Skandapurāṇa Adhyāya 80

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0800010: sanatkumāra uvāca|
SP0800011: tasminmahati yuddhe tu vartamāne mahābhaye|
SP0800012: dānavāṃstāṃstadā devāḥ samantātparyavārayan|| 1||
SP0800021: mṛtyuḥ kālo yamaścaiva kṛtāntaḥ kalahastathā|
SP0800022: nikṛtirvyādhayaścaiva vairaṃ krodhaśca vīryavān|| 2||
SP0800031: narakāścaiva te sarve yamadūtāśca sarvaśaḥ|
SP0800032: pretāśca pitaraścaiva catvāro ye gaṇā divi|| 3||
SP0800041: vāmanaścaiva yo devaḥ kiṃkarāśca mahābalāḥ|
SP0800042: ete sarve tadāviśya saṃjaghnurdānavaṃ balam|| 4||
SP0800051: yamadūtairvibhinnāṅgā bhagnasakthatrikorasaḥ|
SP0800052: niṣṭananti kṣitau daityā nirayeṣviva pāpinaḥ|| 5||
SP0800061: yamadaṇḍaviniṣpiṣṭā mṛtyupāśograpāśitāḥ|
SP0800062: kṛtāntavaśagāḥ sarve te 'bhajyanta diteḥ sutāḥ|| 6||
SP0800071: te hanyamānā daiteyā mṛtyunā ca yamena ca|
SP0800072: trātāramalabhanto vai tatra tatraiva babhramuḥ|
SP0800073: tathā tāṃstatra tatraiva bhramanto jaghnurārditāḥ|| 7||
SP0800081: tato hāhākṛtaṃ sarvaṃ dānavānāṃ bale 'bhavat|
SP0800082: sādhu sādhviti devānāṃ yamaṃ pūjayatāmabhūt|| 8||
SP0800091: atha prahlādatanayo virocana iti śrutaḥ|
SP0800092: sa gajena tadābhyetya devānāṃ balamardayat|| 9||
SP0800101: saha tena mahāmāyo gajena samadhāvata|
SP0800102: yamaṃ pradakṣiṇaṃ kṛtvā droṇamegha ivāparaḥ|| 10||
SP0800111: sa śarairbahubhistīkṣṇairakuṇṭhāgrairayasmayaiḥ|
SP0800112: varuṇaṃ ca dhaneśaṃ ca vāyuṃ caivābhyavarṣata|| 11||
SP0800121: sa saṃchādya tadā bhāsaṃ bhāskarasya śitaiḥ śaraiḥ|
SP0800122: avākirata tāndevānsaṃvartaka ivāmbudaḥ|| 12||
SP0800131: te śarācitasarvāṅgā vadhyamānāḥ punaḥ punaḥ|
SP0800132: kṣaṇena samapadyanta devāḥ sarve vicetasaḥ|| 13||
SP0800141: yāntamāyāntamaprāptaṃ prāptaṃ dūrasthameva ca|
SP0800142: yaṃ yato vīkṣate daityastaṃ tato 'bhijaghāna saḥ|| 14||
SP0800151: nityāyatadhanurdaityaḥ pāriveṣīva bhāskaraḥ|
SP0800152: durnirīkṣyaḥ samabhavadyugāntāgnirivotthitaḥ|| 15||
SP0800161: athaivamasyato vyāsa varuṇaḥ kārmukaṃ tadā|
SP0800162: ciccheda sumahaddhīmāṃstarjayandānaveśvaram|| 16||
SP0800171: vāyustīkṣṇaiḥ śaraistasya kavacaṃ sarvato 'harat|
SP0800172: dhaneśo 'śanighātena gajamasya nyasūdayat|| 17||
SP0800181: taṃ tathā nikṛtaṃ dṛṣṭvā balirbāṇaśca tāvubhau|
SP0800182: prahlādo bhrātṛbhiḥ sārdhaṃ lokapālānupādravat|| 18||
SP0800191: teṣāmāpatatāmeva lokapālā mahābalāḥ|
SP0800192: śarairāśīviṣākāraiścakrarakṣānapothayan|| 19||
SP0800201: vāyurbāṇasya viśikhaiḥ kārmukāṇi vikarṣataḥ|
SP0800202: ciccheda yugapadvyāsa tadadbhutamivābhavat|| 20||
SP0800211: sa cchinnadhanvā saṃkruddhastomarāṇi tadāsṛjat|
SP0800212: cikṣepa tāni vegena vāyuranyāṃ diśaṃ punaḥ|| 21||
SP0800221: hayāṃśca punarevāsya śaraiḥ saṃnataparvabhiḥ|
SP0800222: sasūtānparamāyasto hyanayadyamasādanam|| 22||
SP0800231: sa rathādbalijaḥ krodhādavaprutya mahābalaḥ|
SP0800232: gadāṃ gṛhītvā vegena śvasanaṃ samupādravat|| 23||
SP0800241: tasyāpatata evātha bhagavānanilastadā|
SP0800242: śarairāśīviṣākārairgadāṃ tāṃ samakṛntata|| 24||
SP0800251: sa nikṛttagadaścāpi bāṇaḥ praharatāṃ varaḥ|
SP0800252: pragṛhya tu gadāmanyāṃ cikṣepa ca jahāsa ca|| 25||
SP0800261: tāmāpatantīṃ vegena gadāṃ bāṇasya khecarīm|
SP0800262: ākṣipya vāyurvyadhamadanyāṃ diśamadīnavat|| 26||
SP0800271: vimukhaṃ tamathālakṣya vāyunā ca śarārditam|
SP0800272: putraṃ balirdrutaṃ vyāsa rathena samapādayat|| 27||
SP0800281: tāvekarathasaṃyattau babhaturdānaveśvarau|
SP0800282: sūryācandramasau yadvatpūrṇamāsyāṃ samāgatau|| 28||
SP0800291: atha teṣāṃ ca teṣāṃ ca tadyuddhamabhavattadā|
SP0800292: - - - - - - - -  - - - - - - - -|| 29||
SP0800301: tānniruddhānathājñāya lokapālairmahābalaiḥ|
SP0800302: nivātakavacāḥ sarve kālakeyāśca daṃśitāḥ|| 30||
SP0800311: paulomāḥ saiṃhikeyāśca śambaraḥ kālaśambaraḥ|
SP0800312: andhakaśca mahādaityo hiraṇyākṣaśca viśrutaḥ|| 31||
SP0800321: sarve vyūhamamuñcanto dānavā yuddhalālasāḥ|
SP0800322: cakrurvegaṃ mahāvegāḥ sameghā iva sānavaḥ|| 32||
SP0800331: tānāpatata evātha yamo daṇḍena vīryavān|
SP0800332: avārayata te tasthuścitrapaṭṭārpitā iva|| 33||
SP0800341: tānyamasya bhayāddaityāndṛṣṭvā sarvānavasthitān|
SP0800342: andhako yamamabhyetya tiṣṭha tiṣṭheti cābravīt|| 34||
SP0800351: mahatā sa rathenetya dhanurvisphārya cāsakṛt|
SP0800352: yamaṃ lalāṭe daśabhirbāṇairvivyādha vīryavān|| 35||
SP0800361: pañcabhirmahiṣaṃ cāsya ṣaḍbhiḥ kālaṃ tathāgrataḥ|
SP0800362: mṛtyuṃ dvādaśabhiścaiva kṛtāntaṃ caiva saptabhiḥ|| 36||
SP0800371: bhrāmayansa punaścāpamindrāyudhasamaprabham|
SP0800372: nanādāmbudavadvyāsa punarvivyādha caiva tam|| 37||
SP0800381: hiraṇyākṣasuto jyeṣṭha andhako 'haṃ mahābalaḥ|
SP0800382: brahmaṇā ca varo datto mahyamityavaghoṣayat|| 38||
SP0800391: tasyaivaṃ vadatastūrṇaṃ sūryaputraḥ pratāpavān|
SP0800392: rathaṃ ciccheda saṃkruddho daṇḍena vinipātayan|| 39||
SP0800401: sakārmuke rathe tatra mathite hyandhakastadā|
SP0800402: gadāmudyamya vegena pretādhipamathādravat|| 40||
SP0800411: tasya tāṃ daṇḍaghātena gadāṃ sarvāmacūrṇayat|
SP0800412: śirasyenaṃ punaḥ kruddho daṇḍena samatāḍayat|| 41||
SP0800421: jitendriyo muniryadvatspṛṣṭo viṣayagocaraiḥ|
SP0800422: na cacāla mahāsaṃkhye daṇḍaṃ cāsya samāhanat|| 42||
SP0800431: athāpratihataṃ daṇḍamandhakena parāhatam|
SP0800432: punaḥ pratihataṃ dṛṣṭvā jahasurdānaveśvarāḥ|| 43||
SP0800441: siṃhanādaṃ savāditraṃ bāhuśabdāṃśca susvarān|
SP0800442: cakruḥ sādhvandhaketyevaṃ cukruśuśca muhurmuhuḥ|| 44||
SP0800451: andhako 'pi tadābhyetya nardamāno yathārṇavaḥ|
SP0800452: talenāhatya mahiṣādyamaṃ bhūmau nyapātayat|| 45||
SP0800461: tato hāhākṛtaṃ devairgṛhṇa gṛhṇeti dānavaiḥ|
SP0800462: vyūhabhaṅgaśca devānāmabhavacchaktinandana|| 46||
SP0800471: atha mṛtyuśca kālaśca kṛtāntaścaiva te trayaḥ|
SP0800472: andhakaṃ bahubhiḥ pāśairbabandhuḥ krodhamūrchitāḥ|| 47||
SP0800481: pāśānsa teṣāṃ daityendro vicchidya sumahābalaḥ|
SP0800482: bāhupāśena balavānkṛtāntamavabandhata|| 48||
SP0800491: sa baddho bāhupāśena kṛtāntaḥ krodhamūrchitaḥ|
SP0800492: utkṣipyāndhakamuddhūto nināya balavānbalāt|| 49||
SP0800501: taṃ nīyamānaṃ saṃprekṣya hiraṇyākṣaḥ sutaṃ svakam|
SP0800502: jaghāna sāyakaistīkṣṇaiḥ kṛtāntaṃ subhṛśaṃ dṛḍhaiḥ|| 50||
SP0800511: tasya gātrāṇi sarvāṇi saṃdhīṃścaiva mahābalaḥ|
SP0800512: vivyādha niśitairbāṇaiḥ sa viṣṭabdho vyatiṣṭhata|| 51||
SP0800521: taṃ bāṇairvivṛtaṃ dṛṣṭvā devāḥ sarve savāsavāḥ|
SP0800522: rakṣantaḥ samavartanta bhīmodyatakarāyudhāḥ|| 52||
SP0800531: atha kikharamṛdaṅgaveṇuvīṇāpaṇavasughoṣakaḍiṇḍimānakānām|
SP0800532: asurasurabale mahāṃstadānīṃ samabhavadagravaraḥ sa tūryanādaḥ|| 53||
SP0809999: iti skandapurāṇe 'śītitamo 'dhyāyaḥ||