Skandapurāṇa Adhyāya 97

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP0970010: sanatkumāra uvāca|
SP0970011: tathābhūtaṃ jagaddṛṣṭvā devāste duḥkhapīḍitāḥ|
SP0970012: vairājaṃ lokamāsādya bhūyo 'paśyanpitāmaham|| 1||
SP0970021: te sarve samupāgamya praṇamya ca punaḥ punaḥ|
SP0970022: ūcuste karma daityasya sarva eva suduḥkhitāḥ|
SP0970023: nivedya ca punardevamūcuste lokakāraṇam|| 2||
SP0970031: bhagavanhṛtarājyāśca durbalāśca tathā vibho|
SP0970032: asamarthā vayaṃ tasya sthātuṃ daityasya saṃyuge|
SP0970033: na tatsthānaṃ prapaśyāma yatra tiṣṭhāma vijvarāḥ|| 3||
SP0970040: sanatkumāra uvāca|
SP0970041: teṣāṃ tadvacanaṃ śrutvā bhītānāṃ tridivaukasām|
SP0970042: uvāca bhagavānbrahmā sarvāneva divaukasaḥ|| 4||
SP0970051: na bhetavyaṃ surāstasya yoginaḥ sumahātmanaḥ|
SP0970052: samāptaṃ tapasaḥ sarvaṃ phalaṃ daityasya tasya tat|| 5||
SP0970061: kālastasyābhisaṃprāpto jīvitāntakaraḥ surāḥ|
SP0970062: tasmātsarve mayā sārdhaṃ yāta viṣṇuṃ prayācata|| 6||
SP0970071: bhavanto nirbalā hyadya aśaktāstasya bādhane|
SP0970072: viṣṇuḥ śaktaḥ sa taṃ daityaṃ jīvitāccyāvayiṣyati|| 7||
SP0970081: pūrvaṃ hi jāte tasmiṃstu vāguvācāśarīriṇī|
SP0970082: nāyaṃ vadhyo manuṣyasya na devasya kathaṃcana|| 8||
SP0970091: nāpi tiryakṣu jātasya na bhūmau na ca tejasi|
SP0970092: nākāśe nāpi lokeṣu mahātmāyaṃ bhaviṣyati|| 9||
SP0970101: sa eṣa devā daityeśo mahātmā dhārmikastathā|
SP0970102: avadhyaḥ sarvabhūtānāṃ vadhyo duḥkhādbhaviṣyati|| 10||
SP0970111: vārāhaṃ rūpamāsthāya na devatvaṃ na mānuṣam|
SP0970112: na ca tiryakṣu tajjātaṃ naravārāhamasti vai|| 11||
SP0970121: pātāle ca praviśyaiva nāsau bhūrnāpi khaṃ hi tat|
SP0970122: na tejo nāpi loko 'sau sarvato yuktameva tat|| 12||
SP0970130: sanatkumāra uvāca|
SP0970131: tataste hṛṣitāḥ sarve praṇamya ca pitāmaham|
SP0970132: ūcurgacchāma deveśa kālo 'tikrāmate hi naḥ|| 13||
SP0970141: tataste sarva evetya śvetaṃ parvatasattamam|
SP0970142: viṣṇuṃ sahiṣṇuṃ jiṣṇuṃ ca dānavāyutamardanam|
SP0970143: astuvanvāgbhiriṣṭābhiḥ praṇamya bahumānataḥ|| 14||
SP0970151: namaḥ sarvaripughnāya dānavāntakarāya ca|
SP0970152: namo 'jitāya devāya vaikuṇṭhāya mahātmane|| 15||
SP0970161: namo nirdhūtarajase namaḥ satyāya caiva ha|
SP0970162: namaḥ sādhyāya devāya namo dhāmne suvedhase|| 16||
SP0970171: namo yamāya devāya jayāya ca namo namaḥ|
SP0970172: namaścāditiputrāya naranārāyaṇāya ca|| 17||
SP0970181: namaḥ sumataye caiva namaścaivāstu viṣṇave|
SP0970182: namo vāmanarūpāya kṛṣṇadvaipāyanāya ca|| 18||
SP0970191: namo rāmāya rāmāya dattātreyāya vai namaḥ|
SP0970192: namaste narasiṃhāya dhātre caiva namo namaḥ|| 19||
SP0970201: namaḥ śakunihantre ca namo dāmodarāya ca|
SP0970202: salile tapyamānāya nāgaśayyāpriyāya ca|| 20||
SP0970211: namaḥ kapilarūpāya mahate puruṣāya ca|
SP0970212: namo jīmūtarūpāya mahādevapriyāya ca|| 21||
SP0970221: namo rudrārdharūpāya tathomārūpiṇe namaḥ|
SP0970222: cakramudgarahastāya maheśvaragaṇāya ca|| 22||
SP0970231: śivipiṣṭāya ca sadā namaḥ śrīvatsadhāriṇe|
SP0970232: dhundhumārāya śūrāya madhukaiṭabhaghātine|| 23||
SP0970241: caturbhujāya kṛṣṇāya ratnakaustubhadhāriṇe|
SP0970242: trivikramaviyatsthāya pītavastrasuvāsase|| 24||
SP0970251: namaḥ puravighātāya gadākhaḍgogradhāriṇe|
SP0970252: yogine yajamānāya bhṛgupatnīpramāthine|| 25||
SP0970261: vṛṣarūpāya satataṃ ādityānāṃ varāya ca|
SP0970262: cekitānāya dāntāya śauriṇe vṛṣṇibandhave|| 26||
SP0970271: purāśvagrīvanāśāya tathaivāsurasūdine|
SP0970272: namaste śārṅgadhanuṣe saubhasālvavighātine|| 27||
SP0970281: namaste padmanābhāya brahmasatpathadarśine|
SP0970282: namo jayāya śarvāya rudradattavarāya ca|| 28||
SP0970291: namaḥ sarveśvarāyaiva naṣṭadharmapravartine|
SP0970292: puruṣāya vareṇyāya namaste śatabāhave|
SP0970293: tava prasādātkṛcchrānvai tarāmaḥ puruṣottama|| 29||
SP0970301: hṛtarājyā vayaṃ sarve na tvaṃ vetsi mahābhuja|
SP0970302: hiraṇyākṣeṇa vaikuṇṭha taṃ nāśaya namo 'stu te|| 30||
SP0970310: sanatkumāra uvāca|
SP0970311: ya idaṃ vaiṣṇavaṃ stotraṃ bhaktyā paramayā yutaḥ|
SP0970312: kīrtayetsatataṃ martyaḥ sarvapāpaiḥ pramucyate|| 31||
SP0970321: mṛtaśca sarvalokeṣu varṣakoṭiṃ caturdaśa|
SP0970322: pūjitaḥ sarvadevaiśca modate nātra saṃśayaḥ|| 32||
SP0970331: kīrtayatyeva ya idaṃ pāpebhyo vipramucyate|
SP0970332: sa mṛtyulokamaprāpya carate duḥkhavarjitaḥ|| 33||
SP0970340: sanatkumāra uvāca|
SP0970341: teṣāṃ tadvacanaṃ śrutvā bhagavānsa jagatpatiḥ|
SP0970342: uvāca suraśārdūlānidaṃ saṃpūjayaṃstadā|| 34||
SP0970351: hataḥ sa daityo durbuddhirdevadviḍvighnakārakaḥ|
SP0970352: kriyatāṃ rūpamabhyetya vārāhaṃ mā vicāryatām|| 35||
SP0970361: mahātmā sa ca daityendro balavāndhārmikaśca ha|
SP0970362: na ca śakyo mayaikena hantuṃ satyaṃ bravīmi vaḥ|| 36||
SP0970371: sarvadevamayaṃ rūpaṃ vārāhaṃ nandivardhanam|
SP0970372: tatsamāsthāya hantāsmi daityendraṃ taṃ mahābalam|| 37||
SP0970381: tena rūpeṇa sarveṣāṃ yuṣmākaṃ devasattamāḥ|
SP0970382: mahīṃ śakyaṃ punastasmādihānayitumojasā|| 38||
SP0970391: yuṣmadarthe tamadyāhaṃ dānavaṃ dharmapālinam|
SP0970392: vadhiṣyāmi yathā siṃhaṃ śarabhaḥ sumahābalaḥ|| 39||
SP0970401: rājāsmākamayaṃ śreṣṭhaḥ sahasrākṣaḥ puraṃdaraḥ|
SP0970402: dīkṣito daityayajñena hotā tvasya bṛhaspatiḥ|| 40||
SP0970411: brahmā brahmatvamāpannaḥ prasthātā yama ityapi|
SP0970412: udgātā varuṇaścātra hiraṇyanayanaḥ paśuḥ|
SP0970413: śamitāhaṃ suraśreṣṭhāḥ paśostasya mahātmanaḥ|| 41||
SP0970421: adya paśyantu bhūtāni mama tasyaiva cobhayoḥ|
SP0970422: - - - - - - - -  - - - - - - - -|
SP0970423: araṇye vāsitāhetormattayorgajayoriva|| 42||
SP0970431: tasya tadvacanaṃ śrutvā garjitaṃ ca mahātmanaḥ|
SP0970432: harṣotphullekṣaṇāḥ sarve nirīkṣantaḥ parasparam|
SP0970433: menire hata-m-ityeva daityendraṃ sumahābalam|| 43||
SP0970441: teṣāṃ tadotphullakuśeśayābhavaktrekṣaṇānāṃ hṛṣito ravo 'bhūt|
SP0970442: hataḥ sa daityo narasiṃharūpiṇā yathā purā tasya gururmahābalaḥ|| 44||
SP0979999: iti skandapurāṇe saptanavatitamo 'dhyāyaḥ||