Skandapurāṇa Adhyāya 105

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1050010: sanatkumāra uvāca|
SP1050011: sa dhanvī kavacī bhūtvā baddhagodhāṅgulitravān|
SP1050012: baddhapṛṣṭheṣudhī caiva śarī khaḍgī mahābalaḥ|| 1||
SP1050021: hariśmaśruścaturdaṃṣṭraḥ śaṅkukarṇo mahāhanuḥ|
SP1050022: ājānubāhurdīrghākṣo nyagrodhaparimaṇḍalaḥ|| 2||
SP1050031: hastayoḥ padmaśaṃkhau ca cakramatsyau ca pādayoḥ|
SP1050032: dadhāno jālahastaśca jālapādo 'śvamehanaḥ|| 3||
SP1050041: bālādityanibhākṣaśca añjanācalasaṃnibhaḥ|
SP1050042: sa niryayau tadā vyāsa bhṛkuṭībhūṣitānanaḥ|| 4||
SP1050051: dvāryapaśyacca sūtena rathaṃ samupakalpitam|
SP1050052: sahasranalvamātraṃ ca hayairdivyaiḥ samanvitam|| 5||
SP1050061: sahasrairdaśabhirvyāsa sarvopakaraṇānvitam|
SP1050062: khaṭvāṅgena ca saṃyuktaṃ dhvajenādityavarcasā|| 6||
SP1050071: āruroha jayetyukto dānavairbahubhistadā|
SP1050072: divākaro rathaṃ yadvadbhagavāṃstejasāṃ patiḥ|| 7||
SP1050081: vibabhau sa tadārūḍho rathastho ditinandanaḥ|
SP1050082: sauvarṇe bhājane yadvadindranīlaṃ samarpitam|| 8||
SP1050091: kirīṭaṃ tvābabhau tasya śiraḥsthaṃ sumahādyuti|
SP1050092: yathāñjanagireḥ śṛṅge dāvāgniḥ samavasthitaḥ|| 9||
SP1050101: saṃcodayacca yantāraṃ sa daityo gamanaṃ prati|
SP1050102: yathāturataraṃ vyāsa vyādhirvai maraṇaṃ prati|| 10||
SP1050111: yantā pracoditastena tasyāśvānsaṃpracodayat|
SP1050112: dhātrā pracodito yadvajjīvitāni nṛṇāṃ yamaḥ|| 11||
SP1050121: javanāste tadā jaitramūhustaṃ syandanaṃ hayāḥ|
SP1050122: dharmādharmau naraṃ yadvanmṛtaṃ saṃyamanaṃ prati|| 12||
SP1050131: tasya pārśve 'bhavadvyāsa vipracittiravasthitaḥ|
SP1050132: ketoriva yathā vyomni pratiketuravasthitaḥ|| 13||
SP1050141: śaṅkhabherīmṛdaṅgaiśca murajairveṇubhistathā|
SP1050142: vādyamānairyayau rājā hiraṇyākṣo 'śmakātpurāt|| 14||
SP1050151: agrataḥ pṛṣṭhataścaiva pārśvayorubhayorapi|
SP1050152: jagmuḥ sarve 'surā vyāsa bhāskarasya yathā grahāḥ|| 15||
SP1050161: nirgacchamānaḥ svapurācchakuntānbhayaśaṃsinaḥ|
SP1050162: apaśyadvyāsa daityendro na ca tānakaroddhṛdi|| 16||
SP1050171: acchinattasya panthānaṃ bhujaṃgaḥ kṛṣṇadehavān|
SP1050172: gṛdhraśca raktavaktro 'sya nililye dhvajamūrdhani|| 17||
SP1050181: gṛdhraścakrāyate cāsya rathopari ca gacchataḥ|
SP1050182: dhvajaścābhajyata mahānrathasya sumahāprabhaḥ|| 18||
SP1050191: vāmaṃ cāṅgaṃ sphuratyasya śarīrasya muhurmuhuḥ|
SP1050192: heṣante na hayā dīnā hastino vimadābhavan|| 19||
SP1050201: etāṃścānyāṃśca subahūnsa daityo munisattama|
SP1050202: avekṣata nimittāni bhayadānyātmano 'sakṛt|| 20||
SP1050211: nātidūre sa nirgamya nagarasya mṛgeśvaram|
SP1050212: apaśyaddānavaḥ saṃkhye yudhyamānamabhītavat|| 21||
SP1050221: so 'pi daityavaraḥ śrīmānkrodhātsaṃraktalocanaḥ|
SP1050222: visphārayanmahācāpaṃ rathenābhyapatadbalī|| 22||
SP1050231: varāho 'pi mahābāhurvidrāvya ditinandanān|
SP1050232: suvarṇākṣaṃ prati ruṣā vegenaivābhyadhāvata|| 23||
SP1050241: tasyāpatata evāśu dānavaḥ sumahābalaḥ|
SP1050242: sarvasaṃdhiṣu tīkṣṇāgrāṃścakhāna subahūñcharān|| 24||
SP1050251: sāyakaistairvinirbhinnaḥ sarvasaṃdhiṣu suvrata|
SP1050252: na cacāla mṛgendro 'sau viṣṭabdhaḥ samatiṣṭhata|| 25||
SP1050261: taṃ stambhitaṃ tadā vyāsa dṛṣṭvā devā mahābalam|
SP1050262: viśalyakaraṇairmantrairviśalyamabhicakrire|| 26||
SP1050271: sa viśalyastadā devaiḥ kṛto mṛgapatirmahān|
SP1050272: punarvegaṃ mahatkṛtvā jagāma ditijaṃ prati|| 27||
SP1050281: sa vadhyamāno bahubhiḥ śarairmṛgapatirmahān|
SP1050282: daityendrarathamāsādya iyeṣa rathamavyayaḥ|| 28||
SP1050291: grahītuṃ nādayanvyāsa bahudhā viśvarūpadhṛk|
SP1050292: yantā ca maṇḍalaṃ kṛtvā bhrāmayāmāsa taṃ ratham|| 29||
SP1050301: prasāritakaraṃ daityo mṛgaṃ taṃ sumahābalam|
SP1050302: babandhāstreṇa nāgānāṃ sa baddho nyapatadbhuvi|| 30||
SP1050311: patitaṃ taṃ ca daityendrā vividhāyudhapāṇayaḥ|
SP1050312: vijaghnurbhṛśamāyastā bahudhā krodhamūrchitāḥ|| 31||
SP1050321: taṃ baddhaṃ vadhyamānaṃ ca patitaṃ nandivardhanam|
SP1050322: garutmānbhujagendrebhyaḥ kṣiprameva vyamocayat|| 32||
SP1050331: muktaśca sa tadotpatya drāvayāṇo diteḥ sutān|
SP1050332: hiraṇyākṣarathaṃ tūrṇamabhyadhāvanmahāyaśāḥ|| 33||
SP1050341: taṃ dhāvantaṃ punardaityaḥ śareṇānataparvaṇā|
SP1050342: vivyādha hṛdaye vyāsa nardamāno yathāmbudaḥ|| 34||
SP1050351: mṛgeśvaraśca bhinno 'sau hṛdaye mohamāsthitaḥ|
SP1050352: papāta bhūmau nirvṛtte śakradhvaja ivotsave|| 35||
SP1050361: tato hāhākṛtaṃ sarvaiḥ samūḍhairdevapuṃgavaiḥ|
SP1050362: ṛṣayastuṣṭuvuścainaṃ bhāskaraścāprabho 'bhavat|| 36||
SP1050371: atha so 'pyāyitastatra ṛṣibhirbrahmavittamaiḥ|
SP1050372: pratilabhya tadā saṃjñāmidaṃ vacanamabravīt|| 37||
SP1050381: āpyāyayadhvaṃ māṃ kṣipraṃ mūḍho 'haṃ sarvaśaḥ surāḥ|
SP1050382: nālpavīryeṇa śakyo 'yaṃ daityo yodhayituṃ raṇe|| 38||
SP1050391: tataste devatāḥ sarve ṛṣayaśca tapodhanāḥ|
SP1050392: tapasā svena taṃ devaṃ sarva evābhyapūrayan|| 39||
SP1050401: tasya tvāpyāyyamānasya ṛṣibhirdevataiśca ha|
SP1050402: babhau rūpaṃ yugāntāgnikālamṛtyusamaprabham|| 40||
SP1050411: sa dīpyamāno vibabhau mahātmā devaiśca sarvai ṛṣibhiḥ stutaśca|
SP1050412: dīptastadā bhāskarasaptakalpo lokāndahiṣyanniva devadevaḥ|| 41||
SP1059999: iti skandapurāṇe pañcottaraśato 'dhyāyaḥ||