Skandapurāṇa Adhyāya 71

E-text generated on February 11, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0710010: sanatkumāra uvāca|
SP0710011: śāsatastasya daityasya hiraṇyakaśipostadā|
SP0710012: agātkālo mahānvyāsa trailokyaṃ sacarācaram|| 1||
SP0710021: darpeṇa mahatāviṣṭaḥ śrīmadodvṛttacetanaḥ|
SP0710022: avamene surānsarvānna ca dharmamavekṣate|| 2||
SP0710031: sa devānsahitānsarvāñchakrādyānkrodhamūrchitaḥ|
SP0710032: cālitānapi rājye sve kṛcchramāpādayadbhṛśam|| 3||
SP0710041: saṃtāpyamānāste sarve brahmāṇaṃ śaraṇaṃ yayuḥ|
SP0710042: bhagavanbhūtabhavyeśa pitāmaha mahādyute|| 4||
SP0710051: hiraṇyakaśipurdaityastvatto labdhavaro 'nagha|
SP0710052: trailokyaṃ kṛtsnamākramya rājyaṃ no hṛtavāndivi|| 5||
SP0710061: aniśaṃ cāvamānaṃ naḥ prayuṅkte vairayātanam|
SP0710062: tena vidrāvitāḥ sarve śaraṇaṃ vayamāgatāḥ|| 6||
SP0710071: prasādaṃ kuru deveśa sa na syānno yathā ripuḥ|
SP0710072: tyaktadharmā jagacchatrurhiraṇyakaśipurbalī|| 7||
SP0710081: evaṃ proktastadā devairdevaḥ kamalavāhanaḥ|
SP0710082: provācedaṃ mahāprajña devānāṃ priyakṛdvacaḥ|| 8||
SP0710091: kṣīṇaṃ taddaityarājasya tapastasya durātmanaḥ|
SP0710092: kṛcchraṃ gamitavānyo vo rājyaṃ ca hṛtavānripuḥ|| 9||
SP0710101: tenāhaṃ prārthitaḥ pūrvaṃ sarvāvadhyatvamuttamam|
SP0710102: antaraṃ bhāṣitaścāsau mayā saṃjñāvimohitaḥ|| 10||
SP0710111: yadaivāntaramāhātha daityarājo vicetanaḥ|
SP0710112: tadaiva manasā toṣamahamāgāṃ mahābalāḥ|| 11||
SP0710121: te yūyamadya gacchadhvaṃ viṣṇorbhavanamuttamam|
SP0710122: taṃ brūta sahitāḥ sarve tasya nāśārthamacyutam|| 12||
SP0710131: narasiṃhavapuḥ kṛtvā sakṛdāhatya haṃsyati|
SP0710132: hiraṇyakaśipuṃ daityaṃ tato nirvṛtimeṣyatha|| 13||
SP0710141: evamastviti te sarve praṇipatya pitāmaham|
SP0710142: ājagmuḥ sahitā devā viṣṇorbhavanamādṛtāḥ|| 14||
SP0710151: atha dṛṣṭvā mahātejā viṣṇurdevānupasthitān|
SP0710152: uvāca ślakṣṇayā vācā vacaścetomanoharam|| 15||
SP0710161: svāgataṃ bhavatāmastu kimarthaṃ yūyamāgatāḥ|
SP0710162: pūjyā bhavantaḥ sarve me suhṛdo 'tigarīyasaḥ|| 16||
SP0710171: yadvo manogataṃ kiṃcinmayā kāryaṃ divaukasaḥ|
SP0710172: kṣipraṃ tadbrūta saṃkṣiptaṃ kartāhamavicāritam|| 17||
SP0710181: viṣṇunaivaṃ tadā proktā devāḥ śakrapurogamāḥ|
SP0710182: ūcuḥ prahṛṣṭavadanāḥ saṃstuvanto janārdanam|| 18||
SP0710191: hiraṇyakaśipordeva daityarājño mahābalāt|
SP0710192: bhayaṃ naḥ sumahajjātaṃ rājyaṃ cāpahṛtaṃ divi|| 19||
SP0710201: avamānaḥ prayuktaśca tenāsmabhyaṃ surottama|
SP0710202: bhunakti sa jagatkṛtsnaṃ brahmadviṭkaśyapātmajaḥ|| 20||
SP0710211: sa yathā vadhyate daityastvayā sarvārisūdana|
SP0710212: tathā kuru hṛṣīkeśa varo 'yaṃ naḥ pradīyatām|| 21||
SP0710221: tato viṣṇuściraṃ dhyātvā vadhopāyaṃ pracintya ca|
SP0710222: prāha devānsuraśreṣṭho vacasāpyāyayanniva|| 22||
SP0710231: evamastu suraśreṣṭhāḥ sarvaṃ kartāsmi vo vacaḥ|
SP0710232: mahābalaḥ sa daityendro yato yuṣmānvadāmyaham|| 23||
SP0710241: āviśantu bhavanto 'pi śarīraṃ mama suvratāḥ|
SP0710242: sarvadevamayo bhūtvā dṛptaṃ haṃsyāmi vo ripum|| 24||
SP0710251: tato devāstadā sarve viviśurvaiṣṇavīṃ tanum|
SP0710252: sa cāpi balavānbhūtvā rūpaṃ kṛtvā bhayānakam|| 25||
SP0710261: nārasiṃhaṃ mahātejā nakhadaṃṣṭrāvibhīṣaṇam|
SP0710262: jagāma vilasanviṣṇurhiraṇyakaśipoḥ puram|| 26||
SP0710271: udyānaṃ sa bahistasya sarvartukusumāyutam|
SP0710272: nṛsiṃho daityasiṃhasya dṛṣṭvā tasthau suvismitaḥ|| 27||
SP0710281: campakāśokajātībhiḥ kadambabakulairapi|
SP0710282: tathā surabhipuṣpaiśca samantādupaśobhitam|| 28||
SP0710291: sarobhiḥ padmasaṃchannairhaṃsacakrāhvaśobhitaiḥ|
SP0710292: vṛkṣaiḥ kāmaphalaiścaiva vaibhrājasadṛśaṃ vanam|| 29||
SP0710301: tadbabhañja nṛsiṃhastu khelagāmī madotkaṭaḥ|
SP0710302: sarāṃsi kṣobhayāmāsa karīva samadolvaṇaḥ|| 30||
SP0710311: sa reje vanamadhyasthaḥ parisarpannitastataḥ|
SP0710312: meroracalarājasya sthitaṃ śṛṅgamivocchritam|| 31||
SP0710321: athāgatya nṛsiṃhaṃ taṃ vanapālā ruṣānvitāḥ|
SP0710322: balino vārayāmāsustāṃścaiva vyahanadbalī|| 32||
SP0710331: hataśeṣāstatastatra prapalīnāstu ye 'surāḥ|
SP0710332: te gatvā kathayāmāsurhiraṇyakaśipostadā|| 33||
SP0710341: teṣāṃ tadvacanaṃ śrutvā daityarājo mahābalaḥ|
SP0710342: prahlādaṃ cānuhlādaṃ ca namuciṃ bāṣkaliṃ balim|| 34||
SP0710351: vipracittipradhānāṃśca sarvānāhūya dānavān|
SP0710352: provāca tvaritaṃ gatvā baddhvā siṃhaṃ mamāntikam|| 35||
SP0710361: samānayata daityendrā na hantavyaḥ kathaṃcana|
SP0710362: krīḍanaṃ siṃhapoto 'sau devyā mama bhaviṣyati|| 36||
SP0710371: iti śrutvāsurāḥ sarve vipracittipurogamāḥ|
SP0710372: udyānaṃ sahitā gatvā nṛsiṃhaṃ dadṛśuḥ sthitam|| 37||
SP0710381: dūrasthāścikṣipuḥ pāśāṃstāṃśca ciccheda mādhavaḥ|
SP0710382: atha vidrāvayāmāsa dānavānkesarī bhṛśam|| 38||
SP0710391: tato hatasahāyāste daityā vimanaso yayuḥ|
SP0710392: pārśvaṃ dānavarājasya sarvaṃ cākathayaṃstadā|| 39||
SP0710401: atha kruddhaḥ svayaṃ rājā hiraṇyakaśipurbalī|
SP0710402: rathamāsthāya saṃnaddho nṛsiṃhaṃ prādravadruṣā|| 40||
SP0710411: sa rathaḥ siṃharājena sāyudhaḥ parvatopamaḥ|
SP0710412: saṃbhrāmya pātitastūrṇaṃ cūrṇamāgānmahītale|| 41||
SP0710421: tato bhagnaratho daityaḥ krodhātsaṃraktalocanaḥ|
SP0710422: vṛkṣamutpāṭya vegena nṛsiṃhāya vyasarjayat|| 42||
SP0710431: atha saḥ patito gātre siṃharājasya pādapaḥ|
SP0710432: mṛdbhāṇḍa iva pāṣāṇe kṣiptaścūrṇaṃ jagāma ha|| 43||
SP0710441: gṛhītvā sa tadā siṃho hiraṇyakaśipuṃ sakṛt|
SP0710442: talenāhatya taṃ prāṇairvyayojayata satvaram|| 44||
SP0710451: siṃhanādaṃ mahatkṛtvā nakhairvajramayairvibhuḥ|
SP0710452: uro bibheda daityasya mahāśailopamaṃ hariḥ|| 45||
SP0710461: hate tasminmahādaitye viṣṇunā śaktinandana| 
SP0710462: dānavā na hatā ye tu viviśuste rasātalam|| 46||
SP0710471: devarājyaṃ punaḥ śakro lebhe niṣkaṇṭakaṃ mahat|
SP0710472: divaukasaśca sarve te svāni rājyāni bhejire|| 47||
SP0710481: athāgatya tato devaḥ śūlapāṇirvṛṣadhvajaḥ|
SP0710482: surairvijñāpito vyāsa yatte kathitavānaham|| 48||
SP0710491: viṣṇostyājayituṃ rūpaṃ siṃhamadbhutakarmaṇaḥ|
SP0710492: śarabhaḥ sa tadā bhūtvā himavacchikharopamaḥ|| 49||
SP0710501: caturbhiḥ pṛṣṭhajaiḥ pādaistīkṣṇadaṃṣṭro mahābalaḥ|
SP0710502: narasiṃhasamīpaṃ tu gatvāgarjatsamāhitaḥ|| 50||
SP0710511: atha siṃhastadā dṛṣṭvā śarabhaṃ samupasthitam|
SP0710512: krodhena mahatāviṣṭo talenainamatāḍayat|| 51||
SP0710521: sa hatastena siṃhena śarabho naiva cukṣubhe|
SP0710522: tataḥ śarabhamāhatya vajradehaṃ mahābalam|
SP0710523: ātmanaivāgamatkṛcchraṃ sparśāttasya mahātmanaḥ|| 52||
SP0710531: tato viṣṇuściraṃ dhyātvā jñātvā śaṃkaramāgatam|
SP0710532: praṇamya śirasā tasmai stotramenaṃ pracakrame|| 53||
SP0710541: namaḥ śarvāya rudrāya senānye sarvadāya ca|
SP0710542: namaḥ paramadevāya brahmaṇe paramāya ca|| 54||
SP0710551: kālāya yamarūpāya kāladaṇḍāya vai namaḥ|
SP0710552: namaḥ kālāntakartre ca kālākālaharāya ca|| 55||
SP0710561: namaḥ pinākahastāya raudrabāṇadharāya ca|
SP0710562: caṇḍāya vāmadevāya sarvayogeśvarāya ca|| 56||
SP0710571: namo vidyādhipataye brahmaṇaḥ pataye namaḥ|
SP0710572: namo 'suravaraghnāya kālacakrāya vai namaḥ|| 57||
SP0710581: saṃvartakāgnicakrāya pralayāntakarāya ca|
SP0710582: naranārāyaṇeśāya naranārāyaṇātmane|| 58||
SP0710591: mamaiva varadātre ca sarvakāmapradāya ca|
SP0710592: śarabhāya surūpāya vyāghracarmasuvāsase|| 59||
SP0710601: nandīśvaragaṇeśāya gaṇānāṃ pataye namaḥ|
SP0710602: indriyāṇāmatheśāya manasāṃ pataye namaḥ|| 60||
SP0710611: namaḥ pradhānapataye surāṇāṃ pataye namaḥ|
SP0710612: namo 'stu bhāvapataye tattvānāṃ pataye namaḥ|| 61||
SP0710621: carācarasya pataye bhūtānāṃ pataye namaḥ|
SP0710622: trailokyapataye caiva lokānāṃ pataye namaḥ|| 62||
SP0710631: yogadāya namo mahyaṃ tathaivaiśvaryadāya ca|
SP0710632: avadhyatvapradātre ca tathaivājayyadāya ca|| 63||
SP0710641: bhagavaṃstvatpratiṣṭho 'smi tvanniṣṭhastvatparāyaṇaḥ|
SP0710642: śaraṇaṃ tvāṃ prapanno 'haṃ prasīda mama sarvadā|| 64||
SP0710651: ya imaṃ śṛṇuyānnityaṃ śuciḥ prayatamānasaḥ|
SP0710652: sa rudralokamāsādya devasya gaṇapo bhavet|| 65||
SP0710661: dhanyaṃ yaśasyamāyuṣyaṃ svargyaṃ pāpapraṇāśanam|
SP0710662: śrāvaṇaṃ śravaṇaṃ cāsya tathānusmaraṇaṃ sadā|| 66||
SP0710670: sanatkumāra uvāca|
SP0710671: sa evaṃ stūyamānastu viṣṇunā bhuvaneśvaraḥ|
SP0710672: hṛṣīkeśamuvācedaṃ vacaḥ paramapūjitam|| 67||
SP0710681: tubhyaṃ viṣṇo mayā dattaḥ puṇyo hyeṣa varaḥ śubhaḥ|
SP0710682: ayonau sajjamānasya svayonau pratipādanam|| 68||
SP0710691: sa tvaṃ viṣṇurmahātejā matto labdhavaraḥ sadā|
SP0710692: velāyāṃ tvaṃ samudrasya tiryagyonimasūta yaḥ|| 69||
SP0710701: kṛtaṃ kāryaṃ tvayā sarvaṃ hiraṇyakaśipurhataḥ|
SP0710702: ehi gaccha śubhāṃ yonimātmanaḥ paramādbhutām|| 70||
SP0710711: tatastamākramatpādaiḥ siṃhaṃ śarabhasattamaḥ|
SP0710712: ayojayacca dehena punardivyena keśavam|| 71||
SP0710721: viṣṇave 'tha varaṃ dattvā daityaghnaṃ sa vṛṣadhvajaḥ|
SP0710722: prakṛtistho bhavetyuktvā tatraivāntaradhīyata|| 72||
SP0710731: dattvā tasmai varamanupamaṃ viṣṇave lokadhātā
SP0710732: daityaghnatvaṃ surapuravadhūlocanaiḥ pīyamānaḥ|
SP0710733: nīlāmbhodadyutinibhamuraḥ prodvahañchūlapāṇi-
SP0710734: rdhāma svākyaṃ paramamunibhirvandyamāno jagāma|| 73||
SP0719999: iti skandapurāṇa ekasaptatitamo 'dhyāyaḥ||