Skandapurāṇa Adhyāya 82

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0820010: sanatkumāra uvāca|
SP0820011: tāṃstathāṃśena daityendrānkalyamānānitastataḥ|
SP0820012: dṛṣṭvā valo mahāmāyo yantāramidamabravīt|| 1||
SP0820021: nayasva māṃ yato 'ṃśo 'yaṃ durātmā dahate balam|
SP0820022: yāvadenaṃ śitairbāṇairnayāmi yamasādanam|| 2||
SP0820031: tasyāpatata evāṃśastadā praharatāṃ varaḥ|
SP0820032: dhvajaṃ ciccheda bāṇena hayāṃścaikaikaśastadā|| 3||
SP0820041: bhallena ca śiraḥ kāyādyanturāśu nyapātayat|
SP0820042: taṃ caiva pañcabhirbāṇairlalāṭe samavidhyata|| 4||
SP0820051: tasya daityasya te bhānti lalāṭe pañca sāyakāḥ|
SP0820052: ghanodaraviniṣkrāntā bhāskarasyeva raśmayaḥ|| 5||
SP0820061: daityo 'pi hi tadāmarṣī viyadutpatya roṣitaḥ|
SP0820062: sāyakairbahubhirvyāsa so 'ṃśaṃ samakiradbalī|| 6||
SP0820071: savṛṣṭiriva jīmūta utpāta iva cāśanim|
SP0820072: karāndivākaro yadvattuṣāraṃ candramā iva|| 7||
SP0820081: tathā sa dānavo darpādvalaḥ praharatāṃ varaḥ|
SP0820082: aṃśaṃ samākirattīkṣṇaiḥ sāyakairmarmabhedibhiḥ|| 8||
SP0820091: dhvajaṃ ciccheda caivāsya bahudhā dānaveśvaraḥ|
SP0820092: hayānvegahatānkṛtvā sārathiṃ cāpyasārathim|
SP0820093: kārmukaṃ bahubhirbāṇairvyadhamattilaśastadā|| 9||
SP0820101: yathāṃśaṃ sa cakārograṃ tathānyānapi devatān|
SP0820102: nirudyamānmahāmāyaścakāra virarāsa ca|| 10||
SP0820111: kvacijjīmūtasaṃkāśaḥ kvacidbhāskarasaṃnibhaḥ|
SP0820112: kvacitsomāgnikalpaśca kvacittārāgrahaiḥ samaḥ|| 11||
SP0820121: kvacitparvatasaṃkāśaḥ kvacitkhagavapurdharaḥ|
SP0820122: kvacidākāśamāviśya adṛśyaḥ so 'sṛjaccharān|| 12||
SP0820131: śaropacitagātraṃ tacchinnabhinnavidāritam|
SP0820132: niṣpandaṃ mūkavatsarvaṃ devānāṃ balamābabhau|| 13||
SP0820141: naṣṭavāditraninadaṃ hayaheṣitavarjitam|
SP0820142: gajabṛṃhitavibhraṣṭaṃ śāntayodhogranāditam|
SP0820143: niṣpandaṃ tadbalaṃ bhāti citrapaṭṭārpitaṃ yathā|| 14||
SP0820151: ūrdhvaṃ nirīkṣate tatra yaḥ kaścidvibudho bale|
SP0820152: valastasya śarairvaktramakarodvividhaṃ balī|
SP0820153: ceṣṭāvirahitāścāsanyathā mokṣapathi sthitāḥ|| 15||
SP0820161: tāṃstathā sīdataḥ sarvāndṛṣṭvā balamahārṇave|
SP0820162: vāyurjayantaḥ pūṣā ca bhagaśca sumahābalaḥ|
SP0820163: nadantastāñcharāṃstasya valasya samavārayan|| 16||
SP0820171: vāyustasya mahāvegaḥ śarānmeghādivoditān|
SP0820172: mucyato mucyamānāṃśca muktāṃścaivāharadbalī|| 17||
SP0820181: bhago 'sya kārmukaṃ divyamacchinatprahasanniva|
SP0820182: dehatrāṇaṃ tathā pūṣā jayantaśceṣudhī tathā|
SP0820183: samārdayañcharaistīkṣṇairdevā ravisamaprabhāḥ|| 18||
SP0820191: so 'rdyamānastadā devairbalī dānavapuṃgavaḥ|
SP0820192: vṛkṣaiḥ kānanajairvyāsa yuyudhe bhīmavikramaḥ|| 19||
SP0820201: tāndrumāṃste tadā kṣiptānvalena bahudhā śubhān|
SP0820202: cakruḥ śarairdevatendrāstataḥ sa girimāvrajat|| 20||
SP0820211: gṛhītvā sa mahacchṛṅgaṃ samṛgavyālakinnaram|
SP0820212: cikṣepa sumahannādaṃ prakurvāṇo 'tidāruṇam|| 21||
SP0820221: athāpatantaṃ vegena pavano balavānbalāt|
SP0820222: jahāra śṛṅgaṃ taccāpi papātāsuramūrdhasu|| 22||
SP0820231: dānavānāṃ tadā koṭimekāṃ vīryavatāṃ yudhi|
SP0820232: jaghāna valamuktaṃ tadgiriśṛṅgaṃ mahāsvanam|| 23||
SP0820241: tānhatāndānavāṃstena śṛṅgeṇa ditinandanāḥ|
SP0820242: dṛṣṭvā devāṃśca tānugrānabhajyanta sahasraśaḥ|| 24||
SP0820251: rathairaśvairgajaiścaiva tathā caiva padātayaḥ|
SP0820252: utsṛjya vāhanānanye jīvitenārthinastadā|
SP0820253: prapalīnā bhayāddaityā dānavāśca sahasraśaḥ|| 25||
SP0820261: dravatastāṃstadābhyetya hiraṇyākṣaḥ sa dānavaḥ|
SP0820262: vipracittiśca danujaḥ prahlādaśca mahābalaḥ|| 26||
SP0820271: yamamukto 'ndhako daityastārakaḥ śakratāpanaḥ|
SP0820272: ūcire dānavānsarvāndaityāṃśca bhayavihvalān|| 27||
SP0820281: bho bho dānavaśārdūlā daityāśca suraśatravaḥ|
SP0820282: kiṃ palāyata tiṣṭhadhvaṃ mā bhayaṃ vo 'stu dānavāḥ|
SP0820283: kva gatā dānavā yūyaṃ sukhaṃ lapsyatha vijvarāḥ|| 28||
SP0820291: ete balamajānanto devāḥ pūrvaṃ mahābalāḥ|
SP0820292: na pramardanti pātāle sthitānapyasurottamāḥ|| 29||
SP0820301: sāmprataṃ tu balairhīnāñjñātvā vo 'surasattamāḥ|
SP0820302: niḥśeṣānprakariṣyanti pātāle 'pi kulādhamāḥ|| 30||
SP0820311: mā yāta vinivartadhvaṃ rakṣāṃ kuruta sarvaśaḥ|
SP0820312: suyuddhenātmano daityā mā bhayaṃ vo 'stu jīvite|| 31||
SP0820321: kva gataṃ danujatvaṃ vaḥ kva gatā daityatā ca vaḥ|
SP0820322: kva ca vairaṃ suraiḥ sārdhaṃ kva rājyaharaṇaṃ gatam|| 32||
SP0820331: yadvairaṃ yaśca vo darpaḥ kulajanma ca yaddhi vaḥ|
SP0820332: yacca tadgarjitaṃ pūrvaṃ tasya kālo 'yamāgataḥ|| 33||
SP0820341: yattvabrūta tadā daityā na bālā vayamityuta|
SP0820342: vayamekaikaśo yogyā devānāṃ nāśaneti ca|
SP0820343: tasya kālo 'yamadyeha prāptaḥ kiṃ vipalāyata|| 34||
SP0820351: tatsarvaṃ garjitaṃ vo 'dya jānāmyahamataḥ param|
SP0820352: śaradambudavaddaityā vyarthaṃ mā yāta bhīṣitāḥ|| 35||
SP0820361: nivartadhvamadharmajñā yudhyadhvaṃ kṛtaniścayāḥ|
SP0820362: vīkṣadhvaṃ me saputrasya mahatkarma kulādhamāḥ|| 36||
SP0820371: kaśyapasya sutaḥ śrīmānhiraṇyākṣo 'smi dānavāḥ|
SP0820372: andhakaśca suto 'yaṃ me brahmadattavaraḥ śubhaḥ|| 37||
SP0820381: hiraṇyakaśiporvīryaṃ yadabhūdasurottamāḥ|
SP0820382: dviguṇaṃ tanmamāpyasti vīkṣadhvaṃ tadaśaṅkitāḥ|| 38||
SP0820391: adya devānmayā sarvānhatānpaśyata dānavāḥ|
SP0820392: saṃgrāme yadi tiṣṭhanti sarve devā mamāgrataḥ|| 39||
SP0820401: adya trailokyamavyagraṃ hateṣvasuraśatruṣu|
SP0820402: vijvarā bhokṣyatha sukhaṃ mayendreṇāsurottamāḥ|| 40||
SP0820411: mā vo 'stu bhayamadyeha yathā tiṣṭhanti sādhavaḥ|
SP0820412: saputraṃ māṃ yudhi tathā vīkṣamāṇāstu tiṣṭhata|| 41||
SP0820420: sanatkumāra uvāca|
SP0820421: ta evamuktā viprendra gajāstottrārditā iva|
SP0820422: vinivṛttāḥ punaḥ sarve lajjayābhisamāvṛtāḥ|| 42||
SP0820431: te chattrasaṃchāditavaktrapadmā lajjāsamāviṣṭavirāgavaktrāḥ|
SP0820432: na tasya rājño mukhato 'vatasthustimerivāntaḥ salile 'lpamīnāḥ|| 43||
SP0829999: iti skandapurāṇe dvyaśītitamo 'dhyāyaḥ||