Skandapurāṇa Adhyāya 108

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1080010: sanatkumāra uvāca|
SP1080011: tasminvinihate daitye surāḥ sarve 'bhituṣṭuvuḥ|
SP1080012: ṛṣayaśca tapoyuktāḥ puṣpavṛṣṭyaśca petire|| 1||
SP1080021: devadundubhayo neduradṛśyāḥ sumahāsvanāḥ|
SP1080022: bhūtānāṃ cābhavaccharma prakṛtisthaṃ jagadbabhau|| 2||
SP1080031: jagāmādṛśyatāṃ cakraṃ tataḥ svasthā babhuḥ surāḥ|
SP1080032: ṛṣayaścaiva lokāśca daityaṃ ca dadṛśurhatam|| 3||
SP1080041: asurāpi hi te sarve puradvārāṇi sarvaśaḥ|
SP1080042: pidhāya yatnātsaṃnaddhāḥ prākāreṣvavatasthire|| 4||
SP1080051: te bhītā muktakeśāśca rajodhvastā bhayārditāḥ|
SP1080052: jīvitaṃ saṃparīpsantaḥ sthitāḥ prākāragāstadā|| 5||
SP1080061: bhagavānapi dīptārcirhaviṣeddha ivānalaḥ|
SP1080062: bhīṣayāno 'surānsarvānpṛthivīmanvacinvata|| 6||
SP1080071: sa bahiḥ sarvato 'nviṣya utpāṭya ca mahīruhān|
SP1080072: praṇaṣṭāmiva gāṃ gopaḥ samantādanvacinvata|| 7||
SP1080081: parvatānsa tadotpāṭya devodyānānyacūrṇayat|
SP1080082: ārāmānsa taḍāgāni babhañja ca rarāsa ca|| 8||
SP1080091: tato dakṣiṇato gatvā muhūrtaṃ devasattamaḥ|
SP1080092: śaṅkhaṃ parvatamāsādya nanarda jalado yathā|| 9||
SP1080101: asurāpi hi te bhītāḥ prākārāntarasaṃsthitāḥ|
SP1080102: avekṣanta mṛgendraṃ taṃ dhāvantaṃ sarvatodiśaḥ|| 10||
SP1080111: so 'pi devastadā śaṅkhamutpāṭya nagamuttamam|
SP1080112: apaśyatpṛthivīṃ baddhāṃ rakṣyamāṇāṃ ca dānavaiḥ|| 11||
SP1080121: sāgarāmbhasi vikṣipya śaṅkhaṃ taṃ parvatottamam|
SP1080122: avadhīddānavānsarvānmedinyā ye 'bhirakṣiṇaḥ|| 12||
SP1080131: tato vidrāvya nāgendrānpragṛhya pṛthivīṃ balāt|
SP1080132: jagāma daityānsaṃdṛśya ratnānyādāya sarvaśaḥ|| 13||
SP1080141: sa tāṃ daṃṣṭrāṅkure lagnāṃ vahanbhāti mṛgeśvaraḥ|
SP1080142: viṣāṇalagnāṃ lambantīṃ mṛṇālīṃ gajarāḍiva|| 14||
SP1080151: sa tāṃ sāgaramadhyena vahanbhāti mṛgeśvaraḥ|
SP1080152: varāharūpī kālānte brahmeva vasudhāṃ purā|| 15||
SP1080161: sa sāgaraṃ tamuttīrya bhagavānnandivardhanaḥ|
SP1080162: sve sthāne sthāpayāmāsa mahīṃ tāṃ punareva hi|| 16||
SP1080171: tataḥ śakrāya lokāṃstrīnadātsa madhusūdanaḥ|
SP1080172: uvāca rājā tvaṃ no 'dya mitraṃ cāhaṃ tavānagha|| 17||
SP1080181: ye 'nye 'pi te 'rayaḥ kecidbhaviṣyantyasureśvarāḥ|
SP1080182: teṣāmapi vadhaṃ ghoraṃ kariṣyāmi na saṃśayaḥ|| 18||
SP1080191: tatastamṛṣayaḥ sarve devatāśca savāsavāḥ|
SP1080192: ūcuḥ svāṃ mūrtimāsthāya yathā pūrvaṃ tathā bhava|| 19||
SP1080200: varāha uvāca|
SP1080201: iyaṃ mūrtirmayā devāḥ prāptā paramavarcasaḥ|
SP1080202: na cānayā ratiḥ kācitprāptā me sadṛśī bhuvi|| 20||
SP1080211: so 'haṃ kaṃcidvihṛtyeha kālaṃ mūrtyānayā sukham|
SP1080212: bhaviṣyāmi punardevaḥ satyametadbravīmi vaḥ|| 21||
SP1080220: sanatkumāra uvāca|
SP1080221: tasya tadvacanaṃ śrutvā sarve devāḥ savāsavāḥ|
SP1080222: pradakṣiṇamupāvṛtya jagmuḥ sthānāni sarvaśaḥ|| 22||
SP1080231: gateṣu devasaṃgheṣu bhagavānnandivardhanaḥ| 
SP1080232: vijahāra sukhaṃ tatra hatvā dānavapuṃgavam|| 23||
SP1080241: tasya tatropatiṣṭhanta mṛgyo bhūtvā sahasraśaḥ|
SP1080242: vaidikyo 'psarasaḥ śubhrāstābhiḥ saha rarāma saḥ|| 24||
SP1080251: sa tābhirvicarandevo mahātmā nandivardhanaḥ|
SP1080252: reme matto mahānāgo yathāraṇye kareṇubhiḥ|| 25||
SP1080261: sa siṃha iva siṃhībhiḥ śārdūla iva connadan|
SP1080262: rarāma sāgarānūpe airāvata ivāparaḥ|| 26||
SP1080271: ramamāṇasya siddhāśca ṛṣayaśca tapodhanāḥ|
SP1080272: puṣpāṇāṃ rucirā vṛṣṭīḥ pātayanti viyatsthitāḥ|| 27||
SP1080281: tuṣṭuvuścāpare nityaṃ cakruścainaṃ pradakṣiṇam|
SP1080282: devadundubhayo nityaṃ sarva eva nyavādayan|| 28||
SP1080291: nṛtyantyapsarasaścāpi varāhasyāgratastadā|
SP1080292: vādayanti ca gandharvā gāyanti ca mahātmanaḥ|| 29||
SP1080301: ramayanto varāhaṃ taṃ devāścendrapurogamāḥ|
SP1080302: yakṣāḥ puṇyajanā ye ca tathā devajanāśca ye|| 30||
SP1080311: yātudhānāśca ye kecidbrahmadhānāśca sarvaśaḥ|
SP1080312: manuṣyāḥ paśavaścaiva ṛṣayaścaiva sarvaśaḥ|| 31||
SP1080321: rājanyāḥ kṣatriyāḥ sarve nikāyāścaiva sarvaśaḥ|
SP1080322: tatrājagmurnirīkṣanto varāhasyotsavaṃ śubham|
SP1080323: bahvāścaryasamākīrṇaṃ bahvālakṣyaṃ sadaiva ca|| 32||
SP1080331: evaṃ tasyābhavadvyāsa varāhasya mahātmanaḥ|
SP1080332: utsavaḥ sumahāndivyaḥ pratyahaṃ nandivardhanaḥ|| 33||
SP1080341: tasyotsavo 'sau ṛṣisaṃghajuṣṭaḥ sadā suraiḥ siddhajanaiśca juṣṭaḥ|
SP1080342: gandharvayakṣoragarākṣasaiśca vidyādharaiścaiva sahāpsarobhiḥ|| 34||
SP1089999: iti skandapurāṇe 'ṣṭottaraśato 'dhyāyaḥ||