Skandapurāṇa Adhyāya 102

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1020010: sanatkumāra uvāca|
SP1020011: atha tānnihatānsarvānvarāheṇābhivīkṣya tu|
SP1020012: ekaḥ kṛcchrādvinirmukto hyaśmakaṃ puramāgamat|| 1||
SP1020021: sa gatvā tatsabhādvārimidaṃ vacanamabravīt|
SP1020022: muktakeśo rajodhvasto rudhireṇābhisaṃplutaḥ|| 2||
SP1020031: nivedayata bho daityā dānavendrāya dhīmate|
SP1020032: ye te gatā mṛgendraṃ taṃ draṣṭuṃ hyasurapuṃgavāḥ|
SP1020033: te hatāstena vikramya sarva eva diteḥ sutāḥ|| 3||
SP1020041: mā pramādamagā daitya māvamaṃsthā mṛgeśvaram|
SP1020042: mā ca kālaṃ pratīkṣadhvaṃ mṛgaṃ taṃ mā vijānata|
SP1020043: mahānasau na saṃdeho jetuṃ śakyo na dānavaiḥ|| 4||
SP1020050: sanatkumāra uvāca|
SP1020051: tasya tadvacanaṃ śrutvā hiraṇyākṣo mahāsuraḥ|
SP1020052: svayamevābhisaṃkruddha utpapāta tadāsanāt|| 5||
SP1020061: sendraketurivottasthau payoda iva connadan|
SP1020062: bhṛkuṭīdūṣitamukhaḥ sadhūmo 'gniriva jvalan|| 6||
SP1020071: athotthitaṃ tadā daityā vipracittiśca dānavaḥ|
SP1020072: praṇamyocustadā daityamidaṃ ślakṣṇapadākṣaram|| 7||
SP1020081: tvaṃ rājā sarvadaityānāṃ bhūtānāṃ ca jayāvahaḥ|
SP1020082: tiṣṭhatsvasmāsu nodyantuṃ svayameva tvamarhasi|| 8||
SP1020091: vayaṃ taṃ saha devaiśca ye ca tasyābhirakṣiṇaḥ|
SP1020092: hatvā māṃsaṃ mahārāja chitvā tasyānayāmahe|| 9||
SP1020101: ādityānāṃ sarudrāṇāṃ vasūnāmaśvinorapi|
SP1020102: bhṛgūṇāṃ pitṛbhiḥ sārdhaṃ tathaivāṅgirasāmapi|| 10||
SP1020111: viśvedevāśca ye kecitsādhyā devāstathaiva ca|
SP1020112: yakṣāṇāṃ rākṣasānāṃ ca piśācānāṃ mahoragaiḥ|| 11||
SP1020121: gandharvapakṣiṇāṃ caiva mānuṣānāṃ ca dānava|
SP1020122: udyuktānāṃ samṛtyūnāṃ lokapālaiḥ sahaiva ca|| 12||
SP1020131: śaktā nivāraṇe daityā vadhe caiva durātmanām|
SP1020132: nigrahe ca yathākālaṃ svayaṃ mā tvamito gamaḥ|
SP1020133: hatamasmābhirudyuktaiḥ paśyādya ditinandana|| 13||
SP1020141: ājñāpayati no yatra rājā svāmī prajeśvaraḥ|
SP1020142: tadvayaṃ śirasā sarve kariṣyāma na saṃśayaḥ|| 14||
SP1020151: yadaśaktā vayaṃ kāryaṃ sarve 'pyasurapuṃgava|
SP1020152: kartuṃ tasya bhavānkartā mā naḥ paśya parāniva|| 15||
SP1020161: mṛgārthe danudaityānāṃ svayaṃ rājā mahābalaḥ|
SP1020162: nirgato nāsti daityānāṃ vakṣyante balamityuta|| 16||
SP1020170: sanatkumāra uvāca|
SP1020171: tataḥ sa rājā daityānāṃ sarvāneva samādiśat|
SP1020172: kāle jaladharānindro yathā bhinnāñjanatviṣaḥ|| 17||
SP1020181: ājñāṃ tasya gṛhītvaiva te 'pi daityā mudānvitāḥ|
SP1020182: saṃnahyanta mahāmāyā vāhanāni ca bhejire|| 18||
SP1020191: prahlādaścānuhlādaśca śinirbāṣkala eva ca|
SP1020192: jambhaḥ kujambho vātāpī ilvalo 'tha virocanaḥ|| 19||
SP1020201: balirbāṇaśca vātaśca śambhuḥ kāśyapa eva ca|
SP1020202: śambaraśca mahāmāyaḥ kālaśambara eva ca|| 20||
SP1020211: pradīptaścāsilomā ca silikaścaiva dānavaḥ|
SP1020212: śarabhaḥ śalabhaścaiva dhundhurmūkaśca dānavaḥ|| 21||
SP1020221: śatodaraśca vikhyātastathaivānyo hradodaraḥ|
SP1020222: tāraśca tārakaścaiva mayo hālaśca viśrutaḥ|| 22||
SP1020231: ajako namuciścaiva vyaṃsaḥ kārtasvanaḥ kubhaḥ|
SP1020232: ilvakaḥ pilvakaścaiva vipākaḥ pāka eva ca|| 23||
SP1020241: hastī duryodhanaścaiva vipracittiśca dānavaḥ|
SP1020242: hayagrīvo muraścaiva narakaḥ kuṇḍa eva ca|| 24||
SP1020251: śakunirvṛṣaparvā ca śataketurmahāravaḥ|
SP1020252: makaraścaiva rāhuśca svarbhānuḥ kāla eva ca|| 25||
SP1020261: virādhaśca kabandhaśca dundubhiḥ śatadundubhiḥ|
SP1020262: sālvo drumaśca dvāvetau mayūragrīva eva ca|| 26||
SP1020271: kālanemī meghanādo mahāvīryaḥ sa cāndhakaḥ|
SP1020272: mahiṣānandaśamakā āṭiśca baka eva ca|| 27||
SP1020281: tato dānavaśārdūlā mahāmāyā mahābalāḥ|
SP1020282: sarve mahāstraviduṣo labdhalakṣāśca saṃyuge|| 28||
SP1020291: rathairhayairgajaiścaiva tathaivānye padātayaḥ|
SP1020292: jagmurvarāhaṃ taṃ vyāsa hantuṃ devā ivāsuram|| 29||
SP1020301: sa cāpi hi mahātejā varāho nandivardhanaḥ|
SP1020302: stūyamānastathātmasthairmunibhirvegavānbalī|| 30||
SP1020311: hatvā tānkiṃkarānsarvānaśmakaṃ puramāgamat|
SP1020312: garjamāno yathā megho yugānte vṛṣṭisarjanaḥ|| 31||
SP1020321: sa gatvā taṃ tadā vyāsa puraṃ lokamayaḥ prabhuḥ|
SP1020322: avasavyaṃ parāvṛtya dakṣiṇaṃ dvāramāgamat|| 32||
SP1020331: dakṣiṇadvāribhistatra dānavairbahubhirbhṛśam|
SP1020332: kṛto halahalāśabdo nagaraṃ yena kopitam|| 33||
SP1020341: so 'pi bhittvā śataghnīśca kavāṭaṃ kūṭamudgarān|
SP1020342: kālacakrāṇi yantrāṇi so 'vacūrṇayadavyayaḥ|| 34||
SP1020351: athājagmurbhṛśāviṣṭāste dānavamahārathāḥ|
SP1020352: śastravarṣeṇa cogreṇa chādayanto mṛgeśvaram|| 35||
SP1020361: sa śaktitomaraśatairbhindipālaiśca tāḍitaḥ|
SP1020362: dvāraṃ tyaktvābhinirgamya samāṃ bhūmimapāśritaḥ|| 36||
SP1020371: te 'pi taṃ bhagnamityeva vijānanto 'surāstathā|
SP1020372: pṛṣṭhato 'nuyayurvyāsa takṣayanto varāyudhaiḥ|| 37||
SP1020381: sa takṣyamāṇaḥ śaravṛṣṭitomarairmahāgadābhirmusalairayomukhaiḥ|
SP1020382: tadābhiniḥsṛtya diteḥ sutānasāvayodhayaddevagaṇairadhiṣṭhitaḥ|| 38||
SP1029999: iti skandapurāṇe dvyuttaraśato 'dhyāyaḥ||