Skandapurāṇa Adhyāya 95

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0950010: sanatkumāra uvāca|
SP0950011: atha laṅkāṃ samāsādya dhaneśasya purīṃ śubhām|
SP0950012: adūre tasthuruddhūtāḥ saṃnaddhakavacāyudhāḥ|| 1||
SP0950021: avasthitāṃstathā dṛṣṭvā dānavānbaladarpitān|
SP0950022: laṅkānivāsinaḥ sarve nidhipālāstathaiva ca|| 2||
SP0950031: nidhayaḥ śaṅkhapadmādyā ṛṣayaśca tapodhanāḥ|
SP0950032: arghaṃ ratnāni cādāya dānavāya nyavedayan|| 3||
SP0950041: ūcuśca tava daityendra vayaṃ vaśyā na saṃśayaḥ|
SP0950042: kiṃkarāśca praśādhyasmānyathā devo nareśvaraḥ|| 4||
SP0950050: hiraṇyākṣa uvāca|
SP0950051: mā bhīrbhavatu vo yakṣā mama yūyaṃ na saṃśayaḥ|
SP0950052: ayaṃ rājā hi vaḥ śreṣṭho hiraṇyakaśipoḥ sutaḥ|
SP0950053: prahlādo devasaṃghānāṃ sarveṣāṃ viprabādhanaḥ|| 5||
SP0950061: tatastaṃ tatra saṃsthāpya dhaneśaṃ daityapuṃgavaḥ|
SP0950062: anyeṣāṃ devasaṃghānāṃ sthānānyāpūrayatpunaḥ|| 6||
SP0950071: saṃsthāpya sarvasthāneṣu sthānino dānaveśvarān|
SP0950072: andhakaṃ tvamarāvatyāmindratvenābhyaṣecayat|
SP0950073: bhūrlokaṃ cākhilaṃ daityaḥ svayamevānvaśāsata|| 7||
SP0950081: bhūyaśca dhanurādāya saśaraṃ sūryasaṃnibham|
SP0950082: daityendro medinīṃ prāha mamātmānaṃ vidarśaya|| 8||
SP0950091: sā bhītā tasya daityasya vepamānā kṛtāñjaliḥ|
SP0950092: jayetyuktvāgratastasthau kule lakṣmīrivāparā|| 9||
SP0950101: tāṃ mṛgīmiva śārdūlo bhujaṃgīmiva pakṣirāṭ|
SP0950102: śārdūlīṃ siṃha iva ca siṃhīṃ śarabharāḍiva|| 10||
SP0950111: haṃsīṃ kāka iva kṣudro mayūrīṃ madgurāḍiva|
SP0950112: tathā tāṃ sa diteḥ putro jagrāha ruṣitānanaḥ|| 11||
SP0950121: uvāca cedaṃ saṃrabdhastāṃ devīṃ bhayavihvalām|
SP0950122: tavāhaṃ vasudhe bhartā brahmaṇā prakṛtaḥ śubhe|
SP0950123: mānyaṃ patiṃ tvamicchethā rakṣiṣye 'haṃ tato hi te|| 12||
SP0950130: sanatkumāra uvāca|
SP0950131: tato rasātalaṃ gatvā svapurasya samīpataḥ|
SP0950132: babandha nāgapāśaistāṃ duṣṭāmiva yathāṅganām|| 13||
SP0950141: tato 'calena daityendraḥ śaṅkhena sumahābalaḥ|
SP0950142: ākramadrājā duṣṭasya kartāramiva vīryavān|| 14||
SP0950151: tato 'syā rakṣaṇe nityamudyuktānrakṣiṇo dadau|
SP0950152: kiṃkarānnāma daityendrānsahasrāṇi caturdaśa|| 15||
SP0950161: sa tathā tadvidhāyaiva daityendrastuṣṭimānbabhau|
SP0950162: kṛṣīvala iva kṣetraṃ suniṣpannaṃ samīkṣya ha|| 16||
SP0950171: kṛtakṛtyo 'hamityeva buddhiṃ cakre sa pārthivaḥ|
SP0950172: saṃyujya svasutaṃ jyeṣṭhaṃ dāraiḥ sādhurivātmavān|| 17||
SP0950181: antaraṃ na ca tasyānyaḥ kaścitprāpnoti suvrata|
SP0950182: susahāyasya viprasya yathādambhena vartataḥ|| 18||
SP0950191: yajadhvaṃ dānavāḥ sarve viprānpūjayateti ca|
SP0950192: devaṃ ca śūlinaṃ samyaṅnamasyata punaḥ punaḥ|
SP0950193: dharmameva niṣevadhvamiti so 'jñāpayattadā|| 19||
SP0950201: na tasyādhārmikaḥ kaściddaityo vā dānavo 'pi vā|
SP0950202: rājye 'bhavaddurācāra iti rājyaṃ praśāsati|| 20||
SP0950211: svayameva sa vāyuśca candramāḥ sūrya eva ca|
SP0950212: abhavadvyāsa lokeṣu tapobalasamanvitaḥ|| 21||
SP0950221: oṣadhyaḥ svayamudbhūtāstasminrājani śāsati|
SP0950222: vinā vṛṣṭiṃ saṃbhavanti sarvalokasya sādhikāḥ|| 22||
SP0950231: sa eva tāḥ samādāya khalaṃ nayati daityarāṭ|
SP0950232: sa evāmardayaccāpi nināya ca punargṛhān|| 23||
SP0950241: sa eva daṇḍiko 'bhūcca daṇḍaścaiva sa eva hi|
SP0950242: sa eva yogātsarvatra caurādrakṣati nityadā|| 24||
SP0950251: na tasya vyādhitaḥ kaścinmriyate vāpi kaścana|
SP0950252: paradāraprasakto vā piśuno vāpi karhicit|
SP0950253: hiṃsakā na ca tasyāsanna cāpyādhārmikāḥ kvacit|| 25||
SP0950261: palvalāni taḍāgāni saritprasravaṇāni ca|
SP0950262: vinā vṛṣṭyā bhavantyete sarvatraiva ca susthitam|| 26||
SP0950271: na santi tasya rakṣāṃsi na piśācāśca hiṃsriṇaḥ|
SP0950272: ītayaśca na santyasya na dvandvāni ca kānicit|| 27||
SP0950281: na juhvate tadā vahniṃ viprāstasmiṃstu rājani|
SP0950282: nādhīyate yajante vā ekavarṇamabhūttadā|| 28||
SP0950291: bhṛgavo ye 'bhavanviprā dānavānāṃ mudāvahāḥ|
SP0950292: adhīyate yajante ca ta eva vyāsa sarvaśaḥ|| 29||
SP0950301: hṛṣṭapuṣṭamabhūtsarvaṃ vyādhiduḥkhavivarjitam|
SP0950302: karmāśramaparityaktaṃ svargalokasamaṃ jagat|| 30||
SP0950311: tannṛttagītotsavanityayuktaṃ sukhaprasuptaṃ ratikāryayuktam|
SP0950312: jagadbabhau rājani daityadeve hiraṇyanetre ditidānavendre|| 31||
SP0959999: iti skandapurāṇe pañcanavatitamo 'dhyāyaḥ||