Skandapurāṇa Adhyāya 96

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP0960010: vyāsa uvāca|
SP0960011: tathā rājani daityendre trailokyādhipatau śubhe|
SP0960012: dharaṇyāṃ caiva baddhāyāṃ sukhitāsu prajāsu ca|| 1||
SP0960021: sthānebhyaścyāvitā devā hyapratiṣṭhā mahābalāḥ|
SP0960022: kimakurvanta duḥkhārtā etannaḥ śaṃsa sarvaśaḥ|| 2||
SP0960030: sanatkumāra uvāca|
SP0960031: śṛṇu dharmajña devānāmavasthā yā babhūva ha|
SP0960032: yadakurvanta duḥkhārtāstacca sarvaṃ yathātatham|| 3||
SP0960041: havyavāho 'gnirabhavaddevānāṃ bhāgavardhanaḥ|
SP0960042: taṃ nirasya tadā daityo vahnimanyaṃ cakāra ha|| 4||
SP0960051: tasminkarmaṇi viprendra mantrāstadanugābhavan|
SP0960052: daityadānavabhāgānāṃ vaktāraḥ śubhasādhakāḥ|| 5||
SP0960061: tato yajñaḥ svayaṃ daityānupatasthe mahātmanaḥ|
SP0960062: yajñe gate ca daityendrāndevāḥ sarve mṛtā iva|| 6||
SP0960071: abhavannaṣṭasaṃjñāśca mandavīryaparākramāḥ|
SP0960072: niḥśrīkāśca nirudyogā nirānandā nirutsukāḥ|| 7||
SP0960081: mantradagdhā yathā sarpā vajrapiṣṭā ivācalāḥ|
SP0960082: garutmatābhisaṃdaṣṭā bhujagā iva nirviṣāḥ|
SP0960083: vihīnādbhiryathā vṛkṣā bāndhavairvāpi yoṣitaḥ|| 8||
SP0960091: tathā te devatā vyāsa hṛtarājyā hṛtaśriyaḥ|
SP0960092: cintayanti hṛdā caiva śuṣyanti vilapanti ca|| 9||
SP0960101: atha devaḥ svayaṃbhūstāñjñātvā devāṃstathāvidhān|
SP0960102: vimānenārkavarṇena provācedaṃ pitāmahaḥ|| 10||
SP0960111: bho devā naṣṭasaṃjñāḥ stha kimarthaṃ duḥkhitā bhṛśam|
SP0960112: tapoyogabalaṃ vo 'dya dadāni surapuṃgavāḥ|| 11||
SP0960121: yūyaṃ lokasya kartāro hartāraścaiva sarvaśaḥ|
SP0960122: na yuktaṃ bhavatāmetatklīvavatsthātumadya vai|| 12||
SP0960131: svaṃ ca yogaṃ madīyaṃ ca tyaktvā duḥkhaṃ mahābalāḥ|
SP0960132: pratipadyata mā śoke svayaṃ devāḥ pravartata|| 13||
SP0960141: na tamo bhāskarādyuktaṃ na somāduṣṇatā yathā|
SP0960142: nāgnestuṣāraśca yathā nāmṛtaṃ bhujagādapi|| 14||
SP0960151: nāsādhoḥ sādhubhāvaśca na kulīnādaśobhanam|
SP0960152: nādharmo niyamebhyaśca na vedebhyaśca durmatiḥ|| 15||
SP0960161: tathā na yuktaṃ yuṣmākamidaṃ devā mahātmanām|
SP0960162: āpatsu na viṣīdanti ye kecittejasi sthitāḥ|| 16||
SP0960171: te yūyamāpadaṃ prāpya na śokaṃ kartumarhatha|
SP0960172: mā bhavanto 'vasīdantu rājyaṃ bhūyo bhaviṣyati|| 17||
SP0960181: mahāyogabalopeto hiraṇyākṣo 'dya devatāḥ|
SP0960182: aśakyo hantumalpena tejasā ditinandanaḥ|| 18||
SP0960191: pratīkṣantu bhavanto 'sya tapasaḥ kṣayamavyayāḥ|
SP0960192: kṣīṇe tapasi daityendraṃ yuddhe viṣṇurvadhiṣyati|| 19||
SP0960200: sanatkumāra uvāca|
SP0960201: ta evaṃ brahmaṇā proktā labdhayogāḥ sureśvarāḥ|
SP0960202: praṇamya sarvabhūtānāṃ sraṣṭāramidamabruvan|| 20||
SP0960211: hṛtāni no mahāyoga sthānāni ditinandanaiḥ|
SP0960212: kva tiṣṭhāma vayaṃ brūhi diśa naḥ sthānamavyayam|| 21||
SP0960220: pitāmaha uvāca|
SP0960221: hṛtāni sarvasthānāni yuṣmākaṃ viditaṃ mayā|
SP0960222: śṛṇudhvaṃ yatra vastavyaṃ yuṣmābhiryogamāyayā|| 22||
SP0960231: yūyaṃ sarvaśarīreṣu yogādvasata sattamāḥ|
SP0960232: prajānāṃ sarvato devāstato vṛttimavāpsyatha|| 23||
SP0960241: teṣāmaśitapītaiśca saṃskāraiśca pṛthagvidhaiḥ|
SP0960242: pṛthivī nāgabaddhāpi yuṣmānāpyāyayiṣyati|| 24||
SP0960250: sanatkumāra uvāca|
SP0960251: ta evamuktā devena devāḥ sarve savāsavāḥ|
SP0960252: tathā cakruryathovāca brahmā lokapitāmahaḥ|| 25||
SP0960261: te 'vartayanta satataṃ tatrasthāḥ surasattamāḥ|
SP0960262: caturyugamupāsanta lokadhāturmate sthitāḥ|| 26||
SP0960271: atha yogāddhiraṇyākṣaḥ prajāsu samavasthitān|
SP0960272: surānapaśyadyogātmā cukopa sa ca tānprati|| 27||
SP0960281: yasminyasminnapaśyacca suraṃ sa samavasthitam|
SP0960282: avadhīttaṃ tamabhyetya tadā dānavasattamaḥ|| 28||
SP0960291: ahaṃ prajāḥ sadodyukto rakṣāmi satataṃ bhayāt|
SP0960292: mamaiva tā durācārā vidviṣo vardhayantyuta|| 29||
SP0960301: kṛtaghnāḥ svāmighātinyo duṣpūrā duṣṭacetasāḥ|
SP0960302: mama śatrūnimānduṣṭānannapānādibhiḥ sadā|
SP0960303: āpyāyayanti durvṛttā daṇḍārhā me matāstataḥ|| 30||
SP0960311: evaṃ niścintya daityendro nairghṛṇyaṃ paramaṃ gataḥ|
SP0960312: yatra tatra gatāḥ sarvāḥ prajāḥ sarvatra so 'vadhīt|| 31||
SP0960321: palvalāni taḍāgāni nadīprasravaṇāni ca|
SP0960322: sarvāṇyeva tadā yogādaśoṣayata dānavaḥ|| 32||
SP0960331: auṣadhyo 'kṛṣṭapacyāśca yā hyāsaṃstasya suvrata|
SP0960332: vyanāśayatsa tāścāpi vṛkṣavallīraśoṣayat|| 33||
SP0960341: tannaṣṭavṛkṣakṣupavallipallavaṃ tathauṣadhīprasravaṇodakāśayam|
SP0960342: sarittaḍāgāvaṭaśuṣkapalvalaṃ jagadbabhau kacchapapṛṣṭhasaṃnibham|| 34||
SP0960351: pranaṣṭavarṇāśramadharmasaṃyamaṃ vinaṣṭaghoṣavrajapakṣimānuṣam|
SP0960352: dvipāśvapaśvādigaṇairvināditaṃ yugāntakālāgnisudagdhavajjagat|| 35||
SP0969999: iti skandapurāṇe ṣaṇnavatitamo 'dhyāyaḥ||