Skandapurāṇa Adhyāya 73

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0730010: vyāsa uvāca|
SP0730011: andhakaḥ kasya putro 'sau kiṃvīryaḥ kiṃparākramaḥ|
SP0730012: kathaṃ ca nihataḥ saṃkhye sarvametadvadasva me|| 1||
SP0730020: sanatkumāra uvāca|
SP0730021: śṛṇu vyāsa mahābuddhe sarvametadyathābhavat|
SP0730022: andhakasya purāvṛttaṃ sarvaṃ vakṣyāmi te dvija|| 2||
SP0730031: kaśyapasya sutau dityāṃ daityau tau saṃbabhūvatuḥ|
SP0730032: hiraṇyakaśipurjyeṣṭho hiraṇyākṣastato 'nujaḥ|
SP0730033: jyeṣṭhastatrābhavadrājā hiraṇyakaśipustadā|| 3||
SP0730041: tasminvinihate vīre narasiṃhena dhīmatā|
SP0730042: hiraṇyākṣo 'bhavadrājā sarvadaityanamaskṛtaḥ|
SP0730043: aputraḥ sa tapastepe putrahetoriti śrutiḥ|| 4||
SP0730051: sa śaṅkukarṇaṃ saṃprāpya sindhusāgarasaṃgame|
SP0730052: tapastepe diteḥ putro devaṃ draṣṭuṃ pinākinam|| 5||
SP0730060: vyāsa uvāca|
SP0730061: kathaṃ tadabhavaddivyaṃ pavitraṃ lokaviśrutam|
SP0730062: śaṅkukarṇaṃ maheśasya kṣetraṃ sarvārthasādhakam|
SP0730063: yatphalaṃ puṇyasampacca tanme vyākhyātumarhasi|| 6||
SP0730070: sanatkumāra uvāca|
SP0730071: purā hi bhagavāndevaḥ kapardī nīlalohitaḥ|
SP0730072: sindhusāgaramāgamya lokānugrahahetave|
SP0730073: tapaḥ kartuṃ samārebhe yadacintyaṃ surāsuraiḥ|| 7||
SP0730081: daśasvapi tato dikṣu rakṣaṇārthaṃ jagatpatiḥ|
SP0730082: sthāpayāmāsa gaṇapānnikumbhādīnsahasraśaḥ|| 8||
SP0730091: śaṅkukarṇaṃ mahādaṃṣṭraṃ sthūlākṣaṃ sthūlanāsikam|
SP0730092: hrasvapādakaraṃ caiva dāritāsyaṃ vibhīṣaṇam|
SP0730093: śārdūlacarmasaṃchannaṃ dvīpicarmottaracchadam|| 9||
SP0730101: śaṅkukarṇamiti khyātaṃ gaṇeśaṃ sumahābalam|
SP0730102: samāhūya samīpaṃ tu bhagavānidamabravīt|| 10||
SP0730111: svaistvaṃ gaṇeśvaraiḥ sārdhaṃ na viśeyuryathā surāḥ|
SP0730112: tathā pāhi vanaṃ vatsa yāvadetadvrataṃ mama|| 11||
SP0730121: evaṃ sa kṛtvā rakṣāṃ tu mahādevo vṛṣadhvajaḥ|
SP0730122: tapastepe mahattatra ghoraṃ paramaduścaram|| 12||
SP0730131: athājagmuḥ surāstatra sarve śakrapurogamāḥ|
SP0730132: niruddhāḥ śaṅkukarṇena na celuḥ padamagrataḥ|| 13||
SP0730140: devā ūcuḥ|
SP0730141: bho gaṇeśā vayaṃ devaṃ śarvamugraṃ kapardinam|
SP0730142: draṣṭuṃ kāryeṇa saṃprāptāstaṃ no darśayatānaghāḥ|
SP0730143: ākulāstamapaśyanto naśyāma pramatheśvarāḥ|| 14||
SP0730150: śaṅkukarṇa uvāca|
SP0730151: na yuṣmābhiḥ surāḥ śakyo devo draṣṭuṃ kathaṃcana|
SP0730152: tapaḥ kuruta bhadraṃ vo tato drakṣyatha śaṃkaram|| 15||
SP0730160: devā ūcuḥ|
SP0730161: mā lokānāṃ vināśaḥ syādgaṇeśvara mahādyute|
SP0730162: iti prayaccha no dvāraṃ prasādaṃ kuru naḥ prabho|| 16||
SP0730170: śaṅkukarṇa uvāca|
SP0730171: lokā naśyantu yūyaṃ vā na praveśaḥ pradīyate|
SP0730172: vinaṣṭānpunareveśaḥ srakṣyate bhuvaneśvaraḥ|| 17||
SP0730181: sraṣṭā sa eva bhūtānāṃ sa vināśayitā tathā|
SP0730182: taṃ vinā kaḥ surāḥ śakto lokānnāśayituṃ vibhum|
SP0730183: yacchāma na vayaṃ dvāramājñā naḥ parameśvarī|| 18||
SP0730191: ta evamuktāḥ saṃcintya jagmurbrahmasadaḥ surāḥ|
SP0730192: tato nivedayāmāsurbrahmaṇaste surottamāḥ|| 19||
SP0730201: atha brahmā surānāha mayā saha punaḥ surāḥ|
SP0730202: gacchadhvaṃ gaṇapānyāvatpratyāpattiṃ nayāmi vaḥ|| 20||
SP0730211: tataste brahmaṇā sārdhaṃ viṣṇunā ca divaukasaḥ|
SP0730212: tameva punarājagmustiṣṭhate yatra śaṃkaraḥ|| 21||
SP0730221: atha tānpunarevāśu rurodha gaṇapeśvaraḥ|
SP0730222: śaṅkukarṇo gaṇādhyakṣastejasā prajvalanniva|| 22||
SP0730231: atha brahmā tamāhedaṃ sāntvamarthayutaṃ vacaḥ|
SP0730232: gaṇeśvara na devānāṃ dauṣṭyaṃ kiṃciddhi vidyate|
SP0730233: tava prasādātpaśyantu devadevaṃ vṛṣadhvajam|| 23||
SP0730241: śirasā praṇatāstubhyaṃ devāḥ sendrapurogamāḥ|
SP0730242: ahaṃ ca viṣṇunā sārdhaṃ prayācema gaṇeśvara|| 24||
SP0730251: tasya tadvacanaṃ śrutvā brahmaṇaḥ sa gaṇeśvaraḥ|
SP0730252: kruddhaḥ paṭṭasamudyamya vacaḥ provāca niṣṭhuram|| 25||
SP0730261: na me gurutaro devāḥ praṇāmo bhavatāmayam|
SP0730262: ājñā garīyasī śambhorna praveśo 'sti kaścana|| 26||
SP0730271: pratiṣiddhāḥ kathaṃ brahmanniyuktā rakṣaṇāya ca|
SP0730272: īśājñāṃ samatikramya prayacchāma praveśanam|| 27||
SP0730281: tasya tadvacanaṃ śrutvā gaṇeśasya mahātmanaḥ|
SP0730282: ekāntaṃ prayayau brahmā lajjayā parayānvitaḥ|| 28||
SP0730291: tato devāstathā dṛṣṭvā vrīḍāyuktaṃ pitāmaham|
SP0730292: kruddhā manyuparītāṅgā vākyamūcurgaṇeśvaram|| 29||
SP0730301: gaṇādhipa na te lajjā gurumākrośase katham|
SP0730302: naivaṃ tvāṃ vibruvantaṃ hi kṣaṃsyate vṛṣabhadhvajaḥ|| 30||
SP0730311: avamānaṃ punarmaivaṃ tvamasmākaṃ kṛthā gaṇa|
SP0730312: mādya te vayamudyuktā nāśayiṣyāma jīvitam|| 31||
SP0730321: teṣāṃ tadvacanaṃ śrutvā śaṅkukarṇo ruṣānvitaḥ|
SP0730322: vacaḥ provāca saṃkruddhastiryagvīkṣya divaukasaḥ|| 32||
SP0730331: guravaḥ kiṃ bhavanto me yena śaṅke 'marādhipāḥ|
SP0730332: prasādya śaṃkaraṃ yūyaṃ gatā devatvamuttamam|
SP0730333: gaṇabhūtāḥ sureśasya yūyamapyamarottamāḥ|| 33||
SP0730341: vayamapyatiyogīśā gaṇapāstasya śūlinaḥ|
SP0730342: samānā yūyamasmākaṃ hīnā vā tridivaukasaḥ|| 34||
SP0730351: yasmādvayaṃ sadeśānaṃ paśyāmo 'nucarāma ca|
SP0730352: sarvaireva suraistasmādvayaṃ pūjyāḥ sadādhikāḥ|| 35||
SP0730361: paśyāmo nirbhayā yūyaṃ praveśaṃ kurutāmarāḥ|
SP0730362: yāvadadya gaṇeśānāṃ balaṃ drakṣyatha dāruṇam|| 36||
SP0730371: yadvo balaṃ ca yogaṃ ca yattapo yaśca vaḥ śramaḥ|
SP0730372: tatsarvaṃ darśayadhvaṃ vai tato jñāsyatha me balam|| 37||
SP0730381: tasya tadvacanaṃ śrutvā sarve devāḥ sagarvitāḥ|
SP0730382: pragṛhītāyudhāḥ kṣipraṃ śaṅkukarṇaṃ vidudruvuḥ|| 38||
SP0730391: teṣāmāpatatāṃ vyāsa surāṇāṃ śūramāninām|
SP0730392: balaṃ jagrāha yogena śaṅkukarṇo mahābalaḥ|| 39||
SP0730401: nigṛhītabalāste tu sarva eva surottamāḥ|
SP0730402: nāśaknuvanpadaṃ dātuṃ tasthuḥ stambhā ivācalāḥ|| 40||
SP0730411: nigṛhīteṣu deveṣu viṣṇuḥ praharatāṃ varaḥ|
SP0730412: abhidudrāva vegena śaṅkukarṇaṃ gaṇeśvaram|
SP0730413: sa yogena tadā viṣṇordehamastambhayadbalī|| 41||
SP0730421: sa yogaṃ punarāsthāya viṣṇuraiśvaryasaṃyutaḥ|
SP0730422: yuyudhe śaṅkukarṇena sa cainaṃ pratyayudhyata|| 42||
SP0730431: tayostu yogīśvarayoryuktayormunisattama|
SP0730432: babhūva sumahadyuddhaṃ yogenaiva parasparam|| 43||
SP0730441: vinigṛhya sa taṃ viṣṇuṃ gaṇeśaḥ śarvavallabhaḥ|
SP0730442: pitaraṃ mama yogena yuyodha paramādbhutam|| 44||
SP0730451: susūkṣmaṃ yogamāsthāya brahmā bhūtānyathāviśat|
SP0730452: yadyadviśatyasau bhūtaṃ brahmā lokapitāmahaḥ|
SP0730453: tatra tatra sthitaṃ hyagre śaṅkukarṇamavaikṣata|| 45||
SP0730461: sa bhūtāni samutsṛjya tanmātrāṇyaviśatprabhuḥ|
SP0730462: indriyāṇyatha tattvāni bhāvāṃścaiva pitāmahaḥ|| 46||
SP0730471: tatra tatra sa yogātmā yogaṃ paramamāsthitam|
SP0730472: apaśyatsthūlaśirasaṃ śaṅkukarṇaṃ mahābalam|| 47||
SP0730481: athāsminnantare vyāsa devadevasya śūlinaḥ|
SP0730482: divyaṃ varṣasahasraṃ tu prayayau dvādaśātmakam|
SP0730483: samāptaṃ cābhavadvyāsa vrataṃ tasya mahātmanaḥ|| 48||
SP0730491: sa samāpte vrate tasminyugāntāgnisamadyutiḥ|
SP0730492: avaikṣata diśaḥ sarvā jīvayanniva śaṃkaraḥ|| 49||
SP0730501: so 'paśyannigṛhītāṃstānsarvāneva divaukasaḥ|
SP0730502: sāmnaiva sa tadā devaḥ śaṅkukarṇaṃ nyavārayat|| 50||
SP0730511: samyagājñā kṛtā vatsa tvayā me gaṇapeśvara|
SP0730512: muñca devānimānsarvānmāvamaṃsthā gaṇeśvara|| 51||
SP0730521: evaṃ devena saṃproktaḥ śaṅkukarṇo gaṇādhipaḥ|
SP0730522: vimucya devatānsarvāṃstasthau devasamīpataḥ|| 52||
SP0730531: surā api tadā sarve vrīḍayā parayānvitāḥ|
SP0730532: praṇemurdevadeveśaṃ bhaktyā paramayā vibhum|| 53||
SP0730541: tāṃstadā vṛḍitāndevaḥ prahasya viditātmavān|
SP0730542: uvāca brahmaṇā sārdhaṃ viṣṇumābhāṣya susvaram|| 54||
SP0730551: gaṇeśvaro 'yaṃ deveśā macchāsanaparaḥ sadā|
SP0730552: yadanena kṛtaṃ kiṃcidvyetu tadvaḥ surottamāḥ|
SP0730553: kartavyaṃ yacca tadbrūta yadarthaṃ yūyamāgatāḥ|| 55||
SP0730560: brahmovāca|
SP0730561: śaṅkukarṇo hyayaṃ śrīmāngaṇeśo yena no balam|
SP0730562: hṛtaṃ yogena deveśa varo 'smai saṃpradīyatām|
SP0730563: asmabhyaṃ parato dadyāḥ sadādarśanamātmanaḥ|| 56||
SP0730570: deva uvāca|
SP0730571: asyaivedaṃ bhavennāmnā pavitraṃ lokaviśrutam|
SP0730572: śaṅkukarṇamiti khyātaṃ tathā sthūleśvaraṃ śubham|| 57||
SP0730581: samantādyojanamidaṃ sarvatīrthasamanvitam|
SP0730582: sarvayajñaphalairjuṣṭaṃ sarvadānaphalairyutam|| 58||
SP0730591: yo 'bhyāgatya caruṃ kṛtvā māṃ yatnenārcayiṣyati|
SP0730592: ahorātropavāsena mama lokaṃ sa yāsyati|| 59||
SP0730601: yatkiṃcinniyamaṃ kṛtvā yo 'tra saṃvatsaraṃ vaset|
SP0730602: sa yogaṃ paramaṃ prāpya śaṅkukarṇasamo bhavet|| 60||
SP0730611: yaśca prāṇāniha kṣetre tyajenniyamamāsthitaḥ|
SP0730612: sa dehabhedamāsādya mahāgaṇapatirbhavet|
SP0730613: pitṝṇāmakṣayaṃ śrāddhamiha dattaṃ bhaviṣyati|| 61||
SP0730621: yūyaṃ caiśvaryasaṃpannāstapoyogabalānvitāḥ|
SP0730622: nityaṃ drakṣyatha māṃ devāḥ prayatā vigatajvarāḥ|| 62||
SP0730631: tato devo varaṃ dattvā devebhyaḥ prabhurīśvaraḥ|
SP0730632: prakāmaṃ darśanaṃ nityaṃ tatraivāntaradhīyata|| 63||
SP0730641: gate tasminmahādeve brahmā suravarairvṛtaḥ|
SP0730642: tatra liṅgaṃ pratiṣṭhāpya cakre tīrthānyanekaśaḥ|| 64||
SP0730651: daśāśvamedhikaṃ tīrthaṃ tīrthaṃ pañcāśvamedhikam|
SP0730652: surāṇāṃ caiva tīrthāni kṛtvā svabhavanaṃ yayau|| 65||
SP0730661: etatte kathitaṃ vyāsa sindhusāgarasaṃgame|
SP0730662: paraṃ bhagavataḥ sthānaṃ pavitraṃ lokaviśrutam|| 66||
SP0730671: siddhacāraṇasaṃkīrṇamapsarogaṇasevitam|
SP0730672: bahupuṣpaphalopetaṃ sadāvihaganāditam|| 67||
SP0730681: tasmingatvā vane vyāsa hiraṇyākṣaḥ pratāpavān|
SP0730682: putrahetostapastepe dhyāyamānastrilocanam|| 68||
SP0730691: atha devastadā gatvā sagaṇo vṛṣabhadhvajaḥ|
SP0730692: ramyaṃ himagireḥ śṛṅgaṃ mainākamiti viśrutam|
SP0730693: tasthau paramayogīśaḥ paraṃ brahma sanātanam|| 69||
SP0730701: tasyāgatya tadā devī saṃsthitā pṛṣṭhataḥ śanaiḥ|
SP0730702: karābhyāṃ padmatulyābhyāṃ netre śambhornyamīlayat|
SP0730703: jānīte neti saṃcintya krīḍārthaṃ himavatsutā|| 70||
SP0730711: atha tasminkṣaṇe vyāsa jagadandhamajāyata|
SP0730712: apradṛśyaṃ hi tamasā tathā bhūtaṃ purā yathā|| 71||
SP0730721: atha devastadā buddhvā tṛtīyaṃ netramavyayam|
SP0730722: lalāṭe 'sṛjadūrdhvasthaṃ yugāntāgnisamaprabham|
SP0730723: tejasā tasya netrasya sa girirbhasmasādbhavat|| 72||
SP0730731: pārvatī pitaraṃ dṛṣṭvā tathā dagdhaṃ pinākinā|
SP0730732: apanīya karau tasthau viṣaṇṇā patipārśvataḥ|| 73||
SP0730741: atha devastadā dṛṣṭvā viṣaṇṇavadanāmumām|
SP0730742: saumyena cakṣuṣā śailamapaśyatpunareva tu|
SP0730743: sa tathādṛṣṭamātrastu punaḥ paurāṇiko 'bhavat|| 74||
SP0730751: prakṛtisthaṃ punardṛṣṭvā devī pitaramavyayam|
SP0730752: praṇamyovāca bhartāraṃ hṛṣitāsyā girīndrajā|| 75||
SP0730761: śaila eṣa tvayā deva kimarthaṃ bhasmasātkṛtaḥ|
SP0730762: kimarthaṃ prakṛtisthaśca punareva kṛtaḥ prabho|| 76||
SP0730771: tasyāstadvacanaṃ śrutvā provāca parameśvaraḥ|
SP0730772: locane me tvayā devi yasminkāle nimīlite|
SP0730773: andhāḥ samabhavaṃl lokāstadā sarve tamovṛtāḥ|| 77||
SP0730781: prakāśārthaṃ tato devi netrametanmayā kṛtam|
SP0730782: lalāṭe sumahadyena dagdho 'yamacalottamaḥ|| 78||
SP0730791: tvāṃ ca dīnāṃ pitṛvadhādupalakṣya tataḥ śubhe|
SP0730792: priyārthaṃ tava suśroṇi prakṛtisthaḥ punaḥ kṛtaḥ|| 79||
SP0730801: asmiṃśca tamasā graste loke tīvreṇa sarvataḥ|
SP0730802: utpanno 'ndhaḥ prabhāvena mama devi tathaiva ca|
SP0730803: tapyamānāya dāsyāmi hiraṇyākṣāya taṃ sutam|| 80||
SP0730811: evamuktvā sa bhagavānpragṛhyāndhaṃ gaṇairvṛtaḥ|
SP0730812: sindhusāgaramāgamya hiraṇyākṣamuvāca ha|| 81||
SP0730821: paśya māṃ tvaṃ diteḥ putra cakṣurdivyaṃ dadāni te|
SP0730822: śarvo 'hamāgato daitya varaṃ brūhi yathepsitam|| 82||
SP0730831: sa protthāya hiraṇyākṣaḥ praṇamya śirasā bhavam|
SP0730832: varamaprārthayaddevaṃ putraṃ datsveti satvaram|| 83||
SP0730841: tamuvāca suraśreṣṭhaḥ śirasā pādayornatam|
SP0730842: ayaṃ te 'suraśārdūla putraḥ putraśatāgrajaḥ|
SP0730843: māvajñāmandha ityasya kuryāstvamasurādhipa|| 84||
SP0730851: bhavitā te mahāneṣa tapovīryabalānvitaḥ|
SP0730852: na kasyacidayaṃ vadhyo matto 'nyasya bhaviṣyati|| 85||
SP0730861: tataḥ sa bhagavāndevastasmai dattvā sutaṃ śubham|
SP0730862: jagāma śikharaṃ ramyaṃ mainākaṃ punareva tu|| 86||
SP0730871: ādāyāndhaṃ sutaṃ so 'pi hiraṇyākṣo mahāsuraḥ|
SP0730872: svamaśmakapuraṃ yātvā bhāryāmāha yaśasvinīm|| 87||
SP0730881: ayaṃ tubhyaṃ suto devi datto bhagavatā svayam|
SP0730882: saṃvardhayainaṃ yogena mā pramādaṃ kṛthāḥ kvacit|
SP0730883: tasyāḥ snehena taṃ dṛṣṭvā stanābhyāṃ prasrutaṃ payaḥ|| 88||
SP0730891: saṃvardhyamānaḥ kālena so 'ndhakaḥ samavardhata|
SP0730892: yadā tu yauvanaṃ prāptastadaiva samacintayat|| 89||
SP0730901: dhigjīvitaṃ mamāndhasya mṛtyureva varo mama|
SP0730902: yo 'hamandho na paśyāmi gṛhasaṃbandhibāndhavān|| 90||
SP0730911: dhanyāste puruṣā loke ye svayaṃ yāntyaviklavāḥ|
SP0730912: dṛṣṭvā dṛṣṭvā sukhaṃ bandhūnābhāṣya hi yathāsukham|| 91||
SP0730921: kāryaṃ bhavecca loṣṭena tṛṇenātha śavena vā|
SP0730922: na mayānugṛhītena dhiṅmāmaśubhakāriṇam|| 92||
SP0730931: sutasnehādayaṃ daityaḥ sadā māṃ rakṣate pitā|
SP0730932: hantavyaṃ na vihantyeṣa koṣakṣayakaraṃ hi mām|
SP0730933: nāyaṃ snehena saṃmūḍho jānātīmāṃ mama vyathām|| 93||
SP0730941: ahameva kariṣyāmi yatkāryaṃ buddhisattamaiḥ|
SP0730942: tapo mahatsamāsthāya cakṣuṣmānbhavitā hyaham|| 94||
SP0730951: sa evaṃ pariniścintya bahudhāndhaḥ subuddhimān|
SP0730952: āmantrya sahitaṃ mātrā pitaraṃ taṃ praṇamya ca|
SP0730953: jagāma tapase dhīmānsaṃkalpya kṛtaniścayaḥ|| 95||
SP0730961: pitrā śokapariplutekṣaṇamukhenāyāsakhinnātmanā
SP0730962: mātrā cāsakṛdasrupātamukhayā saṃvīkṣyamāṇaściram|
SP0730963: tattīvrādhṛtikhedadṛṣṭivirahaprakvāthito 'ntaḥ śvasan
SP0730964: dhyāyandevamumāpatiṃ sa tapase yāto gṛhādandhakaḥ|| 96||
SP0739999: iti skandapurāṇe trisaptatitamo 'dhyāyaḥ||