Skandapurāṇa Adhyāya 92

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0920010: sanatkumāra uvāca|
SP0920011: nakṣatrādhipatiṃ dṛṣṭvā bhagavānhavyavāhanaḥ|
SP0920012: vidrutaṃ dānavabhayātpadātiḥ samadhāvata|| 1||
SP0920021: sa śarairdānavarathaṃ sasūtaṃ saha vājibhiḥ|
SP0920022: sadhvajaṃ sapatākaṃ ca bhasmasāyujyamānayat|| 2||
SP0920031: tato 'sya kārmukaṃ divyaṃ śareṇānataparvaṇā|
SP0920032: vijyaṃ cakāra saṃkruddhastiṣṭha tiṣṭheti cābravīt|| 3||
SP0920041: athāndhakaśca rāhuśca prahlādo maya eva ca|
SP0920042: anye ca dānavaśreṣṭhāḥ kṛśānuṃ paryavārayan|| 4||
SP0920051: so 'vaprutya tadā teṣāṃ dhanūṃṣi ca rathāṃstathā|
SP0920052: dhvajāni ca vicitrāṇi dadāha ca rarāsa ca|| 5||
SP0920061: kavacāni vicitrāṇi śirāṃsi ca vasūttamaḥ|
SP0920062: dadāha vikṛtākāro nādayansarvatodiśaḥ|| 6||
SP0920071: hāheti nadatāṃ tatra bhagavānhavyavāhanaḥ|
SP0920072: jihvā dahanbabhau vyāsa guhāyāṃ dīpavatsthitaḥ|| 7||
SP0920081: keṣāṃcitpradahanbhāti dānavānāṃ mukhāni saḥ|
SP0920082: paṅkajānīva phullāni timirārirmahāprabhaḥ|| 8||
SP0920091: keṣāṃcidbhujagendrābhānkarānkāñcanabhūṣitān|
SP0920092: dadāha bhagavānvahnirdāvāgnirbhujagāniva|| 9||
SP0920101: śarāñcharāsanāṃścaiva tathā khaḍgaparicchadān|
SP0920102: dadāha bhagavānvahnirhastyaśvamapi sarvaśaḥ|| 10||
SP0920111: te hanyamānā daityendrā viśastrā duḥkhitā bhṛśam|
SP0920112: bhramanti vitanutrāśca tatra tatraiva sarvaśaḥ|| 11||
SP0920121: teṣāṃ vahnipradīptānāṃ dahyatāṃ suravidviṣām|
SP0920122: hiraṇyākṣaḥ svayaṃ rājā parjanyaḥ samapadyata|| 12||
SP0920131: sa meghabhūto daityendrastamagniṃ vṛṣṭibhistadā|
SP0920132: aśāmayata vegena saṃvartaka ivāmbudaḥ|| 13||
SP0920141: taṃ praśāntaṃ tadālakṣya vidhuraṃ havyavāhanam|
SP0920142: vipracittiḥ śaraistīkṣṇairlalāṭe samavākirat|| 14||
SP0920151: tato 'sya nadato bhūyo mayo dānavasattamaḥ|
SP0920152: mukhe śaraṃ mahāghoraṃ nicakhāna mahāsuraḥ|| 15||
SP0920161: tasya tena tadā vyāsa mukhe bhinnasya dāruṇaḥ|
SP0920162: uttasthau vāyuvaddhūmaḥ śarīrādañjanopamaḥ|| 16||
SP0920171: tena dhūmena khaṃ caiva divaṃ bhūścaiva sarvaśaḥ|
SP0920172: pūritā mahatā vyāsa na prajñāyata kiṃcana|| 17||
SP0920181: tena śabdena saṃjñābhirnāmaviśrāvaṇairapi|
SP0920182: karasparśaistadānyo 'nyamanayadyamasādanam|| 18||
SP0920191: na devo jñāyate tatra na daityo dānavo 'pi vā|
SP0920192: ajānantastatastatra saṃjñāmetāṃ pracakrire|| 19||
SP0920201: āṭirdaityāḥ prakurvanta baka ityeva devatāḥ|
SP0920202: bakaṃ vadanti ye tatra daityāstānvyahanaṃstadā|
SP0920203: āṭiṃ bruvāṇaṃ ca surā ityevaṃ tadvyavartata|| 20||
SP0920211: etadbhūtsaṃjñayā yuddhaṃ varṣāṇāṃ vai mahābhayam|
SP0920212: sahasramekaṃ daityānāmandhakāre suraiḥ saha|| 21||
SP0920221: tadandhakāre sumahābhayaṃkaraṃ tadābhavadyuddhamatīva dāruṇam|
SP0920222: jagadvināśāya jagaddhitaiṣiṇāṃ surāsurāṇāṃ rudhiraughanisravam|| 22||
SP0929999: iti skandapurāṇe dvinavatitamo 'dhyāyaḥ||