Skandapurāṇa Adhyāya 104

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1040010: sanatkumāra uvāca|
SP1040011: atha te taṃ mṛgaṃ vyāsa dānavā bhīmagarjanāḥ|
SP1040012: āyudhaiḥ samabhikruddhāstatakṣustaṃ tadā bhṛśam|| 1||
SP1040021: te mṛgā iva śārdūlaṃ siṃhapotaṃ gajā iva|
SP1040022: ājaghnurdānavāḥ kruddhā varāhaṃ śastravṛṣṭibhiḥ|| 2||
SP1040031: sa cāpi mṛgaśārdūla upaviśya mahodadhau|
SP1040032: āpo 'pibatsamāviśya vahnivadvaḍavāmukhe|| 3||
SP1040041: tathā tānīritāndaityairāyudhāni sahasraśaḥ|
SP1040042: vyādāya sumahadvaktraṃ jagrāsa ca rarāsa ca|| 4||
SP1040051: grasitvā tāni sarvāṇi śastrāṇi sa mahābalaḥ|
SP1040052: dānavānprati saṃcakre vegaṃ sindhurivāparaḥ|| 5||
SP1040061: gajānprati yathā siṃhaḥ siṃhāñcharabharāḍiva|
SP1040062: garutmānbhujagānyadvacchārdūlaśca mṛgāniva|
SP1040063: meghavṛndānyathā vāyuḥ kapotāniva pakṣirāṭ|| 6||
SP1040071: tathā sa bhagavānvyāsa dānavānprati lokapaḥ|
SP1040072: vegaṃ cakre yathā kṣiptamindriyānprati vai manaḥ|| 7||
SP1040081: āsādya ca sa tāndaityānmahājaladanisvanaḥ|
SP1040082: sarvānvidrāvayāmāsa rudraḥ paśugaṇāniva|| 8||
SP1040091: kaṃcitpadbhyāṃ susaṃkruddho hastābhyāmaparānapi|
SP1040092: aparāndaṃṣṭrayā tatra hyapraiṣīdyamasādanam|| 9||
SP1040101: talena śambaraṃ bhūmau kālaśambarameva ca|
SP1040102: narakaṃ pādaghātena hayagrīvaṃ ca muṣṭinā|| 10||
SP1040111: urasā namuciṃ cāpi mahāmāyaṃ ca suvrata|
SP1040112: āhatyāhatya saṃkruddhaḥ pātayāmāsa devapaḥ|| 11||
SP1040121: tāṃstathā drāvayāṇaṃ ca garjamānaṃ ca siṃhavat|
SP1040122: vipracittirvarāhaṃ taṃ muṣṭinorasyatāḍayat|
SP1040123: vipracittiṃ jaghānograṃ pārśvadeśe sa muṣṭinā|| 12||
SP1040131: sa āhato varāheṇa varāhaṃ krodhamūrchitaḥ|
SP1040132: punarjaghāna khaḍgena vakṣasyenaṃ vinādayan|| 13||
SP1040141: amṛṣyamāṇastaṃ ghātaṃ varāhaḥ sa mahābalaḥ|
SP1040142: muṣṭinā mūrdhni taṃ daityaṃ vajrābhena vyatāḍayat|| 14||
SP1040151: sa daityastena ghātena bhramitvā cakravattadā|
SP1040152: papāta bhūmau vegena vātāhata iva drumaḥ|| 15||
SP1040161: patitaṃ taṃ tadābhyetya vipracittiṃ mṛgeśvaraḥ|
SP1040162: pāde jagrāha deveśo drāvayāṇo diteḥ sutān|| 16||
SP1040171: bhrāmayitvā tataścainaṃ narditvā cāsakṛdbalī|
SP1040172: puraṃ prati vicikṣepa mahātmā nandivardhanaḥ|| 17||
SP1040181: sa tena kṣipto vibabhau dānavādhipatirbalī|
SP1040182: sabalākataḍijjvālaḥ paricchinna ivāmbudaḥ|| 18||
SP1040191: srastahārāmbaradharaścyutamālyavibhūṣaṇaḥ|
SP1040192: papātopari vegena hiraṇyākṣasya veśmani|| 19||
SP1040201: soccamaṭṭālakaṃ tasya vimānamiva saṃsthitam|
SP1040202: cūrṇayāno 'patadvyāsa parvatendramivāśaniḥ|| 20||
SP1040211: mahatā cāsya śabdena hiraṇyākṣaḥ svayaṃ tadā|
SP1040212: vegenāgatya dadṛśe dānavendraṃ diteḥ sutaḥ|| 21||
SP1040221: so 'pi dānavaśārdūlo varāheṇāvatāḍitaḥ|
SP1040222: tena caiva nighātena muhūrtamabhavajjaḍaḥ|| 22||
SP1040231: taṃ samāśvāsayadrājā tadā śītena vāriṇā|
SP1040232: tālavṛntaiśca bahubhirmaṇibhiśca diteḥ sutaḥ|| 23||
SP1040241: samāśvasyotthitaṃ caiva upaviṣṭaṃ varāsane|
SP1040242: rājā papraccha taṃ daityaṃ paraṃ vismayamāgataḥ|| 24||
SP1040250: hiraṇyākṣa uvāca|
SP1040251: kenādya himavāndaitya pṛthivī vā sasāgarā|
SP1040252: mahābalairmahādaitya tulitā viśvakarmaṇā|| 25||
SP1040261: kenādya mandaraḥ srasto mṛtyuḥ kena parājitaḥ|
SP1040262: kena tvaṃ dānaveśāna kṣiptaḥ ko balavānbhuvi|| 26||
SP1040271: pṛthivyāstulanaṃ yādṛṅmandarasya ca cālanam|
SP1040272: mṛtyośca bandhanaṃ tādṛktavedaṃ kṣipaṇaṃ matam|| 27||
SP1040281: rudrendramṛtyupratimo lokapālabhayaṃkaraḥ|
SP1040282: kena tvaṃ tulitaḥ saṃkhye balavānabalo yathā|| 28||
SP1040291: kasyedaṃ balamakṣayyaṃ kena bāhvorbalaṃ mahat|
SP1040292: khyāpitaṃ triṣu lokeṣu dānaveśvara kathyatām|| 29||
SP1040300: sanatkumāra uvāca|
SP1040301: tasya tadvacanaṃ śrutvā dānavaḥ sa mahābalaḥ|
SP1040302: tamāha dīrghaṃ niśvasya nirīkṣya ca punaḥ punaḥ|| 30||
SP1040310: vipracittiruvāca|
SP1040311: amānuṣamidaṃ rājannatidevaṃ tathāpi ca|
SP1040312: atidaityaṃ ca daityendra na dṛṣṭaṃ na śrutaṃ kvacit|| 31||
SP1040321: varāhasya balaṃ yādṛṅna tādṛkkasyacitkvacit|
SP1040322: na hi tulyaṃ prapaśyāmi tasya rājanmahātmanaḥ|| 32||
SP1040331: astraiḥ śastraiśca bahubhistakṣyamāṇasya saṃyuge|
SP1040332: nārtirna duḥkhaṃ daityendra na ca saṃjñā prahīyate|| 33||
SP1040341: bhavettasyābhidaṣṭasya maśakenāpyanirvṛtiḥ|
SP1040342: na daityadānavai rājannighnasya bhayamityuta|| 34||
SP1040351: yathā kṣudramṛgānsiṃho maṇḍūkāniva coragaḥ|
SP1040352: tathā sa kālayāmāsa sarvāndaityendradānavān|| 35||
SP1040361: na taṃ mṛgamahaṃ manye na devaṃ nāpi cāsuram|
SP1040362: ko 'pyasau ditiputrāṇāmanayaḥ samupasthitaḥ|| 36||
SP1040371: tenāsmi muṣṭinā mūrdhni tāḍito bhūtalaṃ gataḥ|
SP1040372: gṛhītvā sahasā kṣiptaḥ patitastvadgṛhopari|| 37||
SP1040381: dānavānāṃ sadaityānāmitareṣāṃ ca dānava|
SP1040382: na jāne samavasthānaṃ manye te sarvaśo hatāḥ|| 38||
SP1040391: avadhyaḥ sa mahātejā balavāndurbalā vayam|
SP1040392: śrutvaitadditiputrāṇāṃ hitaṃ yattatsamācara|| 39||
SP1040401: tasyāṅge munayaḥ sarve dṛśyante saha devataiḥ|
SP1040402: kṛtyā seti mataṃ me 'dya tava hetorvinirmitā|| 40||
SP1040411: manaśca tava daityendra yuddhāya kṛtaniścayam|
SP1040412: vinivartaya taccaiva daityānāṃ hitamācara|| 41||
SP1040421: balavānso 'balā daityā vayaṃ martyāḥ sa cāmaraḥ|
SP1040422: ajayyo 'sau jitā daityā mā no yuddhena yojaya|| 42||
SP1040431: hitvāśmakapuraṃ sarve samudrāmbhaḥ samāsthitāḥ|
SP1040432: tiṣṭhāma rājanmā yuddhe tena sārdhaṃ manaḥ kṛthāḥ|| 43||
SP1040441: māvamaṃsthā mṛgaṃ daitya mṛgo 'sāviti sarvaśaḥ|
SP1040442: narasiṃho 'pyabhūtpūrvaṃ mṛgastadviditaṃ hi vaḥ|| 44||
SP1040451: yāvattvaṃ dhriyase daitya dānavānāṃ sukhāvaha|
SP1040452: tāvatsarve 'surā jīvā bhaviṣyanti na saṃśayaḥ|| 45||
SP1040461: mā naśantu diteḥ putrā danoścaiva subāliśāḥ|
SP1040462: apayāma purādasmādasureśvara sarvaśaḥ|| 46||
SP1040470: sanatkumāra uvāca|
SP1040471: tasya tadvacanaṃ śrutvā hiraṇyākṣaḥ pratāpavān|
SP1040472: uvāca dānaveśānaṃ bhītaṃ tasya mahātmanaḥ|| 47||
SP1040481: asaṃśayaṃ mahātmāsau mṛgo dānavasattama|
SP1040482: yena mandarakalpastvaṃ tulitaḥ sumahābalaḥ|| 48||
SP1040491: adya varṣasahasrāṇi divyānyasurapuṃgava|
SP1040492: catvāri bhuñjato rājyaṃ gatāni sumahānti me|| 49||
SP1040501: pañcamaṃ cānusaṃprāptaṃ tāvaddevāśca nāśitāḥ|
SP1040502: sabalā bahubhirghoraiḥ saṃgrāmairabalā iva|| 50||
SP1040511: so 'haṃ tathā balopeto bhuktvā sarvamakaṇṭakam|
SP1040512: bhītaḥ praviśya salilaṃ kathaṃ sthāsye bhujaṃgavat|| 51||
SP1040521: mṛgarūpī sa viṣṇuśca vārāhaṃ rūpamāsthitaḥ|
SP1040522: yadi syāttacca kṛtyaṃ me dānaveśvara mā bhayam|
SP1040523: mamāpi balamakṣayyaṃ tasmācca balavānaham|| 52||
SP1040531: yo me bhayātparityajya svaṃ rūpaṃ mṛgatāṃ gataḥ|
SP1040532: yo hanyāddhastinaṃ saṃkhye siṃhaṃ śarabhameva ca|
SP1040533: tasya kāsthā bhaveddaitya mṛge hyasminmahābala|| 53||
SP1040541: madbhayātsa varāhaśca sarvadevairadhiṣṭhitaḥ|
SP1040542: māmāhvayati daityendra jaya eva tato hi me|| 54||
SP1040551: bhavāneva hi me daitya tena dūtaḥ praveritaḥ|
SP1040552: tvaratā mṛtyulokaṃ tu gatvā dānavapuṃgava|| 55||
SP1040561: adya taṃ bhrātṛhantāraṃ dānavānāṃ bhayaṃkaram|
SP1040562: ahatvā na nivartiṣye śape satyena dānava|| 56||
SP1040571: sūtaṃ tataḥ samādiśya rathaṃ sajjamacīkarat|
SP1040572: samāśvāsayituṃ patnyaḥ praviveśa punargṛhān|| 57||
SP1040581: sa tatra tābhiḥ kṛtamaṅgalastadā diteḥ sutastāśca nirīkṣya sarvaśaḥ|
SP1040582: jagrāha sarvaṃ raṇayogyamujjvalaṃ mahābalaḥ śatrunivāraṇakṣamam|| 58||
SP1049999: iti skandapurāṇe caturuttaraśato 'dhyāyaḥ||