Skandapurāṇa Adhyāya 103

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1030010: sanatkumāra uvāca|
SP1030011: atha vyāsa samāṃ bhūmiṃ saṃprāptāndānavarṣabhān|
SP1030012: uvāca sarvāngambhīraṃ mṛgānsiṃha ivājane|| 1||
SP1030021: bhavanto dānavāḥ sarve daityāśca sumahābalāḥ|
SP1030022: mayā mṛgeṇa samare yudhyatāṃ tu punarbhṛśam|| 2||
SP1030031: na lajjā samare 'styadya yuṣmākaṃ dānaveśvarāḥ|
SP1030032: athavā na balaṃ vo 'sti mithyā devā hi vo jitāḥ|| 3||
SP1030041: bahavo balavantaśca mṛgaścāhaṃ vanecaraḥ|
SP1030042: na manye dharmayuddhe vo matirdānavasattamāḥ|| 4||
SP1030051: na mamāsti dhanuḥ kiṃcinna śastraṃ ca tathāvidham|
SP1030052: saśastrairbahubhiryena yudhyeyamasureśvarāḥ|| 5||
SP1030061: te yūyaṃ yadi manyadhvaṃ śastrāṇi tyajatādhunā|
SP1030062: mayā caikaikaśaḥ sarve yudhyadhvaṃ nyāyamāsthitāḥ|| 6||
SP1030070: sanatkumāra uvāca|
SP1030071: tasya tadvacanaṃ śrutvā so 'ndhako dānaveśvaraḥ|
SP1030072: uvāca sarvāndaityendrānyugāntāmbudavannadan|| 7||
SP1030081: evametadyathāhāyaṃ mṛgo 'suramahārathāḥ|
SP1030082: saṃtyajāmo 'dya śastrāṇi yodhayāmaikaśastataḥ|| 8||
SP1030090: prahlāda uvāca|
SP1030091: abuddhireṣā daityendrā yathāhāyaṃ mṛgādhamaḥ|
SP1030092: samānānāṃ samaiḥ sārdhametadyuddhaṃ praśasyate|| 9||
SP1030101: na mṛgāṇāṃ ca śastrāṇi na bāhubalamityuta|
SP1030102: vadhyante ca sadā śastraireṣa dharmaḥ satāṃ mataḥ|| 10||
SP1030111: te vayaṃ kathamutsṛjya svadharmaṃ dānaveśvarāḥ|
SP1030112: mṛgadharmaṃ samāsthāya yudhyema paśavo yathā|| 11||
SP1030121: mṛgādhamo 'yaṃ durvṛtta avadhyo nāsmadādibhiḥ|
SP1030122: ghnatainaṃ mā vicāro vo mṛge bhavatu sarvaśaḥ|| 12||
SP1030131: māyāmāsthāya duṣṭātmā ko 'pyayaṃ surapāṃsanaḥ|
SP1030132: asmānvañcayituṃ daityāḥ kāṅkṣate sudurātmavān|| 13||
SP1030141: kva vaḥ śrutaṃ vā dṛṣṭaṃ vā mṛgāṇāmasureśvarāḥ|
SP1030142: manuṣyavadbāhuyuddhaṃ puruṣaiḥ saha saṃyuge|| 14||
SP1030151: eṣa viṣṇurdurācāro durātmā daityakaṇṭakaḥ|
SP1030152: aśaktaḥ svena vīryeṇa māyāmāsthāya saṃsthitaḥ|| 15||
SP1030161: tatastaṃ balavānkruddho dhanuṣāsau 'sureśvaraḥ|
SP1030162: śarairavākiradvyāsa bahubhirvirarāsa ca|| 16||
SP1030171: andhako vipracittiśca sarve ca ditidānavāḥ|
SP1030172: avākirañcharaistīkṣṇaiḥ śataśo 'tha sahasraśaḥ|| 17||
SP1030181: atha devaḥ susaṃrabdho viddhastairdānavairbhṛśam|
SP1030182: śuśubhe bhāskarakaraiḥ saṃbaddho himavāniva|| 18||
SP1030191: sa vegaṃ balavānkṛtvā vidhunvānaḥ śarāñchitān|
SP1030192: salīlaṃ prayayau devaḥ prahlādaṃ prati dānavam|| 19||
SP1030201: sa gatvā tasya sahasā sārathiṃ rathameva ca|
SP1030202: daṃṣṭrābhiśca karābhyāṃ ca nāmaśeṣaṃ cakāra ha|| 20||
SP1030211: tato rathādavaprutya hanyamāno 'pi dānavaiḥ|
SP1030212: rathadhvajena taṃ daityaṃ mūrdhni devo 'bhijaghnivān|| 21||
SP1030221: prahlādo 'pi tatotpatya gadayā bhīmarūpayā|
SP1030222: ājaghānorasi kruddho vighno dharmaṃ yathāsthitam|| 22||
SP1030231: sa tenābhihato devo muktvā tasya rathaṃ tadā|
SP1030232: tameva deśamāyāto pūrvaṃ yatrābhavatsthitaḥ|| 23||
SP1030241: tato 'ndhako vipracittiḥ śambaraḥ kālaśambaraḥ|
SP1030242: śarairāśīviṣākārairbibhidurnandivardhanam|| 24||
SP1030251: sa bhinnastaistadā vyāsa śaraiḥ saṃnataparvabhiḥ|
SP1030252: bhidyamānaśca bahudhā maṇḍalāni cacāra ha|| 25||
SP1030261: kadācitsiṃhavaccāpi plavate nardate 'pi ca|
SP1030262: śārdūlavatkadācicca bhūmāvātmānamāhave|| 26||
SP1030271: vitatya sa mahāvīryastiṣṭhate sāyakānsahan|
SP1030272: pādena tata utthāya avakīrya vṛṣo yathā|| 27||
SP1030281: pakṣivatsa tadākāśe maṇḍalāni mṛgeśvaraḥ|
SP1030282: bhramitvā niścalastasthau varāhaḥ parvato yathā|| 28||
SP1030291: evaṃ bahuvidhānmārgānvicaritvā mahābalaḥ|
SP1030292: vegenaiva karābhyāṃ sa rathau jagrāha nādayan|
SP1030293: vipracitteśca balavānandhakasya ca suprabhaḥ|| 29||
SP1030301: bhrāmayitvā muhūrtaṃ ca sahāśvaiḥ saha sāyakaiḥ|
SP1030302: bhūmāvutkṣipya cikṣepa babhañja ca punaḥ padā|
SP1030303: rathe sthitau ca tau daityau punarmūrdhnanyatāḍayat|| 30||
SP1030311: tau hatāvatisaṃkruddhau gade codyamya vegitau|
SP1030312: varāhaṃ mūrdhni yugapatsamāhatya vinedatuḥ|| 31||
SP1030321: tābhyāṃ sa balavānkruddho hastābhyāṃ raktalocanaḥ|
SP1030322: gade jagrāha yattābhyāṃ balādeva mṛgeśvaraḥ|| 32||
SP1030331: tato 'caranmaṇḍalāni vividhāni janārdanaḥ|
SP1030332: gadāviśāradaḥ samyagvicitrāṇi bahūni ca|| 33||
SP1030341: ākṣiptamatha vikṣiptamavākṣiptaṃ ca maṇḍalam|
SP1030342: utkṣiptamatha nikṣiptaṃ visṛṣṭaṃ dhāvitaṃ tathā|| 34||
SP1030351: parāvṛttaṃ nivṛttaṃ ca ardhacandramathāpi ca|
SP1030352: viṣṭabdhaṃ codyataṃ caiva haṃsodbhramaṇameva ca|| 35||
SP1030361: gadāviśāradaḥ samyagbhramitvā maṇḍalāni ca|
SP1030362: gadāmupari cikṣepa so 'ndhakāya vinādayan|
SP1030363: aparāṃ vipracitteśca balavānnandivardhanaḥ|| 36||
SP1030371: te gade tau mahāvegau dānavau sudurāsadau|
SP1030372: vañcayitvā raṇe bhūyo varāhaṃ prati dānavau|
SP1030373: ādhāvitau yathā deśamutpātau vegitāviva|| 37||
SP1030381: tayorāpatatoreva varāho 'sau mahābalaḥ|
SP1030382: muṣṭināndhakamāhatya vipracittiṃ padāvadhīt|| 38||
SP1030391: andhakastasya muṣṭiṃ taṃ vipracittiḥ padaṃ ca ha|
SP1030392: kruddhau jagṛhaturdaityau hatastvamitivādinau|
SP1030393: nādayānau yathākāle kṛṣṇāviva balāhakau|| 39||
SP1030401: sa gṛhītastadā tābhyāṃ mahātmā surasattamaḥ|
SP1030402: utpapāta viyadvegātpakṣirāḍiva kāśyapaḥ|| 40||
SP1030411: viyatstho vibabhau daityāvudvahansa mṛgeśvaraḥ|
SP1030412: garutmāniva pakṣīśo bhakṣārthaṃ gajakacchapau|| 41||
SP1030421: vinadya sa tadākāśe vidhūya ca karau balī|
SP1030422: pādaṃ caivābhicikṣepa tau daityau bhujagāviva|| 42||
SP1030431: tau kṣiptau petaturvyāsa dānavau yuddhadurmadau|
SP1030432: dārayānau mahīṃ ghorāvaśanī khāccyutāviva|| 43||
SP1030441: asāvapi ca deveśo varāho nandivardhanaḥ|
SP1030442: rathānvai sarvadaityānāṃ cūrṇayāmāsa vīryavān|| 44||
SP1030451: gṛhītvā kūbare kaṃcitsa cikṣepa mahārṇavam|
SP1030452: kaṃcitpadā samāhatya pāṃsusāyujyamānayat|| 45||
SP1030461: kaṃcidrathaṃ rathenaiva padātiṃ ca padātinā|
SP1030462: gajaṃ gajena cāhatya sa ninye yamasādanam|| 46||
SP1030470: sanatkumāra uvāca|
SP1030471: te 'tha vidrāvitāḥ sarve lajjāṃ paramikāṃ gatāḥ|
SP1030472: daityadānavaśārdūlā vinivṛttā yathābalāḥ|| 47||
SP1030481: ekena sarve vijitāsurendrāḥ parasparaṃ vīkṣya mukhāni śūrāḥ|
SP1030482: vrīḍānvitāstaṃ punareva devaṃ varāhadehaṃ parivārya tasthuḥ|| 48||
SP1039999: iti skandapurāṇe tryuttaraśato 'dhyāyaḥ||