Skandapurāṇa Adhyāya 79

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0790010: sanatkumāra uvāca|
SP0790011: vyūḍhe surāṇāṃ sainye 'tha sthite yuddhāya daṃśite|
SP0790012: dānavānāṃ balaṃ ghoraṃ samadṛśyata bhīṣaṇam|| 1||
SP0790021: te dānavabalaṃ dṛṣṭvā devāḥ sarve savāsavāḥ|
SP0790022: siṃhanādānakurvanta vāditraravamiśritān|| 2||
SP0790031: sa nādaḥ sumahānvyāsa sāgarasyeva mathyataḥ|
SP0790032: āpūrayajjagatsarvaṃ yugāntāmbudanisvanaḥ|| 3||
SP0790041: tato dānavaśārdūlāḥ sarve dṛṣṭvā surottamān|
SP0790042: vyūhaskandhāsthitānsamyagvīkṣāṃcakruḥ parasparam|| 4||
SP0790051: tānīkṣamāṇānsaṃdṛśya sthitāndānavayūthapān|
SP0790052: uvāca bhārgavaṃ vyāsa hiraṇyanayanaḥ svayam|| 5||
SP0790061: ete vyūhamimaṃ kṛtvā devāstiṣṭhantyabhītavat|
SP0790062: manyante dānavānyuddhe vayaṃ jeṣyāma sarvaśaḥ|| 6||
SP0790071: sa bhavānyuktamasyaiva devavyūhasya bhedanam|
SP0790072: kuru māyāprativyūhamasmākamapi mā ciram|| 7||
SP0790080: sanatkumāra uvāca|
SP0790081: evamastviti saṃprocya ardhacandramakurvata|
SP0790082: khagasya tasya yacchettuṃ śiraḥ kāyādiyeṣa saḥ|| 8||
SP0790091: cakāra tasya śṛṅge tu prahlādāndhakadānavau|
SP0790092: dhārāṃ nivātakavacānpaulomānkālakāsutān|| 9||
SP0790101: virocanaṃ baliṃ caiva vipracittiṃ sahānujaiḥ|
SP0790102: prahlādabhrātaraścaiva sasuhṛdvargabāndhavān|
SP0790103: pṛṣṭhaṃ cakre mahāyogī madhyaṃ rājā tathaiva ca|| 10||
SP0790111: uvāca cedaṃ viśrabdho bhārgavaḥ śatrutāpanaḥ|
SP0790112: hiraṇyākṣamidaṃ yuktaṃ kāle pathyaṃ ca sarvaśaḥ|| 11||
SP0790121: daivatavyūhabhettāyaṃ mahāvyūho hi vaḥ kṛtaḥ|
SP0790122: yuddhaṃ kuruta bhadraṃ vo manmantraparipālitāḥ|| 12||
SP0790131: parasparaṃ ca rakṣantaḥ sarve citrāstrayodhinaḥ|
SP0790132: mahāmāyānsurānsarve yathā naivābhimanyata|| 13||
SP0790141: tataḥ śaṅkhāśca bheryaśca paṇavānakagomukhāḥ|
SP0790142: āḍambarā ḍiṇḍimāśca paṭahāśca mahāsvanāḥ|| 14||
SP0790151: nānāvidhāni cānyāni pravādyanta sahasraśaḥ|
SP0790152: devānāṃ dānavānāṃ ca madasattvapradāni vai|| 15||
SP0790161: tataḥ pramardatetyuktvā dānavā dānaveśvaraiḥ|
SP0790162: mamardurdevatānīkaṃ prahatāḥ sarvaśastadā|| 16||
SP0790171: devā api ca saṃyattāstapoyogabalānvitāḥ|
SP0790172: dānavānvividhaiḥ śastrairabhijaghnuḥ kṛtāgasaḥ|| 17||
SP0790181: asīnāṃ pātyamānānāṃ śirasāṃ hastināmapi|
SP0790182: āsīcchabdo mahāghoro vaṃśānāmiva pāṭyatām|| 18||
SP0790191: vikṛṣyatāṃ kārmukāṇāmiṣūṇāṃ ca vimucyatām|
SP0790192: āsīttatra mahāñchabdo girīṇāmiva bhidyatām|| 19||
SP0790201: gacchadbhirbhindipālaiśca śaktibhistomaraistathā|
SP0790202: ākāśamabhavatsarvaṃ khadyotairiva saṃvṛtam|| 20||
SP0790211: śirobhiścaraṇaiścaiva bāhubhiśca nipātitaiḥ|
SP0790212: kṣaṇena yuddhabhūmiḥ sā viṣamā samapadyata|| 21||
SP0790221: dantibhiḥ parvatākārairhayairdhuryai rathottamaiḥ|
SP0790222: kabandhaiścābhinṛtyadbhirdurnirīkṣyamabhūtkṣaṇāt|| 22||
SP0790231: ātapatraiśca hāraiśca kavacaistalabhairapi|
SP0790232: niṣkasūtraiḥ sumukuṭaiḥ keyūraiḥ kuṇḍalairapi|| 23||
SP0790241: kaṇṭhatrāṇairvicitraiśca dukūlairmaṇibhiśca ha|
SP0790242: kuthābhiśca vicitrābhirbhujaiḥ sābharaṇairapi|| 24||
SP0790251: cāmarairhemadaṇḍaiśca ghaṇṭābhiścāṅkuśairapi|
SP0790252: vibhāti bhūtalaṃ tatra jyotirbhirdyaurivāvṛtā|| 25||
SP0790261: kruddhaḥ keśeṣu saṃgṛhya viratho 'pi mahārathaḥ|
SP0790262: rathinaṃ rathamāprutya nijaghāna balādbalī|| 26||
SP0790271: tatra cānyo gajenāśu abhipatya mahābalaḥ|
SP0790272: rathaṃ cikṣepa nirvṛtte kuśamuṣṭiṃ yathādhvare|| 27||
SP0790281: kṣipto gajaṃ samutpatya sagajaṃ gajinaṃ sa ca|
SP0790282: śarairāśīviṣākārairanayadyamasādanam|| 28||
SP0790291: hatamapyeṣa turagaḥ sādinaṃ patitaṃ kṣitau|
SP0790292: upāste pādataḥ suptaṃ guruṃ śiṣyo yathātmavān|| 29||
SP0790301: sasūte nihate yodhe rathamete hayottamāḥ|
SP0790302: vahanti puruṣāḥ kṣīṇā jñānavanta ivāgamān|| 30||
SP0790311: ayamanyaḥ subaddho 'pi daityena surapuṃgavaḥ|
SP0790312: bāhubhyāṃ veṣṭayitvainaṃ prayayau devatāntikam|| 31||
SP0790321: ayamādhāvato yasya gajasya bhujamāchinat|
SP0790322: sa tenaiva gajenograḥ papāta vinisūditaḥ|| 32||
SP0790331: ayamanyena saṃyukta anyenāgatya ghātitaḥ|
SP0790332: sa cāpyanyena devena so 'pyanyena punarhataḥ|| 33||
SP0790341: ete padātayaścānye bahavaḥ saṃhatā bhṛśam|
SP0790342: rathinaṃ mohayitvā tu jaghnurenamabhītavat|| 34||
SP0790351: evamākāśagāḥ siddhā ṛṣayaścāraṇāstathā|
SP0790352: sādhayanti ramante ca gāyanti ca japanti ca|| 35||
SP0790361: harantyapsarasaścaiva yodhāṃstatra raṇe hatān|
SP0790362: piśācāścāpi modanti nṛtyanti ca nikumbhilāḥ|| 36||
SP0790371: tatpravāditagāndharvaṃ chinnabhinnavidāritam|
SP0790372: yuddhagāndharvamabhavadbhīrūṇāṃ bhayavardhanam|| 37||
SP0790381: te 'nyonyaghātakṣatasarvadehāḥ surāsurā vairamanusmarantaḥ|
SP0790382: jaghnustadā rākṣasatulyarūpāḥ svarājyahetorjayamīpsamānāḥ|| 38||
SP0799999: iti skandapurāṇa ekonāśītitamo 'dhyāyaḥ||