Skandapurāṇa Adhyāya 100

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1000010: sanatkumāra uvāca|
SP1000011: tasminbhaye samāpanne vināśabhayasūcakāḥ|
SP1000012: hiraṇyākṣapure ghorā utpātā hyabhavaṃstadā|| 1||
SP1000021: aṭṭālakā viśīryante devatārcā hasanti ca|
SP1000022: śivā nadanti daityānāṃ gṛheṣu ca sabhāsu ca|| 2||
SP1000031: akasmāccābhavattatra paurāṇāṃ bhairavo ravaḥ|
SP1000032: pādapāśca vinā vātaṃ patantyunmūlitā bhuvi|
SP1000033: bhāskaraśca kabandhāndho yuddhaṃ cāpyatra dṛśyate|| 3||
SP1000040: sanatkumāra uvāca|
SP1000041: etānyanyāni ca tadā nimittāni mahānti ca|
SP1000042: saṃlakṣya rājā daityānāmasurānidamabravīt|| 4||
SP1000051: nimittānyabhilakṣyante mahāntyasurapuṃgavāḥ|
SP1000052: naiva tānyanimittāni dṛśyate ca bhayaṃ mahat|| 5||
SP1000061: hṛtarājyāśca deveśā na te sthāsyanti niṣkriyāḥ|
SP1000062: nūnaṃ te kiṃcidāśritya kurvanti samaraṃ prati|| 6||
SP1000070: sanatkumāra uvāca|
SP1000071: tasya tadvacanaṃ śrutvā prahlādo 'surasattamaḥ|
SP1000072: praṇamya pitaraṃ samyagidaṃ vacanamabravīt|| 7||
SP1000080: prahlāda uvāca|
SP1000081: suto 'haṃ tava daityendra pitā tvaṃ mama dharmataḥ|
SP1000082: na tavāsmadvidhe buddhirādheyā daityasattama|| 8||
SP1000091: tathāpi tu vayaṃ prītyā icchanto rājyamakṣayam|
SP1000092: vakṣyāmo bālabhāvena tannaḥ saṃsmartumarhasi|| 9||
SP1000101: adya rātrau mayā svapne dṛṣṭo 'sau nararūpavān|
SP1000102: varāharūpī saṃgatya bhavantaṃ nigṛhītavān|
SP1000103: na tathā tadyathā syāddhi tathā tvaṃ samyagācara|| 10||
SP1000110: hiraṇyākṣa uvāca|
SP1000111: evametanna saṃdeho bhavāndharmarataḥ sadā|
SP1000112: dṛṣṭavāṃstadyathātattvamevametanna saṃśayaḥ|| 11||
SP1000121: ahamadya gataḥ svapne tryambakasya niveśanam|
SP1000122: nataṃ ca māmidaṃ prāha bhagavāngovṛṣadhvajaḥ|| 12||
SP1000131: etāvadbhavato daitya rājyamindratvameva ca|
SP1000132: yacchemāṃ tvaṃ śriyaṃ putra sahasrākṣāya suprabhām|| 13||
SP1000141: śanairāchidya muktvaiva mukuṭaṃ hārameva ca|
SP1000142: keyūre cāṅgade caiva khaḍgaṃ rucakameva ca|| 14||
SP1000151: kaṭake śāsanaṃ caiva dukūlaṃ ca tathottamam|
SP1000152: anicchato me saṃgṛhya śakrāya pradadau tadā|| 15||
SP1000161: tato māṃ bhagavānāha matsamīpe tvayā sadā|
SP1000162: kālyaṃ prabhṛti vastavyaṃ divye rājye na daityapa|| 16||
SP1000171: yadetaddhi mayā dṛṣṭaṃ naitanmithyā bhaviṣyati|
SP1000172: sarvathā nāsti daityānāṃ mayaikena bhayaṃ tviha|| 17||
SP1000180: sanatkumāra uvāca|
SP1000181: tasya tadvacanaṃ śrutvā daityāḥ sarve tadābruvan|
SP1000182: mithyaitatsvapnagatayo mithyā rājanprakīrtitāḥ|| 18||
SP1000191: andhako 'sahito 'smābhiryotsyate devataiḥ saha|
SP1000192: yo 'vadhyaḥ sarvabhūtānāṃ balavānajitaśca ha|| 19||
SP1000201: tamāśritya vayaṃ sarve yotsyāmo vijvarāḥ sukham|
SP1000202: mā yudhyatu bhavānsārdhaṃ suraiḥ surabalārdanaḥ|| 20||
SP1000211: tvayi prāṇāḥ sthitāḥ sarve daityānāṃ dānavaiḥ saha|
SP1000212: tvayi jīvati jīvāma tvaṃ cennāsi kuto vayam|
SP1000213: tyaktvā vā svapuraṃ sarve praviśāma mahodadhim|| 21||
SP1000220: sanatkumāra uvāca|
SP1000221: teṣāṃ tadvacanaṃ śrutvā hiraṇyākṣo mahāsuraḥ|
SP1000222: prahasya tānidaṃ samyaguvāca vadatāṃ varaḥ|| 22||
SP1000231: sraṣṭāyaṃ sarvabhūtānāṃ dātā hartā tathaiva ca|
SP1000232: vihitaṃ tena yatpūrvaṃ tatkuryātko 'nyathā punaḥ|| 23||
SP1000241: yadi mṛtyuravaśyaṃ me vihitastena dānavāḥ|
SP1000242: ayudhyamānamāsīnametyāsau māṃ haniṣyati|| 24||
SP1000251: vīkṣadhvaṃ tanmama sthānaṃ sarva evāsurottamāḥ|
SP1000252: yatra tiṣṭhantamabhyetya na māṃ mṛtyurnayiṣyati|| 25||
SP1000261: athavā naiva mṛtyurme vihitastena dānavāḥ|
SP1000262: yudhyamānaṃ yathāpūrvaṃ naiva māṃ sa nayiṣyati|| 26||
SP1000271: mādṛśaḥ kathamevaitatkuryātsadbhirvigarhitam|
SP1000272: bāle mṛtyuṃ samāveśya tataścātmābhirakṣaṇam|| 27||
SP1000281: raṇe ripūṇāṃ kadanaṃ kṛtvaikaścāpyanekaśaḥ|
SP1000282: pṛṣṭhaṃ dadyātpunasteṣāṃ mādṛśo dānaveśvarāḥ|| 28||
SP1000290: vipracittiruvāca|
SP1000291: devā hyanekaśaḥ sarve jitā naṣṭāśca sarvaśaḥ|
SP1000292: punaścāyānti na yathā tathā sarve yatāmahe|| 29||
SP1000300: hiraṇyākṣa uvāca|
SP1000301: amaraṃ devatā jñātvā svamātmānaṃ sudurbalāḥ|
SP1000302: jīvantaḥ sucireṇāpi bhūyo lapsyāmahe vayam|
SP1000303: rājyamevaṃ vijānanto vipalāyanti nityaśaḥ|| 30||
SP1000311: asmākamamaratvaṃ tu naivāstyasurottamāḥ|
SP1000312: naṣṭānāmapyato 'smākaṃ jīvitāśā na vidyate|
SP1000313: tasyāmasatyāṃ paśyāma yatprāptaṃ taddhi no varam|| 31||
SP1000321: mā kṛthā naśane buddhiṃ yuddhe buddhiḥ sthirā mama|
SP1000322: suyuddhena raṇe prāṇā yāntu mā klīvavaddhi naḥ|| 32||
SP1000330: sanatkumāra uvāca|
SP1000331: teṣāmevaṃ tu vadatāṃ sabhāyāṃ suravidviṣām|
SP1000332: vegaśvāsābhisaṃrabdho dānavaḥ pratyadṛśyata|| 33||
SP1000341: tiryaksaṃtrāsita iva mṛgarājena nirjane|
SP1000342: karīva siṃhapātena garuḍeneva pannagaḥ|| 34||
SP1000351: tadā sa baddhamuṣṭiśca diśaḥ sarvā vilokayan|
SP1000352: vegena niśvasangatvā dvāri dvāḥsthamabhāṣata|| 35||
SP1000360: dānava uvāca|
SP1000361: āvedaya sabhāpāla rājñe prāpto nalaḥ svayam|
SP1000362: sāgarārakṣikaḥ kṣipramakālaṃ śīghramucyate|| 36||
SP1000371: tataḥ prahasya taṃ dvāḥsthaḥ sabhāpāleti bhāṣitaḥ|
SP1000372: uvāca mā bhīrbhavatu kuto bhayamihāsura|| 37||
SP1000381: neha siṃho 'sti coro vā nānyaḥ śvāpada-m-ityapi|
SP1000382: na gāvaḥ paśavo 'nye vā bhayaṃ tyaja samāśvasa|| 38||
SP1000391: sa tathā tena saṃproktaḥ śāntaścāsurapuṃgavaḥ|
SP1000392: kruddhaḥ śabdaṃ tadā cakre mahāntaṃ nādayandiśaḥ|| 39||
SP1000401: te 'bhigamya tadā vyāsa rājānaṃ dānaveśvaram|
SP1000402: ūcureṣa kimapyadya dṛṣṭaṃ kathayate 'suraḥ|| 40||
SP1000411: sa rājā samyagāśvāsya daityamenaṃ mahāyaśāḥ|
SP1000412: dānavānāṃ hitārthāya pṛcchasva ditinandanaḥ|| 41||
SP1000421: teṣāṃ sa rājā viprendra dānavānāṃ mahābalaḥ|
SP1000422: śrutvā taṃ dānavaṃ vyāsa idaṃ vacanamabravīt|| 42||
SP1000431: bhayaṃ naśyatu te daitya matsamīpe 'bhivartataḥ|
SP1000432: brūhi sarvaṃ yathādṛṣṭaṃ samāśvasya yathātatham|| 43||
SP1000440: sanatkumāra uvāca|
SP1000441: tataḥ sa dānavo vyāsa rājānaṃ vigatajvaraḥ|
SP1000442: praṇamya prāñjalirvākyamidaṃ samyaguvāca ha|| 44||
SP1000451: nityaṃ jayatu no rājā dānavānāṃ sukhāvahaḥ|
SP1000452: naśantu vidviṣaḥ sarve ye 'smākamahitāvahāḥ|| 45||
SP1000461: ahaṃ tavājñayā rājanvicarāmi dine dine|
SP1000462: sāgarāntaṃ mahārāja puruṣaiḥ saha saṃgataḥ|| 46||
SP1000471: so 'dya paśyāmyahaṃ tatra vārāhaṃ daityapuṃgava|
SP1000472: meruśṛṅgapratīkāśaṃ jvalantamiva pāvakam|| 47||
SP1000481: tasya gātreṣu dṛśyanti sūkṣmarūpadharāḥ sthitāḥ|
SP1000482: sarve surā mahārāja ṛṣayaśca tapodhanāḥ|| 48||
SP1000491: mahābalastvaṃ rājendra devānāṃ bhayadaḥ sadā|
SP1000492: tvatto 'pi sumahānbhīmastādṛgrūpo na vidyate|
SP1000493: na dṛṣṭo na śruto vāpi vapuṣā daityapuṃgava|| 49||
SP1000501: ahaṃ tenāhato dṛṣṭyā nyapataṃ bhūtale bhṛśam|
SP1000502: srastahārāmbaro bhītaḥ kuliśeneva tāḍitaḥ|| 50||
SP1000511: ye mamānucarāścāsandānavā bhīmavikramāḥ|
SP1000512: te sarve tasya vegena patitā gatajīvitāḥ|| 51||
SP1000521: sa eṣo 'bhyeti rājendra tavaiva nagaraṃ prati|
SP1000522: cālayanvasudhāṃ sarvāṃ kṣobhayansāgarāṃstathā|
SP1000523: jalecarāṃśca daityendra jīvitairviprayojayan|| 52||
SP1000530: sanatkumāra uvāca|
SP1000531: tasya tadvacanaṃ śrutvā prahlādo 'surasattamaḥ|
SP1000532: uvāca daityarājānamidaṃ vacanakovidaḥ|| 53||
SP1000540: prahlāda uvāca|
SP1000541: yādṛśaṃ tadvarāhasya tasya rūpaṃ tvayā śrutam|
SP1000542: sarvadevamayaṃ rājanvarāho 'prākṛto mataḥ|| 54||
SP1000551: tasmāttathā vidhātavyaṃ yathā no na sa mohayet|
SP1000552: adhitiṣṭheta daityendra māciraṃ tadvidhīyatām|| 55||
SP1000561: suvyaktaṃ brahmaṇā tasya cakralāṅgaladhāriṇaḥ|
SP1000562: sarvadevamayaṃ rūpaṃ vārāhamidamīhitam|| 56||
SP1000571: bhavānavadhyaḥ sarveṣāṃ devānāṃ dānaveśvaraḥ|
SP1000572: aśaktaistairiyaṃ māyā sṛṣṭā vai na tadanyathā|| 57||
SP1000580: sanatkumāra uvāca|
SP1000581: tasya tadvacanaṃ śrutvā hiraṇyākṣaḥ pratāpavān|
SP1000582: uvāca daityāndanujānidaṃ vacanamarthavat|| 58||
SP1000590: hiraṇyākṣa uvāca|
SP1000591: yadyadya bhrātṛhantā me ihāyāti durātmavān|
SP1000592: pūrṇaḥ syādadya sucirādyo me hṛdi manorathaḥ|| 59||
SP1000601: adyāhaṃ taṃ durātmānaṃ bhrātṛhantāramāhave|
SP1000602: chitvā chitvā kariṣyāmi baliṃ paśupateḥ śubhām|| 60||
SP1000611: adya tasya vicitrākṣaṃ śiraḥ kāyātsakuṇḍalam|
SP1000612: utkṛtya daityā dāsyāmi rudrāya paramātmane|| 61||
SP1000621: mayā nāsāditaḥ pūrvaṃ tasminyuddhe sa keśavaḥ|
SP1000622: adyāhaṃ taṃ samāsādya neṣyāmi yamasādanam|| 62||
SP1000631: adya tasminhate sarve nirāśā bhayavihvalāḥ|
SP1000632: mamaiva kāryatāṃ gatvā devā yāsyanti dāsatām|| 63||
SP1000640: sanatkumāra uvāca|
SP1000641: tataḥ sa dānavāñchūrāndaityāṃśca sumahābalān|
SP1000642: uvāca nāmnā vikhyātānkiṃkarānnāma dānavān|| 64||
SP1000651: daśa tāni sahasrāṇi gacchadhvaṃ taṃ mahābalāḥ|
SP1000652: jānīta ko 'yamityevaṃ tato yāsyāmyahaṃ svayam|| 65||
SP1000661: te tathoktā mahāmāyā hṛṣṭāḥ sarve vinirgatāḥ|
SP1000662: baddhagodhāṅgulitrāṇāḥ saṃnaddhāstu padātayaḥ|| 66||
SP1000671: te hemacitrāmbarahārasūtrā mahābalā dānavadaityaputrāḥ|
SP1000672: vinādayanto bahudhātikopitā yathaiva nāgāḥ saviṣā viniryayuḥ|| 67||
SP1009999: iti skandapurāṇe śatatamo 'dhyāyaḥ||