Skandapurāṇa Adhyāya 94

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0940010: sanatkumāra uvāca|
SP0940011: tamāpatantaṃ vegena garutmantamivāhave|
SP0940012: dṛṣṭvā varuṇaputrāste pitrā saha vidudruvuḥ|| 1||
SP0940021: dānavāpi hi te sarve prāpya tadvaruṇālayam|
SP0940022: vyūḍhaskandhā vyatiṣṭhanta vyasṛjaṃstatpuraṃ prati|
SP0940023: dūtaṃ vātāpinaṃ caiva rājāpreṣayadūrjitaḥ|| 2||
SP0940031: sa gatvā tāṃ purīṃ ramyāṃ praviśya ca mahāsuraḥ|
SP0940032: pauraiḥ supūjito vyāsa prāhedaṃ tānsagarvitaḥ|| 3||
SP0940041: rājā sarvasya lokasya daityadānavanandanaḥ|
SP0940042: kaśyapasya sutaḥ śrīmānhiraṇyākṣaḥ pratāpavān|
SP0940043: jitvā sarvānsurānsaṃkhye ājñāpayati vaḥ sadā|| 4||
SP0940051: yūyaṃ śṛṇuta sarve me ājñāṃ kuruta caiva hi|
SP0940052: ānayadhvaṃ ca ratnāni parityajata devatāḥ|| 5||
SP0940061: devapakṣo 'tra yaḥ kaścitpure prativasatyuta|
SP0940062: abhayaṃ tasya yacchāmi yātu devānabhītavat|| 6||
SP0940070: sanatkumāra uvāca|
SP0940071: ta evamuktā viprendra tathā cakruḥ pure janāḥ|
SP0940072: arghaṃ ratnāni cādāya dadṛśurdānaveśvaram|| 7||
SP0940081: teṣāṃ yathārhataḥ pūjāṃ cakāra ditinandanaḥ|
SP0940082: sthānasyādhipatiṃ cānyamadātsa varuṇālaye|| 8||
SP0940091: tato yayau punarvyāsa daityaḥ saṃyamanaṃ puram|
SP0940092: tatra dharmaśca kālaśca kṛtāntaḥ kalahastathā|
SP0940093: niyatirnigrahaścaiva narakāśca sakiṃkarāḥ|| 9||
SP0940101: dharmakārāstathā sarve tathā saptarṣayaśca ye|
SP0940102: mantrakārāstathā ye ca vyāsa śākhākṛtaśca ye|| 10||
SP0940111: śāstrāṇāṃ ca praṇetāro rājānaścaiva sarvaśaḥ|
SP0940112: mantrāśca mānavāścaiva pitaro ṛṣayastathā|| 11||
SP0940121: arghaṃ dattvātha ratnāni prayacchanta mahātmane|
SP0940122: ūcuśca vaśagāste 'dya vayaṃ tvatpuravāsinaḥ|| 12||
SP0940131: tānuvāca na bhetavyaṃ yuṣmābhirmama karhicit|
SP0940132: yattu vakṣyāmi tatsarvaṃ kurudhvamaviśaṅkitāḥ|| 13||
SP0940141: nārakā vipramucyantāṃ bhajyantāṃ narakāstathā|
SP0940142: vadhyantāṃ vyādhayaḥ sarve yamadūtāśca sarvaśaḥ|
SP0940143: naśyatāṃ cāpyayaṃ mṛtyuḥ kṛtāntaḥ kalahaiḥ saha|| 14||
SP0940151: ete hyaśivakartāro lokānāṃ duṣṭacetasaḥ|
SP0940152: tasmādetānvadhiṣyāmi naibhiḥ kṛtyaṃ mamādya vai|| 15||
SP0940161: trailokyamakhilaṃ sarvaṃ mṛtyurogavivarjitam|
SP0940162: yathā syātsukhasaṃsaktaṃ tathā kartāsmi sarvaśaḥ|| 16||
SP0940171: ahaṃ ca rājā sarveṣāṃ duḥkhitaśca kathaṃ hi me|
SP0940172: rājye kaścidbhavedviprā etanme 'bhīṣṭikī matiḥ|| 17||
SP0940180: sanatkumāra uvāca|
SP0940181: tasya tadvacanaṃ śrutvā dharmakārāḥ sahaiva tu|
SP0940182: rājabhiḥ pitṛbhiścaiva śāstraśākhāpraṇetṛbhiḥ|
SP0940183: ūcustaṃ madhuraṃ vyāsa sāntvayuktamidaṃ tadā|| 18||
SP0940191: rājā bhojo virāṭsamrāḍbhūpatiḥ kṣatriyo nṛpaḥ|
SP0940192: ya ebhiḥ stūyate śabdaiḥ kastaṃ nārcayate budhaḥ|| 19||
SP0940201: sa tvaṃ rājā ca bhojaśca virāṭsamrāṭtathaiva ca|
SP0940202: bhūpatiḥ kṣatriyaścaiva nṛpaḥ sarvaṃsahastathā|| 20||
SP0940211: nirjitāḥ sumahāvīryāstvayā devāḥ savāsavāḥ|
SP0940212: kastvayā sadṛśo loke varjyaikaṃ rudramīśvaram|| 21||
SP0940221: tvaṃ dhātā sarvalokānāṃ kartā sraṣṭā tathaiva ca|
SP0940222: kastavājñāṃ mahārāja pratihanyāddurātmavān|| 22||
SP0940231: vayaṃ tu sarve daityendra varamicchāma dānava|
SP0940232: varadastvaṃ hi bhūtānāmasmākaṃ varado bhava|| 23||
SP0940240: sanatkumāra uvāca|
SP0940241: teṣāṃ tadvacanaṃ śrutvā varado 'smīti so 'bravīt|
SP0940242: athaivamuktā daityena ṛṣayaste tapodhanāḥ|
SP0940243: ūcuste daityarājaṃ vai tadā vacanakovidāḥ|| 24||
SP0940250: ṛṣaya ūcuḥ|
SP0940251: yadetaduktaṃ bhavatā narakavyādhimṛtyuṣu|
SP0940252: na tathā tadbhaveddaitya eṣa no dīyatāṃ varaḥ|| 25||
SP0940260: daitya uvāca|
SP0940261: mama pratijñā viprendrāḥ pūrvameva tapodhanāḥ|
SP0940262: lokānāṃ sukhamedheyaṃ rājā lokasya yadyaham|| 26||
SP0940271: na tathā tatkariṣyāmi yadyahaṃ ṛṣisattamāḥ|
SP0940272: mithyāpratijñaḥ syāṃ cāhamasatyaśca durātmavān|| 27||
SP0940281: tasmādanyadbhavanto māṃ varaṃ yācantu supriyam|
SP0940282: kartāsmi taṃ tathā sarvaṃ yāceyaṃ śirasā hi vaḥ|| 28||
SP0940290: sanatkumāra uvāca|
SP0940291: tasya tadvacanaṃ śrutvā ṛṣayaḥ sarva eva te|
SP0940292: hiraṇyākṣamidaṃ vyāsa punarevābruvanvibhum|| 29||
SP0940300: ṛṣaya ūcuḥ|
SP0940301: lokadharmapravṛttyarthaṃ brahmaṇā daityapuṃgava|
SP0940302: kṛtametatpurā sarvaṃ dharmaścābhipravartitaḥ|| 30||
SP0940311: samīkṣya caitallokasya dharmo 'smābhiḥ pravartitaḥ|
SP0940312: nānṛtaṃ tadbhaveddaitya iti no varado bhava|| 31||
SP0940321: pratijñā bhavataścaiva lokānāṃ duḥkhavarjanam|
SP0940322: tattvaṃ syānna ca naśyeta brahmaṇaḥ kṛtiravyayā|| 32||
SP0940331: yāvattvaṃ daitya lokasya rājā svāmī prabhuśca ha|
SP0940332: tāvanna mṛtyurlokānāṃ vyādhayo vā bhavantyuta|| 33||
SP0940341: mā caiva narakānsarvāngacchantu manujāstava|
SP0940342: evaṃ tavānṛṇatvaṃ ca brahmaṇaśca kṛtirbhavet|| 34||
SP0940350: sanatkumāra uvāca|
SP0940351: teṣāṃ sa vacanaṃ śrutvā dhiyā niścitya caiva ha|
SP0940352: evamastviti tāṃścoktvā yātanāmokṣamādiśat|| 35||
SP0940361: sa muktvā nārakānsarvāndadau sthānasya rakṣaṇam|
SP0940362: pitṛrājatvamanaghaṃ vipracittiṃ mahābalam|| 36||
SP0940371: tato 'vaghuṣya sa jayaṃ pūjayitvā ca tāndvijān|
SP0940372: jagāma dhanadāvāsaṃ hiraṇyākṣo mahābalaḥ|| 37||
SP0940381: te tāṃ dhaneśasya purīṃ mahābalā vinādayanto 'ndhakabāhupālitāḥ|
SP0940382: hiraṇyanetraṃ parivārya dānavāstadābhijagmurjaladā ivācalam|| 38||
SP0949999: iti skandapurāṇe caturṇavatitamo 'dhyāyaḥ||