Skandapurāṇa Adhyāya 98

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP0980010: sanatkumāra uvāca|
SP0980011: atha te suraśārdūlāstasya rūpaṃ pracakrire|
SP0980012: viśvakarmāṇamādāya brahmāṇaṃ lokakāraṇam|
SP0980013: saptalokamayaṃ tasya śarīraṃ cakrurīśvarāḥ|| 1||
SP0980021: asthīni parvatāḥ sarve nadyo nāḍyaśca tasya tu|
SP0980022: rudhiraṃ cārṇavāḥ sapta kaphapittānilā guṇāḥ|| 2||
SP0980031: purīṣaṃ cāpyauṣadhayo dharmo retaḥ kṛtaḥ sa tu|
SP0980032: mūtraṃ tasyābhavanmeghā vāyavaḥ sapta koṣṭhagāḥ|| 3||
SP0980041: śirastasyābhavadbrahmā rudro murdhānamāśritaḥ|
SP0980042: lalāṭaṃ tasya dharmo 'bhūnnāsikā vāyurātmavān|| 4||
SP0980051: sūryācandramasau netre śrotre cāpi diśo 'bhavan|
SP0980052: bhruvau tasyābhavaṃstārā ahorātraṃ ca vartmanī|| 5||
SP0980061: āsyaṃ tasyāgnirabhavadvaḍavāmukhasaṃsthitaḥ|
SP0980062: oṣṭhau bhūrantarikṣaṃ ca dantāśca bhujagābhavan|| 6||
SP0980071: catvāryastrāṇi daṃṣṭrāśca kṛtāni sumahānti vai|
SP0980072: astraṃ pāśupataṃ pūrvaṃ dvitīyaṃ cakrameva ca|
SP0980073: brahmadaṇḍaṃ tṛtīyaṃ ca caturthaṃ brahmaṇaḥ śiraḥ|| 7||
SP0980081: jihvā tasyābhavadvidyuttāluḥ khaṃ sarvamucyate|
SP0980082: grīvā tasyābhavaccomā vajraṃ skandhe 'bhavatsthitam|
SP0980083: gaṇḍe cāpi tathādityā hastau rudraiśca nirmitau|| 8||
SP0980091: aṅgulyastasya kīrtiśca lakṣmī siddhirathāpi ca|
SP0980092: yaśo jayaśca dvāvetau śrīrūrjā kāntireva ca|
SP0980093: pravṛttiśca nivṛttiśca nakhāścāstrāṇi sarvaśaḥ|| 9||
SP0980101: yamadaṇḍaḥ kāladaṇḍo mṛtyudaṇḍastathāparaḥ|
SP0980102: rudradaṇḍaśca catvāro bāhupādāḥ kṛtā babhuḥ|| 10||
SP0980111: sādhyā devā urastasya hṛdayaṃ soma ityapi|
SP0980112: udaraṃ tasya bhūtāni mahānti ṛṣisattama|| 11||
SP0980121: nābhistasyābhavanmātā aditirbrahmasattama|
SP0980122: śiśnaṃ prajāpatistasya mitro 'pāne 'bhavatsthitaḥ|| 12||
SP0980131: vasavastasya pārśveṣu tathā dharmaśca pṛṣṭhataḥ|
SP0980132: mṛtyuḥ kālo yamaścaiva hastapādatalāśritāḥ|
SP0980133: aśvinau tasya lāṅgūlaṃ pitaraḥ saṃdhiṣu sthitāḥ|| 13||
SP0980141: niyatiḥ kālapāśaśca kṛtāntakalahāvapi|
SP0980142: vyādhayaścāpi ye keciddṛṣṭiṃ tasya samāśritāḥ|| 14||
SP0980151: yakṣāśca rākṣasāścaiva gandharvāḥ pannagaiḥ saha|
SP0980152: sarve tvacaṃ samāśritya tvagbhūtāḥ samavasthitāḥ|| 15||
SP0980161: tathā sarvāṇi chandāṃsi vedā iṣṭaya eva ca|
SP0980162: romakūpeṣu sarvāṇi tāni tasthuḥ pṛthakpṛthak|| 16||
SP0980171: dānāni niyamāścaiva yamāḥ sarvāśca mātaraḥ|
SP0980172: sthānābhimānino devāḥ paśavaḥ pakṣiṇaśca ha|
SP0980173: sarve romāṇi tasyāsanvarāhasya mahātmanaḥ|| 17||
SP0980181: aṅgulyastasya pādābhyāṃ viśvedevābhavaṃstadā|
SP0980182: bhṛgavo 'ṅgirasaścaiva devāstasyābhavannakhāḥ|
SP0980183: romāntareṣu ṛṣayaḥ sarveṣvaṅgeṣu saṃsthitāḥ|| 18||
SP0980191: evaṃ samabhavadvyāsa varāho nandivardhanaḥ|
SP0980192: sa bhāti tena rūpeṇa dyāṃ bhuvaṃ cāpi saṃspṛśan|| 19||
SP0980201: purā svayaṃbhurbhagavānuddhariṣyanmahīmimām|
SP0980202: sa reje tena rūpeṇa dīptimānmadhusūdanaḥ|
SP0980203: niśāyāmauṣadhīdīpto himavāniva parvataḥ|| 20||
SP0980211: tatastamṛṣayaḥ sarve tapasā mahatā tadā|
SP0980212: svena svenābhisaṃprāpya tejastasyābhyadīpayan|| 21||
SP0980221: sa viṣṇustejasā teṣāmṛṣīṇāṃ paramaujasām|
SP0980222: saṃprajajvāla kālānte yugāntāgnirivāparaḥ|| 22||
SP0980231: nādaṃ kṛtvā ca sumahaccālayāno mahītalam|
SP0980232: uvāca tānṛṣīnsarvānhanmi daityaṃ suradviṣam|| 23||
SP0980241: hatvā taṃ daityarājaṃ vai siṃhaṃ śarabharāḍiva|
SP0980242: mocayiṣye mahīṃ viprāḥ praviśyādya rasātalam|| 24||
SP0980251: svasthāne sthāpayitvā ca datvā rājyaṃ divaukasām|
SP0980252: japadhvaṃ vijayāyādya śivāya ca tapodhanāḥ|| 25||
SP0980260: sanatkumāra uvāca|
SP0980261: tasya tadvacanaṃ śrutvā brahmā lokapitāmahaḥ|
SP0980262: uvāca balamādhatsva daityo 'sau sumahābalaḥ|| 26||
SP0980271: āsthāya yatnaṃ sumahadapramattaḥ sureśvara|
SP0980272: jahi taṃ daityarājaṃ vai kṛcchrametanmataṃ mama|| 27||
SP0980281: na tasya sadṛśo daityo hiraṇyakaśipuḥ purā|
SP0980282: mahābalo 'yaṃ daityendrastapoyogabalānvitaḥ|| 28||
SP0980291: tato devastadā vyāsa bhagavāngovṛṣadhvajaḥ|
SP0980292: suraiḥ sabrahmakaistatra ṛṣibhiśca tapodhanaiḥ|| 29||
SP0980301: uktaḥ praṇamya deveśo viṣṇumāpyāyaya prabho|
SP0980302: tejasā svena sarveśa yathā hanyātsuradviṣam|| 30||
SP0980310: bhagavānuvāca|
SP0980311: tasminkāle sureśānaṃ śārvaṃ tejo 'vyayaṃ harim|
SP0980312: pravekṣyati tato daityaṃ kṣiprameva nihaṃsyati|| 31||
SP0980321: tato brahmā svayaṃ tasya rakṣāṃ cakre mahātmanaḥ|
SP0980322: yathāvattāṃ nibodhādya gadato me śucivrata|| 32||
SP0980330: brahmovāca|
SP0980331: rakṣatu tvāṃ vidhātā ca dhātā ca ṛṣisattamaḥ|
SP0980332: rudraḥ sraṣṭā ca sarveṣāṃ marmāṇi tava yudhyataḥ|| 33||
SP0980341: kāpālī tālaketuśca gandhādhipatireva ca|
SP0980342: rasasyādhipatiścaiva sūkṣmarūpaśca rakṣatu|| 34||
SP0980351: sparśavettā ca yaḥ sūkṣmo nādavāṃśca mahāmanāḥ|
SP0980352: indriyādhipatiścaiva nīlalohita eva ca|| 35||
SP0980361: rakṣatu tvāṃ mahāyogī bījādhipatireva ca|
SP0980362: bījādhiṣṭhānapālaśca cetanāpatireva ca|| 36||
SP0980371: pravṛtteśca nivṛtteśca kālavettā ca yaḥ prabhuḥ|
SP0980372: dharmādharmagatiścaiva kartṝṇāṃ phaladaḥ prabhuḥ|| 37||
SP0980381: guṇānāṃ vṛttido yaśca anapekṣaśca karmasu|
SP0980382: niyamasya ca yaḥ kartā karmavettā ca karmiṇām|
SP0980383: vinā ca karaṇairyasya karaṇārthaḥ pravartate|| 38||
SP0980391: sarvajñaḥ sarvagopaśca adhiṣṭhātā ca yaḥ svayam|
SP0980392: yena nādhiṣṭhitaṃ kiṃcitkathaṃcinnāpi vidyate|| 39||
SP0980401: sarvataḥpāṇipādāntaḥ sarvatokṣiśiromukhaḥ|
SP0980402: sarvataḥśrutimānyaśca sarvatogatiravyayaḥ|
SP0980403: aiśvaryamakṣayaṃ yasya sahajaṃ cākṛtaṃ tathā|| 40||
SP0980411: yaḥ sraṣṭā sarvabhūtānāṃ tattvānāṃ ca mahāyaśāḥ|
SP0980412: saṃsārasyāsya yaḥ kartā tathā caiva nivartakaḥ|| 41||
SP0980421: yaṃ sāṃkhyā nābhijānanti yogino viditāgamāḥ|
SP0980422: tuṣṭo yo jñāyate nityaṃ māyayā mohayanprajāḥ|| 42||
SP0980431: otaprotāni yena sma tattvāni sumahātmanā|
SP0980432: puruṣādīni sarvāṇi yo vyāptaśca na kenacit|| 43||
SP0980441: yamajñātvā na mokṣo 'sti yena baddhamidaṃ jagat|
SP0980442: yenāhaṃ sarvalokānāṃ kṛtaḥ pūrvaṃ prajāpatiḥ|
SP0980443: tvaṃ yajñaścaiva viṣṇuśca yena sṛṣṭaḥ purātanaḥ|| 44||
SP0980451: sa te balaṃ ca sumahadūrjaṃ tejaśca yacchatu|
SP0980452: akāhalatvaṃ sarvatra smṛtiṃ cāstre mahāmanāḥ|| 45||
SP0980461: rakṣāṃ ca sarvaśo devo yudhyataste prayacchatu|
SP0980462: kṛtarakṣo mayā samyaggaccha daityaṃ vināśaya|| 46||
SP0980470: sanatkumāra uvāca|
SP0980471: tatastaṃ stutibhirviprāstasya romāntarasthitāḥ|
SP0980472: astuvanvāgbhiriṣṭābhirdevāśca bahumānataḥ|
SP0980473: sarvāṇi ca jayetyūcurbhūtāni vividhāni ca|| 47||
SP0980481: anāhatāstadā vyomni devadundubhayaḥ śubhāḥ|
SP0980482: vinedustatra divyāśca varāho yatra so 'bhavat|| 48||
SP0980491: surabhīṇāṃ ca puṣpāṇāṃ varāhopari sarvataḥ|
SP0980492: vṛṣṭayaḥ peturatyarthaṃ devānāṃ harṣavardhanāḥ|| 49||
SP0980501: tataḥ siddhiriti proktvā kṛtvā rudrāya vai namaḥ|
SP0980502: japañjayāvahaṃ rudraṃ prayayau varuṇālayam|| 50||
SP0980511: sa sevyamāno ṛṣibhistapodhanaistathā śakuntairbahubhirjayāvahaiḥ|
SP0980512: mṛgaiśca divyairbahubhiḥ pradakṣiṇairjayāya devaḥ prayayau mahārṇavam|| 51||
SP0989999: iti skandapurāṇe 'ṣṭanavatitamo 'dhyāyaḥ||