Skandapurāṇa Adhyāya 109

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1090010: sanatkumāra uvāca|
SP1090011: tasya kālena mahatā ramataḥ śaktinandana|
SP1090012: bhāryāyāṃ citralekhāyāṃ vṛko nāmābhavatsutaḥ|| 1||
SP1090021: sa vṛko balavānnityaṃ vicaranpṛthivīmimām|
SP1090022: nardamāno 'vadhīlloke bhūtāni śataśo mahān|| 2||
SP1090031: athāsasāda śailendraṃ himavantaṃ mahāgirim|
SP1090032: gaurīkūṭasamīpe ca kārttikeyālayaṃ śubham|| 3||
SP1090041: tamajānaṃstadābhyetya balenāvinayena ca|
SP1090042: nādayāno drumāñchubhrānratnahemavibhūṣitān|
SP1090043: sarvartupuṣpaphaladānsarvakāmapradānapi|| 4||
SP1090051: śilāmaṇimayāñchubhrāñchātakumbhamayāñchubhān|
SP1090052: haritālamayāṃścānyāṃstathā mānaḥśilācalān|
SP1090053: utpāṭyotpāṭya vegena babhañja ruṣito yathā|| 5||
SP1090061: sa garjamānaḥ satataṃ gajo matta ivāparaḥ|
SP1090062: babhañja tadvanaṃ śubhraṃ kārttikeyasya dhīmataḥ|| 6||
SP1090071: tasya garjitaśabdena vanabhaṅgasvanena ca|
SP1090072: skandasya gaṇapaḥ śūro nirjagāma niśāmayan|| 7||
SP1090081: kokavaktra iti khyāto dṛḍhaṃ skandasya vallabhaḥ|
SP1090082: mahātmā balasaṃpanno gatvā vṛkamavaikṣata|| 8||
SP1090091: sa taṃ dṛṣṭvā mahākāyaṃ taruṇaṃ priyadarśanam|
SP1090092: jīmūtamiva nardantaṃ kiṃcitprakupitānanam|
SP1090093: uvāca vacanaṃ hṛṣṭaḥ kokavaktro hasanniva|| 9||
SP1090101: kasya tvamiha saṃprāpto bālo devagṛhaṃ śubham|
SP1090102: na jānīṣe kimetacca skandasya sumahātmanaḥ|| 10||
SP1090111: veśma devaiḥ sagandharvaiḥ sayakṣoragapannagaiḥ|
SP1090112: kṛtaṃ dayitamatyarthaṃ gaṇeśaiścāpi pūjitam|| 11||
SP1090121: kumāro mandaraṃ yātaḥ sarvaiḥ saha gaṇeśvaraiḥ|
SP1090122: rakṣārthaṃ māmiha sthāpya vārayāmi tato hi te|| 12||
SP1090131: tuṣṭo 'smi tava rūpeṇa balena vapuṣā tathā|
SP1090132: upāramasva tena tvāṃ bravīmi sumahābala|
SP1090133: ahaṃ kariṣye yadbhagnaṃ tathaiva punareva hi|| 13||
SP1090141: vakṣye devaṃ ca taṃ samyaktvadarthaṃ sūkareśvara|
SP1090142: yathā na kupyate tubhyaṃ pravaraṃ tvāṃ karoti ca|| 14||
SP1090150: sanatkumāra uvāca|
SP1090151: tasya tadvacanaṃ śrutvā vṛkaḥ saṃraktalocanaḥ|
SP1090152: uvāca kokavadanamidaṃ mṛgapatistadā|| 15||
SP1090161: na bibhemi kumārasya tava vā pāpacetasaḥ|
SP1090162: bale mama kumāro 'sau na tulyaḥ sagaṇeśvaraḥ|| 16||
SP1090171: yadvo balaṃ ca darpaṃ ca tatkurudhvamaśaṅkitāḥ|
SP1090172: nāmāvaśeṣametadvaḥ kartāhaṃ vanamantaśaḥ|| 17||
SP1090180: sanatkumāra uvāca|
SP1090181: tataḥ sa vṛkṣamutpāṭya haimaṃ vaiḍūryapallavam|
SP1090182: kokavaktrāya cikṣepa nanāda ca yathā vṛṣaḥ|| 18||
SP1090191: tataḥ prahasya kokāsyastamevodgṛhya pādapam|
SP1090192: vṛkaṃ taṃ tena saṃkruddhaḥ śirasyabhijaghāna ha|| 19||
SP1090201: sa tena suprahāreṇa bhramitvā maṇḍalaṃ vṛkaḥ|
SP1090202: papāta bhūmau niḥsaṃjño yathā śakradhvajo mahān|| 20||
SP1090211: tatastaṃ patitaṃ dṛṣṭvā kokāsyaḥ prahasaṃstadā|
SP1090212: babandha pāśairbahubhirveśma caiva praveśayat|| 21||
SP1090221: taṃ baddhaṃ patitaṃ dṛṣṭvā sahāyāstasya te mṛgāḥ|
SP1090222: pradrutāḥ sahasā sarve bhayārtā jīvitaiṣiṇaḥ|| 22||
SP1090231: athāgāttena kālena gaṇapairbahubhirvṛtaḥ|
SP1090232: kārttikeyo mayūreṇa kūjamānena sānugaḥ|| 23||
SP1090241: tasya tatkathayāmāsa kokavaktro gaṇeśvaraḥ|
SP1090242: vṛkaṃ ca darśayāmāsa pāśairbaddhaṃ mahābalam|| 24||
SP1090250: kokavaktra uvāca|
SP1090251: bhagavanvarāharūpasya sutaḥ śrīmānvṛkaḥ kila|
SP1090252: hiraṇyākṣo hato yena dānavo devakaṇṭakaḥ|| 25||
SP1090261: babhañjāyaṃ suduṣṭātmā sahito 'nyairvanaṃ tava|
SP1090262: tataḥ pāśairmayā baddhaḥ kriyatāmasya yatparam|| 26||
SP1090270: skanda uvāca|
SP1090271: nāyaṃ śakyo mayādyeha moktuṃ mṛgakulādhamaḥ|
SP1090272: mukte vaktavyatā loke bhaviṣyati na saṃśayaḥ|| 27||
SP1090281: devo māṃ vakṣyate vyaktaṃ skando bhīto na saṃśayaḥ|
SP1090282: yo mumoca sutaṃ tasya varāhasya kṛtāgasam|| 28||
SP1090291: ukto gataścāhamadya sthāṇunā paramātmanā|
SP1090292: mā kṣamethā varāhasya tanuṃ tvāṃ so 'hvayedyudhi|| 29||
SP1090301: iyaṃ ca mama tenādya śaktirdattātibhāsvarā|
SP1090302: saṃvartiketi vikhyātā sarvāstrabalanāśanī|| 30||
SP1090311: so 'yaṃ durātmā durvṛttaḥ sarvalokaprabādhakaḥ|
SP1090312: gṛhyatāṃ badhyatāṃ caiva kṣipramāviṣkṛtaṃ balāt|| 31||
SP1090320: sanatkumāra uvāca|
SP1090321: tata enaṃ bahiḥ sarve skandasya gaṇanāyakāḥ|
SP1090322: baddhvā bahuvidhaiḥ pāśairyātayanta sahasraśaḥ|| 32||
SP1090331: sa yātyamāno duḥkhārto vilalāpa yathā naraḥ|
SP1090332: nirayastho durācāraḥ karmabhiḥ svaiḥ supāśitaḥ|| 33||
SP1090341: taṃ yātyamānaṃ saṃdṛśya nāradaḥ sumahātapāḥ|
SP1090342: gatvā nyavedayattasya varāhasyāmitātmanaḥ|| 34||
SP1090351: eṣa putro vṛkastubhyaṃ baddhaḥ pāśairanekaśaḥ|
SP1090352: yātyate kārttikeyasya kiṃkarairduṣkṛtī yathā|| 35||
SP1090361: na nāma tava devasya lokārthāyodyatasya ca|
SP1090362: karoti saṃnatiṃ skando bālabhāvānnirānamaḥ|| 36||
SP1090371: athavā svabalaṃ skando manyate balavattaram|
SP1090372: tvatto 'tmanastataḥ putraṃ tava pāśairbabandha ha|| 37||
SP1090381: tadyāvadeva taṃ nāsau pramāpayati devapa|
SP1090382: tāvadeva bhavāngatvā vimocayatu māciram|| 38||
SP1090390: sanatkumāra uvāca|
SP1090391: nāradasya vacaḥ śrutvā varāho nandivardhanaḥ|
SP1090392: jīmūta iva kālānte nanāda ruṣitānanaḥ|| 39||
SP1090401: tasya krodhāttadā vahnirnetrābhyāmatidīptimān|
SP1090402: niścakrāma jagatsarvaṃ saṃharanniva tejasā|| 40||
SP1090411: utthāya cāsanāddevaḥ sahasaivānirīkṣaṇaḥ|
SP1090412: pratasthe śikharaṃ divyaṃ gauryā mṛgapatiḥ svayam|| 41||
SP1090421: sa kampayanmahīṃ sarvāṃ stūyamāno mahātmabhiḥ|
SP1090422: utpātānbhayadānpaśyañjagāmāvinivāritaḥ|| 42||
SP1090431: gacchatastasya devasya panthānaṃ bhujago 'cchinat|
SP1090432: daṃṣṭrā ca vṛkṣamāpātya papāta dharaṇītale|| 43||
SP1090441: rudhiraṃ cāsravadvaktrāddhṛdayaṃ ca pravepata|
SP1090442: bhayaṃ cāsyābhavattatra vego yenābhihanyate|| 44||
SP1090451: vāyavaḥ pratilomāśca urasā cāpatadbhuvi|
SP1090452: svedaścāsya priyaṃ smṛtvā tadātyarthamajāyata|| 45||
SP1090461: etāṃścānyāṃśca bahuśa utpātānbhayasūcakān|
SP1090462: anādṛtya mṛgendro 'sau jagāmaiva mahābalaḥ|| 46||
SP1090471: taṃ prasthitamabhiprekṣya nimittāni ca suvrata|
SP1090472: pūjāṃ sajjāmakurvanta devaloke divaukasaḥ|| 47||
SP1090481: sa siddhasaṃghairanugamyamāno yakṣaiśca gandharvamahoragaiśca|
SP1090482: rakṣogaṇaiścāraṇakiṃnaraiśca jagāma gaurīśikharaṃ mahātmā|| 48||
SP1099999: iti skandapurāṇe navottaraśato 'dhyāyaḥ||