Skandapurāṇa Adhyāya 72

E-text generated on February 11, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0720010: vyāsa uvāca|
SP0720011: bhagavansarvayogajña śrutamākhyānamuttamam|
SP0720012: parataḥ śrotumicchāmi yadvṛttaṃ munisattama|| 1||
SP0720021: apanīya tadā viṣṇoḥ siṃharūpaṃ vṛṣadhvajaḥ|
SP0720022: kimanyadakaroddhīmānetadicchāmi veditum|| 2||
SP0720030: sanatkumāra uvāca|
SP0720031: svayoniṃ viṣṇumānīya devadevo bhavastadā|
SP0720032: mandare sahito devyā vicacāra mahādyutiḥ|| 3||
SP0720041: ramyānsa kānanoddeśāngireḥ prasravaṇāni ca|
SP0720042: alaṃcakāra deveśaḥ parisarpansamantataḥ|| 4||
SP0720051: vanaprekṣāratiṃ devaṃ jñātvā śaṃkaramavyayam|
SP0720052: śarattatra vasantaśca dvāvṛtū samupasthitau|| 5||
SP0720061: tato mahīruhāḥ sarve sarāṃsi ca samantataḥ|
SP0720062: nānāvidhāni puṣpāṇi mumucuḥ sahasā samam|| 6||
SP0720071: kamalotpalasaṃchannāḥ ṣaṭpadavrātasevitāḥ|
SP0720072: haṃsasārasasaṃvāsā vāpyastatra manoharāḥ|| 7||
SP0720081: gandhāḍhyā jātayaḥ kṣipraṃ babhūvuḥ saha campakaiḥ|
SP0720082: aśoko gandhapuṣpaśca tathā caivātimuktakaḥ|
SP0720083: upatasthuḥ samaṃ devaṃ sarvagandhasukhānilāḥ|| 8||
SP0720091: sarvartukusumākīrṇaṃ dṛṣṭvā tadvanamuttamam|
SP0720092: puṣpāṇyādāya deveśaḥ svayameva jagatpatiḥ|| 9||
SP0720101: alaṃcakāra hṛṣṭātmā devīṃ himagireḥ sutām|
SP0720102: nandīśvaraṃ ca pārśvasthamātmānaṃ ca sureśvaraḥ|| 10||
SP0720111: tataḥ praṇamya deveśaṃ pārvatī praṇayādidam|
SP0720112: vacaḥ provāca jananī kṛtsnasya jagato 'vyayā|| 11||
SP0720121: yathā me dehajaḥ putro bhavitā govṛṣadhvaja|
SP0720122: tvadvīryastvatprabhāvaśca sarvadevanamaskṛtaḥ|
SP0720123: tathā kuru mahādeva yadi te priyatā mayi|| 12||
SP0720131: evamuktastadā devyā devadevastrilocanaḥ|
SP0720132: provācedaṃ mahātejā devyāḥ priyacikīrṣayā|| 13||
SP0720141: evaṃ bhavatu deveśe vijñaptiṃ saphalāmimām|
SP0720142: kariṣyāmi taveśāni putraste sa bhavedyathā|| 14||
SP0720151: śreṣṭhaḥ sarvasureśānāṃ mahāyogabalānvitaḥ|
SP0720152: kṛtsnaṃ jagadidaṃ yasya vaśe sthāsyati bhāmini|| 15||
SP0720161: gacchatyā tattapaḥ kartuṃ varaḥ pūrvamapi tvayā|
SP0720162: prārthito hyeṣa putrārthaṃ tenāvaśyaṃ dadāni te|| 16||
SP0720171: evamuktvā tu tau devau girijābhuvaneśvarau|
SP0720172: nandīśena tadā sārdhaṃ vicarantau jagadgurū|
SP0720173: sarvodyānāni paśyantau vindhyamājagmaturgirim|| 17||
SP0720181: athāgamya tu vindhyasya sauvarṇaṃ śikharottamam|
SP0720182: darīkandarasaṃkīrṇaṃ nānānirjharasaṃyutam|
SP0720183: sataḍinmeghasaṃghātaṃ ghanīkṛtaśiloccayam|| 18||
SP0720191: nānāvṛkṣaśilopetaṃ nānākusumasaṃyutam|
SP0720192: nānākhagaravāmodaṃ hemaratnojjvalaṃ śubham|| 19||
SP0720201: mānasaṃ tasya madhye tu puraṃ sṛṣṭvā maharddhimat|
SP0720202: maṇihemamayaṃ divyaṃ devāsuravimohanam|
SP0720203: paramaiśvaryasaṃyuktau yutau viviśatuḥ puram|| 20||
SP0720211: nandinaṃ ca tato devī samājñāpayadavyayā|
SP0720212: vatsa nandiṃstathā dvāre tiṣṭhestvaṃ gaṇapeśvara|
SP0720213: viśenneha yathā kaścitsūkṣmo vāyurapi sthitaḥ|| 21||
SP0720221: kṛtvā śirasi tāmājñāṃ nandīśo gaṇapādhipaḥ|
SP0720222: abhavaddvāramūlasthaḥ kṛtvā tejo 'tiduḥsaham|| 22||
SP0720231: yogayuktau tadā devau parāṃ mūrtiṃ samāsthitau|
SP0720232: kṛtsnasya jagato yonī pārvatībhuvaneśvarau|
SP0720233: tasthatuḥ suciraṃ kālaṃ tanayārthaṃ mahādyutī|| 23||
SP0720241: sa na śakyo mayā vaktuṃ brahmaṇā vā mahāmune|
SP0720242: saṃyogo yo bhaveddevyā devadevasya śūlinaḥ|
SP0720243: brahmaṇo madvidhānāṃ ca sraṣṭāsau parameśvaraḥ|| 24||
SP0720251: avaśyaṃ tvāgame vācyaṃ yathāvṛttaṃ mayā śrutam|
SP0720252: ato vakṣyāmi te vyāsa priyaḥ śiṣyaśca me bhavān|| 25||
SP0720261: yogasaṃdhānamāsthāya tayoreva mahāmune|
SP0720262: atītaṃ sthitayordivyaṃ sahasraṃ śaradāmabhūt|| 26||
SP0720271: tato 'bhavannimittāni ghorāṇi trāsanāni ca|
SP0720272: cacāla pṛthivī kṛtsnā saśailavanakānanā|| 27||
SP0720281: nadyaḥ śoṣaṃ tadā jagmuścukṣubhe saritāṃ patiḥ|
SP0720282: tapano niṣprabhaścāsīdvavāvuṣṇaṃ samīraṇaḥ|
SP0720283: peturulkā mahāghorā dikpradāhaśca dāruṇaḥ|| 28||
SP0720291: evamutpātavitrastā śubhahetorvasuṃdharā|
SP0720292: jagāma śaraṇaṃ viṣṇuṃ gatvā cārtiṃ nivedayet|| 29||
SP0720301: utpātā dāruṇā deva babhūvurbahavo bhṛśam|
SP0720302: tenātīva samudvignā tvāmadya śaraṇaṃ gatā|| 30||
SP0720311: atha viṣṇuḥ surānsarvānidamaśrāvayatprabhuḥ|
SP0720312: tato divaukasaḥ sarve bṛhaspatipurogamāḥ|
SP0720313: ekatra saṃgatā bhūtvā cakrurbahuvidhāḥ kathāḥ|| 31||
SP0720321: mahābuddhirathāhedaṃ vākyamaṅgirasaḥ sutaḥ|
SP0720322: śrīkaṇṭho bhagavāneṣa devadevastrilocanaḥ|
SP0720323: yukto 'bhūddhimavatputryā tanayārthaṃ mahādyutiḥ|| 32||
SP0720331: divyaṃ varṣasahasraṃ tu yogena parameṣṭhinaḥ|
SP0720332: agādyuktasya pārvatyā babhūvurdāruṇāstataḥ|
SP0720333: utpātā jagatastrāsāścintyate kimihāparam|| 33||
SP0720341: gacchāma sahitāḥ sarve stotuṃ bhaktyā vṛṣadhvajam|
SP0720342: yathā na dehajaḥ putro bhaveddevyāḥ sureśvarāḥ|
SP0720343: vijñāpayāma deveśaṃ tathā śīghramihāmarāḥ|| 34||
SP0720351: tato vaivasvataḥ prāha vacaḥ krodhaviniḥsṛtam|
SP0720352: kimarthaṃ bhṛśamudvignā bhavantaḥ sarva eva hi|| 35||
SP0720361: yadyasau devadevasya tanayo 'smāsu bhaktimān|
SP0720362: utpatsyati na ca drogdhā tataḥ kṣaṃsyāma taṃ surāḥ|| 36||
SP0720371: atha cetkarkaśo 'smāsu drogdhā vā sa bhaviṣyati|
SP0720372: tata enamahaṃ baddhvā kālapāśena bālakam|
SP0720373: nayiṣye svavaśaṃ krūraṃ mṛtyunā sahito 'marāḥ|| 37||
SP0720381: na cetpuraṃdaro vajraṃ tasya kṣepsyati mūrdhani|
SP0720382: dvidhā yena kṛto mūḍhaḥ prāṇāṃstyakṣyati dustyajān|| 38||
SP0720391: bruvatastasya bahvevaṃ krodhasaṃraktalocanaḥ|
SP0720392: viṣṇuḥ provāca dharmātmā vacāṃsi paramārthavit|| 39||
SP0720401: aho tvayā suviśrabdhaṃ procyate bhāskarātmaja|
SP0720402: paramārthamavijñāya krodhasya vaśavartinā|| 40||
SP0720411: tanayaḥ kila yaḥ śambhorgirijāyāṃ bhaviṣyati|
SP0720412: sa mūḍha iva yaḥ kaścidbhavitā vaśagastava|| 41||
SP0720421: kimasau mānavo 'nyo vā jarāmṛtyusamanvitaḥ|
SP0720422: utpatsyati raveḥ putra tena syādvaśagastava|| 42||
SP0720431: kālenāparipūrṇena mānavasyāpi bhānuja|
SP0720432: na tvaṃ vaśayitā nāma kimu putrasya śūlinaḥ|| 43||
SP0720441: tejo bhagavataḥ śambhoryadbhaviṣyatyuttamam|
SP0720442: sa kathaṃ vadhyatāṃ yāyāttava śakrasya vā vibho|| 44||
SP0720451: bravīmi vo hitaṃ devāḥ kriyate yadi madvacaḥ|
SP0720452: prayāma sahitāḥ sarve taṃ prasādayituṃ haram|| 45||
SP0720461: yo naḥ svayaṃvare datto varastiṣṭhati śaṃkare|
SP0720462: tameva varayiṣyāmo varamagryaṃ pinākinam|
SP0720463: yathā na dehajo devyāstanayaḥ saṃbhaviṣyati|| 46||
SP0720471: nāsmākamahitaṃ śambhuḥ putramutpādayiṣyati|
SP0720472: vayameva sutāḥ sarve śaṃkarasyāgrajā vibhoḥ|| 47||
SP0720481: na śakyastapasā draṣṭuṃ na jñānena sureśvaraḥ|
SP0720482: bhaktyā paramayā draṣṭuṃ śakyaḥ syātsa vṛṣadhvajaḥ|| 48||
SP0720491: āgacchadhvaṃ gamiṣyāmo yatra tiṣṭhati śaṃkaraḥ|
SP0720492: parāṃ bhaktiṃ samāsthāya yathā paśyema śaṃkaram|| 49||
SP0720501: hutabhukcaiṣa no devastatsakāśaṃ pravekṣyati|
SP0720502: sarveṣāmeva vijñaptyā surāṇāṃ surasattamaḥ|| 50||
SP0720511: iti śrutvā vacastasya viṣṇoramitatejasaḥ|
SP0720512: bṛhaspatipurogāste hṛṣṭātmāno divaukasaḥ|
SP0720513: sādhu sādhviti saṃtuṣṭā vacāṃsyūcuḥ surottamāḥ|| 51||
SP0720521: tato viṣṇusahāyāste gatvā te śṛṅgamuttamam|
SP0720522: ūcurhutāśanaṃ devaṃ vacaḥ stutipuraḥsaram|| 52||
SP0720531: tvamagne sarvadevānāṃ hitakṛtsarvato 'vyayaḥ|
SP0720532: praviśya trāhi naḥ sarvāñchaṃkarāya nivedaya|| 53||
SP0720541: tathā kuryātsuraśreṣṭha yena nirgamya śaṃkaraḥ|
SP0720542: asmānnirīkṣate devaḥ prahvānbhaktimataḥ sthitān|| 54||
SP0720551: ityuktaḥ sa suraiḥ sarvaiḥ pratyuvāca hutāśanaḥ|
SP0720552: akartavyaṃ hi me devā na yuṣmānprati vidyate|| 55||
SP0720561: pārvatyā saha saṃyuktaṃ devadeveśvaraṃ param|
SP0720562: na me śaktirharaṃ draṣṭuṃ bhavantaścākulā bhṛśam|
SP0720563: yuṣmadvākyamalaṅghyaṃ ca kṛcchrametadatīva me|| 56||
SP0720571: pravekṣye sutapaṃ devāḥ kariṣye sāhasaṃ mahat|
SP0720572: ityuktvā sa jagāmāśu bhavanaṃ tatkapardinaḥ|| 57||
SP0720581: tatrāpaśyatsthitaṃ dvāre nandinaṃ paramaujasam|
SP0720582: dvāramākramya tiṣṭhantaṃ dīptapaṭṭasadhāriṇam|| 58||
SP0720591: taṃ dṛṣṭvā sa tadā vahniḥ samālokya samantataḥ|
SP0720592: nāsti kaścidihopāyaḥ sūkṣmajantorapi sthite|| 59||
SP0720601: praveṣṭumiti saṃcintya tameva śaraṇaṃ yayau|
SP0720602: nandinaṃ hutabhugdevastuṣṭāva ca kṛtāñjaliḥ|| 60||
SP0720611: namo gaṇādhipataye namaścaṇḍāya śūline|
SP0720612: namaḥ senādhipataye namaḥ sarvātmane sadā|| 61||
SP0720621: hālāhalāya rudrāya nīlarudrāya vai namaḥ|
SP0720622: namo ḍākinirudrāya tathaivārdrapaṭāya ca|| 62||
SP0720631: namaste svapnarudrāya bhasmarudrāya te namaḥ|
SP0720632: namaḥ śmaśānarudrāya koṭīrudrāya te namaḥ|| 63||
SP0720641: namaḥ piṅgalarudrāya rudrādhipataye namaḥ|
SP0720642: namaḥ pramatharudrāya bhūtarudrāya te namaḥ|
SP0720643: virūpākṣāya rudrāya śvetarudrāya te namaḥ|| 64||
SP0720651: namaste satataṃ deva namaste satataṃ śiva|
SP0720652: namaste satataṃ saumya namaste bhaktivatsala|| 65||
SP0720661: mama bhaktasya deva tvaṃ devānāṃ hitamicchataḥ|
SP0720662: varado bhava nandīśa mā naḥ krodhaṃ kṛthāḥ prabho|| 66||
SP0720671: tato nandīśvaraḥ prāha stuvantamanalaṃ sthitam|
SP0720672: prītastavānayā vahne bhaktyāhaṃ surasattama|
SP0720673: brūhi kiṃ te priyaṃ deva karomyadya hutāśana|| 67||
SP0720681: atha provāca vahnistaṃ varadaṃ nandinaṃ sthitam|
SP0720682: yadi tuṣṭo 'si me deva deyo yadi varaśca me|| 68||
SP0720691: devakāryeṇa deveśa praveṣṭuṃ dīyatāṃ mama|
SP0720692: bhavanaṃ devadevasya vara eṣo 'stu me vibho|| 69||
SP0720701: taṃ nandī pratyuvācedaṃ kṛcchraṃ deyo varo hyayam|
SP0720702: na taṃ śakṣyasi deveśaṃ draṣṭuṃ tvaṃ yogamāsthitam|
SP0720703: saha devyā maheśānaṃ sraṣṭāraṃ jagato 'vyayam|| 70||
SP0720711: tathāpyeṣa mayā tubhyaṃ deya eva varo 'nala|
SP0720712: gaccha sūkṣmataro bhūtvā durālakṣyo hutāśana|
SP0720713: praviśya niṣkrama kṣipramavijñātāgamakriyaḥ|| 71||
SP0720721: sa nandinābhyanujñāto jātavedā mudā yutaḥ|
SP0720722: jyotiḥ sūkṣmataro bhūtvā bhāskarasyāṃśunā saha|
SP0720723: praviśya bhavanaṃ śambhormaṇistambhamathāviśat|| 72||
SP0720731: vahneyamaṇimadhyasthaḥ stambhaṃ tadbhāsayanmuhuḥ|
SP0720732: so 'paśyattatra deveśaṃ devīṃ ca bhuvaneśvarīm|
SP0720733: tuṣṭāva manasā devau tato 'sau havyavāhanaḥ|| 73||
SP0720741: tathā saṃstūyamānaśca prītiṃ devyāśca darśayan|
SP0720742: vīkṣya stambhaṃ haro devīṃ vākyametadabhāṣata|| 74||
SP0720751: eṣa stambhamaṇirdevi bhrājamāna iva priye|
SP0720752: saṃstauti māṃ tvayā sārdhaṃ dadānyasmai varaṃ śubham|| 75||
SP0720760: devyuvāca|
SP0720761: evaṃ kuru mahādeva bhaktasyāsya sureśvara|
SP0720762: stuvatastvā mayā sārdhaṃ prayaccha varamuttamam|| 76||
SP0720770: deva uvāca|
SP0720771: prīto 'haṃ maṇimadhyastha bhaktyā te vinayena ca|
SP0720772: brūhi kāryaṃ yatheṣṭaṃ tvaṃ tatsarvaṃ te bhaviṣyati|| 77||
SP0720780: agniruvāca|
SP0720781: devāstvāṃ draṣṭumicchanti bahiḥsthā bhuvaneśvara|
SP0720782: bhagavaṃste yathā sarve paśyeyustvāṃ tathā kuru|| 78||
SP0720790: deva uvāca|
SP0720791: evamastu suraśreṣṭha nirgatya tridivaukasām|
SP0720792: dadāmi darśanaṃ vahne bhavataḥ priyakāmyayā|| 79||
SP0720801: tatheti samanujñāto vahnistasmādvinirgataḥ|
SP0720802: devebhyaḥ kāryamāvedya tasthau yogaṃ samāsthitaḥ|| 80||
SP0720811: atha niṣkramya bhagavāndevadevaḥ pinākadhṛk|
SP0720812: jagāma tvaritaṃ tatra yatra devāḥ samāsate|| 81||
SP0720821: atha dṛṣṭvā mahādevaṃ devāḥ sarve vṛṣadhvajam|
SP0720822: praṇemurmūrdhnabhirhṛṣṭāstuṣṭuvuśca mudā yutāḥ|| 82||
SP0720831: namaḥ sahasranetrāya sahasracaraṇāya ca|
SP0720832: mahatāṃ pataye nityaṃ devānāṃ pataye namaḥ|| 83||
SP0720841: namaḥ śmaśānarataye vyāghracarmasuvāsase|
SP0720842: brahmaṇaśca śiro hartre viṣṇave varadāya ca|| 84||
SP0720851: namo dakṣamakhaghnāya namaste tryambakāya ca|
SP0720852: namo bhūtādhipataye pradhānamathanāya ca|| 85||
SP0720861: pinākapāṇaye nityaṃ sarvayogātmayogine|
SP0720862: namo nīlaśikhaṇḍāya sapatnīkāya vai namaḥ|| 86||
SP0720871: namaḥ kāmeṣvasaktāya kāmasaktāya vai namaḥ|
SP0720872: namaḥ śarvāya sarvāya muṇḍine jaṭine namaḥ|
SP0720873: namaḥ sarvātmabhūtāya diśa no yanmanogatam|| 87||
SP0720881: evaṃ saṃstūyamāno 'tha sarvaireva surottamaiḥ|
SP0720882: pratyuvāca mahādevastānsurānpraṇatānsthitān|
SP0720883: parituṣṭo 'smi vo devā brūta kiṃ pradadāni vaḥ|| 88||
SP0720891: punaḥ praṇamya te devāḥ prāhurvacanamuttamam|
SP0720892: yo naḥ svayaṃvare deva varo dattastvayā vibho|
SP0720893: taṃ prārthayāma sahitāstaṃ no dātuṃ tvamarhasi|| 89||
SP0720901: devyā ya eṣa putrārthaṃ yogaste bhuvaneśvara|
SP0720902: kṛto 'bdāni bahūni sma taṃ saṃhara namastava|| 90||
SP0720911: aśubhāni nimittāni dṛśyante sumahādyute|
SP0720912: pṛthivī duḥsthitā deva vayaṃ ca bhṛśamākulāḥ|| 91||
SP0720921: tenaiṣa na yathā devyā dehe saṃjāyate sutaḥ|
SP0720922: jāyeta ca yathā deva tathā naḥ kartumarhasi|| 92||
SP0720931: teṣāṃ tadvacanaṃ śrutvā devadevo 'bravīdvacaḥ|
SP0720932: mahāneṣa varaḥ sarvaiḥ prārthitaḥ surapuṃgavaiḥ|
SP0720933: tathāpi ca prayacchāmi yuṣmatpriyacikīrṣayā|| 93||
SP0720941: mahāntaṃ kiṃ tvidaṃ kālaṃ tejaḥ saṃdhāritaṃ mayā|
SP0720942: asya prapaśyatha sthānamamoghaṃ hyetaduttamam|| 94||
SP0720951: athaivamuktā devena te devā munisattama|
SP0720952: babhūvuḥ sahitāstūṣṇīṃ surā brahmapurogamāḥ|| 95||
SP0720961: teṣāmagnistadā madhye provāca bhuvaneśvaram|
SP0720962: juhudhyetatparaṃ tejo mayi deva trilokapa|| 96||
SP0720971: juhāvāgnau tatastejastadātmīyaṃ paraṃ bhavaḥ|
SP0720972: hutvā kṛtsnaṃ tatastasmiṃstuṣṭo 'bhūtparameśvaraḥ|| 97||
SP0720981: varaṃ vṛṇu hutāśa tvamiti provāca śaṃkaraḥ|
SP0720982: tato vahniḥ praṇamyeśaṃ varānaprārthayadvibhum|| 98||
SP0720991: iccheyamenaṃ putraṃ te mama nāmnā prakīrtitam|
SP0720992: śāpasyāhamagamyaḥ syāṃ paśyeyaṃ tvāṃ ca nityaśaḥ|
SP0720993: dhārayeyaṃ sukhenaitadutsṛjeyaṃ ca śaṃkara|| 99||
SP0721001: sarvabhakṣo 'pyalepaḥ syāṃ pāpaṃ na ca bhavenmama|
SP0721002: mayi devāśca yajñāśca pratiṣṭhāṃ yāntu śūladhṛk|| 100||
SP0721011: ahaṃ bhūteśvaraśca syāmahaṃ paśupatiśca ha|
SP0721012: ahaṃ tava tanuḥ syāṃ ca tvanmūrtistvadapāśrayaḥ|| 101||
SP0721021: varamicchāmi deveśa dīyamānamimaṃ tvayā|
SP0721022: evamastviti tatsarvaṃ vahnaye pradadau vibhuḥ|| 102||
SP0721031: visṛjya ca tato devāndevadevo vṛṣadhvajaḥ|
SP0721032: punarviveśa bhavanaṃ devī caivamabhāṣata|| 103||
SP0721041: kva gatvā tvamihāyātaḥ kṣipraṃ tribhuvaneśvara|
SP0721042: kiṃ tadgurutaraṃ kāryaṃ yena nirgatavānasi|| 104||
SP0721051: tataḥ provāca deveśaḥ pārvatīṃ ruṣitānanām|
SP0721052: gato 'smi tvarito devi devairvijñāpitaḥ priye|
SP0721053: bahiḥsthaiḥ padmapatrākṣi bhaktimadbhiḥ suduḥkhitaiḥ|| 105||
SP0721061: athovāca tato devī devaṃ sarvajagatpatim|
SP0721062: kathaṃ tvamāgatāndeva bahiḥsthāṃstridivaukasaḥ|
SP0721063: jñātavānasi saṃtrastānkenākhyātaṃ ca te vibho|| 106||
SP0721070: deva uvāca|
SP0721071: praviśya hutabhugdevi maṇistambhaṃ samāsthitaḥ|
SP0721072: nyavedayatstuvanmahyaṃ sarvāndevānbahiḥsthitān|
SP0721073: tavaivānujñayā devi yasmai datto varo mayā|| 107||
SP0721081: tato bhagavatī kruddhā nandinaṃ prati pārvatī|
SP0721082: kathaṃ praviṣṭavānvahnirdvārasthasyeha durmateḥ|| 108||
SP0721091: tatastasya bhṛśaṃ kruddhā śravaṇe nyastamutpalam|
SP0721092: gṛhītvā vajrasaṃkāśaṃ nandīśāya vyasarjayat|| 109||
SP0721101: dvādaśādityasaṃkāśaṃ jvalantaṃ tattadotpalam|
SP0721102: vadhārthaṃ nandino ghoraṃ prasasāra sphuṭanniva|| 110||
SP0721111: hato nandīśvara iti procyotthāya ca śaṃkaraḥ|
SP0721112: bhadraṃ bhavotpala kṣipramityuktvāgṛhṇadutpalam|| 111||
SP0721121: athomāpi tato devī pratyāpattiṃ jagāma ha|
SP0721122: aho bata mahatkaṣṭaṃ kṛtaṃ krodhavaśānmayā|
SP0721123: kathaṃcinna hato nandī mahāgaṇapanāyakaḥ|| 112||
SP0721131: tadgṛhītvā tato hastāddevasya śravaṇotpalam|
SP0721132: cikṣepa tvaritaṃ devī bhadraṃ bhavatu te saraḥ|| 113||
SP0721141: evamuktvā tataḥ kṣiptaṃ devyā tacchravaṇotpalam|
SP0721142: vindhyapṛṣṭhe sarastatra bahupadmotpalaṃ babhau|| 114||
SP0721151: haṃsasārasasaṃkīrṇaṃ cakravākopaśobhitam|
SP0721152: nāmnā bhadrotpalaṃ nāma haimaśṛṅgasamīpataḥ|| 115||
SP0721161: tatra snātvā naraḥ kṣipraṃ sarvapāpaiḥ pramucyate|
SP0721162: tatrākṣayaṃ sadā dānaṃ pitṛtarpaṇameva ca|
SP0721163: mṛtaścātra naro yāti nandīśvarasalokatām|| 116||
SP0721171: tato devaṃ punardevī vākyamāha gireḥ sutā|
SP0721172: kimūcustvāṃ surā deva kīdṛśaṃ cārthayanvaram|| 117||
SP0721181: kathayāmāsa deveśastato devyai vṛṣadhvajaḥ|
SP0721182: devairvijñāpito devi nirgato 'haṃ varānane|| 118||
SP0721191: devyā ya eṣa putrārthaṃ yogaste bhuvaneśvara|
SP0721192: - - - - - - - -  - - - - - - - -|| 119||
SP0721201: aśubhānyatra dṛśyante dāruṇāni sahasraśaḥ|
SP0721202: saṃtrastā pṛthivī kṛtsnā vayaṃ ca bhṛśamākulāḥ|| 120||
SP0721211: tenaiṣa na yathā devyā garbhe saṃjāyate sutaḥ|
SP0721212: bhavecca tanayaḥ ślāghyo vara eṣa pradīyatām|| 121||
SP0721221: tato 'gnau taddhutaṃ tejo mayā putrārthamīśvari|
SP0721222: sutaste bhavitā śrīmānṣaṭśirā dvādaśekṣaṇaḥ|| 122||
SP0721231: tasya tadvacanaṃ śrutvā śaśāpa girijāmarān|
SP0721232: yasmānmama suto dehe nepsitastairdurātmabhiḥ|
SP0721233: svāsu patnīṣu tasmātte na prāpsyanti surāḥ sutam|| 123||
SP0721241: pṛthivī cāpi saṃmūḍhā macchāpopahatendriyā|
SP0721242: bahūnpatīnsamāsādya na putraṃ prāpsyate kvacit|
SP0721243: virarāma tato devī śaptvā devānsavāsavān|| 124||
SP0721250: sanatkumāra uvāca|
SP0721251: kaiṭabhā nāma nāmnā ca puṇyā naikavarapradā|
SP0721252: vindhyasya śikhare haime tatrābhūdgirijā śubhā|| 125||
SP0721261: puṇyamāyatanaṃ taddhi śilāṃ ca ramaṇāhvayām|
SP0721262: yo 'bhigacchennaro vyāsa mṛtaḥ sa gaṇapo bhavet|| 126||
SP0721271: athājagmuḥ surāḥ sarve sārdhaṃ tatra havirbhujā|
SP0721272: vivarṇāḥ kaśmalopetāḥ sagarbhā lajjayānvitāḥ|| 127||
SP0721281: tāndvāḥsthānāgatānnandī śaṃkarāya nyavedayat|
SP0721282: praviśya samanujñātā devamūcurdivaukasaḥ|| 128||
SP0721291: tejo na śaknumaḥ soḍhumidaṃ tribhuvaneśvara|
SP0721292: trāhi naḥ suralokeśa yathā syāma gatajvarāḥ|| 129||
SP0721301: andhakaścāsuro 'tyarthaṃ tapyate duścaraṃ tapaḥ|
SP0721302: bhayaṃ ca nastato deva dṛśyate sumahadvibho|| 130||
SP0721310: deva uvāca|
SP0721311: mā bhīrbhavatu vo devā haṃsye tamahamandhakam|
SP0721312: yuṣmadarthe parākrāntaṃ hiraṇyākṣasutaṃ varam|| 131||
SP0721321: yūyaṃ ca merumadhyasthaṃ vanaṃ yāta suvistṛtam|
SP0721322: nāmnā śaravaraṃ nāma puṇyaṃ dvādaśayojanam|| 132||
SP0721331: yuṣmākaṃ tatra saṃbhittvā kukṣīndaivatapuṃgavāḥ|
SP0721332: madīyaṃ tatparaṃ tejo nirgamiṣyati dīptimat|
SP0721333: suvarṇatvaṃ ca yāsyanti kukṣayo vaḥ surottamāḥ|| 133||
SP0721341: tataste tadvacaḥ śrutvā praṇamya śirasā bhavam|
SP0721342: śrīmantaṃ merumājagmuḥ śaradhānaṃ ca tacchubham|| 134||
SP0721351: yatra teṣāṃ tadā bhittvā tejo 'gneśca vyaniṣkramat|
SP0721352: yugāntānalasaṃkāśaṃ durnirīkṣyaṃ surairapi|| 135||
SP0721361: meruścaivābhavatkṣipraṃ śrīmānatimanoharaḥ|
SP0721362: sarvaṃ hiraṇmayaṃ cakre tejo māheśvaraṃ param|| 136||
SP0721371: vāti gandhavaho divyaḥ sarvartukusumāvahaḥ|
SP0721372: teṣāṃ ca kukṣibhedāste suvarṇatvaṃ paraṃ yayuḥ|| 137||
SP0721381: svarge dundubhayo divyā neduḥ svayamanāhatāḥ|
SP0721382: puṣpāṇāṃ vṛṣṭayaḥ petuḥ sugandhānāmanekaśaḥ|
SP0721383: namaskāraiśca bhūtānāmadṛśyānāmabhūtsvanaḥ|| 138||
SP0721391: evamādīni paśyantaḥ śṛṇvantaśca surottamāḥ|
SP0721392: gatvā pinākine hṛṣṭāḥ sarvamāvedya suvrata|
SP0721393: preṣitāḥ sthāṇunā jagmuḥ svāṃl lokānhṛṣitānanāḥ|| 139||
SP0721401: śrutvā devairabhihitamidaṃ prītiyuktairvaco 'gryaṃ
SP0721402: prītā devī hṛdayamahitā putrajanmapravṛttim|
SP0721403: jñātvā tasthau vibudhavaradā yogamātā vidhātrī
SP0721404: tuṣṭiṃ cāgādṛṣisuraśiraḥspṛṣṭapādāravindā|| 140||
SP0729999: iti skandapurāṇe dvisaptatitamo 'dhyāyaḥ||