Skandapurāṇa Adhyāya 106

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1060010: sanatkumāra uvāca|
SP1060011: sa tathāpyāyito devo balavānbhāskaradyutiḥ|
SP1060012: citraṃ bahu ca śīghraṃ ca maṇḍalāni paribhramat|| 1||
SP1060021: plutādi siṃhavatkṛtvā avalokayatāsakṛt|
SP1060022: pṛṣṭhataścāgrataścāpi punargajavadācarat|| 2||
SP1060031: punarvyāttānano bhūtvā śastrāṇi grasate ripoḥ|
SP1060032: punarvṛkṣaiḥ śilābhiśca dānavānsa nyasūdayat|| 3||
SP1060041: punarākāśago bhūtvā pakṣirāḍiva so 'bhramat|
SP1060042: punarjahāsa saṃkruddha aśanīpātasaṃnibham|
SP1060043: punaśca sūkṣmamātmānaṃ kṛtvā tasthāvathāgrataḥ|| 4||
SP1060051: evaṃ taṃ valgamānaṃ ca nardamānaṃ ca dānavaḥ|
SP1060052: uvāca bhṛkuṭīvaktro hiraṇyākṣo 'bhinādayan|| 5||
SP1060061: bho kṣudramṛga durbuddhe na tvaṃ mokṣamavāpsyasi|
SP1060062: hatvā tvāhaṃ pradāsyāmi rudrāya balimojasā|| 6||
SP1060071: tvayā hataśchadmanā me bhrātā jyeṣṭho durātmanā|
SP1060072: tasyādya karmaṇaḥ prāptaṃ phalaṃ duṣṭātmanastava|| 7||
SP1060080: sanatkumāra uvāca|
SP1060081: tasya tadvacanaṃ śrutvā hiraṇyākṣasya saṃyuge|
SP1060082: uvāca bhagavānviṣṇuḥ krodhayāno diteḥ sutam|| 8||
SP1060091: hato 'sau narasiṃhena mayā daityaḥ pratāpavān|
SP1060092: vikramya saṃyuge tadvadbhavato 'pi vadho dhruvaḥ|| 9||
SP1060101: yadi tvaṃ gacchase khaṃ vā pātālaṃ vāpyato 'param|
SP1060102: parvataṃ vodadhiṃ vāpi na tathāpi vimokṣyase|| 10||
SP1060111: yatte balaṃ tapo yacca yā ca māyā tavāsura|
SP1060112: tatsarvaṃ nirdhamāmyadya tava dehātsajīvitam|| 11||
SP1060120: hiraṇyākṣa uvāca|
SP1060121: tvaṃ mayā śaraviṣṭabdho devairmantrairvimokṣitaḥ|
SP1060122: baddhaṃ cāstreṇa bhūyastvāṃ pakṣirājo hyamocayat|| 12||
SP1060131: bhūyo mṛtaśca durbuddhe devairujjīvito bhavān|
SP1060132: bhūyastvāhaṃ vadhiṣyāmi siṃho mṛgamivājane|| 13||
SP1060141: tava kā śaktiradyeha maheśvaramṛte varam|
SP1060142: māṃ spraṣṭumapi hastena narasyeva hutāśanam|| 14||
SP1060151: tvaṃ lokamayamāsthāya śarīraṃ tairadhiṣṭhitam|
SP1060152: sarvairāpyāyitaścaiva saṃyuge māmupāgataḥ|
SP1060153: ahaṃ tu svena tapasā balena ca samanvitaḥ|| 15||
SP1060161: na ca māṃ tvaṃ tathāpyadya śaktaḥ siṃhaṃ yathā mṛgaḥ|
SP1060162: yoddhuṃ vāpyabhisartuṃ vā saha devairdurātmavān|
SP1060163: nanvāvayoretadeva hyantaraṃ sumahattaram|| 16||
SP1060171: yaḥ syātkulīno vidvānvā satāṃ mārge ca saṃsthitaḥ|
SP1060172: so 'nenaiva jitaṃ matvā ātmānaṃ saṃyugaṃ tyajet|| 17||
SP1060181: nirghṛṇastyaktalajjaśca chidraghātī durātmavān|
SP1060182: tvadanyaḥ ko bhavettiryaṅnaitaddaityeṣu vidyate|| 18||
SP1060191: na tvaṃ mama kṛto mṛtyurahaṃ tu tava saṃyuge|
SP1060192: ete siddhāḥ prapaśyantu cāraṇāśca sahasraśaḥ|
SP1060193: āvayorantaraṃ saṃkhye bahudhā yudhyamānayoḥ|| 19||
SP1060200: sanatkumāra uvāca|
SP1060201: evamuktvā hiraṇyākṣaḥ śarairāśīviṣopamaiḥ|
SP1060202: jaghne varāhaṃ saṃkruddho vajrāśanisamatviṣam|| 20||
SP1060211: so 'tha tenārdyamāno 'pi varāhaḥ sumahābalaḥ|
SP1060212: gatvā vegena saṃkruddho rathaṃ jagrāha nādayan|| 21||
SP1060221: gṛhītvā kūbare cāpi ākṣipyotkṣipya vegavat|
SP1060222: sāśvaṃ sasārathiṃ devaścikṣepa ca rarāsa ca|| 22||
SP1060231: tasya tvākṣepavikṣepaiśchinnayoktrā babhurhayāḥ|
SP1060232: udbhrānto rathamukhyaśca visaṃdhiḥ samapadyata|| 23||
SP1060241: hiraṇyākṣo rathaṃ tyaktvā padātirdhanuṣā tadā|
SP1060242: mṛgendraṃ mohanāstreṇa balavānabhyatāḍayat|| 24||
SP1060251: mohaḥ samāviśaccaiva taṃ devaṃ nandivardhanam|
SP1060252: devairmantraprabhāvena naṣṭamohaḥ punaḥ kṛtaḥ|| 25||
SP1060261: eṣa mantrairbahuvidhairdaityendro hi ruṣānvitaḥ|
SP1060262: ājaghāna na cāpyenaṃ rujā sa samayojayat|| 26||
SP1060271: athainaṃ sa mahātejā varāhaḥ prahasanniva|
SP1060272: vṛkṣamutpāṭya vegena daityaṃ mūrdhni vyatāḍayat|| 27||
SP1060281: tasya tena prahāreṇa daityasyābhihatasya ha|
SP1060282: dhanuḥ papāta vegena hastādbāṇaśca pañcakaḥ|| 28||
SP1060291: tato hāhākṛtaṃ daityairdānavaiśca suduḥkhitaiḥ|
SP1060292: śastraiśca bahubhiḥ kruddhā varāhaṃ samatāḍayan|| 29||
SP1060301: sa hanyamānastairdaityairvyādāya sumahābalaḥ|
SP1060302: mukhaṃ sarvāṇi śastrāṇi jagrāsa ca rarāsa ca|| 30||
SP1060311: taṃ tathāvikṛtaṃ dṛṣṭvā hiraṇyākṣaḥ pratāpavān|
SP1060312: śūlaṃ jagrāha saṃkruddhaḥ kṛtvā rudrāya vai namaḥ|| 31||
SP1060321: tadyugāntānalaprakhyaṃ mahāśūlamatiprabham|
SP1060322: cikṣepa daityaḥ saṃkruddho varāhāya mahāsvanam|| 32||
SP1060331: tamāpatantaṃ bahudhā nadantaṃ jvālāsphuliṅgāśca samudgirantam|
SP1060332: dṛṣṭvā surāḥ siddhagaṇāśca sarve hāheti cakrurbhayamūḍhacittāḥ|| 33||
SP1069999: iti skandapurāṇe ṣaḍuttaraśato 'dhyāyaḥ||