Skandapurāṇa Adhyāya 89

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0890010: sanatkumāra uvāca|
SP0890011: teṣāṃ tadveganunnānāṃ prabhagnānāṃ naśiṣyatām|
SP0890012: trāṇārthamatidīptākṣo hiraṇyākṣo 'grahītpadam|| 1||
SP0890021: andhakaśca mahāmāyo bhrātaraścāsya tatsamāḥ|
SP0890022: śataṃ rathasahasrāṇāṃ sarveṣāmapalāyinām|| 2||
SP0890031: prahlādaśca sahabhrātā hiraṇyakaśipoḥ sutaḥ|
SP0890032: vipracittiḥ sahabhrātā saiṃhikeyaiśca taiḥ saha|
SP0890033: gṛhṇa gṛhṇeti nardanto devānpratyudyayustadā|| 3||
SP0890041: teṣāṃ teṣāṃ ca saṃgrāmaḥ sughoraḥ samapadyata|
SP0890042: grahāṇāmiva kālānte gajānāmiva cājane|| 4||
SP0890051: indrastvaṣṭā ca pūṣā ca hiraṇyākṣaṃ mahābalam|
SP0890052: saṃgatya sāyakaistīkṣṇaiḥ sarvamarmasvatāḍayan|| 5||
SP0890061: teṣāṃ dhanūṃṣi citrāṇi asyatāṃ tu divaukasām|
SP0890062: māyābalena daityendro vyaṣṭambhayata dīptimān|| 6||
SP0890071: tāni viṣṭambhitāni sma tadā daityena māyayā|
SP0890072: nānamanti yathāpūrvaṃ tataste hyākulābhavan|| 7||
SP0890081: so 'pi daityo mahāmāyo naditvā meghanisvanam|
SP0890082: babandha teṣāṃ gātrāṇi samantādastramāyayā|| 8||
SP0890091: tānbaddhānprasamīkṣyaivamakarmaṇyānmahābalān|
SP0890092: yantāro vāhanaiḥ kṣipraṃ jahrustasmādraṇājirāt|| 9||
SP0890101: atha kālo yamaścaiva dhaneśo mitra eva ca|
SP0890102: varuṇo vasavaḥ sarve aśvinau ca mahābalau|| 10||
SP0890111: pragṛhītāyudhāḥ kruddhāstiṣṭha tiṣṭhetivādinaḥ|
SP0890112: abhyadravanta vegena hiraṇyākṣaṃ mahāsuram|| 11||
SP0890121: teṣāmāpatatāṃ saṃkhye sa daityaḥ krodhamūrchitaḥ|
SP0890122: sarveṣāṃ sāyakaistīkṣṇairbibheda kavacānyudhi|| 12||
SP0890131: te bhinnakavacāḥ sarve krodhātprajvalitānanāḥ|
SP0890132: sasarjurastramukhyāni tadāpratihatānyuta|| 13||
SP0890141: yamo daṇḍaṃ sasarjāsya tathā kālaśca kiṃkaram|
SP0890142: dhaneśaścāśaniṃ ghoraṃ varuṇaḥ pāśameva ca|
SP0890143: bhagaśca musalaṃ ghoramanye cānyāṃstathā śarān|| 14||
SP0890151: tānsa daityo hasanneva sāyakairmarmabhedibhiḥ|
SP0890152: vyaṣṭambhayadadīnātmā śakrahastaṃ yathā bhavaḥ|| 15||
SP0890161: sādhuvādāṃstato hṛṣṭā dānavānāṃ mahārathāḥ|
SP0890162: samaṃ cakruśca saṃpūjya hiraṇyākṣāya sarvataḥ|| 16||
SP0890171: apare naitadāścaryaṃ ditiputrasya saṃyuge|
SP0890172: kaśyapena prasūtasya rājño 'smākaṃ ca svāminaḥ|| 17||
SP0890181: apare siṃhanādāṃśca bāhuśabdāṃśca puṣkalān|
SP0890182: cakrurhṛṣṭāśca vādyāni tadā sarvāṇyavādayan|| 18||
SP0890191: evaṃ teṣāṃ prahṛṣṭānāṃ dānavānāṃ mahāhave|
SP0890192: pārāśarya giro bahvyaḥ śrūyante stutisaṃhitāḥ|| 19||
SP0890201: teṣāṃ praharṣaṃ jñātvā taṃ devabhaṅgaṃ ca taṃ tadā|
SP0890202: sarvaprāṇicaro vāyurasurānabhidudruve|| 20||
SP0890211: sahasranalvamātreṇa sa rathena prabhañjanaḥ|
SP0890212: samantāddhvajayuktena patākāśatamālinā|| 21||
SP0890221: javena yantṛṇā yatnānnigṛhītena śabdavān|
SP0890222: prapūrayandiśaḥ sarvāḥ sahasā pratyadṛśyata|| 22||
SP0890231: sa pañcabhiḥ śaraistīkṣṇairdaityarājānamavyathaḥ|
SP0890232: āhatya yojane tasmāddeśātkṣipramavāsṛjat|| 23||
SP0890241: andhakaṃ ca tataḥ ṣaṣṭyā vipracittiṃ ca saptabhiḥ|
SP0890242: mayaṃ pañcāśatā viddhvā saptabhiḥ saptabhiḥ punaḥ|| 24||
SP0890251: daityāṃśca dānavāṃścaiva sarvānvivyādha tatkṣaṇāt|
SP0890252: punaḥ pulomaputrāṃśca nivātakavacānapi|| 25||
SP0890261: te tena bahubhirviddhāḥ śarairasurapuṃgavāḥ|
SP0890262: dikṣu sarvāsu vikṣiptā yojanāntaritāḥ sthitāḥ|| 26||
SP0890271: yānyāṃśca te vimuñcanti gadāmusalapaṭṭasān|
SP0890272: tānsarvānbhagavānvāyurdānavoparyapātayat|| 27||
SP0890281: te hatā hanyamānāśca svamuktairāyudhairbhṛśam|
SP0890282: ārtanādānprakurvāṇāḥ prādravanta diśo daśa|| 28||
SP0890291: so 'pi vāyurmahāvego babhañja rathasattamān|
SP0890292: pāṃsuvarṣeṇa ca punaścakṣūṃṣyeṣāmapūrayat|| 29||
SP0890301: tathā sma bhayasaṃtrastā notsasarjustadā śarān|
SP0890302: śastrāṇi ca tathānyāni puñjaśaścāvatasthire|| 30||
SP0890311: tasya tatkarma saṃvīkṣya hiraṇyākṣaḥ pratāpavān|
SP0890312: uvāca dānavānsarvāngarhayanditinandanaḥ|| 31||
SP0890321: dhigvo daityā balaṃ sarvaṃ dhiṅmāyāṃ dhikparākramam|
SP0890322: visṛjya raṇamavyagrā yāta strīkarmasevinaḥ|| 32||
SP0890331: ye yūyaṃ raṇamadhyasthā jīvite sati bāliśāḥ|
SP0890332: ekena vāyunā bhagnā dhigvastanmantritaṃ purā|| 33||
SP0890341: athavā yanmayā proktaṃ yūyaṃ bālā iti kramāt|
SP0890342: tattathā nāsti saṃdeho bālairiva hi vaḥ kṛtam|| 34||
SP0890351: tiṣṭhadhvaṃ bālavatsarve rakṣanto jīvitaṃ svakam|
SP0890352: ahameko vijeṣyāmi vāyumenaṃ prapaśyata|| 35||
SP0890361: tataḥ sa parvato bhūtvā ditiputraḥ pratāpavān|
SP0890362: samantādvāyuvegaṃ taṃ samavārayadavyathaḥ|| 36||
SP0890371: vāyuṃ nivāritaṃ jñātvā parvatena tadā vibhum|
SP0890372: andhako bāhupāśena avaprutyābabandha tam|| 37||
SP0890381: sa baddho bāhupāśena jagadāyuḥ pratāpavān|
SP0890382: saṃpragṛhyāndhakaṃ śīghramutpapāta vihāyasā|| 38||
SP0890391: tasyotpatitamātrasya pragṛhyāndhakadānavam|
SP0890392: rāhurgadāṃ mahāraudrīṃ kṣipraṃ mūrdhnanyapātayat|| 39||
SP0890401: abhyetya pādayoścaiva vipracittirmahābalaḥ|
SP0890402: jagrāha sumahāgrāho matsāniva mahārṇave|| 40||
SP0890411: sa tena suprahāreṇa vihvalaḥ prāṇigocaraḥ|
SP0890412: andhakenābhisaṃyukto bhrāmito vipracittinā|| 41||
SP0890421: sa bhrāmyamāṇo vibabhau srastahārasragambaraḥ|
SP0890422: alātamiva saṃdīptaṃ niśāyāṃ munisattama|| 42||
SP0890431: bhrāmyamāṇaṃ samālakṣya punardevāḥ savāsavāḥ|
SP0890432: vegaṃ cakrurmahāvegā gṛhṇa gṛhṇetivādinaḥ|| 43||
SP0890441: vipracittistu tāndaityaḥ saṃrabdhānudyatāyudhān|
SP0890442: ālakṣya subahūnsaṃkhye garjamānānpayodavat|| 44||
SP0890451: abhīkṣṇaṃ bhīmasaṃhrādaṃ vāyuṃ dānavayūthapaḥ|
SP0890452: cikṣepa śakramuddiśya girau vajraṃ yathaiva saḥ|| 45||
SP0890461: sa cāpi tena vikṣipto labdhasaṃjño mahābalaḥ|
SP0890462: vihāya vegaṃ devendramupatasthe kṛtāñjaliḥ|| 46||
SP0890471: tato vāyuśca devāśca sarva eva sahānugāḥ|
SP0890472: abhyadravanta daityendrānpragṛhītavarāyudhāḥ|| 47||
SP0890481: teṣāṃ teṣāṃ ca saṃgrāmaḥ sughoraḥ samapadyata|
SP0890482: siṃhānāmiva dṛptānāṃ vijane śarabhaiḥ saha|| 48||
SP0890491: tatra kecidvinihatāḥ suprahāreṇa mūrchitāḥ|
SP0890492: sādhu sādhviti bhāṣantaḥ prāṇānūrdhvaṃ vitatyajuḥ|| 49||
SP0890501: apare devadaityendrāḥ padānmuktā mahābalāḥ|
SP0890502: pareṇābhyāhataṃ śūraṃ saṃrakṣantaḥ svaputravat|| 50||
SP0890511: keciddhatvāpi subahūndevadānavasattamāḥ|
SP0890512: avikṣatāḥ śitaiḥ śastrairātmānaṃ garhayantyuta|| 51||
SP0890521: aśastraṃ kecidabhyetya devadaityā mahābalāḥ|
SP0890522: dharmayuddhamabhīpsantastyaktvā śastrāṇyayodhayan|| 52||
SP0890531: bahavastatra daityendrā yuyudhurbhīmavikramāḥ|
SP0890532: devāśca nāhatā ye vai nābhighnanti kadācana|| 53||
SP0890541: padātayastatra sarve yodhayanti padātinaḥ|
SP0890542: sādinaḥ sādibhiḥ sārdhaṃ rathino rathibhiḥ saha|
SP0890543: gajino gajibhiścaiva tathā yuddhamavartata|| 54||
SP0890551: evaṃ teṣāṃ sa saṃgrāmo devānāṃ dānavaiḥ saha|
SP0890552: avartata śatānyaṣṭau varṣāṇāṃ tu mahābhayaḥ|| 55||
SP0890561: atha daityo mahāmāyo gajenāmbudavarcasā|
SP0890562: tomaraṃ sumahadbibhradyugāntānalavarcasam|| 56||
SP0890571: kokilāñjanameghābho viśruto yo virocanaḥ|
SP0890572: so 'bhyadravattadā devānītiḥ sasyānivotthitān|| 57||
SP0890581: sa gajena prabhinnena mukhāḍambaraghoṣiṇā|
SP0890582: abhidudrāva devendraṃ tiṣṭha tiṣṭheti cābravīt|| 58||
SP0890591: tasyāpatata evātha bhagavānpākaśāsanaḥ|
SP0890592: jatrudeśe śaraṃ ghoraṃ nicakhāna rarāsa ca|| 59||
SP0890601: anubhūya prahāraṃ taṃ sa daityo bhīmavikramaḥ|
SP0890602: tasyāsyatastomareṇa bibheda karamuddhatam|| 60||
SP0890611: athāsya tomarodbhinnāddhastāddhemavibhūṣitam|
SP0890612: papāta taddhanurdivyaṃ mahāśanisamasvanam|| 61||
SP0890621: tato 'sya bhūyo daityendro vyākulasya tadā gajam|
SP0890622: tomareṇa bibhedāśu kumbhadeśe mahābalaḥ|| 62||
SP0890631: sa bhinnastena daityena vane matta iva dvipaḥ|
SP0890632: anaṅkuśaḥ sannamṛdnātsvaṃ balaṃ hyanivāritaḥ|| 63||
SP0890641: te tathā vadhyamānāstu ādityā daityadānavaiḥ|
SP0890642: bhayārditā diśaḥ sarvā vyapālayanta sarvaśaḥ|| 64||
SP0890651: tataḥ śaṅkhāśca bheryaśca vādyāni vividhānyapi|
SP0890652: siṃhanādāṃśca saṃcakrurdaityadānavasaṃmatāḥ|| 65||
SP0890661: tacchinnabhinnapravidāraṇāturaṃ gajena daityaiśca punarviloḍitam|
SP0890662: balaṃ mahaddaivatapālitaṃ babhau yathārṇavo mandaramanthavikṣataḥ|| 66||
SP0899999: iti skandapurāṇa ekonanavatitamo 'dhyāyaḥ||