Skandapurāṇa Adhyāya 110

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1100010: sanatkumāra uvāca|
SP1100011: vinirgamya kumāro 'pi ramyātsvabhavanāttadā|
SP1100012: rarāma gaṇapaiḥ sārdhaṃ krīḍanairbahubhiḥ śubhaiḥ|| 1||
SP1100021: ānayāmāsa taṃ cāpi varāhasya sutaṃ prabhuḥ|
SP1100022: vṛkaṃ vimucya pāśaiśca utsasarja hasanvibhuḥ|| 2||
SP1100031: utsṛṣṭaṃ dhāvamānaṃ ca punarjagrāha vegitam|
SP1100032: punarevotsṛjaccainaṃ jagrāha ca punaḥ punaḥ|
SP1100033: evaṃ rarāma tenāsau varāho 'bhyāgamacca tam|| 3||
SP1100041: śilāṃ gṛhītvā mahatīṃ saṃkruddho 'ntakasaṃnibhaḥ|
SP1100042: cikṣepa kārttikeyāya nādayañjalado yathā|| 4||
SP1100051: tāmāpatantīṃ bahudhā nadantīṃ vihāyasā mṛtyusamānarūpām|
SP1100052: jagrāha vegena mahātivegāṃ kokāmukhaḥ prajvalitāmivolkām|| 5||
SP1100061: tataścakraṃ sahasrāraṃ yugāntāgnisamaprabham|
SP1100062: śilāgrahaṇavyagrāya gaṇāya vyasṛjatprabhuḥ|| 6||
SP1100071: tadantakapratīkāśaṃ cakraṃ sarvasurāriham|
SP1100072: viveśa na gaṇaṃ tūrṇaṃ tatastadvyanivartata|| 7||
SP1100081: tannivṛttaṃ punaścakramakṛtvā kāryamujjvalam|
SP1100082: na jagrāha tadā viṣṇuravamene ca tattadā|| 8||
SP1100091: tattadānarcitaṃ tena cakraṃ dānavaghātinā|
SP1100092: viṣṇunā prayayau kṣipraṃ svameva bhavanaṃ prati|| 9||
SP1100101: tasmiṃścakre tadā yāte bhagavānnandivardhanaḥ|
SP1100102: vṛkṣamutpāṭya vegena kumāramabhijaghnivān|| 10||
SP1100111: agaṇya taṃ prahāraṃ tu bhagavānanalātmajaḥ|
SP1100112: śaktiṃ saṃvartikāṃ krodhāccikṣepa ca nanāda ca|| 11||
SP1100121: sā dahantīva tejāṃsi nadantī bahudhā tadā|
SP1100122: hantuṃ varāhaṃ prayayau śaktirvidyudivāśugā|| 12||
SP1100131: tāmāpatantīṃ vegena bhagavānnandivardhanaḥ|
SP1100132: jaghānāstrairbahuvidhairnādayansiṃharāḍiva|| 13||
SP1100141: tāni sā bhasmasātkṛtvā śaktiḥ saṃvartikā śubhā|
SP1100142: viveśa hṛdayaṃ tasya kāminīva dṛḍhaṃ priyā|| 14||
SP1100151: sa tayā bhinnahṛdayo yogena parameṇa ha|
SP1100152: yogīva dehaṃ saṃtyajya dehenānyena tasthivān|| 15||
SP1100161: so 'nyaddehaṃ samāsthāya paurāṇaṃ surasattamaḥ|
SP1100162: devaiḥ sarvaiḥ parivṛto jagāma bhavamandiram|| 16||
SP1100171: tatrāpaśyanmahādevaṃ jaṭāmukuṭadhāriṇam|
SP1100172: candralekhāṃśujālaughanirastatimirotkaram|| 17||
SP1100181: bhadrapīṭhe samāsīnaṃ kāñcane maṇibhūṣaṇe|
SP1100182: bhrājamānaṃ śriyātyarthaṃ pārvatyā pārśvasaṃsthayā|| 18||
SP1100191: gaṇaiśca vividhākārairbahubhiḥ kāmarūpibhiḥ|
SP1100192: nṛttagītapriyairnityaṃ samantātparivāritam|| 19||
SP1100201: taṃ dṛṣṭvā śaṃkaraṃ viṣṇuḥ prasannenāntarātmanā|
SP1100202: tuṣṭāva vividhaiḥ stotrairidaṃ covāca susvaram|| 20||
SP1100211: vārāhaṃ rūpamāsthāya tvattejobṛṃhitena me|
SP1100212: raṇe vikramya bhagavanhiraṇyākṣo niṣūditaḥ|| 21||
SP1100221: tvaṃ deva kāraṇaṃ nityaṃ saṃbhūteḥ pralayasya ca|
SP1100222: tvayā sarvamidaṃ vyāptaṃ jagadavyaktamūrtinā|| 22||
SP1100231: tvatprasādena deveśa brahmāhaṃ śakra eva ca|
SP1100232: pūjyāḥ sma loke satataṃ tathaivānye divaukasaḥ|| 23||
SP1100241: tvayi prīte mahādeva sarve prītā vayaṃ prabho|
SP1100242: tvayi kruddhe ca nāśo no bhavitā nātra saṃśayaḥ|| 24||
SP1100251: stuvantamevaṃ bhagavānviṣṇuṃ candrārdhaśekharaḥ|
SP1100252: sahasrasūryatejaskaḥ prītaḥ provāca śaṃkaraḥ|| 25||
SP1100261: bhaktyā tuṣṭo 'smi te viṣṇo devakāryodyamena ca|
SP1100262: varaṃ varaya bhadraṃ te yaste manasi vartate|| 26||
SP1100270: viṣṇuruvāca|
SP1100271: yadi tuṣṭo 'si no deva yadi deyo varaśca naḥ|
SP1100272: tataḥ pāśupataṃ divyaṃ vratamādeṣṭumarhasi|| 27||
SP1100281: yadāśritya vayaṃ sarve saśakrāḥ sarvakāmikam|
SP1100282: yuddhe jeṣyāma daiteyānduḥkhaśokavivarjitāḥ|| 28||
SP1100290: deva uvāca|
SP1100291: ahaṃ vaḥ kathayiṣyāmi guhyametatsanātanam|
SP1100292: vrataṃ pāśupataṃ divyaṃ yena kāmānavāpsyatha|| 29||
SP1100301: ityuktvā devadeveśo devānāṃ hitakāmyayā|
SP1100302: yayau divamathāmantrya devīṃ girivarātmajām|| 30||
SP1100311: atha himagiritulyacārumūrtiṃ vṛṣabhavaraṃ bhagavāṃstadābhirūḍhaḥ|
SP1100312: suragaṇasahitaḥ prabhuḥ sumeruṃ vratamupadeṣṭumanā jagāma śarvaḥ|| 31||
SP1109999: iti skandapurāṇe daśottaraśato 'dhyāyaḥ||