Skandapurāṇa Adhyāya 77

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0770010: sanatkumāra uvāca|
SP0770011: sa gatvā tāṃ sabhāṃ vyāsa apaśyaddaityadānavān|
SP0770012: prāvṛṭkāle 'mbudānmattānyathendraḥ samupasthitān|| 1||
SP0770021: mottiṣṭhateti tānsarvānavocadasurādhipaḥ|
SP0770022: maghāpañcakamāsādya bhārgavo 'mbudharāniva|| 2||
SP0770031: tato jāmbūnade divye upaviṣṭo varāsane|
SP0770032: udgacchanniva saṃprāpya udayaṃ tejasāṃ patiḥ|| 3||
SP0770041: bhāti siṃhāsanāsīnaḥ sa rājā suravidviṣām|
SP0770042: meruśṛṅgamivāsādya sabalāko mahāmbudaḥ|| 4||
SP0770051: tasyopaviṣṭasya tadā sarva eva suradviṣaḥ|
SP0770052: jayeti cakrurutthāya vedā iva pitāmaham|| 5||
SP0770061: sa teṣāṃ madhyago bhāti hiraṇyākṣo 'sureśvaraḥ|
SP0770062: madhye kalabhavṛndānāṃ yathā matto mahāgajaḥ|| 6||
SP0770071: babhūvurupaviṣṭāste tūṣṇīmevāsurāstadā|
SP0770072: sisṛkṣavo jalaṃ kāle nīlāmbhodā ivonnatāḥ|| 7||
SP0770080: sanatkumāra uvāca|
SP0770081: sa teṣāmiṅgitaṃ jñātvā kālaṃ ca suratāpanaḥ| 
SP0770082: hiraṇyākṣaḥ svayaṃ rājā tānuvāca suradviṣaḥ|| 8||
SP0770091: yūyaṃ sarve mahāmāyāḥ śṛṇudhvaṃ saṃyatāḥ samam|
SP0770092: kālaprāptaṃ ca pathyaṃ ca śiṣyā iva gurorvacaḥ|| 9||
SP0770101: mama bhrātā priyo hyāsījjyeṣṭhaḥ pūjyo yathā pitā|
SP0770102: hiraṇyakaśipū rājā mahātmā satyasaṃgaraḥ|| 10||
SP0770111: dhārmikaśca vadanyaśca yajvā dātā taponvitaḥ|
SP0770112: āhitāgniścaturvedaḥ sarvabhūtasukhāvahaḥ|| 11||
SP0770121: rājyārthe sa hato devairnikṛtyā mūḍhamānasaiḥ|
SP0770122: tasya duḥkhena tapyāmi śuṣyāmi ca mahāsurāḥ|
SP0770123: salilāduddhṛtaṃ grīṣme padmaṃ kusumitaṃ yathā|| 12||
SP0770131: teṣāṃ kartumahaṃ daṇḍaṃ śakto 'smyasuravidviṣām|
SP0770132: bhavatāṃ tatra bālānāṃ rakṣārthaṃ nodyamāmyaham|| 13||
SP0770141: so 'haṃ daṇḍaṃ svayaṃ kartumekākyasuravidviṣām|
SP0770142: gamiṣyāmi na saṃdeho mā bhīrbhavatu vo 'surāḥ|| 14||
SP0770150: sanatkumāra uvāca|
SP0770151: tasya tadvacanaṃ śrutvā dānavāste mudānvitāḥ|
SP0770152: parasparamavekṣanta vrīḍayā parayānvitāḥ|| 15||
SP0770161: vipracittistadanujo bhrātaraṃ taṃ mahābalam|
SP0770162: uvāca praṇataḥ samyagarthavanmadhuraṃ vacaḥ|| 16||
SP0770171: na saṃdeho hatāḥ sarve tvayaikenāsuradviṣaḥ|
SP0770172: yadi yuddhena tiṣṭhanti māyāṃ kāṃcidanāśritāḥ|| 17||
SP0770181: abalāste na saṃdeho nikṛtyā balinastu te|
SP0770182: prasādayitvā śirasā yadbravīmi nibodha tat|| 18||
SP0770191: bālairapi hi yatproktamupapattyā prasādhitam|
SP0770192: tadgrāhyamiti vedhobhiḥ śāstravidbhiḥ samīritam|| 19||
SP0770201: hiraṇyakaśipū rājā bhrātā no jyeṣṭha uttamaḥ|
SP0770202: so 'pi śakto 'hamityeva ekākī devatairhataḥ|| 20||
SP0770211: mahābalo 'pi bahubhiraśaktairhanyate balāt|
SP0770212: ākrandaṃ hi vinā rājannato vijñāpayāmi te|| 21||
SP0770221: bhavatastu vayaṃ bālā na teṣāmasureśvara|
SP0770222: śaktā vayaṃ suyuddhena tānhantuṃ kulapāṃsanān|| 22||
SP0770231: anusmaranto vairaṃ ca vayaṃ haṃsyāma devatān|| 23||
SP0770241: yathā tava na nidrāsti hiraṇyakaśiporvadhāt|
SP0770242: tathāsmākaṃ mahārāja mā no bālānyathā cara|| 24||
SP0770251: yatra no yokṣyase rājansame vā viṣame 'pi vā|
SP0770252: tariṣyāmo vayaṃ tadvai mahāmatsya ivārṇavam|| 25||
SP0770261: prahlādo 'yaṃ sahabhrātā sasutaḥ sasuhṛjjanaḥ|
SP0770262: eka evāhvayetsarvānyathā siṃho mahādvipān|| 26||
SP0770271: balireṣa ca daityendra eka eva śarīravān|
SP0770272: surānsayamavitteśāñchaktaḥ sarvānprabādhitum|| 27||
SP0770281: ayaṃ bāṇaśca tatputro rājā bāhusahasradhṛk|
SP0770282: eka eva surānsarvānvināśayitumudyataḥ|| 28||
SP0770291: kālanemirmaheṣvāso danuputraḥ pratāpavān|
SP0770292: eka eva surānsarvānvināśayitumudyataḥ|| 29||
SP0770301: imau sundanisundau ca bhrātarau bāhuśālinau|
SP0770302: ubhāvekākinau yuddhe devānhantuṃ samudyatau|| 30||
SP0770311: ayaṃ mayaśca vikrāntastārakastāra eva ca|
SP0770312: anye ca dānavāḥ śūrāḥ śaktā devānprabādhitum|| 31||
SP0770321: vadhiṣyāmaḥ surānsarvānvyādhā iva mṛgānvane|| 32||
SP0770331: śūro 'yamandhakaḥ śrīmānbrahmadattavarastathā|
SP0770332: prasahya sarvāṃstānyuddhe neṣyate vai yamālayam|| 33||
SP0770341: evamenaṃ samāśritya pālitānena caiva hi|
SP0770342: kariṣyāmo mahadyuddhaṃ devatānāṃ bhayaṃkaram|| 34||
SP0770351: pūrvadevā vayaṃ sarve paścātte devatābhavan|
SP0770352: kathaṃ bibhema teṣāṃ vai siṃhānāṃ śarabhā iva|| 35||
SP0770360: sanatkumāra uvāca|
SP0770361: tasya tadvacanaṃ śrutvā andhakaḥ so 'sureśvaraḥ|
SP0770362: uvāca vacanaṃ tatra harṣayandānaveśvarān|| 36||
SP0770371: mahābalā vayaṃ rājanbalahīnāḥ surāśca te|
SP0770372: paśyadhvaṃ devatānsarvānhatānyamapurogamān|| 37||
SP0770381: adya taṃ rājahantāraṃ durātmānaṃ kulādhamam|
SP0770382: mayaikena hataṃ paśya ādityānāṃ kanīyasam|| 38||
SP0770391: adya mātāditisteṣāṃ duḥkhaklinnāśrulocanā|
SP0770392: jalaṃ dāsyati sarveṣāṃ yamasya puravāsinām|| 39||
SP0770401: tiṣṭhadhvaṃ dānavāḥ sarve paryāpto 'haṃ durātmanām|
SP0770402: asmākaṃ rājyahantṝṇāṃ mṛtyurasmi samāgataḥ|| 40||
SP0770410: sanatkumāra uvāca|
SP0770411: tasya tadvacanaṃ śrutvā hiraṇyākṣaḥ pratāpavān|
SP0770412: uvāca dānavānvyāsa jayepsurasurādhipaḥ|| 41||
SP0770421: adya puṣyaśca nakṣatramasmākaṃ balakārakam|
SP0770422: adyaiva daṃśitāḥ sarve drutaṃ niryāta dānavāḥ|| 42||
SP0770431: atha te dānavāḥ śīghraṃ vāhanāni mudā yutāḥ|
SP0770432: protsārayanta saṃgrāme yogyāni ripubādhane|| 43||
SP0770441: śīghraṃ kurudhvaṃ sajjāni gacchāmo devatānprati|
SP0770442: - - - - - - - -  - - - - - - - -|| 44||
SP0770451: teṣāṃ sa tumulaḥ śabdo vāhanānāṃ babhūva ha|
SP0770452: mandareṇeva bhinnasya kṣīrodasya purā mahān|| 45||
SP0770461: mamāśvastava siṃho 'yaṃ mamāyaṃ gajayūthapaḥ|
SP0770462: ratho 'yaṃ kasya sampanno yuddhopakaraṇairbhṛśam|| 46||
SP0770471: niryāntu sarve daityendrā yāsyāmaḥ pṛṣṭhato vayam|| 47||
SP0770481: ārohasva rathaṃ śīghraṃ kiṃ rathena mamādya vai|
SP0770482: padātireva saṃgrāme haṃsyāmyadyāsuradviṣaḥ|| 48||
SP0770491: vaṃśavīṇākhagonmiśraḥ pralāpa iva yoṣitām|| 49||
SP0770501: atha śukrastadābhyetya bhṛgoḥ putro mahātapāḥ|
SP0770502: hiraṇyākṣamuvācedaṃ harṣayandānaveśvaram|| 50||
SP0770511: mahāśāntiḥ kṛtā te 'dya rakṣā ca saha dānavaiḥ|
SP0770512: jahi sarvānsurānyuddhe na tavāsti parājayaḥ|| 51||
SP0770521: dhārayiṣyāmi yudhyantaṃ lokānyajña ivāparaḥ|| 52||
SP0770531: tataḥ pradakṣiṇaṃ kṛtvā śukraṃ mūrdhnā praṇamya ca|
SP0770532: bhārgavaṃ purataḥ kṛtvā nirjagāma sa mandirāt|| 53||
SP0770541: tato bheryaśca śaṅkhāśca paṇavānakagomukhāḥ|
SP0770542: āḍambarā ḍiṇḍimāśca bhambhāśca paṭahaiḥ saha|| 54||
SP0770551: jharjharyo dardurāścaiva sughoṣā mardalāstathā|
SP0770552: kaṭaṃkaṭāḥ pepukāśca tathā caivaikapuṣkarāḥ|| 55||
SP0770561: pañcākṣāḥ paridhīkāśca mukundā murajāstathā|
SP0770562: lampākā jalamattāśca avādyanta sahasraśaḥ|| 56||
SP0770571: gāyanaiścaiva gāyadbhiḥ stuvadbhiḥ sūtamāgadhaiḥ|
SP0770572: divyābhiḥ kulavṛddhābhiḥ strībhiśca kṛtamaṅgalāḥ|| 57||
SP0770581: dvāryapaśyanrathaṃ k.lptaṃ yathā devamayaṃ haraḥ|
SP0770582: śatanalvapramāṇaṃ taṃ divyaṃ jāmbūnadaṃ dṛḍham|| 58||
SP0770591: asaṅgaturagaiḥ śvetaistrisāhasrairmanojavaiḥ|
SP0770592: amaraiḥ kāmagairdivyaiḥ śramaduḥkhavivarjitaiḥ|| 59||
SP0770601: yantā rathasya tasyāsīnmakaro nāma viśrutaḥ|
SP0770602: putro garutmato vyāsa khagaḥ kāmagamaḥ śubhaḥ|| 60||
SP0770611: tamasau jayaśabdena āśīrbhiścābhipūjitaḥ|
SP0770612: āruroha rathaṃ rājā ekacakraṃ yathā raviḥ|| 61||
SP0770621: kavacī baddhatūṇīraḥ śarī khaḍgī śarāsanī|
SP0770622: baddhagodhāṅgulitraśca kaṇṭhatrāṇakṛtastathā|| 62||
SP0770631: dhvajena mahatā caiva cchattreṇa ca vibhūṣitaḥ|
SP0770632: bahvībhirvaijayantībhiḥ sabalāka ivāmbudaḥ|| 63||
SP0770641: tasya cchattraṃ tadā bhāti kirīṭopari saṃsthitam|
SP0770642: savidyutaḥ payodasya paurṇamāsyāṃ yathā śaśī|| 64||
SP0770651: khaṭvāṅgaṃ tasya cābhāti dhvajo divamivākraman|
SP0770652: trailokyasyopaghātādau keturdīpta ivoditaḥ|| 65||
SP0770661: tādṛgeva ratho 'syāsītsutasya sumahātmanaḥ|
SP0770662: andhakasya tadā vyāsa mahājaladanisvanaḥ|| 66||
SP0770671: atha yāhīti tenokto rathayantā suradviṣā| 
SP0770672: trisāhasrānhayāgryāṃstu saṃrabdhaḥ pratyacūcudat|| 67||
SP0770681: pracoditāstamūhuste javanā vātaraṃhasaḥ|
SP0770682: hayāḥ kāmagamāḥ sapta raveriva mahāratham|| 68||
SP0770691: tasyāgratastadā śukro rathenāmbudanādinā|
SP0770692: udgacchata iva vyomni tasyaivābhūdyathā budhaḥ|| 69||
SP0770701: dakṣiṇe tasya pārśve ca abhūdandhakadānavaḥ|
SP0770702: dakṣiṇāyanamāsādya yathā lokasya bhāskaraḥ|| 70||
SP0770711: dvitīyaṃ pārśvamāśritya vipracittirabhūtsthitaḥ|
SP0770712: bhāratasyeva varṣasya himavānparvatottamaḥ|| 71||
SP0770721: pṛṣṭhataścāgrataścaiva yathāprīti yayustathā|
SP0770722: apare dānavāḥ śūrāḥ śaśāṅkasya yathā grahāḥ|| 72||
SP0770731: tatsainyaṃ pracalaṃ bhāti vrajantaṃ munisattama|
SP0770732: savidyutstanayitnūnāmambhodānāmivātyaye|| 73||
SP0770741: hayaheṣitaśabdaṃ ca mattadviradabṛṃhitam|
SP0770742: valgitāsphoṭitotkruṣṭaṃ siṃhanādoddhataṃ yayau|| 74||
SP0770751: taddhi tūryaravasiṃhanāditairaśvaheṣitagajograbṛṃhitaiḥ|
SP0770752: bāhuśabdakucitāvanāditairyāti dānavabalaṃ bhayāvaham|| 75||
SP0779999: iti skandapurāṇe saptasaptatitamo 'dhyāyaḥ||