Skandapurāṇa Adhyāya 75

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0750010: sanatkumāra uvāca|
SP0750011: so 'ṣṭābhirdānavaiḥ sārdhaṃ gatvā tatpuramantike|
SP0750012: nivedayāmāsa pituḥ kṛtārtho 'ndhaka āgataḥ|| 1||
SP0750021: priyākhyātustato vyāsa hiraṇyākṣo 'sureśvaraḥ|
SP0750022: dadau ratnānyanekāni tathā kāmānabhīpsitān|| 2||
SP0750031: svayaṃ rājā tadā sarvaiḥ suhṛdbhiḥ saha vāhanaiḥ|
SP0750032: saha strībhiryayau tūrṇaṃ somastārāgaṇairiva|| 3||
SP0750041: sa gatvā nātidūre 'tha vane sāśokacampake|
SP0750042: āsasāda sutaṃ śrīmānsomo budhamivāparam|| 4||
SP0750051: kṛtārthaṃ sa tu taṃ dṛṣṭvā tuṣṭo 'bhūddānaveśvaraḥ|
SP0750052: snehātsa taṃ pariṣvajya mūrdhnyupāghrāya cāsakṛt|| 5||
SP0750061: kathaṃ kena ca kālena ke ca labdhā varāstvayā|
SP0750062: pṛṣṭaḥ sa kathayāmāsa yathāvṛttamaśeṣataḥ|| 6||
SP0750071: tasya tadvaradānaṃ ca tathā māhātmyameva ca|
SP0750072: śrutvā te 'suraśārdūlāḥ praṇeduḥ sāgarā iva|| 7||
SP0750080: sanatkumāra uvāca|
SP0750081: tatastaṃ rathamāropya hiraṇyākṣo 'ndhakaṃ sutam|
SP0750082: suhṛdbhistaiḥ sahaivāśu praviveśa svakaṃ puram|| 8||
SP0750091: sa putrasahito bhāti daityaḥ saṃpūrṇamānasaḥ|
SP0750092: caranrāśimivādityo yathā sahaśanaiścaraḥ|| 9||
SP0750100: sanatkumāra uvāca|
SP0750101: tataḥ praviśya daityendraḥ suhṛdvargamuvāca ha|
SP0750102: adhvaryuriva sāyāhne yathānyānṛtvijaḥ śubhān|| 10||
SP0750110: hiraṇyākṣa uvāca|
SP0750111: śṛṇudhvaṃ yadidānīṃ me kṛtyaṃ hṛdi cirasthitam|
SP0750112: kartavyaṃ saha sarvaistu yuṣmābhirbhīmavikramaiḥ|| 11||
SP0750121: mayā manīṣitaṃ pūrvaṃ kṛtakṛtya ihāgate|
SP0750122: andhake nagare 'sminvai kartāhaṃ kaumudīmiti|| 12||
SP0750131: makhaghnasya ca devasya devarātriṃ mahāprabhām|
SP0750132: kariṣyāmīti tatsarvaṃ kriyatāmaviśaṅkayā|| 13||
SP0750141: ghuṣyatāṃ nagare hyasmiṃścatvareṣu sabhāsu ca|
SP0750142: kaumudī divasānaṣṭau sapta caiva mamājñayā|
SP0750143: tāvadeva ca devasya santu me devarātrayaḥ|| 14||
SP0750151: suhṛdo ye ca daityendrā dānavāśca mahābalāḥ|
SP0750152: sarvāsu dikṣu te 'pīha samāyāntu ramantu ca|| 15||
SP0750161: asmatpakṣe ca ye viprāḥ śukraprabhṛtayaḥ śubhāḥ|
SP0750162: nāgā rakṣāṃsi yakṣāśca gandharvā manujāstathā|
SP0750163: te 'pi sarve samāyāntu ramantu ca mayā saha|| 16||
SP0750170: sanatkumāra uvāca|
SP0750171: ta evamuktā daityendrā hiraṇyākṣeṇa dhīmatā|
SP0750172: tathā cakrustadā sarvaṃ yathoktamamaradviṣā|| 17||
SP0750181: dūtānapreṣayankṣipraṃ daityānāṃ dānavaiḥ saha|
SP0750182: tathānyeṣāṃ ca pakṣāṇāmātmanaḥ śaktinandana|| 18||
SP0750191: nimantrayati vo rājā hiraṇyākṣo mahābalaḥ|
SP0750192: suhṛdvargaistu sahitā gacchadhvaṃ taṃ didṛkṣavaḥ|| 19||
SP0750201: ghaṇṭikaścāhatairvastrairveṣṭitaḥ suvibhūṣitaḥ|
SP0750202: ārūḍhaḥ pāṇḍaraṃ mattaṃ gajaṃ samavaghoṣayat|| 20||
SP0750211: rājā jayati daityendro hiraṇyākṣaḥ pratāpavān|
SP0750212: hatā daityadviṣaḥ sarve dānavānāṃ ca śatravaḥ|| 21||
SP0750221: jayāya ditiputrāṇāmādityānāṃ bhayāya ca|
SP0750222: prātaḥprabhṛti rājā va ājñāpayati kaumudīm|
SP0750223: devarātriṃ ca devasya rudrasya suranāśanīm|| 22||
SP0750231: susaṃmṛṣṭopaliptābhī rathyābhiḥ kriyatāṃ puram|
SP0750232: vāsobhirahataiḥ sarve bhavantu puravāsinaḥ|
SP0750233: sragmiṇaḥ saśiraḥsnātā dattapaṅkā yathākramam|| 23||
SP0750241: gāyantu gāyanāścaiva nṛtyantu naṭanartakāḥ|
SP0750242: ucchriyantāṃ patākāśca gṛhavīthyāpaṇeṣu ca|| 24||
SP0750251: gṛhāṇi copaliptāni nityameva bhavantu vaḥ|
SP0750252: puṣpaprakarajuṣṭāni dhūpairnānāvidhairapi|
SP0750253: sragdāmavanti sarvāṇi vanamālākulāni ca|| 25||
SP0750261: brāhmaṇāścaiva bhojyantāṃ kriyantāṃ vācanāni ca|
SP0750262: brahmaghoṣāśca sarvatra puṇyāhodīraṇāni ca|| 26||
SP0750271: dīpā rātrau ca sarvatra rājamārge gṛheṣu ca|
SP0750272: anantarāḥ kriyantāṃ vai pracurasnehavartayaḥ|| 27||
SP0750281: taruṇāḥ saha yoṣidbhiḥ samantātparyaṭantu ca|
SP0750282: ramamāṇā hasantaśca gāyanto nṛttasevinaḥ|
SP0750283: bhāṇḍavādyāni vādyantāṃ nṛtyantāṃ daityayoṣitaḥ|| 28||
SP0750291: mahādevasya pūjāṃ ca gandhapuṣpādikīṃ śubhām|
SP0750292: upahārāṃśca vividhānsnapanāni mahānti ca|| 29||
SP0750301: balayaḥ puṣkalāścaiva bhakṣyabhojyairalaṃkṛtāḥ|
SP0750302: dīpāṃśca vividhākārānpānāni ca rasāṃstathā|| 30||
SP0750311: phalāni ca vicitrāṇi māṃsaṃ pakvamathāmakam|
SP0750312: suvarṇamaṇicitrāṇi  īśvarāya prayacchata|
SP0750313: vadhyantāṃ paśavaścātra bhojyantāṃ dvijasattamāḥ|| 31||
SP0750321: yo na kuryādidaṃ sarvaṃ puravāsī naraḥ kvacit|
SP0750322: pātayettasya śārīraṃ rājā daṇḍaṃ mahāyaśāḥ|| 32||
SP0750330: sanatkumāra uvāca|
SP0750331: evaṃ saṃghoṣayitvā tu ghāṇṭiko hastipṛṣṭhagaḥ|
SP0750332: jagāma svagṛhaṃ bhūyaḥ kaumudī cāpyavartata|
SP0750333: yathoktaṃ tattadā sarvamakurvanta pure janāḥ|| 33||
SP0750341: rājāpi saṃyataḥ snātaḥ śuciḥ prayatamānasaḥ|
SP0750342: divase divase vyāsa snāpayāmāsa yatnavān|| 34||
SP0750351: pañcagavyena śuddhena tailena ca sugandhinā|
SP0750352: kṣīreṇa sarpiṣā dadhnā rasaiśca bahubhiḥ śubhaiḥ|| 35||
SP0750361: puṣpaiḥ phalaiśca bījaiśca ratnaiścādbhiḥ samanvitaiḥ|
SP0750362: bhasmanā gandhayuktena udakena sugandhinā|| 36||
SP0750371: ekaikasya svayaṃ rājā ghaṭānāṃ daśabhiḥ śataiḥ|
SP0750372: divase divase vyāsa tryambakaṃ so 'bhyaṣecayat|| 37||
SP0750381: gandhaiḥ puṣpaiśca dhūpaiśca japyairbalibhireva ca|
SP0750382: pūjayitvā tato rājā viprānanyāṃśca bhojayet|| 38||
SP0750391: sa kṛtvā paśubhirmedhyai ratnairmaṇibhireva ca|
SP0750392: baliśayyāsanādyaiśca stūyamāno gṛhānyayau|| 39||
SP0750401: tathaivānye 'pi daityendrāḥ so 'ndhakaśca mahābalaḥ|
SP0750402: cakruḥ sarve muniśreṣṭha yathā rājā tathaiva te|| 40||
SP0750411: andhakaṃ sa gṛhītvā tu hiraṇyākṣaḥ pratāpavān|
SP0750412: padbhyāmapātayadvyāsa rudrasyedamudāharan|| 41||
SP0750421: eṣa devaḥ sadā putra tavāstu sumukhaḥ prabhuḥ|
SP0750422: asminbhaktistvayā kāryā bhāvitā parameśvare|| 42||
SP0750431: eṣa vandyaśca pūjyaśca ato nāsti paro guruḥ|
SP0750432: pūjayethāḥ sadaivainaṃ bhaktitaḥ parameśvaram|| 43||
SP0750440: sanatkumāra uvāca|
SP0750441: sa evamuktvā praṇipatya śaṃkaraṃ mahāsuraḥ so 'suradānaveśvaraḥ|
SP0750442: jagāma dhīmānpunareva nirvṛto niveśanaṃ devapatiryathā svakam|| 44||
SP0759999: iti skandapurāṇe pañcasaptatitamo 'dhyāyaḥ||