Skandapurāṇa Adhyāya 81

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0810010: sanatkumāra uvāca|
SP0810011: hiraṇyākṣastadāyāntaṃ dṛṣṭvā devendramagrataḥ|
SP0810012: uvāca rathayantāramindraṃ prati nayasva mām|| 1||
SP0810021: sa tena coditaḥ samyakcodayānastadā hayān|
SP0810022: anayattaṃ surendrāya hutabhāgaṃ yathānalaḥ|| 2||
SP0810031: sa gajaskandhagaṃ devaṃ sahasrākṣaṃ sureśvaram|
SP0810032: śarapāte tadā sthitvā provācāsurapuṃgavaḥ|| 3||
SP0810041: śakra yatte balaṃ kiṃcittadvidarśaya mā ciram|
SP0810042: pūrvadevā vayaṃ caiva trailokyaṃ cākhilaṃ hi naḥ|
SP0810043: jyeṣṭhakramāgataṃ kṛtvā nyāyena surasattama|| 4||
SP0810051: te yūyaṃ nyāyamutsṛjya hatvā me bhrātaraṃ punaḥ|
SP0810052: viśrambheṇa śaṭhā bhūtvā paścāddevatvamāgatāḥ|| 5||
SP0810061: ime vayaṃ pūrvadevā navā yūyaṃ ca devatāḥ|
SP0810062: yudhyatāṃ vo 'dya sarveṣāṃ jīvitāni harāmyaham|| 6||
SP0810071: sahānujaistvāmihādya hatvā kṛtvā baliṃ tathā|
SP0810072: bhaviṣyāmyanṛṇo bhrāturyastvayā māyayā hataḥ|| 7||
SP0810081: sa evamuktvā balavāndhanurākṛṣya vīryavān|
SP0810082: lalāṭe pañcabhirvyāsa vivyādha niśitaiḥ śaraiḥ|| 8||
SP0810091: sa viddhastena devānāṃ lalāṭe pañcabhiḥ śaraiḥ|
SP0810092: rājā babhau yathā meruḥ sūryapādairnagottamaḥ|| 9||
SP0810101: atha tasya tadā śakraḥ punarākarṣato dhanuḥ|
SP0810102: ciccheda vajramādāya punaścainamatāḍayat|| 10||
SP0810111: sa tena suprahāreṇa diśo dīptā hyapaśyata|
SP0810112: anyacca dhanurādāya punareva vyakarṣata|| 11||
SP0810121: tamapyasyācchinadrājā tathānyadbhūya eva ca|
SP0810122: atha śaktiṃ samādāya cikṣepa ruṣitastadā|| 12||
SP0810131: tāmāpatantīṃ dīptāsyāmugrāṃ mṛtyoriva svasām|
SP0810132: vajreṇa rājā ciccheda tadadbhutamivābhavat|| 13||
SP0810141: gadāmanyāṃ samudyamya hiraṇyākṣastadā śubhām|
SP0810142: abhidudrāva vegena kruddhaḥ siṃha iva dvipam|| 14||
SP0810151: tasyāpatata evāśu gadāṃ hemapariṣkṛtām|
SP0810152: ciccheda bahudhā rājā dharmārthāniva nāstikaḥ|| 15||
SP0810161: athainaṃ vipracittiśca śinirbāṣkala eva ca|
SP0810162: mayaśca śambaraścaiva asilomā ca dānavaḥ|| 16||
SP0810171: tāraśca tārakaścaiva tathendradamanaḥ sa ca|
SP0810172: kālanemī ca ṣaṇḍaśca vipākaḥ pāka eva ca|| 17||
SP0810181: ilvalo namuciścaiva vātāpī kālamuñjikaḥ|
SP0810182: ete sarve mahāmāyā devendramabhidudruve|| 18||
SP0810191: tānāpatata evātha rudrādityāḥ pramanyavaḥ|
SP0810192: rurudhurvijane yadvadgajānsiṃhāḥ samūrjitāḥ|| 19||
SP0810201: teṣāṃ teṣāṃ ca saṃgrāmaḥ sughoraḥ samapadyata|
SP0810202: araṇye 'nyonyasaṃpātānmattānāṃ dantināmiva|| 20||
SP0810211: tatrāṃśo nāma ādityo rathenāmbudanādinā|
SP0810212: āyamya kārmukaṃ vyāsa dānavānsamupādravat|| 21||
SP0810221: sa vipracittiṃ daśabhiḥ śiniṃ pañcabhireva ca|
SP0810222: tribhiśca bāṣkaliṃ saṃkhye mayaṃ pañcabhireva ca|| 22||
SP0810231: śambaraṃ caiva viṃśatyā asilomānameva ca|
SP0810232: tāraṃ ca tārakaṃ caiva ilvalaṃ namuciṃ tathā|| 23||
SP0810241: vātāpiṃ sendradamanaṃ vipākaṃ pākameva ca|
SP0810242: kālanemiṃ ca ṣaṇḍaṃ ca tathā cāmīsṛmuñjikam|
SP0810243: etānsarvānsa vivyādha daśabhirdaśabhiḥ śaraiḥ|| 24||
SP0810251: vikarṣatāṃ ca saṃgrāme ādityo laghuhastavān|
SP0810252: dhanūṃṣi yugapaddevaściccheda ca nanāda ca|| 25||
SP0810261: tata eṣāṃ punarvāhānsūtāndivyāñjayadhvajān|
SP0810262: prahasanniva viprendra sāyakairbahudhākarot|| 26||
SP0810271: te hatāśvā maheṣvāsā hatasūtāśca sarvaśaḥ|
SP0810272: vegena khaḍginaḥ sarve aṃśamevābhidudruvuḥ|| 27||
SP0810281: tānmūrtāniva śailendrāngarjato jaladāniva|
SP0810282: asaṃbhrāntastadādityo jānuṣvevāvapūrayat|| 28||
SP0810291: śarapūritagulphāste jānuṣveva ca dānavāḥ|
SP0810292: aṃśamutsṛjya vegena jagmuranyāṃ diśaṃ tadā|| 29||
SP0810301: tato devāstadā cakrurmahāntaṃ tūryanisvanam|
SP0810302: siṃhanādāṃśca vipulānbāhuśabdāṃśca puṣkalān|| 30||
SP0810311: aṃśo 'pyāyamya bhagavāndhanurindrāyudhopamam|
SP0810312: dānavānāṃ sadaityānāmakarotkadanaṃ mahat|| 31||
SP0810321: śirāṃsi dānavendrāṇāmaṃśaḥ praharatāṃ varaḥ|
SP0810322: apātayatphalānīva pakvāni śvasano yathā|| 32||
SP0810331: dhāvantaḥ kecidaṃśena aśiraskāḥ śaraiḥ kṛtāḥ|
SP0810332: gatvā vegena saṃgrāmātpatantyurvyāṃ gatāsavaḥ|| 33||
SP0810341: apare bāhubhiśchinnairūrubhiśca mahābalāḥ|
SP0810342: patitā niṣṭanantyurvyāṃ nirayasthā yathā narāḥ|| 34||
SP0810351: śarapūritasarvāṅgāḥ śarasaṃbaddhabandhanāḥ|
SP0810352: bhramanti tatra tatraiva saṃsāra iva dehinaḥ|| 35||
SP0810361: na sa tatrāsti daityo vā dānavo vā mahābalaḥ|
SP0810362: yaḥ śarānna bibhetyugrānaṃśasya sumahātmanaḥ|| 36||
SP0810371: bandhujīvavanaṃ yadvadghanamābhāti puṣpitam|
SP0810372: aśokakiṃśukānāṃ vā tathā daityabalaṃ babhau|| 37||
SP0810381: ayamaṃśo 'yamaṃśeti netyayaṃ cāyamityuta|
SP0810382: sarvamaṃśamayaṃ daityā apaśyanta bhayārditāḥ|| 38||
SP0810391: so 'pi nityāyatadhanuḥ pāriveṣīva bhāskaraḥ|
SP0810392: yaṃ yataḥ paśyate daityaṃ taṃ taṃ vivyādha patribhiḥ|| 39||
SP0810401: nādadānastadā hyaṃśaḥ saṃdadhānastathāpi vā|
SP0810402: na vikarṣandhanuścaiva lakṣyate daityadānavaiḥ|| 40||
SP0810411: maṇḍalīkṛtamevāsya dṛśyate kārmukaṃ mahat|
SP0810412: āditya iva madhyāhne dṛśyate sa tadā yudhi|| 41||
SP0810421: sa divyacāpo laghuhastavānbalī sadā mahāmaṇḍalabhūtakārmukaḥ|
SP0810422: dadāha śatrūnpavanerito raṇe vibhāvasuḥ śuṣkamivendhanaṃ mahān|| 42||
SP0819999: iti skandapurāṇa ekāśītitamo 'dhyāyaḥ||