Skandapurāṇa Adhyāya 87

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0870010: sanatkumāra uvāca|
SP0870011: mayaścandramasaṃ devamardayatkrodhamūrchitaḥ|
SP0870012: śarairāśīviṣākārairnardamāna ivāmbudaḥ|| 1||
SP0870021: tasyāsyatastato bāṇaiścandramāḥ prahasanniva|
SP0870022: ekaikaṃ saptadhā kṛtvā mayaṃ vivyādha pañcabhiḥ|| 2||
SP0870031: tata enaṃ pṛṣatkena lalāṭe samavidhyata|
SP0870032: jahāsa ca punardevastasya lajjāṃ samādadhat|| 3||
SP0870041: sa tasya hasataḥ śīghraṃ lalāṭaṃ kaṅkapatriṇā|
SP0870042: vivyādha bhṛśamāyasto yathā vighno yatavratam|| 4||
SP0870051: tato 'sya deva uddiśya dhvajaṃ ciccheda nādayan|
SP0870052: cakrarakṣāṃśca niśitairanayadyamasādanam|| 5||
SP0870061: tasya taccāpalaṃ vīkṣya mayo dānavasattamaḥ|
SP0870062: māyāṃ divyāṃ samāsthāya rāhuḥ samabhavattadā|| 6||
SP0870071: sa rāhubhūto daityendrastaṃ devaṃ śaśalakṣaṇam|
SP0870072: abhyadravadyathā rāhū rathenāmbudanādinā|| 7||
SP0870081: sa tāṃ māyāṃ tadā jñātvā devo hyamṛtasaṃbhavaḥ|
SP0870082: āpūrayadviyatsthaṃ vai taṃ śaraistimirāśayam|| 8||
SP0870091: so 'pi daityo mahāmāyastāñcharānmāyayaiva tu|
SP0870092: vārayāṇo 'bhidudrāva śītaraśmiṃ mahābalaḥ|| 9||
SP0870101: tato 'sya syandanaṃ divyaṃ nāgayantṛ mahāprabham|
SP0870102: gṛhītvā kūbare daityaścikṣepa ca rarāsa ca|| 10||
SP0870111: ahirbudhnaḥ samāsādya rāhuṃ candramaso graham|
SP0870112: viśikhaiḥ pañcabhirviddhvā dhvajamasya nyapātayat|| 11||
SP0870121: tasyāprutya rathādrāhurgadayā bhīmarūpayā|
SP0870122: dhanurdhvajaṃ hayāṃścaiva samacūrṇayadavyayaḥ|| 12||
SP0870131: ahirbudhnastadā tena graheṇa bhṛśamārditaḥ|
SP0870132: aśaniṃ śataghaṇṭānāṃ dīptāṃ mṛtyoriva svasām|
SP0870133: jagrāha bhṛśamāyastaḥ pāśaṃ mṛtyurivāntakaḥ|| 13||
SP0870141: bhrāmayitvā sa tāmugrāṃ yamadaṇḍanibhāṃ balāt|
SP0870142: cikṣepa rāhumuddiśya vidyutaṃ megharāḍiva|| 14||
SP0870151: sā jvalantī maholkeva meghāśanirivojjvalā|
SP0870152: papāta rāhoḥ śirasi yathā vajraṃ śiloccaye|| 15||
SP0870161: atha tena prahāreṇa nārtimānabhavatsa vai|
SP0870162: sa prahasya bhṛśaṃ rāhurvegaṃ cakre mahābalaḥ|
SP0870163: ahirbudhnaṃ prati kruddho nāgānāmiva pakṣirāṭ|| 16||
SP0870171: āpatantaṃ ca vīkṣyaiva bhagavāndevasattamaḥ|
SP0870172: jagāma tasya panthānaṃ muktvānyena yathoragaḥ|| 17||
SP0870181: - - - - - - - -  - - - - - - - -|
SP0870182: - - - - - - - -  - - - - - - - -|| 18||
SP0870191: śataketuśca taṃ vīro rathenāmbudanādinā|
SP0870192: abhyadravadraṇe kruddhastiṣṭha tiṣṭheti cābravīt|| 19||
SP0870201: ādhāvato 'sya kāpālī hṛdayaṃ kaṅkapatriṇā|
SP0870202: bibheda kuliśaḥ kṣipto giriśṛṅgamivocchritam|| 20||
SP0870211: sa bhinnahṛdayastena rudreṇa grahasattamaḥ|
SP0870212: papāta svarathe mūḍhaḥ śakradhvaja ivocchritaḥ|| 21||
SP0870221: tato hāhākṛtaṃ daityairgṛhṇa gṛhṇeti cāpyuta|
SP0870222: sādhu sādhviti devāśca vinedurjaladā iva|| 22||
SP0870231: athāndhako hiraṇyākṣo vipracittirvirocanaḥ|
SP0870232: śambaraścelvalaścaiva bāṇo balirathāpi ca|| 23||
SP0870241: kālakeyāḥ sapaulomā nivātakavacāśca ye|
SP0870242: anye ca bahavo daityāstaṃ rudraṃ paryavārayan|| 24||
SP0870251: te śaraiśca gadābhiśca musalaiḥ prāsatomaraiḥ|
SP0870252: nyavārayanta taṃ devaṃ tarjayantaḥ punaḥ punaḥ|| 25||
SP0870261: sa hanyamānastairdevo bahubhirmunisattama|
SP0870262: apāsarpata vegena samīpātsuravidviṣām|| 26||
SP0870271: ajaikapātkālanemiṃ gadinaṃ gadayā mahān|
SP0870272: samāhvayata daityendraṃ madhuṃ viṣṇurivorjitaḥ|| 27||
SP0870281: tau suyuddhau gadāhastau maṇḍalāni mahābalau|
SP0870282: anyonyavijaye saktau grahāviva viceratuḥ|| 28||
SP0870291: kālanemistu saṃkruddho gadāṃ hemapariṣkṛtām|
SP0870292: śataghaṇṭāṭṭahāsāṃ ca mṛtyorjihvāmivādbhutām|| 29||
SP0870301: bhrāmayitvāsakṛddaityo nardamāno yathā vṛṣaḥ|
SP0870302: mumoca rudramuddiśya skandaḥ śaktimivācale|| 30||
SP0870311: śakramuktamivāyāntamaśaniṃ parvatopari|
SP0870312: vidyutaṃ vā mahāśabdāṃ sa rudro bhīmavikramaḥ|
SP0870313: vañcayāmāsa vegena śveto mṛtyumivāgatam|| 31||
SP0870321: tiṣṭha tiṣṭheti cāpyuktvā rudraḥ praharatāṃ varaḥ|
SP0870322: bhrāmayitvā gadāṃ ghorāṃ daityasyoparyapātayat|| 32||
SP0870331: sa tayā gadayā daityo dīptayā bhīmarūpayā|
SP0870332: hato mūrdhni diśaḥ sarvā hāridrāḥ samapaśyata|| 33||
SP0870341: atha daityastadā samyagbhrāmayāṇo gadāṃ punaḥ|
SP0870342: maṇḍalāni vicitrāṇi darśayitvā mahābalaḥ|
SP0870343: ajaikapādaṃ gadayā skandhadeśe vyatāḍayat|| 34||
SP0870351: sa cāpyabhihatastena yathā vajreṇa bhūdharaḥ|
SP0870352: viveśa bhūmiṃ duḥkhārtastadadbhutamivābhavat|| 35||
SP0870361: utthāya ca sa vegena rudraḥ kruddho mahābalaḥ|
SP0870362: avasavyaṃcaraṃ daityaṃ savyato maṇḍalecaraḥ|
SP0870363: bhrāmayitvā gadāṃ bhūyo daityasyoparyapātayat|| 36||
SP0870371: sa daityastena ghātena bhramitvā trirmahābalaḥ|
SP0870372: saṃstambhya gadayā bhūyo rudraṃ kukṣāvatāḍayat|| 37||
SP0870381: sa tayā gadayā nunno yathā vāyvīrito nagaḥ|
SP0870382: papāta bhūmau vegena śvetaśṛṅgo yathā purā|| 38||
SP0870391: patitaṃ taṃ tato 'bhyetya pāde jagrāha suvrata|
SP0870392: bhrāmayitvā ca cikṣepa sa cāmṛtyuravasthitaḥ|| 39||
SP0870401: kārtasvanaṃ jvaraścogro rudraḥ praharatāṃ varaḥ|
SP0870402: jaghāna niśitairbhallairdaśabhiḥ stanayoḥ samam|| 40||
SP0870411: kārtasvanastu bāṇena kārmukaṃ tasya dīptimat|
SP0870412: ciccheda bahudhā cainaṃ punarvivyādha patribhiḥ|| 41||
SP0870421: chinne dhanuṣi rudro 'pi daṇḍaṃ sarvārthasādhakam|
SP0870422: bhrāmayitvāsya cikṣepa kārtasvanarathaṃ prati|| 42||
SP0870431: taṃ yugāntānalaprakhyaṃ śatasūryānalaprabham|
SP0870432: jagrāha śarajālena megho vṛṣṭyā yathācalam|| 43||
SP0870441: hanyamānaśca tairdaṇḍo haviṣeddha ivānalaḥ|
SP0870442: bhūyastaraṃ prajajvāla vegavaccāpyadhāvata|| 44||
SP0870451: tamapratihataṃ daṇḍaṃ jñātvā kārtasvanaḥ sa tu|
SP0870452: rathamutsṛjya vegena ākāśastho 'bhavadbalī|| 45||
SP0870461: daṇḍaśca rathamabhyetya sahayaṃ saha yantṛṇā|
SP0870462: sadhvajaṃ sapatākaṃ ca bhasma kṛtvā yayau punaḥ|| 46||
SP0870471: yāvaddaṇḍo na patati rathe neti ca taṃ prati|
SP0870472: tāvatkārtasvano rudraṃ śarairabhyadravadbalī|| 47||
SP0870481: chittvā dhvajaṃ dhanuścāsya tathā yoktrāṇi vājinām|
SP0870482: virathaṃ taṃ jvaraṃ kṛtvā asinā mūrdhnyatāḍayat|| 48||
SP0870491: asighātaparītātmā sa rudraḥ śatrusaṃsadam|
SP0870492: tyaktvānyato yayau tūrṇaṃ padātirmunisattama|| 49||
SP0870501: so 'sighātaviparītacetano raktacandanavilepanaḥ prabhuḥ|
SP0870502: taṃ vihāya ripumugravikramaṃ dudruve surabalaṃ yatastataḥ|| 50||
SP0879999: iti skandapurāṇe saptāśītitamo 'dhyāyaḥ||