Skandapurāṇa Adhyāya 101

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1010010: sanatkumāra uvāca|
SP1010011: te 'bhinirgatya vegena daṃśitā daityadānavāḥ|
SP1010012: varāhaṃ prati saṃjagmurmṛgāḥ siṃhamivāturāḥ|| 1||
SP1010021: te varāhadṛśā tena nīyamānāsureśvarāḥ|
SP1010022: ābhānti vyāsa saṃbaddhāḥ prokṣitāḥ paśavo yathā|| 2||
SP1010031: tānnihatya kṛtāntena mṛtyunā cāvapāśitān|
SP1010032: nināya sa tadā daityānpaśūniva yathā naraḥ|| 3||
SP1010041: gatvā te yojanānyaṣṭau uttīrṇaṃ sāgarāmbhasaḥ|
SP1010042: varāhaṃ dadṛśuḥ sarve siṃhaṃ kṣudramṛgā iva|| 4||
SP1010051: te muhūrtaṃ nirīkṣyainaṃ parivavruḥ samantataḥ|
SP1010052: visphārayantaścāpāni saṃkruddhā daityadānavāḥ|| 5||
SP1010061: tānāpatata evātha nirīkṣya sa samantataḥ|
SP1010062: varāhendrastadā daityānprāhedaṃ sumahābalaḥ|| 6||
SP1010070: varāha uvāca|
SP1010071: kiṃ mā yūyaṃ diteḥ putrā abhidravata sarvaśaḥ|
SP1010072: dūṣayāmi na vaḥ kiṃcidasuhṛnna ca vo hyaham|| 7||
SP1010081: athaivaṃvādinaṃ daityā varāhaṃ taṃ suvismitāḥ|
SP1010082: papracchuḥ parivāryaiva sarve ditisutāstadā|| 8||
SP1010091: kastvaṃ varāharūpīha tīrtvā sāgaramūrjitaḥ|
SP1010092: ihāgataḥ kimarthaṃ vā kva vā gantavyamityuta|| 9||
SP1010101: teṣāṃ tadvacanaṃ śrutvā varāho 'sau mahāmanāḥ|
SP1010102: uvāca dānavānsarvāṃstadā jaladanisvanaḥ|| 10||
SP1010111: varāho 'haṃ yathā daityāstādṛgrūpaṃ ca paśyata|
SP1010112: pracārārthamimaṃ deśamāgato 'smi na saṃśayaḥ|| 11||
SP1010121: hṛtabhāryo 'hamanyena vimanā daityapuṃgavāḥ|
SP1010122: paryaṭaṃstasya duṣṭasya cintayāmi parigraham|| 12||
SP1010130: dānavā ūcuḥ|
SP1010131: nāyaṃ pracāro yuṣmākaṃ daityānāmayamālayaḥ|
SP1010132: anādṛtya kathaṃ daityānimaṃ deśamupāgataḥ|| 13||
SP1010141: vayaṃ tvādya vadhiṣyāmaḥ sarve mṛgakulādhama|
SP1010142: hatvā ca te nayiṣyāma sarve daityeśvaraṃ prati|| 14||
SP1010151: tataste dānavāḥ sarve tamāyudhavarairbhṛśam|
SP1010152: nijaghnuḥ parvataṃ yadvanmeghā vṛṣṭyā samunnatāḥ|| 15||
SP1010161: balavānso 'pi devātmā varāhaḥ sumahābalaḥ|
SP1010162: vadhyamāno 'pi tāndaityānidaṃ vacanamabravīt|| 16||
SP1010171: na hyatra bhavatāṃ kiṃcidalpamapyasurottamāḥ|
SP1010172: aparādhaṃ cakārāhaṃ na kariṣye karomi vā|| 17||
SP1010181: kimarthaṃ māṃ śitaiḥ śastrairghnata sarve yathā param|
SP1010182: na hi no vairamastīha na ca kāryaṃ mayā hi vaḥ|| 18||
SP1010191: atha māṃsena kṛtyaṃ vo tato mā ghnata dānavāḥ|
SP1010192: yathāprāṇaṃ śitaiḥ śastrairyuṣmatto na hi me bhayam|| 19||
SP1010201: etau karau prasāryāhaṃ saṃsthito ditinandanāḥ|
SP1010202: yadā bhavantaḥ sthāsyanti tadā hantāsmi vaḥ sakṛt|| 20||
SP1010211: adya vetsyata daiteyā mṛgāṇāmapi yadbalam|
SP1010212: mattā yūyaṃ surāñjitvā tanmadaṃ nāśayāmi vaḥ|| 21||
SP1010220: sanatkumāra uvāca|
SP1010221: tataḥ sa bhagavānvyāsa śakradhvajanibhau bhujau|
SP1010222: prasārya tasthāvudyanvai bhagavāniva bhāskaraḥ|| 22||
SP1010231: te 'pi tadvacanaṃ śrutvā dānavāḥ krodhamūrchitāḥ|
SP1010232: nijaghnurbhṛśamāyastā nānāśastrāstrapāṇayaḥ|| 23||
SP1010241: meghairiva mahāvāyurgarutmānbhujagairiva|
SP1010242: mṛgairiva yathā vyāghraḥ śaśaiḥ siṃhaśiśuryathā|
SP1010243: haviṣevānalo dīpto gajo gomāyubhiryathā|| 24||
SP1010251: tathā sa bhagavānvyāsa varāho nandivardhanaḥ|
SP1010252: tairardyamāno 'gaṇayaṃstasthāvacalasaṃnibhaḥ|| 25||
SP1010261: sa yadā taiḥ śaraiścaiva gadāmusalakampanaiḥ|
SP1010262: bhindipālairbhusuṇḍībhiḥ karavālairayomukhaiḥ|| 26||
SP1010271: etaiścānyaiśca bahubhirvadhyamāno mṛgeśvaraḥ|
SP1010272: adṛśyo vibabhau sarve tadā te harṣitā bhṛśam|| 27||
SP1010280: sanatkumāra uvāca|
SP1010281: teṣāṃ ninadatāṃ vyāsa varāho nandivardhanaḥ|
SP1010282: śastrakūṭādviniṣkramya śirāṃsi samapothayat|| 28||
SP1010291: karābhyāṃ caraṇābhyāṃ ca daṃṣṭrābhiśca vidārayan|
SP1010292: tanmuktairāyudhaiścāpi cicchedānyānrarāsa ca|| 29||
SP1010301: te sarve karacaraṇaiḥ svamuktaśastrairdaṃṣṭrābhirnakhamukhadāritāstathaiva|
SP1010302: saṃkṣīṇā bahubhirivopabhujyamānā dravyāṇāmatinicayāḥ sadā mahāntaḥ|| 30||
SP1019999: iti skandapurāṇa ekottaraśato 'dhyāyaḥ||