Skandapurāṇa Adhyāya 99

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP0990010: sanatkumāra uvāca|
SP0990011: sa saṃprayāto dharmātmā nardamāno yathā ghanaḥ|
SP0990012: sarvalokamayo devo varāho nandivardhanaḥ|
SP0990013: apaśyatsāgaraṃ caiva saṃprāpyātimahābalaḥ|| 1||
SP0990021: nardamānaṃ yathā meghaṃ līyamānaṃ mṛgendravat|
SP0990022: nartakīmiva nṛtyantaṃ valgantaṃ caiva yodhavat|| 2||
SP0990031: maṇḍalairbahubhiścitraiścarantaṃ vasudhāṃ tathā|
SP0990032: niyuddhakuśalaṃ yadvadgadāyuddhaviśāradam|| 3||
SP0990041: tadā taṃ bahudhā citramapaśyannandivardhanam|
SP0990042: - - - - - - - -  - - - - - - - -|| 4||
SP0990051: sa tamargheṇa deveśaṃ sarvalokamayaṃ vibhum|
SP0990052: pūjayāmāsa devāśca ṛṣayo ye ca saṃgatāḥ|| 5||
SP0990061: sa jayāya pragṛhyainamanumānya mahodadhim|
SP0990062: nivartya sarvabhūtāni praviveśa mahārṇavam|| 6||
SP0990071: vigāhamānaḥ sakrīḍamarṇavaṃ vibabhau vibhuḥ|
SP0990072: saraḥ sumahadāsādya yathā matto mahāgajaḥ|| 7||
SP0990081: saṃpraviśya sudūraṃ ca so 'dṛśyaḥ samapadyata|
SP0990082: bhūmilekhāvṛtaḥ sūryo yathā saṃpūrṇamaṇḍalaḥ|| 8||
SP0990091: tato 'ntarjalamāviśya kṣobhayāno mahārṇavam|
SP0990092: jalacandrakavadvyāsa adṛśyata jalaukasaiḥ|| 9||
SP0990101: timīṃstimiṃgilāṃścaiva timiṃgilagilānapi|
SP0990102: tathā vai tadgilānanyānhastino gardabhānapi|| 10||
SP0990111: makarāṃścaiva śaṅkhāṃśca tathaivāśvamukhānapi|
SP0990112: tathā vai pakṣisaṃkāśānmānuṣānapi cāparān|| 11||
SP0990121: rathacakraprakārāṃśca siṃhavyāghramukhānapi|
SP0990122: śarabharkṣaviḍālāsyānmatsyānbahuvidhāṃstathā|
SP0990123: trāsayansa mahātejā jagāma sumahābalaḥ|| 12||
SP0990131: kutūhalātsamāviśya kecidāghrāya caiva hi|
SP0990132: naśyanti matsyā dīptāsyāḥ śataśo 'tha sahasraśaḥ|| 13||
SP0990141: sa pradakṣiṇamāvṛtya divyaṃ hayaśiraḥ śubham|
SP0990142: kṣaṇānmainākamadhyena gatvā bhogavatīmapi|| 14||
SP0990151: varuṇasya purīṃ gatvā payonāthasya dhīmataḥ|
SP0990152: parjanyaṃ diggajaṃ prāpya kṛtvā cāpi pradakṣiṇam|| 15||
SP0990161: surabhīpuramāsādya gāṃ dṛṣṭvā caiva suprabhām|
SP0990162: yā kṣarantī sadā vyāsa sudhāmamṛtameva ca|| 16||
SP0990171: kṣīrodaṃ tatsaro divyaṃ phenapā yatra te dvijāḥ|
SP0990172: tasminsarasi tatpītvā payo 'mṛtasamaprabham|
SP0990173: pūjitaḥ phenapaiḥ samyaktāṃ rātriṃ tatra so 'vasat|| 17||
SP0990181: uṣitvā tatra so 'gacchatkaṅkasya puramavyayam|
SP0990182: vāsukeśca puraṃ prāpya takṣakasya ca dhīmataḥ|| 18||
SP0990191: tataḥ śeṣasya deveśo viditāṃ ramaṇāmiti|
SP0990192: ramyāṃ manojñāṃ divyāṃ ca svargādapi tāṃ varām|| 19||
SP0990201: śrutvānantaśca taṃ rājā argheṇa ca sa pūjayat|
SP0990202: praṇamya bahumānācca upāmantrayadavyayaḥ|| 20||
SP0990211: mahatkāryamidaṃ deva kartavyaṃ tridivaukasām|
SP0990212: bhūyo vayaṃ tvayā sārdhaṃ kariṣyāma yadīcchasi|| 21||
SP0990221: taṃ pūjayānaṃ madhuhā prītyā paramayā yutaḥ|
SP0990222: uvāca lokakāryasya na vighnaṃ kartumarhasi|
SP0990223: mā ca kālo 'yamudyukto daityasya na bhavediti|| 22||
SP0990230: sanatkumāra uvāca|
SP0990231: tato visṛjya taṃ nāgaṃ rasātalamupāgamat|
SP0990232: tatra sāgarako daityaḥ suprabho 'ntarjalecaraḥ|| 23||
SP0990241: apaśyattaṃ tadāyāntaṃ hiraṇyākṣapuraṃ prati|
SP0990242: gātreṣu devānsūkṣmāṃśca varāhasyānvavaikṣata|| 24||
SP0990251: vismitaścāsya rūpeṇa bhayānnainamupāgamat|
SP0990252: tejasā cāpi viṣṭabdho durātmā tasya so 'suraḥ|| 25||
SP0990261: āvivedayiṣustasmai hiraṇyākṣāya so 'tvarat|
SP0990262: cakre vegaṃ prati puraṃ varāhasya tadāgrataḥ|| 26||
SP0990271: sa yātukāmo ditijādhirājaṃ varāharūpaṃ tamanantamantakam|
SP0990272: jagāma daityāya sa jīvitāntakaṃ yathānilaḥ pracyutadāmamālyavān|| 27||
SP0999999: iti skandapurāṇa ekonaśatatamo 'dhyāyaḥ||