Skandapurāṇa Adhyāya 111

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1110010: vyāsa uvāca|
SP1110011: gate divaṃ mahādeve vratamādeṣṭumuttamam|
SP1110012: ekākinī mahādevī kiṃ cakre tadanantaram|| 1||
SP1110020: sanatkumāra uvāca|
SP1110021: gate tasminmahādeve devīṃ girivarātmajām|
SP1110022: upatasthurmahābhāgā devyo lokasya mātaraḥ|| 2||
SP1110031: bharatasya sutāgnestu mālinītyabhiviśrutā|
SP1110032: śubhāvatī ca devasya parjanyasya sutāvyayā|| 3||
SP1110041: sāvitrī vedamātā ca gāyatrī durgayā saha|
SP1110042: śrīḥ kīrtiścaiva lakṣmī ca dhṛtiḥ prajñā tathaiva ca|| 4||
SP1110051: khyātirditirdanuścaiva aditiḥ siṃhikā khaśā|
SP1110052: rākā kuhū sinīvālī tathaivānumatī śubhā|| 5||
SP1110061: gaṅgā sarasvatī caiva tathānyāḥ saritaḥ śubhāḥ|
SP1110062: ṛṣīṇāṃ patnayo yāśca devānāṃ yakṣarakṣasām|
SP1110063: uragāṇāṃ khagānāṃ ca gandharvāṇāṃ tathaiva ca|| 6||
SP1110071: etāḥ sarvāstathāgamya namaskṛtvā ca pārvatīm|
SP1110072: papracchuḥ sarvadharmajñāṃ dharmaṃ dharmārthasaṃśritāḥ|| 7||
SP1110081: kena dharmeṇa deveśe tapasā vā śubhānane|
SP1110082: sumahatprāpyate puṇyaṃ kiṃ cākṣayyaṃ prakīrtitam|| 8||
SP1110090: devyuvāca|
SP1110091: yuṣmākaṃ tu hitārthāya lokānāṃ caiva suvratāḥ|
SP1110092: kathayiṣyāmyahaṃ dharmaṃ yathāvadanupūrvaśaḥ|| 9||
SP1110101: annadānātparaṃ dānaṃ naiva kiṃciddhi vidyate|
SP1110102: annādbhavanti bhūtāni tasmāttadadhikaṃ smṛtam|| 10||
SP1110111: annaṃ yastu susaṃskṛtya prayaccheta dvijātaye|
SP1110112: sa sarvakāmānāpnoti pūjyate ca tripiṣṭape|| 11||
SP1110121: mayūrahaṃsayuktaṃ ca sarvakāmasamṛddhimat|
SP1110122: vimānaṃ sūryasaṃkāśamannado labhate śubham|| 12||
SP1110131: yadi mānuṣyamāyāti kadācitsa narottamaḥ|
SP1110132: dhanadhānyasamākīrṇe kule jāyati rūpavān|| 13||
SP1110141: yathāśakti tu yo dadyāddivase divase naraḥ|
SP1110142: sa tena karmaṇāpnoti prajāpatisalokatām|| 14||
SP1110151: kadācidapi yo dadyādannaṃ viprāya saṃskṛtam|
SP1110152: tasyāpi tacchataguṇaṃ sahasraguṇameva ca|
SP1110153: upatiṣṭhati lokeṣu ihāpi ca sukhī bhavet|| 15||
SP1110161: avadhūtamavajñātamasatkṛtamathāpi ca|
SP1110162: annaṃ pradadyādyo devi yādṛśaṃ tādṛśaṃ śubhe|| 16||
SP1110171: tasyāpi narake ghore yātyamānasya rākṣasaiḥ|
SP1110172: upatiṣṭheta badhudhā tṛptiryenāsya jāyate|| 17||
SP1110181: yadi mānuṣyamāyāti kadācitsa naraḥ punaḥ|
SP1110182: mleccheṣu bhogī bhavati ramate ca yathāmaraḥ|| 18||
SP1110191: annamevaṃ viśiṣṭaṃ hi na tasmātparamaṃ bhuvi|
SP1110192: annaṃ prajāpatiḥ proktaṃ sa ca saṃvatsaro mataḥ|
SP1110193: saṃvatsaraśca yajño 'sau yajñe sarvaṃ pratiṣṭhitam|| 19||
SP1110201: tasmādbhavanti bhūtāni sthāvarāṇi carāṇi ca|
SP1110202: tasmādannaṃ viśiṣṭaṃ tu sarvebhya iti vai śrutiḥ|| 20||
SP1110211: annadānātparaṃ dānaṃ naiva kiṃciddhi vidyate|
SP1110212: annādbhavanti bhūtāni tasmāttadvai praśasyate|| 21||
SP1110221: sugandhāḥ śītalāścāpo rasairdivyaiḥ samanvitāḥ|
SP1110222: yaḥ prayacchati viprebhyastasya dānaphalaṃ śṛṇu|| 22||
SP1110231: vimānaṃ sūryasaṃkāśamapsarogaṇanāditam|
SP1110232: so 'dhiruhya divaṃ yāti varuṇasya salokatām|| 23||
SP1110241: tatrāsāvayutānyaṣṭāvuṣitvā devavatsukhī|
SP1110242: kule mahatyasaṃkīrṇe jāyate dhanadhānyavān|| 24||
SP1110251: apāṃ tu pūrṇaṃ yo bhāṇḍaṃ brāhmaṇāya prayacchati|
SP1110252: rasāstasyopatiṣṭhanti pūjyate ca divaṃ gataḥ|| 25||
SP1110261: bhājanāni ca yo dadyātsupūrṇāni śubhānane|
SP1110262: bhājanaṃ syātsa bhogānāṃ tārayecca pitṝnbhayāt|| 26||
SP1110271: taḍāgaṃ yastu kurvīta apāṃ devi samṛddhimat|
SP1110272: gāvaḥ pibanti vai yatra sarve jantava eva ca|| 27||
SP1110281: tārayitvā ca sa pitṝṃstathaiva ca pitāmahān|
SP1110282: prapitāmahāṃśca lokeṣu kāmageṣu vihaṃgamaḥ|
SP1110283: carate devavaddevi varṣāyutaśatāni ṣaṭ|| 28||
SP1110291: punaśca mānuṣe loke sarvarogavivarjitaḥ|
SP1110292: bhogī bhavati bhogānāṃ rājamātraśca jāyate|
SP1110293: dātā yajvā ca balavānsuprabhaḥ priyadarśanaḥ|| 29||
SP1110301: avaṭaṃ yo naraḥ kuryādapāṃ pūrṇaṃ śucismite|
SP1110302: dadyācca brāhmaṇebhyastaṃ bhojayitvā yathārthavat|| 30||
SP1110311: aṣṭābhiḥ suvicitrābhiḥ patākābhiralaṃkṛtam|
SP1110312: dhvajena vaijayantyā ca puṣpaiśca samalaṃkṛtam|| 31||
SP1110321: sa tārayitvā tu pitṝnvimānena narottamaḥ|
SP1110322: yātyapsaropagītena varuṇasya salokatām|| 32||
SP1110331: hiraṇyaṃ hema bhūmiṃ vā tilānratnāni vāpi yaḥ|
SP1110332: pradadyātsarvabhūtebhyastasya puṇyaphalaṃ śṛṇu|| 33||
SP1110341: sa vimānena mahatā sarvalokasamanvitaḥ|
SP1110342: indralokaṃ sa saṃprāpya modate vibudho yathā|| 34||
SP1110351: tataścyutaśca dharmātmā sarvakāmasamṛddhimān|
SP1110352: kule mahati lokeśo jāyate subhagaśca ha|| 35||
SP1110361: yastu vṛkṣaṃ prakurute chāyāpuṣpaphalopagam|
SP1110362: pathi devi naraḥ somye sa tārayati vai pitṝn|| 36||
SP1110371: tathaiva dattvā viprebhyo niṣkrīya ca punarnaraḥ|
SP1110372: sa yatphalamavāpnoti tacchṛṇuṣva mahāprabhe|| 37||
SP1110381: yāvadvṛkṣasya puṣpāṇi upayujyanti dehinaḥ|
SP1110382: phalāni caiva bhakṣyante jantubhiḥ phalitasya tu|| 38||
SP1110391: tāvadvarṣasahasrāṇi tārayitvā pitṝnapi|
SP1110392: somalokaṃ samāsādya sa mṛtaḥ phalamāpnuyāt|| 39||
SP1110401: phalāni yaḥ prayaccheta brāhmaṇebhyaḥ samāhitaḥ|
SP1110402: phalānāṃ sa tu bhāgī syādbahūnāṃ subhagaśca ha|| 40||
SP1110411: kāṣṭhāni yaḥ prayaccheta hemante narasattamaḥ|
SP1110412: brāhmaṇebhyaḥ sadā devi so 'gnilokaṃ samaśnute|| 41||
SP1110421: bhājanaṃ yaḥ prayaccheta haimaṃ ratnavibhūṣitam|
SP1110422: so 'psaraḥśatasaṃkīrṇe vimāne divi modate|| 42||
SP1110431: rājataṃ yaḥ prayaccheta viprebhyo bhājanaṃ śubhe|
SP1110432: sa gāndharvapadaṃ prāpya urvaśyā saha modate|| 43||
SP1110441: tāmraṃ yo bhājanaṃ dadyādbrāhmaṇebhyo viśeṣataḥ|
SP1110442: sa bhavedyakṣarājasya yakṣo balasamanvitaḥ|| 44||
SP1110451: gṛhaṃ yastu prayaccheta sarvakāmasamṛddhimat|
SP1110452: sa lokaṃ brahmaṇaḥ prāpya sarvakāmairniṣevyate|| 45||
SP1110461: varṣakoṭyaḥ sa tatroṣya catasrastena karmaṇā|
SP1110462: gṛhamedhī sadādātā bhogavāṃścaiva jāyate|| 46||
SP1110471: auṣadhīryaḥ prayaccheta dhānyāni vividhāni ca|
SP1110472: sa sarvakāmasamṛddhaṃ somalokaṃ samaśnute|| 47||
SP1110481: tatra varṣasahasrāṇi sapta sthitvā punarnaraḥ|
SP1110482: iha sarvadhanopeto bhogavānabhijāyate|| 48||
SP1110491: yastu kṣetraṃ prayaccheta niṣpannaṃ phalavatpunaḥ|
SP1110492: sa tu kṣetraṃ pumānbhuktvā prājāpatyaṃ samaśnute|| 49||
SP1110501: yastu bhūmiṃ prayaccheta brāhmaṇāya mahātmane|
SP1110502: sarvalokeṣu sa sukhī vimānena suvarcasā|
SP1110503: bahūnyabdasahasrāṇi carate kāmarūpavān|| 50||
SP1110511: yadi mānuṣyamāyāti sa naraḥ kālaparyayāt|
SP1110512: tatra kāmaduhā tasya mahī bhavati sarvaśaḥ|| 51||
SP1110521: yastu vastraṃ prayaccheta brāhmaṇāya mahāyaśāḥ|
SP1110522: sa lokaṃ prāpya vairājaṃ varṣakoṭiṃ sukhaṃ vaset|| 52||
SP1110531: āsanaṃ yaḥ prayaccheta saṃvītaṃ brāhmaṇāya vai|
SP1110532: sa rājyasthānamāpnoti svargaṃ cāpnoti vijvaraḥ|| 53||
SP1110541: yastu śayyāṃ prayaccheta svāstīrṇāṃ narasattamaḥ|
SP1110542: sa tu bhāryāḥ priyā divyā bahvīrbhartā samaśnute|| 54||
SP1110551: yastu kanyāṃ prayaccheta brāhmaṇāya svalaṃkṛtām|
SP1110552: sa gatvā pitṛlokaṃ vai varṣāyutaśataṃ vaset|| 55||
SP1110561: iha cāpi punarjātaḥ sarvakāmasamanvitaḥ|
SP1110562: bhāryāḥ prāpnoti bhaktāśca prajāvāṃścopajāyate|| 56||
SP1110571: aśvaṃ yastu prayaccheta hemacitraṃ sulakṣaṇam|
SP1110572: sa tena karmaṇā devi gāndharvaṃ lokamaśnute|| 57||
SP1110581: rathamaśvaṃ gajaṃ dāsīṃ kanyāṃ gṛhamathāpi ca|
SP1110582: bhūmiṃ ca yaḥ prayaccheta sa rājā bhuvi jāyate|| 58||
SP1110591: vidhinā mantrayuktena tasya dharmaphalaṃ mahat|
SP1110592: sarvakāmaduhā sāsya dhenurbhūtvopatiṣṭhati|| 59||
SP1110601: jaladhenuṃ ca yo dadyāttasya dānaphalaṃ śṛṇu|
SP1110602: prapāṃ sabhāṃ taḍāgaṃ vā kūpaṃ vāpi supuṣkalam|| 60||
SP1110611: kṛtvā kumbhānsusaṃpūrṇāngandhamālyairalaṃkṛtān|
SP1110612: puṣpaiśca vividhākārairabhyarcya dvijasattamān|| 61||
SP1110621: bhakṣyabhojyaiḥ sutṛptānāṃ tilapātrāṇi dāpayet|
SP1110622: dakṣiṇāṃ puṣkalāṃ dadyāttebhyastāṃ sparśayettataḥ|| 62||
SP1110631: āpaḥ śivāśca saumyāśca tarpayantu pitṝnmama|
SP1110632: kāmagāḥ kāmadātāro bhavantviti ca vai vadet|| 63||
SP1110641: evaṃ dattvā tu tāṃ dhenuṃ punaḥ krītvā ca vai tadā|
SP1110642: vāhayettāṃ prapāṃ devi brahmalokasamarpaṇīm|| 64||
SP1110651: tilapātrāṇi dattvā ca tathā vastrayugaṃ navam|
SP1110652: suvarṇasya ca sāṃnidhyaṃ phalāni vividhāni ca|
SP1110653: tato dadyācchuciḥ snāto brāhmaṇebhyo yathāvidhi|| 65||
SP1110661: ghṛtaṃ gāvaḥ prasūyante ghṛtaṃ bhūmyāṃ pratiṣṭhitam|
SP1110662: ghṛtamagniśca devāśca ghṛtaṃ me saṃpradīyatām|
SP1110663: evaṃ vidhānato dattvā brahmalokamavāpnuyāt|| 66||
SP1110671: yo naro gāṃ prayaccheta savatsāṃ kāṃsyadohanīm|
SP1110672: hemaśṛṅgīṃ rūpyakhurāṃ dukūlakṣaumavāsitām|| 67||
SP1110681: śayyāstaraṇasaṃpannāṃ bahupuṣpaphalairyutām|
SP1110682: brāhmaṇāṃstarpayitvā tu gandhamālyairalaṃkṛtām|| 68||
SP1110691: dānakāle tatastasyāḥ surā gātrāṇi saṃśritāḥ|
SP1110692: brahmā tasyāḥ sthito mūrdhni śakro 'pānaṃ samāśritaḥ|| 69||
SP1110701: candrādityau ca netrasthau ghrāṇe vāyuḥ pratiṣṭhitaḥ|
SP1110702: mukhaṃ tasyāḥ śrito vahnirjihvāṃ somaḥ svayaṃ prabhuḥ|| 70||
SP1110711: karṇayostu diśaḥ sarvāḥ śiro rudrāḥ samāśritāḥ|
SP1110712: pādayorlokapālāḥ syuḥ sarve 'sthīni ca parvatāḥ|| 71||
SP1110721: samudrāḥ sapta jaṭhare grīvāyāṃ tapanāḥ śritāḥ|
SP1110722: sāsnāṃ gaṅgā saricchreṣṭhā pārśve tu vasavaḥ śubhāḥ|| 72||
SP1110731: prajāpatirupasthaṃ ca mūtraṃ tīrthāni sarvaśaḥ|
SP1110732: purīṣaṃ śrīrabhūttasyā nāgāścāntrāṇi sarvaśaḥ|
SP1110733: sādhyā viśve 'tha lokāśca pucchamāśritya saṃsthitāḥ|| 73||
SP1110741: mantrā yajñāśca dānāni yamāni ṛṣibhiḥ saha|
SP1110742: nakṣatrāṇi grahāścaiva tārārūpāṇi yāni ca|| 74||
SP1110751: gāyatrī caiva tṛṣṭupca jagatī paṅktireva ca|
SP1110752: anuṣṭubṛgyajuścaiva sāmānyātharvaṇaṃ tathā|| 75||
SP1110761: lokasya mātaraścaiva meghā varṣamathāpi ca|
SP1110762: dharmo nārāyaṇaścaiva bhūtāni saritastathā|
SP1110763: romakūpāṇi saṃśritya tasyā devā vyavasthitāḥ|| 76||
SP1110771: yakṣāśca rākṣasāścaiva piśācāḥ pakṣibhiḥ saha|
SP1110772: yajñāśca dakṣiṇāścaiva tathā cāpsarasaḥ śubhāḥ|| 77||
SP1110781: gandharvāśca mahātmāno ye cānye 'pyevamādayaḥ|
SP1110782: tasyā viṣāṇayorvyāsa sarva eva samāśritāḥ|| 78||
SP1110791: phalāni yajñadānānāṃ gatayaśca pṛthagvidhāḥ|
SP1110792: vatsaṃ samāśritāḥ sarve sarvadevamayaṃ śubham|| 79||
SP1110801: devairadhyāsitāṃ tāṃ tu sarvairhastadvayena tu|
SP1110802: viprebhyo mantravaddhaste pradadyātsusamāhitaḥ|| 80||
SP1110811: kuśānsuvarṇabījāni tilānsiddhārthakāṃstathā|
SP1110812: pradadyāddhastato 'dbhistu mantreṇānena suvrataḥ|| 81||
SP1110821: sarvadevamayīṃ dogdhrīṃ sarvalokamayīṃ tathā|
SP1110822: sarvalokanimittāya sarvadevanamaskṛtām|
SP1110823: prayacchāmi mahāsattvāmakṣayāya śubhāmiti|| 82||
SP1110831: evaṃ sa dattvā tāṃ gāṃ tu yatra yatra prajāyate|
SP1110832: tatra tatra gatā sā taṃ jantuṃ tārayate 'kṣayā|| 83||
SP1110841: tathā kāmaduhā caiva sarvalokapradā tathā|
SP1110842: sarvajñānapradā caiva sarvayajñaphalā tathā|| 84||
SP1110851: sarvāṃl lokāṃstayā gatvā ramate ca yathāmaraḥ|
SP1110852: iha jātaśca tāmeva kāmagāṃ saṃprapadyate|| 85||
SP1110861: sa tayā mānuṣo jāto gosahasrī mahābalaḥ|
SP1110862: rūpavāndhanavāṃścaiva bahuputraśca jāyate|| 86||
SP1110871: prasūyamānāṃ yo gāṃ tu dadyādubhayatomukhīm|
SP1110872: yathoktena vidhānena sa jātismaratāṃ labhet|| 87||
SP1110881: yastu gāṃ saṃprayaccheta brāhmaṇebhyo yathātatham|
SP1110882: tamapyasau bhayādghorāttrāyate narakādapi|| 88||
SP1110891: kṛṣṇājinaṃ tu yo dadyādvratine brahmacāriṇe|
SP1110892: pṛthivīphalamāpnoti yogaścāsya pravartate|| 89||
SP1110901: yogibhyo brahmacāribhyo brāhmaṇebhyo yatātmavān|
SP1110902: yaḥ prayacchedāvasathaṃ so 'śvamedhaphalaṃ labhet|| 90||
SP1110911: āptoryāmaṃ pauṇḍarīkaṃ gosahasraṃ ca vindati|
SP1110912: smṛtiṃ ca paramāṃ labdhvā yogamāpnoti suvrataḥ|| 91||
SP1110921: kamaṇḍaluṃ tu yo dadyādbrāhmaṇāya narottamaḥ|
SP1110922: sa tena karmaṇā devi dharmanityatvamāpnute|| 92||
SP1110931: vyādhitaṃ yastu viprarṣiṃ dīnaṃ mūḍhamacetasam|
SP1110932: uddhareta yathāśaktyā sa mucyedbrahmahatyayā|| 93||
SP1110941: yaḥ suvarṇaṃ prayaccheta daridrāya dvijātaye|
SP1110942: daśānāmaśvamedhānāṃ phalaṃ prāpnoti devatāḥ|| 94||
SP1110951: yaścaivemāni sarvāṇi dānānyuktāni kṛtsnaśaḥ|
SP1110952: dadāti yugapaddevyaḥ pṛthivyāṃ saikarāḍbhavet|| 95||
SP1110961: idaṃ yaḥ śṛṇuyānnityaṃ dadyāccaiva svaśaktitaḥ|
SP1110962: paṭheta ca mahābhāgāḥ so 'pi gacchettripiṣṭapam|| 96||
SP1119999: iti skandapurāṇa ekādaśottaraśato 'dhyāyaḥ||