Skandapurāṇa Adhyāya 83

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0830010: sanatkumāra uvāca|
SP0830011: atha te dānavā vyāsa nivṛttā raṇamūrdhani|
SP0830012: duṣkaraṃ taṃ tadā cakrurvegaṃ nadya ivārṇave|| 1||
SP0830021: prahlādaścānuhlādaśca śinirbāṣkala eva ca|
SP0830022: virocano balirbāṇo valo vāto 'tha kampanaḥ|| 2||
SP0830031: vipracittiśca ṣaṇḍaśca hradaśca saśatodaraḥ|
SP0830032: mayo 'suraśca vyaṃsaśca śatāvarto hradodaraḥ|| 3||
SP0830041: keśī ca namuciścaiva tathendradamano 'suraḥ|
SP0830042: mayo murastārakākṣo vidyunmālī prabhākaraḥ|| 4||
SP0830051: tāraśca tārakaścaiva bakaścāṭiśca viśrutaḥ|
SP0830052: mūkaścaiva kubhaścaiva kārtasvaramahāravau|| 5||
SP0830061: vātāpī celvalaścaiva tathaivelvakapilvakau|
SP0830062: ketuśca śataketuśca rāhuḥ svarbhānureva ca|| 6||
SP0830071: śambaro narakaścaiva kālaśambara eva ca|
SP0830072: dundubhirmahiṣaścaiva śatadundubhireva ca|| 7||
SP0830081: kālanemī vipākaśca pāko duryodhanastathā|
SP0830082: hastī sundanisundau ca śarabhaḥ kāla eva ca|| 8||
SP0830091: vṛṣaparvā śatānandaḥ śatāvarto 'tha dhenukaḥ|
SP0830092: pralambaśca dhvajaścaiva gaṇo hālāhalastathā|| 9||
SP0830101: saiṃhikeyāśca vikhyātāḥ paulomāḥ kālakāsutāḥ|
SP0830102: nivātakavacāścaiva bāleyaśca tathā gaṇaḥ|| 10||
SP0830111: bāṇasya ca sutāḥ sarve kālakañjāśca viśrutāḥ|
SP0830112: vṛto vṛttaśca sagaṇastathānye sumahābalāḥ|| 11||
SP0830121: tasya sainyasya viprendra nardataḥ saṃbabhau tadā|
SP0830122: vegaḥ sa sindhurājasya velāṃ prati yathā mahān|| 12||
SP0830131: vāditraravasaṃmiśraiḥ siṃhanādaiḥ supuṣkalaiḥ|
SP0830132: rathanemihayānāṃ ca gajānāṃ bṛṃhitaiḥ saha|
SP0830133: sa śabdastumulo vyāsa trailokyamavapūrayat|| 13||
SP0830141: devāpi hi susaṃyattāḥ sarvodyogena saṃsthitāḥ|
SP0830142: pratyagṛhṇanta tāndaityānkrodhatāmrāyatekṣaṇāḥ|| 14||
SP0830151: asibhiḥ pātyamānaiśca śataghnībhiśca sarvaśaḥ|
SP0830152: ulkābhiriva tadvyoma vicitramabhavattadā|| 15||
SP0830161: śarāsibhirnikṛttāni patantyurvyāṃ śirāṃsi tu|
SP0830162: tālebhya iva pakvāni phalāni munisattama|| 16||
SP0830171: mukuṭairhārakeyūraiḥ śroṇīsūtraiśca saprabhaiḥ|
SP0830172: niṣkairdukūlaiḥ kaṭakairaṅgulīyaiḥ sakuṇḍalaiḥ|| 17||
SP0830181: uracchadaiḥ kaṅkaṭībhiḥ karapālaiśca dantinām|
SP0830182: vyajanaistālavṛntaiśca chattrairmaṇibhireva ca|| 18||
SP0830191: paṭṭaiśca kāñcanairdivyaiḥ kavacaiśca mahāprabhaiḥ|
SP0830192: śirobhiścaraṇaiścaiva karairvastrairmahāprabhaiḥ|| 19||
SP0830201: pratodaiśca kuthābhiśca yoktraiśca kanakojjvalaiḥ|
SP0830202: tatra yuddhāvanirbhāti tārābhirdyaurivāparā|| 20||
SP0830211: tiṣṭha tiṣṭha kva me yāsi nāsti mokṣastavādya vai|
SP0830212: sthito 'haṃ praharasveti na me bhīstiṣṭha me 'grataḥ|| 21||
SP0830221: kiṃ garjasi vṛthā vyomni śaradīva balāhakaḥ|
SP0830222: karmaṇā darśaya kṣipraṃ garjitaṃ te 'dya niṣphalam|
SP0830223: naivaṃ prahriyate mūḍha māṃ vīkṣasva dṛḍho bhava|| 22||
SP0830231: tiṣṭha tiṣṭha kva gantāsi mama hatvā priyaṃ sutam|
SP0830232: sthito 'smyeṣa nayiṣyāmi tvāmapyadya yamālayam|| 23||
SP0830241: adya te 'maratāṃ sarvāṃ devādhama suduḥsahām|
SP0830242: nāśayiṣyanti madbāṇāstiṣṭha tiṣṭha mamāgrataḥ|
SP0830243: dānavādhama devo 'smi nāsmi bhītastavāhave|| 24||
SP0830251: evaṃ vadanto yuyudhuryathā mattā mahāgajāḥ|
SP0830252: parasparavadhe saktā yodhāstatra sahasraśaḥ|
SP0830253: anyo 'nyamevamābhāṣya preṣayadyamasādanam|| 25||
SP0830261: siddhāśca cāraṇāścaiva vyomni sarve vyavasthitāḥ|
SP0830262: sādhayanti ramante ca nadante ca yathāmbudāḥ|| 26||
SP0830271: mamāyaṃ dānavaḥ saṃkhye hato bhartā vinirmitaḥ|
SP0830272: ayaṃ devastava patirmā pārakye manaḥ kṛthāḥ|| 27||
SP0830281: kimevaṃ lobhayuktāsi śreṣṭhaṃ śreṣṭhaṃ parīkṣase|
SP0830282: svayaṃgrāho na hīhāsti lekhyaṃ vācaya mā tvarīḥ|| 28||
SP0830291: asaṃtoṣo mataḥ kaste saṃtuṣṭā bhava sundari|
SP0830292: bhāgo yaste surairdattaṃ taṃ gṛhītvā vrajānaghe|| 29||
SP0830301: evamapsarasaścātra vadanti ca hasanti ca|
SP0830302: samare nihatānyodhānkurvanti kalahaṃ tathā|| 30||
SP0830311: mekhalāvalayonmiśraṃ tāsāṃ tatkalabhāṣitam|
SP0830312: śrutvā śrutvā ca te yodhā yuyudhurbhayavarjitāḥ|
SP0830313: valgitāsphoṭitāścaiva diśaḥ sarvā vyanādayan|| 31||
SP0830321: tatpravāditagajopabṛṃhitaṃ valgitākupitasiṃhanāditam|
SP0830322: devadānavabhayapravartanaṃ jīvitāntakaramābabhau raṇam|| 32||
SP0839999: iti skandapurāṇe tryaśītitamo 'dhyāyaḥ||