Skandapurāṇa Adhyāya 112: R and A recensions, sub-chapter 2

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SPra112.2.0010: sanatkumāra uvāca|
SPra112.2.0011: tāṃ tathā patiśokena cintayantīṃ suduḥkhitām|
SPra112.2.0012: agnikanyā mahāsattvā mālinī tāmuvāca ha|| 1||
SPra112.2.0020: mālinyuvāca|
SPra112.2.0021: mā śoke mana ādhatsva himavattanaye 'vyaye|
SPra112.2.0022: āgamiṣyati te bhartā nacirādeva yajñahā|| 2||
SPra112.2.0031: so 'pi nūnaṃ mahāsattvo virahāttava śobhane|
SPra112.2.0032: bhūyastareṇa śokena bādhyate nātra saṃśayaḥ|
SPra112.2.0033: na hi te sa priyo devi dhṛtiṃ labhati karhicit|| 3||
SPra112.2.0040: prabhāvatyuvāca|
SPra112.2.0041: yatheha mālinī tvāha evameva na saṃśayaḥ|
SPra112.2.0042: mā tvaṃ śoke na ādhatsva sakhya etāḥ sumadhyame|| 4||
SPra112.2.0051: etā hi tava duḥkhena dviguṇaṃ duḥkhitāḥ śubhe|
SPra112.2.0052: lokāśca duḥkhitā vyaktaṃ tava śokena suprabhe|| 5||
SPra112.2.0061: tvaṃ hi dhārayase lokāṃstvayā dattaṃ --  prabho|
SPra112.2.0062: duḥkhena duḥkhitānmā tvaṃ duḥkhena samayojaya|| 6||
SPra112.2.0070: devyuvāca|
SPra112.2.0071: ayaṃ bhṛṅgiriṭirnandī īśvarasya sadā priyaḥ|
SPra112.2.0072: enaṃ dṛṣṭvā hi śokeṣu mā sīdadhvaṃ mayā punaḥ|| 7||
SPra112.2.0080: sanatkumāra uvāca|
SPra112.2.0081: tato bhṛṅgiriṭirnandī niścakrāma pratāpavān|
SPra112.2.0082: tasmādgṛhānmahāsattvaḥ pura evābhavatsthitaḥ|
SPra112.2.0083: gamyamānābhicakrāma sakhībhiḥ sā sukhāvahā|| 8||
SPra112.2.0090: mālinyuvāca|
SPra112.2.0091: eṣa vṛkṣo bahuphalo 'ṇḍajaiśca bahubhirvṛtaḥ|
SPra112.2.0092: paśyainaṃ gaṇapairdivyairyathā rudraṃ samāvṛtam|| 9||
SPra112.2.0101: ayaṃ supuṣpaḥ surasiddhacāraṇairniṣevito devapatiryathābhavat|
SPra112.2.0102: tathā khagairmandarasānugocarairniṣevyate devi ca saukhyadaḥ sadā|| 10||
SPra112.2.0111: ayaṃ tathānyaḥ surasiddhavanditaḥ supuṣpitaḥ stūyati māgadhairiva|
SPra112.2.0112: khagaiḥ khagībhiśca trilokavandito yathāmareśo munibhiḥ purandaraḥ|| 11||
SPra112.2.0121: ayaṃ ca samyaksunavendutoṣito yathaiva kāmī vadanaiḥ svayoṣitām|
SPra112.2.0122: Dagnotes yayau†s tathānyaḥ khagasattamaḥ śubhe papau tarūṇāṃ kusumāsavaṃ śubham|| 12||
SPra112.2.0131: imaṃ ca cārūjjvalacitralakṣaṇaṃ khagaṃ pravartantamume nirīkṣaya|
SPra112.2.0132: khagīsahāyaṃ rucirābjalocanaṃ yathaiva rudraṃ sahitaṃ tvayā ume|| 13||
SPra112.2.0141: imaṃ ca mattaṃ kusumāvṛtaṃ sakhi khageśvaraṃ bhūtapatiṃ niśāmaya|
SPra112.2.0142: pureva somāsavamattacetasā maruttayajñe patitaṃ purandaram|| 14||
SPra112.2.0151: imaṃ sudhāśaṅkhatuṣārapāṇḍare taḍāgatīre śikhinaṃ niśāmaya|
SPra112.2.0152: vitatya pakṣāvaniśaṃ vyavasthitaṃ yathaiva yuddhe turageṇa sādinam|| 15||
SPra112.2.0161: imaṃ tathānyaṃ vanamadhyagaṃ śubhaṃ dyutiprabhāsaṃ viṭapaiḥ samanvitam|
SPra112.2.0162: ume prapaśyeha yathāmbudātyaye surendrapūjādhvajamekamucchritam|| 16||
SPra112.2.0171: idaṃ Dagnotes pureve†s patigītabhāṣitaṃ sahaiva patnyā vibhayaṃ śubhānane|
SPra112.2.0172: yathaiva rudraḥ sahitastvayānaghe  - - - - - - - -----|| 17||
SPra112.2.0181: iyaṃ ca vallī bahupuṣpaśobhitā aveṣṭayatpādapamenamantataḥ|
SPra112.2.0182: yathaiva mattā suratābhikāṅkṣiṇī samaṇḍanā kāminamanyakāminī|| 18||
SPra112.2.0191: ayaṃ ca vṛkṣo himavatsute 'vyaye śarīrajātena tathā prabādhyate|
SPra112.2.0192: yathaiva devaḥ suranāthapūjito maheśvarastvanmadanena suvrate|| 19||
SPra112.2.0200: sanatkumāra uvāca|
SPra112.2.0201: etacchrutvā tu sā devī prahasya himavatsutā|
SPra112.2.0202: utpalena samāhatya idaṃ vacanamabravīt|| 20||
SPra112.2.0211: duḥkhitāmapi māmadya marmasvevāhvayaḥ priye|
SPra112.2.0212: na nāma sa tu śoko 'sti gaccha tvaṃ nāsmi te 'vyathā || 21||
SPra112.2.0221: tāṃ tathāvādinīṃ sakhya ūcuḥ sarvāḥ sumadhyamāḥ|
SPra112.2.0222: tava hāsyārthametadvai mālinyā samudāhṛtam|| 22||
SPra112.2.0231: jitātmā anayā sarvā hāsyabhāvena śobhane|
SPra112.2.0232: hāsyaṃ tavotpādayantyā sādhu mālini sādhuṣu|| 23||
SPra112.2.0240: sanatkumāra uvāca|
SPra112.2.0241: tatastāḥ pādacāreṇa hasantyaḥ kālinandana|
SPra112.2.0242: anyadeśamanuprāptāḥ saha śailādināvyayāḥ|| 24||
SPra112.2.0251: tāḥ svarṇalekhā iva śāṇayuktā yathaiva saudāminayaḥ prakāśāḥ|
SPra112.2.0252: vanaṃ samāsādya viśokaśalyaṃ vibhānti megheṣu-r-atiprabhāvāḥ|| 25||
SPra112.2.9999: iti skandapurāṇe dvādaśottaraśate 'dhyāye devīśokaparihāraḥ|| 112-2||