Skandapurāṇa Adhyāya 74

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0740010: sanatkumāra uvāca|
SP0740011: atha gatvā sa viprendra hiraṇyākṣasutastadā|
SP0740012: gaṅgādvāraṃ śubhadvāraṃ tapovanamanuttamam|| 1||
SP0740021: divyaṃ kanakhalaṃ nāma yatra hairaṇvatī nadī|
SP0740022: vṛkṣāḥ kanakhalā yatra sarva eva hi kāñcanāḥ|| 2||
SP0740031: yatra dakṣaḥ purā yajñamayajaddevataiḥ saha|
SP0740032: mahādevena yatrāsya yajño vinihataḥ purā|| 3||
SP0740041: tatrāsau devamabhyarcya snātaḥ prayatamānasaḥ|
SP0740042: namaskṛtvā devatebhya idaṃ vacanamabravīt|| 4||
SP0740050: andhaka uvāca|
SP0740051: ye 'smiṃstapovane devā bhūtāni vividhāni ca|
SP0740052: sarvāṃstāñcharaṇaṃ yāmi tapaḥsiddhiṃ diśantu me|| 5||
SP0740061: adyaprabhṛti kartāsmi tapa ugraṃ suduścaram|
SP0740062: varānyenāpnuyāmiṣṭānmṛtyuṃ vā prāṇanāśanam|| 6||
SP0740070: sanatkumāra uvāca|
SP0740071: sa evamuktvā tu tataḥ pārāśarya mahābalaḥ|
SP0740072: saṃvatsaraṃ vāyubhakṣo babhūva klamavarjitaḥ|| 7||
SP0740081: tathā triṣavanaṃ snāyī juhvāno 'gniṃ tathaiva ca|
SP0740082: devārcanarataścaiva japyahomaparastathā|| 8||
SP0740091: varṣe varṣe tu saṃpūrṇe svāṅgādutkṛtya kārṣikam|
SP0740092: piśitasya tadā bhāgaṃ juhāvāgnau mahāsuraḥ|| 9||
SP0740101: evaṃ tasyāgamaddivyaṃ sahasraṃ munisattama|
SP0740102: juhvataḥ svāni māṃsāni varṣāṇāṃ pratyahastadā|| 10||
SP0740111: so 'suraḥ śaṃkhahārāmbusudhākundendupāṇḍaraḥ|
SP0740112: babhūvāsthiśirāśeṣaḥ kevale tapasi sthitaḥ|| 11||
SP0740121: sa tena tapasā yukto bhāskaraṃ niṣprabhaṃ tadā|
SP0740122: somaṃ ca grahatārābhiḥ saha cakre 'mitātmavān|| 12||
SP0740131: sa eva bhāskaro yadvatprakāśayati tejasā|
SP0740132: aśoṣayatpalvalāni nadīkūpasarāṃsi ca|| 13||
SP0740141: pavanaṃ stambhayāmāsa so 'ndhakastapasastadā|
SP0740142: vyomni siddhā na gacchanti vimānāni ca petire|| 14||
SP0740151: tasya tattapaso rūpaṃ dṛṣṭvā vighnaśatānyuta|
SP0740152: akarotsahasā śakro vikriyāṃ na ca so 'nvagāt|| 15||
SP0740161: tato brahmā tamabhyetya provācāndhakadānavam|
SP0740162: mahāsura tapo ghoraṃ tvayā taptaṃ mahābala|
SP0740163: tuṣṭo 'smi te mahābāho cakṣuṣmānbhava suvrata|| 16||
SP0740171: śarīraṃ prakṛtiṃ yātu yathāpūrvaṃ ca te 'sura|
SP0740172: brūhi cānyaṃ varaṃ bhūyo yaste manasi saṃsthitaḥ|| 17||
SP0740180: sanatkumāra uvāca|
SP0740181: sa cakṣuṣmāṃstadā bhūtvā śarīreṇākṣatena ca|
SP0740182: uvāca praṇataḥ sākṣādbrahmāṇaṃ lokabhāvanam|| 18||
SP0740190: andhaka uvāca|
SP0740191: bhagavanyadi tuṣṭo 'si yadi me caritaṃ tapaḥ|
SP0740192: apratidvandvatāṃ saṃkhye devatebhyaḥ pitāmaha|| 19||
SP0740201: mahābalatvaṃ māyāśca tathā cāmaratāmapi|
SP0740202: etadicchāmi deveśa yadi tvaṃ varado mama|| 20||
SP0740210: sanatkumāra uvāca|
SP0740211: tasya tadvacanaṃ śrutvā prahasya bhagavānvibhuḥ|
SP0740212: hiraṇyākṣasutaṃ prāha punareva vacaḥ śubham|| 21||
SP0740221: amaratvaṃ na daityasya dadāni ditinandana|
SP0740222: sāntaraṃ tu bhavettatte svayamevāntaraṃ vada|| 22||
SP0740230: andhaka uvāca|
SP0740231: yā strī syāllokamātā vai praṇameyaṃ na tāṃ yadi|
SP0740232: tadā syānmama mṛtyustu mṛtyuhīno 'nyathā hyaham|| 23||
SP0740240: brahmovāca|
SP0740241: evametadbhavatu te tvayā proktaṃ yadadya vai|
SP0740242: andhako bhava nāmnā tvaṃ khyātiṃ loke ca yāsyasi|| 24||
SP0740250: sanatkumāra uvāca|
SP0740251: evamuktvā sa bhagavānandhakaṃ lokakaṇṭakam|
SP0740252: jagāma svaṃ tadāvāsaṃ virarāmāndhakaśca saḥ|| 25||
SP0740261: sa gaṅgāmbhobhirāplutya devamiṣṭvā yathāvidhi|
SP0740262: agniṃ hutvā tato dhīmānanumānya tapovanam|
SP0740263: sahāyaiḥ saha daityendro jagāma piturantikam|| 26||
SP0740271: sa hṛṣṭacetāstapasā mahābalo vivṛddhakāmaḥ suraśatrutoṣaṇaḥ|
SP0740272: pituḥ sakāśaṃ punareva dīptimānagacchaduddhūtabalāhakopamaḥ|| 27||
SP0749999: iti skandapurāṇe catuḥsaptatitamo 'dhyāyaḥ||