Skandapurāṇa Adhyāya 107

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1070010: sanatkumāra uvāca|
SP1070011: tamāpatantaṃ vegena na śūlaṃ dṛṣṭavānmṛgaḥ|
SP1070012: daityaiḥ sarvaiḥ samāsaktaḥ sarvaprāṇibhayaṃkaram|| 1||
SP1070021: alakṣitena tenāsau śūlenāditinandanaḥ|
SP1070022: vibhinno hṛdaye vyāsa mṛtakalpaḥ papāta ca|| 2||
SP1070031: tato hāhākṛtaṃ bhūtairadṛśyairmunisattama|
SP1070032: udvelāḥ sāgarāścāsanbhāskaraścāprabho 'bhavat|| 3||
SP1070041: ulkāḥ petuśca sarvatra mlānamālyāḥ surābhavan|
SP1070042: grahāṇāmabhavadyuddhaṃ vimānāni ca petire|| 4||
SP1070051: jajapurmunayaḥ sarve varāhe patite tadā|
SP1070052: mahādevaṃ namaskṛtya brahmā sasmāra taṃ tadā|| 5||
SP1070061: tato vitimiraṃ sarvamabhavatpūrvavacchubham|
SP1070062: prakṛtisthaṃ jagaccābhūdvarāhaścodatiṣṭhata|
SP1070063: tejo māheśvaraṃ divyaṃ viveśa madhusūdanam|| 6||
SP1070071: so 'pyāyitatanustena śūlaṃ niṣkṛṣya mādhavaḥ|
SP1070072: sahasrānalasaṃkāśo babhūva sa mahābalaḥ|| 7||
SP1070081: tatastenaiva śūlena taṃ daityaṃ devanandanaḥ|
SP1070082: jaghāna hṛdaye kruddhaḥ krauñcaṃ śaktyā yathā guhaḥ|| 8||
SP1070091: sa bhinnahṛdayastena varāheṇa mahāsuraḥ|
SP1070092: nārtimānabhavadvyāsa kṛcchre vidvāniva sthitaḥ|| 9||
SP1070101: madhyebhinnaḥ sa taṃ śūlaṃ niṣkṛṣya ca visṛjya ca|
SP1070102: khaḍgaṃ niṣkṛṣya vegena varāhaṃ mūrdhnyatāḍayat|| 10||
SP1070111: sa tena suprahāreṇa varāho nandivardhanaḥ|
SP1070112: nārtimānabhavadvyāsa babhūva rudhiraplutaḥ|| 11||
SP1070121: nānādhātuvicitro 'sau himavāniva parvataḥ|
SP1070122: babhau varāho devātmā sarvāsuravimardanaḥ|| 12||
SP1070131: punarāhantukāmasya tasya daityasya suvrata|
SP1070132: apāhastaprahāreṇa khaḍgaṃ hastādapātayat|| 13||
SP1070141: akurvatāṃ tato yuddhaṃ niyuddhakuśalāvubhau|
SP1070142: tau gajāviva saṃkruddhau mahiṣāviva darpitau|| 14||
SP1070151: siṃhāviva ca nardantau saṃkruddhau vṛṣabhāviva|
SP1070152: śarabhāviva cāyastau śārdūlāviva nirghṛṇau|| 15||
SP1070161: parasparamayudhyetāṃ parasparajayaiṣiṇau|
SP1070162: aṅkuśairhastayoktraiśca kṣepaṇairapasarpaṇaiḥ|
SP1070163: maṇḍalaiśca punaścitraiḥ karṣaṇairapakarṣaṇaiḥ|| 16||
SP1070171: talaiśca muṣṭibhiścaiva bhujaiḥ sacaraṇairapi|
SP1070172: nakhaiśca daśanaiścaiva tathānyaiśca mahābalau|| 17||
SP1070181: tayorevamabhūdyuddhamubhayordevadaityayoḥ|
SP1070182: ahāni daśa cāṣṭau ca tathānyāni caturdaśa|| 18||
SP1070191: anyatsahasramevāsīdvarṣāṇāṃ tacca mānuṣam|
SP1070192: eṣa kālo bhavettatra tato daityo 'balo 'bhavat|| 19||
SP1070201: taṃ hīyamānamālakṣya daityādhipatimūrjitam|
SP1070202: ākāśe vāguvācedamaśarīrātisusvarā|| 20||
SP1070211: śṛṇu deva varāhedaṃ śrutvā caiva samācara|
SP1070212: aśakyo 'yaṃ tvayā hyevaṃ hantuṃ daityo mahābalaḥ|| 21||
SP1070221: abalo 'yaṃ kṛtaḥ krūro dhruvaṃ māheśvareṇa hi|
SP1070222: tejasā paśya caivainameṣa kālo 'sya vartate|| 22||
SP1070231: muktvainaṃ daityarājānaṃ cakreṇa vinisūdaya|
SP1070232: māheśvareṇa vaikuṇṭha tato mṛtyumavāpsyati|| 23||
SP1070240: sanatkumāra uvāca|
SP1070241: tatastamabhisaṃśrutya bhagavānnandivardhanaḥ|
SP1070242: mumoca daityarājānaṃ pādenāhatya vakṣasi|| 24||
SP1070251: sa muktastena devena vibabhau daityapuṃgavaḥ|
SP1070252: bhuktamukto yathā sūryaḥ saiṃhikeyena rāhuṇā|| 25||
SP1070261: bhagavānapi dīpyantaṃ śriyā daityaṃ samīkṣya tam|
SP1070262: sasmāra tattadā cakraṃ namaskṛtvā pinākine|| 26||
SP1070271: tataḥ sarvā diśo vyāsa vahnikuṇḍanibhā babhuḥ|
SP1070272: śabdaśca sumahānāsīdyugāntāmbudasaṃnibhaḥ|| 27||
SP1070281: siddhāḥ petuśca medinyāṃ devāṃśca bhayamāviśat|
SP1070282: svastyastu sarvabhūtānāmityūcurmunayastadā|| 28||
SP1070291: sāgarāścāvaśuṣyanti vineśurnāgapakṣiṇaḥ|
SP1070292: daityāśca dānavāścaiva sarve te viviśuḥ puram|| 29||
SP1070301: bhayatrastāni bhūtāni ulkāḥ peturnabhastalāt|
SP1070302: āgacchati yugāntāgnikālacakre subhāsvare|| 30||
SP1070311: kṣurāntaṃ tanmahācakramabjaṃ jalacarāntakam|
SP1070312: durnirīkṣyaṃ sarvaghāti abhedyamavighāti ca|| 31||
SP1070321: tathāpratihataṃ divyaṃ mohanaṃ sarvadehinām|
SP1070322: karamāgādvarāhasya śatāśanisamasvanam|| 32||
SP1070331: tamāpatantaṃ saṃvīkṣya sarvabhūtāni sarvataḥ|
SP1070332: peturbhūmau mahāghoramapaśyanna ca kiṃcana|| 33||
SP1070341: so 'pi devastadā kṛtvā rūpaṃ sumahadavyayam|
SP1070342: trailokyavyāpi cikṣepa dānavaṃ prati nādayan|| 34||
SP1070351: tadyugāntānalaprakhyaṃ kṣurāntaṃ sphoṭayannabhaḥ|
SP1070352: jagāma dānavaṃ kṣipraṃ diśaḥ sarvā dahanniva|| 35||
SP1070361: taṃ sa dānavaśārdūla upayāntaṃ mahāravam|
SP1070362: jaghānāstrairbahuvidhairavyathaḥ śaktinandana|| 36||
SP1070371: tacca tāni mahācakramastrāṇyanalasaṃnibham|
SP1070372: cakāra bhasmasādvyāsa jagāma ca vinādayat|| 37||
SP1070381: atha māyāṃ samāsarjattejasīṃ pārthivāmapi|
SP1070382: vāyavyāṃ vāruṇīṃ caiva tāmasīmindriyātmikām|| 38||
SP1070391: tathaivotpātikīṃ māyāṃ mohanīṃ stambhanīmapi|
SP1070392: nivartanīṃ jambhanīṃ ca cakārānyāśca saṃyuge|| 39||
SP1070401: tāḥ sarvāstattadā cakraṃ mahadbhīmamanāśayat|
SP1070402: gatvā tasya śiraḥ kāyādunmamātha yathācalam|| 40||
SP1070411: tattena kṛttaṃ sumahacchiro 'gryaṃ vyāttānanāgnipratimogranetram|
SP1070412: daṃṣṭrālamatyadbhutabhīmanādaṃ papāta meroriva śṛṅgamuccam|| 41||
SP1070421: rathāṅganiṣpītavapurvirāgaṃ na bhāti tadvaktramatīva dīnam|
SP1070422: niśāprahāṇau vinivṛttaraśmi bimbaṃ yathā candramaso viśobham|| 42||
SP1070431: taddantapaṅkticchadamādaśānaṃ muhuśca dantānyapi saṃdaśānam|
SP1070432: papāta daityasya śiro nikṛttaṃ yathā gireḥ śṛṅgamatipravṛddham|| 43||
SP1079999: iti skandapurāṇe saptottaraśato 'dhyāyaḥ||