Skandapurāṇa Adhyāya 112: S recension

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1120010: devyuvāca|
SP1120011: devyaḥ śṛṇuta bhūyo 'pi yathā dānaṃ vinā śubhāḥ|
SP1120012: ayamevopavāsena yathā dharmo 'pi labhyate|| 1||
SP1120021: ekabhaktena yo devyo māsaṃ mārgaśiraṃ kṣapet|
SP1120022: sa tena karmaṇā devyo gomānbhavati nityaśaḥ|| 2||
SP1120031: pauṣamāsena putrāṃśca bahūnāpnoti dhārmikān|
SP1120032: māghamāse ca kurvāṇaḥ striyaḥ prāpnoti vai priyāḥ|| 3||
SP1120041: ekabhaktaṃ tu kurvāṇaḥ phālgune māsi nityaśaḥ|
SP1120042: strīṣu saubhāgyamāpnoti striyaśca paramapriyāḥ|| 4||
SP1120051: yaḥ kṣapedekabhaktena caitramāsaṃ narottamaḥ|
SP1120052: dhanadhānyasamṛddhe sa kule jāyeta rūpavān|| 5||
SP1120061: vaiśākhaṃ yaḥ kṣapenmāsamekabhaktena mānavaḥ|
SP1120062: yāti sa śreṣṭhatāṃ loke pūjito dhanavānapi|| 6||
SP1120071: jyeṣṭhamūlaṃ tu yo māsamekabhaktaṃ samācaret|
SP1120072: bhrātṝṇāṃ bhavati jyeṣṭho bhogaṃ prāpnoti puṣkalam|| 7||
SP1120081: āṣāḍhaṃ cāpi yo māsamekabhaktaṃ samācaret|
SP1120082: sa rājño 'mātyatāṃ prāpya kāmānāpnoti puṣkalān|| 8||
SP1120091: śrāvaṇe cāpi yo māse tathā caivācarennaraḥ|
SP1120092: senāpatyaṃ sa saṃprāpya balavānabhijāyate|| 9||
SP1120101: yastu bhādrapade māsa-m-ekabhaktaṃ samācaret|
SP1120102: sa tena karmaṇā devyo dhanavānabhijāyate|| 10||
SP1120111: yo 'pi cāśvayujaṃ māsamekabhaktena tiṣṭhati|
SP1120112: vāṇijyaṃ phalate tasya kṛṣiḥ paśugaṇāstathā|| 11||
SP1120121: kārttikaṃ tvapi yo māsamekabhaktena tiṣṭhati|
SP1120122: so 'śvamedhaphalaṃ prāpya vahniloke mahīyate|| 12||
SP1120131: yaḥ kṣapedekabhaktena yāvajjīvaṃ narottamaḥ|
SP1120132: vimānenārkavarṇena  sa gacchecchakralokatām|| 13||
SP1120141: saṃvatsaraṃ tu yaḥ pūrṇamekabhaktena tiṣṭhati|
SP1120142: sa pārthivasamo bhūtvā mahīṃ pāti mahendravat|| 14||
SP1120151: ahorātraṃ tu yo devyaḥ kuryādekaṃ narottamaḥ|
SP1120152: daśānāṃ sa suvarṇānāṃ phalaṃ prāpnoti śobhitam|| 15||
SP1120161: māse māse tvahorātraṃ yaḥ karoti narottamaḥ|
SP1120162: sa tena karmaṇā śuddho vidvānbhavati dhārmikaḥ|| 16||
SP1120171: caturdaśīmaṣṭamīṃ ca ubhayoḥ pakṣayorapi|
SP1120172: ahorātraṃ kṣapedyastu saṃvatsaramaśeṣataḥ|| 17||
SP1120181: sa tena karmaṇā yuktaḥ sarvapāpavivarjitaḥ|
SP1120182: na yāti narakaṃ devyo yamaṃ ca na sa paśyati|| 18||
SP1120191: māse māse ca yaḥ kuryāttrirātrakṣapaṇaṃ budhaḥ|
SP1120192: kauberaṃ lokamāsādya sa vindetparamaṃ sukham|| 19||
SP1120201: caturthe 'hani yo bhuṅkte prayatātmā śucirnaraḥ|
SP1120202: gāndharvaṃ sa padaṃ prāpya modate śakravaddivi|| 20||
SP1120211: pañcame 'hani yo bhuṅkte pratimāsamatandritaḥ|
SP1120212: vāyulokaṃ samāsādya svargalokaṃ sa gacchati|| 21||
SP1120221: yo bhuṅkte divase ṣaṣṭhe nityaṃ niyamamāsthitaḥ|
SP1120222: vāruṇaṃ lokamāsādya so 'pi vindenmahatpadam|| 22||
SP1120231: saptame 'hani yo bhuṅkte jitadvandvo dṛḍhavrataḥ|
SP1120232: ādityalokamāsādya so 'pi vindenmahatpadam|| 23||
SP1120241: aṣṭame caiva yo bhuṅkte divase mānavaḥ śuciḥ|
SP1120242: vaiṣṇavaṃ lokamāsādya sa bhavetparamadyutiḥ|| 24||
SP1120251: navame 'hani yo bhuṅkte naro niyamamāsthitaḥ|
SP1120252: sa vasūnāṃ priyo bhūtvā carate vasubhiḥ saha|| 25||
SP1120261: daśame 'hani bhuktvā tu daśāhasya phalaṃ labhet|
SP1120262: aśvibhyāṃ ca samo bhūtvā sūryavajjvalate sadā|| 26||
SP1120271: mānuṣyaṃ ca punaḥ prāpya daśa bhāryā labheta saḥ|
SP1120272: suvarṇamakṣayaṃ caiva na cākāle mriyeta saḥ|| 27||
SP1120281: ekādaśe tu yo bhuṅkte divase mānavaḥ śuciḥ|
SP1120282: ekādaśyāḥ phalaṃ prāpya sa rudragaṇatāṃ labhet|| 28||
SP1120291: sthitvā tatra śatānyaṣṭāvatisaukhyasamanvitaḥ|
SP1120292: brāhmaṇatvamanuprāpya yajvā sa iha jāyate|| 29||
SP1120301: dvādaśe divase yastu devyo bhuṅkte sadā naraḥ|
SP1120302: dvādaśāhaṃ sa saṃprāpya śakralokamavāpnuyāt|| 30||
SP1120311: tatroṣya sa sukhaṃ bhūya iha jāto narottamaḥ|
SP1120312: rājā vā rājamātro vā dhanī vā sumahānbhavet|| 31||
SP1120321: trayodaśe tu yo nityamaśnāti divase naraḥ|
SP1120322: viśetsa bhārgavaṃ sthānaṃ prāpya divyasukhānvitaḥ|| 32||
SP1120331: atha cenmānuṣo bhūyaḥ sa naro jāyate śubhaḥ|
SP1120332: dhanadhānyasamākīrṇe jāyate sa kule śubhaḥ|| 33||
SP1120341: caturdaśa tu yo nityaṃ divasāni kṣapennaraḥ|
SP1120342: tauṣitaṃ lokamāsādya bhavedgaṇapatirvaraḥ|| 34||
SP1120351: ardhamāsaṃ kṣapedyastu nityameva hyatandritaḥ|
SP1120352: devarājena tulyo 'sau bhūtvā svarge 'vatiṣṭhati|
SP1120353: iha rājā mahānbhūmau bhūya evābhijāyate|| 35||
SP1120361: yastu māsaṃ kṣapeddhīro jitakrodho jitendriyaḥ|
SP1120362: vimānena sa divyena apsarobhiḥ samāvṛtaḥ|| 36||
SP1120371: pūjyamāno yathā devaḥ stūyamānaśca sarvaśaḥ|
SP1120372: jvalanādityasaṃkāśo nityaṃ sukhamupāśnute|
SP1120373: sarvalokeṣu vasate bahūnyabdāyutāni tu|| 37||
SP1120381: tato brahmasadaṃ prāpya brahmaṇā sa supūjitaḥ|
SP1120382: brahmaloke nivasate yathā brahmā narottamaḥ|| 38||
SP1120391: atha cetpunarāyāti brāhmaṇo bhavatīśvaraḥ|
SP1120392: yogaṃ ca tatra labhate yenaiśvaryaṃ samaśnute|
SP1120393: yogīśaḥ sa tato bhūtvā śambhorgaṇapatirbhavet|| 39||
SP1120401: sarveṣāṃ copavāsānāṃ vidhiṃ paramapuṇyadam|
SP1120402: devyaḥ śṛṇudhvaṃ matto 'nyaṃ yathāvadanupūrvaśaḥ|| 40||
SP1120411: snātaḥ śucirathācānto hutāgniḥ susamāhitaḥ|
SP1120412: dīkṣayitvā tato 'tmānamupavāsaṃ caredbudhaḥ|| 41||
SP1120421: snāyettriṣavaṇaṃ caiva juhuyādagnimeva ca|
SP1120422: vāgyato 'krodhano dānto dhārmikaḥ satyavāgghṛṇī|| 42||
SP1120431: japansa caiva gāyatrīṃ pavitrāṇi ca nityaśaḥ|
SP1120432: rudrānatha gaṇānvāpi rātrau ca sthaṇḍileśayaḥ|
SP1120433: kuśānāstīrya vidhivatstrīśūdraiḥ parivarjitaḥ|| 43||
SP1120441: samaśnīyāttato devyo vītaśoko vimatsaraḥ|
SP1120442: yāvantyahāni tiṣṭheta tāvadviprāṃstu bhojayet|| 44||
SP1120451: tataḥ pūrṇe tu kāle vai brāhmaṇānāṃ śataṃ varam|
SP1120452: sahasramathavā śaktyā pūjayitvā tu sarvaśaḥ|| 45||
SP1120461: haviṣyaṃ bhojanaṃ dattvā gāvo vāsāṃsi ca kramāt|
SP1120462: suvarṇaṃ tilapātraṃ ca ekaikasya pradāpayet|
SP1120463: tatastatphalamāpnoti yadanyairdurlabhaṃ vrataiḥ|| 46||
SP1120471: vṛṣabhaṃ yastu nīlāṅgamutsṛjeta narottamaḥ|
SP1120472: anyaṃ vāpi mahābhāgāḥ sa pitṝṃstārayennaraḥ|| 47||
SP1120481: yāvanti tasya romāṇi vṛṣabhasya mahātmanaḥ|
SP1120482: tāvantyeva sahasrāṇi varṣāṇāṃ divi modate|| 48||
SP1120491: tilapātrāṇi yo dadyādviprebhyaḥ śuddhamānasaḥ|
SP1120492: amāvāsyāṃ samāsādya kṛṣṇānāṃ susamāhitaḥ|| 49||
SP1120501: sa pitṝṃstarpayitvā tu akṣayaṃ narapuṃgavaḥ|
SP1120502: pitṛlokaṃ samāpnoti ciraṃ ca sukhamaśnute|| 50||
SP1120511: upavāsavidhistveṣa kathito me suśobhanāḥ|
SP1120512: cāndrāyaṇavidhiṃ bhūyaḥ śṛṇudhvaṃ susamāhitāḥ|| 51||
SP1120521: yastu cāndrāyaṇaṃ kuryādyathoktaṃ susamāhitaḥ|
SP1120522: sa somalokamāsādya somena samatāṃ vrajet|| 52||
SP1120531: prājāpatyaṃ tu yaḥ kuryādekaśo bahuśo 'pi vā|
SP1120532: prajāpatisamo bhūtvā tasya loke mahīyate|| 53||
SP1120541: yastu sāṃtapanaṃ kṛcchraṃ karoti narasattamaḥ|
SP1120542: ātmānamuddharetkṛcchrātso 'gnilokaṃ ca gacchati|| 54||
SP1120551: mahāsāṃtapanaṃ yaśca karoti sumahāmanāḥ|
SP1120552: sarvajñatāmavāpnoti brahmalokaṃ ca vindati|| 55||
SP1120561: tulāpuruṣakaṃ yaśca kurute dvijasattamaḥ|
SP1120562: sa muktaḥ sarvapāpaistu gaccheta divi-m-ūrjitaḥ|| 56||
SP1120571: atikṛcchreṇa tu naraḥ śarvasya bhavanaṃ vrajet|
SP1120572: kṛcchrātikṛcchreṇa tathā gāṇāpatyamavāpnuyāt|| 57||
SP1120581: yastu sarvāṇi kṛcchrāṇi kurute narasattamaḥ|
SP1120582: sa yaṃ prārthayate kāmaṃ tameva samupāśnute|| 58||
SP1120591: yasya kasyacideveha kṛcchrasya susamāhitaḥ|
SP1120592: sa tena siddho bhavati devatvaṃ cāpi vindati|| 59||
SP1120601: payobhakṣastu yo nityaṃ naraḥ saṃvatsaraṃ vaset|
SP1120602: yāvakaṃ copayuñjāno gomūtreṇābhisaṃskṛtam|| 60||
SP1120611: piṇyākaphalabhakṣo vā akṣāralavaṇo 'pi vā|
SP1120612: so 'śvamedhaphalaṃ prāpya brahmalokaṃ samaśnute|| 61||
SP1120621: sarvapāpavinirmukto vimuktaḥ sarvabandhanaiḥ|
SP1120622: vimānenārkavarṇena brahmavaccarate ca saḥ|| 62||
SP1120631: yastvetānyeva sarvāṇi vyastāni narasattamaḥ|
SP1120632: yāvaducchvāsamāsevenmahātmā naṣṭakilbiṣaḥ|| 63||
SP1120641: sa lokānvā mahāsattvo yatheṣṭānmokṣameva vā|
SP1120642: aiśvaryaṃ vā mahatprāpya dīpyamāno 'vatiṣṭhate|| 64||
SP1120651: etānyeva ca sarvāṇi dānāni ca tapāṃsi ca|
SP1120652: vinā mantreṇa satataṃ śūdrāṇāmapi sarvaśaḥ|| 65||
SP1120661: vidhīyante na saṃdeha evamāha prajāpatiḥ|
SP1120662: amantrāste smṛtāḥ sarve śūdrā vigatakalmaṣāḥ|| 66||
SP1120671: strīṇāṃ tu daivataṃ bhartā na tato 'nyadvidhīyate|
SP1120672: sa gatiḥ paramaṃ dhāma sa dharmaḥ paramaḥ smṛtaḥ|| 67||
SP1120681: tena yā tvabhyanujñātā idaṃ dharmaṃ samācaret|
SP1120682: sā phalaṃ tasya dharmasya prāpnoti susamāhitā|| 68||
SP1120691: yā tu tenānanujñātā dharmaṃ kuryācchucismitāḥ|
SP1120692: na tatphalaṃ sā labhate labhate cāsatīphalam|| 69||
SP1120701: yā tu bhartrābhyanujñātā kṛtvā dharmaṃ supuṣkalam|
SP1120702: dadyāttu pataye nārī tasyānantaṃ hi tatphalam|| 70||
SP1120711: yacca prārthayate kiṃcidiha loke paratra vā|
SP1120712: tatsarvaṃ prāpnute devyaḥ subhagā cābhijāyate|| 71||
SP1120721: vaśyaścāsyā bhavedbhartā priyā tasya ca sā tadā|
SP1120722: putraprajā ca bhavati na ca duḥkhaṃ samaśnute|
SP1120723: eṣa dharmo mayākhyāto yuṣmākaṃ lokamātaraḥ|| 72||
SP1120730: sanatkumāra uvāca|
SP1120731: tatastāḥ sahitāḥ sarvā devyo lokasya mātaraḥ|
SP1120732: pūjayitvā mahādevīmūcuḥ saṃhṛṣṭacetasaḥ|| 73||
SP1120741: aho dharmastvayākhyātaḥ sarvāmaranamaskṛte|
SP1120742: yasya saṃsevanātkṣipraṃ prāpyate sumahatphalam|| 74||
SP1120751: ito vīkṣāmahe devi girerasya vanaṃ śubham|
SP1120752: puṣpajātisamākīrṇaṃ bahupakṣigaṇāvṛtam|| 75||
SP1120761: tata utthāya sā devī sahitā devamātṛbhiḥ|
SP1120762: mandarasya girerdivyaṃ draṣṭuṃ tadvanamuttamam|
SP1120763: vicacāra mahāyogā cakṣurdehasukhāvaham|| 76||
SP1120771: mānaḥśilāni śṛṅgāṇi sauvarṇāni ca vīkṣatī|
SP1120772: ramyāṇi sitatoyāni gireḥ prasravaṇāni ca|| 77||
SP1120781: sarāṃsyutpalapūrṇāni vāpīśca sumanoharāḥ|
SP1120782: tutoṣa girijā dṛṣṭvā pārśvasaṃsthaṃ ca nandinam|| 78||
SP1120791: tataḥ sā devadevī tu vicarantī mahāgirim|
SP1120792: apaśyadbālasūryābhaṃ bālāśokaṃ supuṣpitam|
SP1120793: ātāmrapallavaśataiḥ kṛtvāñjalimavasthitam|| 79||
SP1120801: taṃ dṛṣṭvā girijā devī parāṃ prītimagānmune|
SP1120802: eṣa me tanayaḥ ślāghyo bhavitā nandivardhanaḥ|| 80||
SP1120811: bhagavatyāgate hyenamanujñātā svayambhuvā|
SP1120812: grahīṣyāmi priyaṃ putraṃ bālāśokaṃ supādapam|| 81||
SP1120821: athāsminnantare tatra utpāto 'tīva bhīṣaṇaḥ|
SP1120822: vāyuvego mahānāsīdgirivṛkṣanipātanaḥ|| 82||
SP1120831: andhako 'pi tadā daityaḥ pātālānmandaraṃ yayau|
SP1120832: prahlādapramukhairdaityairdānavaiśca sahasraśaḥ|
SP1120833: vṛtaḥ śrīmānmahādaityaḥ śakro devagaṇairiva|| 83||
SP1120841: so 'ndhakaḥ sumahāvīryaḥ sakhībhiḥ sahitāṃ tadā|
SP1120842: apaśyaddevadevīṃ tu vṛkaḥ siṃhavadhūmiva|| 84||
SP1120851: dṛṣṭvā bhagavatīṃ devīṃ sa daityo mūḍhacetanaḥ|
SP1120852: praṇāmaṃ nākarodvyāsa anvavekṣata kevalam|| 85||
SP1120861: taṃ dṛṣṭvānimiṣaṃ daityaṃ paśyantamacalātmajām|
SP1120862: prahlādastu mahābuddhiridamāha vaco 'rthavat|| 86||
SP1120871: jagato jananī hyeṣā himavadduhitāvyayā|
SP1120872: umeti jagati khyātā tapoyogabalānvitā|| 87||
SP1120881: yasya putro 'bhavadbrahmā sarvalokapitāmahaḥ|
SP1120882: asmākaṃ devatānāṃ ca yo dadāti varāñchubhān|| 88||
SP1120891: yaḥ sthitaḥ sarvamāviśya bhūtagrāmamaśeṣataḥ|
SP1120892: yasyātmanā sarvamidaṃ dhāryate jagadavyayam|| 89||
SP1120901: patnīyaṃ tasya devasya parameśasya dhīmataḥ|
SP1120902: śaktā hīyaṃ jagatsarvaṃ kṣaṇena ditijādhipa|| 90||
SP1120911: dagdhuṃ vāpyathavā hartuṃ kṣeptuṃ naraka eva vā|
SP1120912: kathamasyāḥ praṇāmaṃ tvaṃ nākarordaitya mohita|| 91||
SP1120920: sanatkumāra uvāca|
SP1120921: athaivaṃ bruvatastasya dharmayuktaṃ suradviṣaḥ|
SP1120922: devībhiḥ sahitā devī kṣaṇenāntarhitā mune|| 92||
SP1120931: atha te daityapāḥ sarve vicaranto mahāgirau|
SP1120932: bahunirjharasaṃkīrṇe nānāpādapasaṃkule|| 93||
SP1120941: tatra te vicarantastu ekasminnirjhare sthitān|
SP1120942: apaśyansaptarṣīnsiddhānyogayuktānmahāmunīn|| 94||
SP1120951: tāndṛṣṭvā so 'ndhako 'pṛcchatprahlādamasurottamam|
SP1120952: ka ime ṛṣayo hyatra kimarthaṃ ceha saṃgatāḥ|| 95||
SP1120960: prahlāda uvāca|
SP1120961: ete 'ndhaka mahātmāno ṛṣayaḥ sapta saṃgatāḥ|
SP1120962: bhṛguratrirmarīciśca viśvāmitro 'ṅgirāstathā|| 96||
SP1120971: bharadvājo vasiṣṭhaśca yogasiddhāstapodhanāḥ|
SP1120972: naiṣāṃ niṣkāraṇaṃ manye mandarāgamanaṃ prabho|| 97||
SP1120981: ito vayamihaikānte sthitvā sarve 'sureśvarāḥ|
SP1120982: mataṃ gṛhṇīma sarveṣāṃ tūṣṇīṃ tiṣṭhata daityapāḥ|| 98||
SP1120991: tatasteṣu sthiteṣvevamasureṣu durātmasu|
SP1120992: ṛṣayaste tapoyuktā vākyamūcuḥ parasparam|| 99||
SP1121001: na śuddho 'yaṃ girerdeśo gacchāmo 'nyatra vai dvijāḥ|
SP1121002: ihāgamo hi daityānāṃ dṛśyate sudurātmanām|| 100||
SP1121011: gatāste nidhanaṃ sarve dharmaṃ ye nāśayantyuta|
SP1121012: rājyārthaṃ yadi taiḥ krūrairna dharmo nāśito bhavet|
SP1121013: naiva te nidhanaṃ sarve prāptāḥ syuramaradviṣaḥ|| 101||
SP1121021: svarājyaparisaṃtuṣṭā bhaveyuryadi saṃsthitāḥ|
SP1121022: te 'pi sarveṣu lokeṣu babhuḥ pūjyāḥ surā iva|| 102||
SP1121031: asurānprati sarveṣāmevaṃ kathayatāṃ tadā|
SP1121032: āgāddhātā vidhātā ca kṛtāntaśca mahābalaḥ|| 103||
SP1121041: tāṃste saṃpūjya vidhivatparasparamanuvratāḥ|
SP1121042: ūcuḥ kvedaṃ bhavanto 'dya prasthitā lokadhāriṇaḥ|| 104||
SP1121050: vidhātovāca|
SP1121051: brahmalokādupāvṛttā vayamadya gatā dvijāḥ|
SP1121052: brahmaṇā sma samājñāptāḥ kaśyapasya tato 'ntikam|| 105||
SP1121061: athābravīnmuniṃ dhātā kaśyapaṃ taṃ prajāpatim|
SP1121062: yattvayā jñāpito brahmanbrahmā lokapitāmahaḥ|| 106||
SP1121071: asurā api me putrā devāścāpi priyāḥ prabho|
SP1121072: teṣāṃ naiva yathānyonyaṃ vairaṃ syāllokabhāvana|
SP1121073: tathā kuru suraśreṣṭha bhaveyaṃ nirvṛtastataḥ|| 107||
SP1121081: tatrāhaṃ brahmaṇājñāpto bravīmi tvāṃ mahāmune|
SP1121082: devāsuraṃ yathāvṛttamanyonyaṃ sakhyameva ca|
SP1121083: amṛtotpādanaṃ caiva rājyasaṃsthāṃ ca kṛtsnaśaḥ|| 108||
SP1121091: tasyaivaṃ pṛcchataḥ sarvaṃ bhaviṣyamṛṣisattamaḥ|
SP1121092: kathayāmāsa bhūtārthaṃ devāsuraviceṣṭitam|| 109||
SP1121101: nivedya tasya tatsarvaṃ brahmaṇā preṣitā vayam|
SP1121102: ihāgatā bhagavatīṃ draṣṭuṃ himagireḥ sutām|| 110||
SP1121110: sanatkumāra uvāca|
SP1121111: tānevaṃvādino bhūyo ṛṣayaste tapodhanāḥ|
SP1121112: papracchurniyatātmānaḥ sarva eva tadā mune|| 111||
SP1121121: devāsurāṇāṃ yadvṛttaṃ bhaviṣyaṃ kathitaṃ śubhāḥ|
SP1121122: tadvayaṃ śrotumicchāmo yadi vo 'nugrahe matiḥ|| 112||
SP1121131: kiṃ ca vijñāpitā devī yuṣmābhiḥ surasattamāḥ|
SP1121132: kathayadhvaṃ ca tatsarvaṃ yadyanugrāhyatā hi naḥ|| 113||
SP1121141: teṣāṃ tadvacanaṃ śrutvā trayaste devasattamāḥ|
SP1121142: tvamācakṣva kṛtānteti vākyamūcurmahābalāḥ|| 114||
SP1121151: tataḥ sa teṣāṃ bahucitrakāraṇaṃ yathābhaviṣyaṃ kathayāṃcakāra|
SP1121152: surāsurāṇāṃ jayatāṃ ca kāraṇaṃ purā vidhātrā vihitaṃ yathārthavat|| 115||
SP1129999: iti skandapurāṇe dvādaśottaraśato 'dhyāyaḥ||