Skandapurāṇa Adhyāya 86

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0860010: sanatkumāra uvāca|
SP0860011: tato dagdhe rathe khastho dānavaḥ sa virocanaḥ|
SP0860012: vegenāsiṃ viniṣkṛṣya sa pūṣṇo niśitāñcharān|| 1||
SP0860021: cicchedāpatataḥ sarvānkārmukaṃ caiva vīryavān|
SP0860022: tathā cainaṃ punarmūrdhni khaḍgena samatāḍayat|| 2||
SP0860031: sa tena suprahāreṇa kṣaradrudhiramastakaḥ|
SP0860032: rathopasthe papātāśu vṛttotsava iva dhvajaḥ|| 3||
SP0860041: patitaṃ taṃ sa daityendraḥ pragṛhyāśu mahābalaḥ|
SP0860042: cikṣepa devarājānaṃ nardamānaḥ payodavat|| 4||
SP0860051: baliṃ vivyādha mitraśca jatrudeśe śaraistribhiḥ|
SP0860052: balirekena bhallena tasya ciccheda kārmukam|| 5||
SP0860061: athainaṃ punaranyena hṛdaye samatāḍayat|
SP0860062: sa mūḍho mṛtakalpaśca rathopasthe sasāda ha|| 6||
SP0860071: taṃ sārathirmṛtyubhayādviṣaṇṇaṃ mitramāsthitam|
SP0860072: apovāha tadā vyāsa tato daityā vicukruśuḥ|| 7||
SP0860081: bāṇaṃ vivyādha varuṇaḥ kṣudrakāṇāṃ śatena ha|
SP0860082: sa kārmukaśatāni sma pañca bāṇaḥ pratāpavān|
SP0860083: ākṛṣya yugapatkruddhaḥ śarāṃścikṣepa tāvataḥ|| 8||
SP0860091: tānāpatata evātha varuṇo laghuhastavān|
SP0860092: ekaikaṃ pañcadhā kṛtvā bāṇaṃ vivyādha pañcabhiḥ|| 9||
SP0860101: tato 'sya kārmukānsarvānvaruṇaḥ prahasanbalī|
SP0860102: ciccheda sāyakaistīkṣṇaistadadbhutamivābhavat|| 10||
SP0860111: atha cchinnadhanurdaityastasya cikṣepa vai gadām|
SP0860112: chinnāṃ dṛṣṭvā ca tāṃ bhūyo gadāḥ pañcāsṛjadbalī|| 11||
SP0860121: sa ekasyāṃ tadāsaktastā gadā nābhyavīkṣata|
SP0860122: avīkṣitāśca tāḥ sarvāḥ petustasya tadopari|| 12||
SP0860131: kācinmukuṭamāruhya nipapāta mahītale|
SP0860132: kācicca kārmukaṃ ghoraṃ hastādasya nyapātayat|| 13||
SP0860141: kāciddhvajaṃ dṛḍhaṃ divyaṃ cikṣepa dharaṇītale|
SP0860142: kāciddhayāṃstadāhatya pāṃsugrāsāṃścakāra ha|| 14||
SP0860151: urasyūrūdare kaṭyāmaparāstasya tā gadāḥ|
SP0860152: patatyaḥ sumahāghorā ārtiṃ cakrurmahābhayāḥ|| 15||
SP0860161: evaṃ sa tena virathaḥ kṛtaḥ kṛcchreṇa dhīmatā|
SP0860162: varuṇastaṃ samutsṛjya jagāmānyadraṇājiram|| 16||
SP0860171: yamo 'ndhakaṃ samāsādya tiṣṭha tiṣṭheti coditaḥ|
SP0860172: andhakasya tato daṇḍaṃ rathaṃ prati samutsṛjat|| 17||
SP0860181: sa rathaṃ tasya saṃcūrṇaṃ kṛtvā śatasahasraśaḥ|
SP0860182: yamahastaṃ punargatvā tathaiva samatiṣṭhata|| 18||
SP0860191: andhako 'pi rathaṃ tyaktvā gadāpāṇirmahābalaḥ|
SP0860192: yamaṃ samabhidudrāva krodhādvahniṃ samudgiran|| 19||
SP0860201: sa tasya dhāvato vegātpitṛrājo yamaḥ svayam|
SP0860202: daṇḍenaiva gadāmugrāṃ bhasmasāyujyamānayat|| 20||
SP0860211: sa prahasya tadā cainamuvāca prasabhaṃ yamaḥ|
SP0860212: bhavato dhāma yadabhūttatte vinihataṃ mayā|| 21||
SP0860221: sāmprataṃ tvāmapi punarnayiṣyāmi svamālayam|
SP0860222: ahaṃ hi sarvalokasya maraṇe heturīśvaraḥ|| 22||
SP0860231: mayā vairaṃ samāsādya kva me jīvanvimokṣyase|
SP0860232: adya tvā nihaniṣyāmi sudṛṣṭaṃ kriyatāṃ jagat|| 23||
SP0860241: athavā tvaṃ gataḥ pūrvamadyaivāndhaka matpuram|
SP0860242: punardraṣṭāsi tatraiva sarvānetānsuradviṣaḥ|| 24||
SP0860250: sanatkumāra uvāca|
SP0860251: athaivaṃvādinaṃ yuddhe nirbhīrandhakadānavaḥ|
SP0860252: uvāca taṃ yamaṃ kruddhaṃ krodhāddīptānalekṣaṇaḥ|| 25||
SP0860261: hiraṇyākṣasuto dṛpta andhako 'smi surāntakaḥ|
SP0860262: mahāyogabalopeto nāsmi prākṛtadānavaḥ|| 26||
SP0860271: aṅgādyena samutkṛtya bhāgānmāṃsasya kārṣikān|
SP0860272: saṃvatsaraśatānyaṣṭau pañca caiva huto 'nalaḥ|| 27||
SP0860281: tuṣṭo brahmā dadau yasya sadaivāmaratāṃ śubhām|
SP0860282: so 'haṃ nāmnā mahāsattvo mṛtyustava na saṃśayaḥ|| 28||
SP0860291: na tvaṃ mama kṛto mṛtyuḥ siṃhasyeva vane śaśaḥ|
SP0860292: ahaṃ tu bhavitā mṛtyustava nāstyatra saṃśayaḥ|| 29||
SP0860301: adya tvāhaṃ durātmānaṃ sarvalokabhayaṃkaram|
SP0860302: hatvā śreyo vidhāsyāmi trailokyasyeti me matiḥ|| 30||
SP0860311: devānāṃ ca bhavānnityaṃ hantavyo vipriye sthitaḥ|
SP0860312: teṣāmapi priyaṃ hṛdyaṃ bhaviṣyati hate tvayi|| 31||
SP0860321: na tvayāsāditaṃ pūrvaṃ haratā jīvitāni ha|
SP0860322: kiṃcidbhūtaṃ mahadbhūtaṃ tena tvaṃ nirbhayaḥ sadā|| 32||
SP0860331: devāstava bhayādbhītā aśaktāstvadvadhe tataḥ|
SP0860332: amṛtādīni lipsanti pūjayanti sadā ca te|| 33||
SP0860341: adya tvayi hate krūre nirdvandvāste 'pi sāsurāḥ|
SP0860342: amṛtena yathā prītiṃ kariṣyanti na saṃśayaḥ|| 34||
SP0860351: adya garvaṃ ca darpaṃ ca yogamāhātmyameva ca|
SP0860352: prāṇaiḥ sahaiva dehātte nāśayiṣyāmi sarvaśaḥ|| 35||
SP0860360: sanatkumāra uvāca|
SP0860361: sa evamasurendreṇa tarjito bhāskarātmajaḥ|
SP0860362: daṇḍenāsuraśārdūlamuttamāṅge 'bhyatāḍayat|| 36||
SP0860371: kālaśca kiṃkareṇaiva hṛdaye samatāḍayat|
SP0860372: mṛtyuścāśaninā kṣipraṃ śirasyeva vyatāḍayat|| 37||
SP0860381: kaṇṭhe ca niyatistasya pāśaṃ cikṣepa dāruṇam|
SP0860382: kṛtāntaḥ parighenainaṃ gaṇḍadeśe samāhanat|| 38||
SP0860391: sa tairamoghairyāmyaiśca prahato 'ndhakadānavaḥ|
SP0860392: puṣpavṛṣṭyā yathā kaścinnārtimānabhavattadā|| 39||
SP0860401: na pāśāstasya līyante daṇḍo vā parigho 'pi vā|
SP0860402: anyāni cāsya tīvrāṇi na duḥkhāya bhavantyuta|| 40||
SP0860411: tataḥ sarvaistadotkruṣṭaṃ dānavaiḥ sarvatodiśam|
SP0860412: avādyanta ca tūryāṇi mumude cāndhako bhṛśam|| 41||
SP0860421: sa teṣāṃ tuṣṭiśabdena madavīryasamīritaḥ|
SP0860422: vinadyāmbudavadvyāsa yamamevābhidudruve|| 42||
SP0860431: sa gatvā tasya vegena hanyamāno 'pi kiṃkaraiḥ|
SP0860432: ājaghāna mahāvego muṣṭinorasi taṃ yamam|
SP0860433: puṇḍraṃ ca mahiṣaṃ tasya śirasyabhyahanatpadā|| 43||
SP0860441: tāvubhau vihvalau tatra bhramitvā kiṃcidantaram|
SP0860442: hitvāndhakaṃ tatastūrṇaṃ yayaturmunisattama|| 44||
SP0860451: jayantaścelvalaṃ prāpya vivyādha daśabhiḥ śaraiḥ|
SP0860452: tasyelvalaścakartāśu dhvajaṃ ratnavibhūṣitam|
SP0860453: hayānāṃ caiva yoktrāṇi pratodaṃ caiva kāñcanam|| 45||
SP0860461: vinā yoktrairhayāstasya rathaṃ tyaktvā samuddhatāḥ|
SP0860462: nānā vijagmurheṣanto jayanto viratho 'bhavat|| 46||
SP0860471: sa rathaṃ saṃparityajya bhūsthaḥ śakrātmajaḥ prabhuḥ|
SP0860472: ilvalasya hayānsūtaṃ dhvajaṃ caiva nyapātayat|| 47||
SP0860481: tāvubhau virathau bhūtvā anyonyavijayaiṣiṇau|
SP0860482: avidhyetāṃ tadānyasya kārmukaṃ sāyakaiḥ śitaiḥ|| 48||
SP0860491: parasparavinirmuktānubhau saṃvārya sāyakān|
SP0860492: astrairastrāṇi saṃvārya nedatuḥ sāgarāviva|| 49||
SP0860501: atha śakrasutaḥ śrīmāṃl labdhvā tasya tadāntaram|
SP0860502: dhanuściccheda bhallena nanāda ca punaḥ punaḥ|| 50||
SP0860511: sa vikṛttadhanurdaityaḥ khaḍgaṃ dīptānalaprabham|
SP0860512: bhrāmayitvā vicikṣepa tamapyasyācchinattadā|| 51||
SP0860521: gṛhītvāthāsya patitāṃ gadāṃ hemavibhūṣitām|
SP0860522: bhrāmayitvā tu cikṣepa sā pradudrāva vegavat|| 52||
SP0860531: sa yāvattāṃ gadāṃ ghorāṃ śaraiḥ saṃnataparvabhiḥ|
SP0860532: viciccheda diteḥ putrastāvadasyācchinaddhanuḥ|| 53||
SP0860541: atha yāvanna nistriṃśaṃ jagrāhāditinandanaḥ|
SP0860542: tāvadenaṃ padā daityo vāmenorasyatāḍayat|| 54||
SP0860551: tameva tasya jagrāha pādaṃ tu sa mahābalaḥ|
SP0860552: jayanto 'bhrāmayaccainaṃ nardamāno yathāmbudaḥ|| 55||
SP0860561: tato hāhākṛtamabhūdasurāṇāṃ bale mahat|
SP0860562: yāta trāyata daityendramilvalaṃ śīghramityuta|| 56||
SP0860571: devānāṃ siṃhanādāśca śaṅkhaśabdāśca puṣkalāḥ|
SP0860572: tūryāṇi cāpyavādyanta sādhu sādhviti cābhavat|| 57||
SP0860581: jayanto 'pi yathā cakraṃ vidhātā balavāṃstathā|
SP0860582: bhrāmayāmāsa taṃ daityaṃ yugāntāmbudavannadan|| 58||
SP0860591: atha svayaṃ hiraṇyākṣaḥ so 'ndhako balireva ca|
SP0860592: bāṇo 'tha vipracittiśca śambaro 'tha virocanaḥ|| 59||
SP0860601: kālakeyāśca te daityāḥ paulomāḥ siṃhikāsutāḥ|
SP0860602: nivātakavacāścainaṃ samantātparyavārayan|| 60||
SP0860611: sa taiḥ śarairgadābhiśca parighairdīrghavedhanaiḥ|
SP0860612: anyaiśca bahubhiścitrairāyudhaiḥ prahato bhṛśam|| 61||
SP0860621: sa hanyamānastaṃ devo jayantaḥ śakranandanaḥ|
SP0860622: hiraṇyākṣopari kṣiptvā prādravadyena devatāḥ|| 62||
SP0869999: iti skandapurāṇe ṣaḍaśītitamo 'dhyāyaḥ||