Skandapurāṇa Adhyāya 78

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0780010: vyāsa uvāca|
SP0780011: bhagavanditiputreṣu prayāteṣvamarāvatīm|
SP0780012: amarāḥ kimakurvanta etadicchāmi veditum|| 1||
SP0780021: kathaṃ tadviditaṃ teṣāṃ ko mantraśceṣṭitaṃ ca kim|
SP0780022: uttaraṃ kiṃ ca devāste pratyapadyanta yatnataḥ|| 2||
SP0780031: dhārmikāśca kṛtajñāśca vidvāṃsaśchinnasaṃśayāḥ|
SP0780032: iṣṭāḥ sarvasya lokasya kimakurvanta devatāḥ|| 3||
SP0780040: sanatkumāra uvāca|
SP0780041: śṛṇu vyāsa yathā devā uttaraṃ pratipedire|
SP0780042: asurāṇāṃ ca yadyuktaṃ pratyakurvanta daṃśitāḥ|| 4||
SP0780051: udyukteṣveva daityeṣu devānāṃ bhayasūcakāḥ|
SP0780052: saṃjajñuramarāvatyāmutpātā dāruṇā bhṛśam|| 5||
SP0780061: piśitāśāḥ khagāstatra bhramantyupari sarvaśaḥ|
SP0780062: mamlurmālyāni devānāṃ gandhaścaivāśubho vavau|| 6||
SP0780071: hayādayo na heṣante vimadāśca gajābhavan|
SP0780072: anabhre bhayadaṃ varṣamapatadrudhiraṃ bahu|| 7||
SP0780081: āyudhāni ca dīpyante sadhūmaṃ śaktinandana|
SP0780082: kabandhāndhastadādityo yuddhaṃ cātra pradṛśyate|
SP0780083: dvayoḥ puruṣayorvyāsa hāhākāraśca sarvaśaḥ|| 8||
SP0780091: devānāmaratiścaiva cittaṃ cāpi samutsukam|
SP0780092: sphuranti vāmanetrāṇi jṛmbhikā copajāyate|| 9||
SP0780101: khagā dīnā vikūjanti bhayadā hyapare tathā|
SP0780102: agniśca dīpyate tatra saśabdo rūkṣa eva ca|| 10||
SP0780111: etāṃścānyāṃśca vividhānutpātānbhayasūcakān|
SP0780112: dṛṣṭvā prāha guruṃ śakro bṛhaspatimidaṃ vacaḥ|| 11||
SP0780121: bhagavankimidaṃ ghoraṃ bhayaṃ naḥ samupasthitam|
SP0780122: yadime sūcayantyugrā utpātā naḥ sudāruṇāḥ|| 12||
SP0780131: neme niṣkāraṇaṃ manye na cāpyalpaṃ hi taddhi naḥ|
SP0780132: yadime sūcayantyugrāḥ kalpānta iva dāruṇāḥ|| 13||
SP0780141: tasya tadvacanaṃ śrutvā devācāryo bṛhaspatiḥ|
SP0780142: nirīkṣya buddhyā saṃcintya provācedaṃ tadā vacaḥ|| 14||
SP0780151: yadbhavānāha tattathyaṃ neme niṣkāraṇaṃ kṛtāḥ|
SP0780152: nimittamatra sumahadbhaviṣyati na saṃśayaḥ|| 15||
SP0780161: nimittamādidaityendro hiraṇyakaśipuḥ purā|
SP0780162: sa hato narasiṃhena prāptaṃ rājyaṃ ca vaḥ punaḥ|| 16||
SP0780171: adya varṣasahasrāṇi dvādaśaiva sunirvṛtāḥ|
SP0780172: yuṣmābhirakhilā lokā bhujyante sumahātmabhiḥ|| 17||
SP0780181: daityādhipā nirutsāhā dānavaiḥ saha śerate|
SP0780182: pātāle danuputrāśca duḥkhaśokasamāhatāḥ|| 18||
SP0780191: hiraṇyākṣastu daityendro hiraṇyakaśiporvaraḥ|
SP0780192: sa nūnaṃ bhrāturanvicchanhatasya pratikāritām|| 19||
SP0780201: sarvairabhyeti daityendrairdānavaiśca samāvṛtaḥ|
SP0780202: saputrapautro daityendro mahābalaparākramaḥ|| 20||
SP0780211: andhakaścāpi putro 'sya brahmaṇā hyamaraḥ kṛtaḥ|
SP0780212: na sa śakyo yudhā hantuṃ tato vo bhayamutthitam|| 21||
SP0780221: tadbhavantaḥ susaṃnaddhāḥ sarve yuddhāya daṃśitāḥ|
SP0780222: pratīkṣadhvaṃ mahāsattvā yāvadautpātikaṃ sthitam|| 22||
SP0780231: tasya tadvacanaṃ śrutvā śakraḥ sarvāṃstadā surān|
SP0780232: uvāca sajjībhavata yuddhāya kṛtaniścayāḥ|| 23||
SP0780241: bhayaṃ mahadidaṃ prāptaṃ mā tiṣṭhata nirudyamāḥ|
SP0780242: mā naḥ saṃprāpya daityendrā hanyurmattānivāmarān|| 24||
SP0780251: atha vāyustadābhyetya śakraṃ sarvāsurāntakam|
SP0780252: uvāca prāñjalirbhūtvā devānāmeva saṃsadi|| 25||
SP0780261: eṣa daityo hiraṇyākṣaḥ sarvāsurasamāvṛtaḥ|
SP0780262: āyāti devatā hantuṃ bhrāturvadhamanusmaran|| 26||
SP0780271: tadbhavāndaṃśitaḥ samyaksahāsmābhirmahābalaḥ|
SP0780272: jayāyottiṣṭha devendra vināśāya suradviṣām|| 27||
SP0780280: sanatkumāra uvāca|
SP0780281: tataḥ sa bhagavānvyāsa mahātmā devarāṭsvayam|
SP0780282: abhedyaṃ kavacaṃ divyaṃ jāmbūnadavibhūṣitam|| 28||
SP0780291: dattaṃ mantreṇa vidhivatputreṇāṅgirasaḥ svayam|
SP0780292: ābabandhātmanaḥ śakro meghadundubhinisvanaḥ|| 29||
SP0780301: sa tena kavacena sma bhāti śakraḥ pratāpavān|
SP0780302: savidyudulkairambhodairnaddho merurivācalaḥ|| 30||
SP0780311: tato godhāṅgulitrāṇaṃ talatraṃ caiva bhāsvaram|
SP0780312: ābabandha svayaṃ mantraistasya devo bṛhaspatiḥ|| 31||
SP0780321: iṣudhīnakṣayāṃścaiva khaḍgaṃ caivāmṛtodbhavam|
SP0780322: ābabandhāsya mantreṇa yadajayyaṃ surāribhiḥ|| 32||
SP0780331: tato 'smai saśaraṃ cāpaṃ vajraṃ cāsuradāruṇam|
SP0780332: mantrābhimantritaṃ samyakpradadau jayavardhanam|| 33||
SP0780341: maṅgalāni tatastasya darśayāmāsa vīryavān|
SP0780342: ghaṭaṃ ca pūrṇaṃ matsyaṃ ca airāvatamathāpi ca|| 34||
SP0780351: kalpitaṃ bahubhirdivyairācāryaiḥ kalpavādibhiḥ|
SP0780352: arcitaṃ dhūpitaṃ caiva dhūpanaiḥ krodhadarpadaiḥ|| 35||
SP0780361: tatastaṃ sa tadā deva āruroha mataṅgajam|
SP0780362: bhadralakṣaṇasaṃpannaṃ caturdantaṃ kṣaranmadam|| 36||
SP0780371: ārūḍhaḥ sa tadā bhāti airāvatagajaṃ vibhuḥ|
SP0780372: udayācalamaulistha udyanniva divākaraḥ|| 37||
SP0780381: pāṇḍareṇātapatreṇa surarāṭsaṃbabhau tadā|
SP0780382: śvetaparvatarājo 'sau śaśineva mahāmune|| 38||
SP0780391: cāmarāvījitaṃ bhāti tasya vaktramatiprabham|
SP0780392: haṃsāṃsāvījitaṃ phullaṃ śaradīva mahotpalam|| 39||
SP0780401: tasya pārśve jayantaśca putraḥ śakrasya dhārmikaḥ|
SP0780402: kārttikeya ivābhāti rudrasya dayitaḥ sutaḥ|| 40||
SP0780411: tato yamaśca puṇḍreṇa mahiṣeṇa mahābalaḥ|
SP0780412: kāladaṇḍaṃ puraskṛtya koṭībhirdaśabhirvṛtaḥ|| 41||
SP0780421: nirjagāma kuberaśca rākṣasairbahubhirvṛtaḥ|
SP0780422: yakṣaiḥ puṇyajanaiścāpi tathānyairdevatairapi|| 42||
SP0780431: teṣāṃ dvādaśa koṭyastāḥ sahasrāṇi ca viṃśatiḥ|
SP0780432: śatāni ca tathāśītistathaivāṣṭādhikā punaḥ|| 43||
SP0780441: varuṇo niryayau caiva putrāṇāṃ daśabhiḥ śataiḥ|
SP0780442: yādobhiste vṛtāḥ sarve koṭyastā ekaviṃśatiḥ|| 44||
SP0780451: analaśca tato devaḥ koṭībhirdaśabhirvṛtaḥ|
SP0780452: niryayau saha putreṇa sasuhṛdvargabāndhavaḥ|| 45||
SP0780461: tato vāyurmahātejāḥ sarvavyāpī mahābalaḥ|
SP0780462: akṣauhiṇībhirdaśabhirnirjagāma mahābalaḥ|| 46||
SP0780471: ādityā niryayuḥ sarve daśākṣauhiṇikarṣiṇaḥ|
SP0780472: ekaikaśaśca te vyāsa sarve divyāstrayodhinaḥ|| 47||
SP0780481: tathā rudrāśca nirjagmurmahāmāyā mahābalāḥ|
SP0780482: ekaikaśastadā sarve ṣoḍaśākṣauhiṇīvṛtāḥ|| 48||
SP0780491: vasavo daśabhiścaiva aṣṭābhiścāśvināvubhau|
SP0780492: tathaivāṅgiraso devāḥ sarve te 'kṣauhiṇīvṛtāḥ|| 49||
SP0780501: yāmā dhāmāśca sādhyāśca lekhā ye ca mahābalāḥ|
SP0780502: te 'pi koṭīśataiḥ sarve daśabhiḥ saha saṃgatāḥ|| 50||
SP0780511: gandharvāṇāmabhūtkoṭyo viṃśatyeva mahātmanām|
SP0780512: pannagānāṃ catuḥṣaṣṭiḥ khagānāṃ caiva viṃśatiḥ|
SP0780513: piśācānāṃ ca koṭyastāḥ pañcāśattatra saṃgatāḥ|| 51||
SP0780521: rājñāṃ sahasramevāsīnmanuṣyāṇāṃ mahātmanām|
SP0780522: etadeva balaṃ sarvamabhūttatrābhisaṃgatam|| 52||
SP0780531: dṛṣṭvā tadbahvaparyantaṃ devānāṃ balamuttamam|
SP0780532: uvāca jīvaṃ jīvānāṃ rājā paramadharmavit|| 53||
SP0780541: bhagavankriyatāṃ vyūho yaḥ syātteṣāṃ durātmanām|
SP0780542: abhedyaścāpradhṛṣyaśca yaṃ na vetti ca bhārgavaḥ|| 54||
SP0780551: tasya tadvacanaṃ śrutvā bṛhadbuddhirbṛhaspatiḥ|
SP0780552: uvāca devatādhyakṣaṃ śakraṃ devatasannidhau|| 55||
SP0780561: na tadasti maheṣvāsa mayi yadbhārgavo mahān|
SP0780562: na vetti yasya vā bhedaṃ na kuryātpākaśāsana|| 56||
SP0780571: uśanā sa tu yadvetti mahāyogī mahāyaśāḥ|
SP0780572: na caiva tadahaṃ vedmi matto varataro hi saḥ|| 57||
SP0780581: sa tu tīkṣṇatayā caiva mānāccaiva śacīpate|
SP0780582: pramādaṃ kurute teṣu tena sarvatra labhyate|| 58||
SP0780591: ahaṃ sahiṣṇubhāvena mārdavena pareṇa ca|
SP0780592: apramattaśca sarvatra tava bhāgyaiśca rakṣitaḥ|
SP0780593: buddhyā tamatiricyāmi vibudheśvara nityaśaḥ|| 59||
SP0780601: tasmātte 'haṃ kariṣyāmi vyūhaṃ śyenamatiprabham|
SP0780602: yena tāndānavānsaṃkhye kaṃcitkālaṃ vijeṣyatha|| 60||
SP0780611: tataḥ sa bhagavāñjīvaścakre vyūhamatiprabham|
SP0780612: śyenaṃ nāma mahāyogī devānāṃ hitamādadhat|| 61||
SP0780621: grīvāyāṃ tasya saṃcakre vitteśaṃ varuṇaṃ tathā|
SP0780622: analaṃ caiva vāyuṃ ca jayantaṃ caiva śakrajam|| 62||
SP0780631: śiraścakre yamaṃ tasya mṛtyuṃ kālaṃ ca tāvubhau|
SP0780632: vaktramasyākarojjīvaścandrasūryau ca cakṣuṣī|| 63||
SP0780641: ekapakṣaṃ cakārāsya rudrānsarvānsa vai dvijaḥ|
SP0780642: dvitīyaṃ pakṣamādityānmadhyaṃ tasya purandaram|| 64||
SP0780651: pādau ca vasavastasya aśvinau ca mahābalau|
SP0780652: gandharvāḥ pannagāścaiva nakhāṃstasya samāśritāḥ|| 65||
SP0780661: pakṣiṇaśca mahāsattvānpiśācāṃśca mahābalān|
SP0780662: pucchaṃ tasyākarotsarvāndevānanyāṃstathodaram|| 66||
SP0780671: rājānastasya pādasthāstale bhūtānnyaveśayat|
SP0780672: mahābalānmahotsāhānsarvāndevānsabhāsadaḥ|
SP0780673: - - - - - - - -  - - - - - - - -|| 67||
SP0780680: sanatkumāra uvāca|
SP0780681: sa kṛtvā taṃ khagavyūhaṃ mantreṇaivābhimantrya ca|
SP0780682: uvāca devarājaṃ taṃ bṛhaspatiridaṃ vacaḥ|| 68||
SP0780691: kalpito 'yaṃ mahāvyūhaḥ kṛtā rakṣā ca pārthiva|
SP0780692: ataḥ paraṃ vidhānasya karma nāsmāsu vidyate|| 69||
SP0780701: jaya śatrūnraṇe śakra devatairabhirakṣitaḥ|
SP0780702: mayā cātharvaṇairmantraistapasā ca balena ca|| 70||
SP0780711: kuru karma yathāśakti amaro hyasi pārthiva|
SP0780712: devāścāpyamarāḥ sarve yudhyantu surapārthiva|| 71||
SP0780721: bhāgyānāṃ jaya āyatto nānyatra surapuṃgava|
SP0780722: jahi śatrūnmahābāho mā bhīrbhavatu te raṇe|| 72||
SP0780731: tataḥ śaṅkhāśca bheryaśca paṭahā ḍiṇḍimāstathā|
SP0780732: āḍambarāśca bhambhāśca kṛkavā goviṣāṇikāḥ|| 73||
SP0780741: mardalāḥ pepukāścitrā meghatūryāṇi sarvaśaḥ|
SP0780742: avādyanta mahārhāṇi śataśo 'tha sahasraśaḥ|| 74||
SP0780751: tena śabdena yodhānāṃ yuddhaharṣo mahānabhūt|
SP0780752: siṃhanādānakurvanta valgitāsphoṭitāni ca|| 75||
SP0780761: devāstataḥ śaṅkhamṛdaṅgavādyairamoghasarvāyudhadīptahastāḥ|
SP0780762: nirjagmurindrādisurapradhānā jayaiṣiṇaḥ śatruvadhepsavaśca|| 76||
SP0789999: iti skandapurāṇe 'ṣṭasaptatitamo 'dhyāyaḥ||