Skandapurāṇa Adhyāya 70

E-text generated on February 11, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0700010: vyāsa uvāca|
SP0700011: sa gatvā mandaraṃ bhūyo giriputryā saha prabhuḥ|
SP0700012: yaccakāra mahādevastanme brūhi mahāmune|| 1||
SP0700020: sanatkumāra uvāca|
SP0700021: mandaraṃ girimāgatya pārvatyā sahito haraḥ|
SP0700022: reme hiraṇmaye divye sarvaratnavibhūṣite|| 2||
SP0700031: cārusopānasaṃkīrṇe citrapaṭṭaśilātale|
SP0700032: tasminpuravare śreṣṭhe manasā nirmite tadā|| 3||
SP0700041: gaṇeśvarairmahāyogairnandīśvarapurogamaiḥ|
SP0700042: siddhairmunivaraiścaiva sevyamāno jagatpatiḥ|
SP0700043: uvāsa sahito devyā nandyamānastathaiva ca|| 4||
SP0700051: tasyaivaṃ dīvyato vyāsa devadevasya dhīmataḥ|
SP0700052: sahasrākṣaḥ śaśāṅkaśca vāyuścaiva tadāgatāḥ|| 5||
SP0700061: samāgatya puradvāraṃ dṛṣṭvā te nandinaṃ sthitam|
SP0700062: ūcuḥ prāñjalayo bhūtvā śaṃkarasya didṛkṣavaḥ|
SP0700063: yathā paśyāma deveśaṃ nandiṃstatkartumarhasi|| 6||
SP0700071: atha nandī samāgamya dvāramūle samāsthitaḥ|
SP0700072: śambhornivedayāmāsa trīndevānsa samāgatān|| 7||
SP0700081: viśantviti samājñāpte devadevena nandini|
SP0700082: viviśuste trayo devāḥ śaṃkarasyāntikaṃ tadā|| 8||
SP0700091: praṇamya sahitāstasthuḥ paśyanto varadaṃ vibhum|
SP0700092: atha tānprāha lokeśaḥ śirobhiḥ praṇatānsthitān|| 9||
SP0700101: kā vaḥ kartavyatā devāḥ kimarthaṃ yūyamāgatāḥ|
SP0700102: brūta dāsyāmi tatsarvaṃ yadyanmṛgayatāmarāḥ|| 10||
SP0700111: atha devaḥ sahasrākṣo vacaḥ provāca śaṃkaram|
SP0700112: hiraṇyakaśipuṃ hantumasurendraṃ mahābalam|
SP0700113: yaccakāra vapurviṣṇurnārasiṃhaṃ bhayānakam|| 11||
SP0700121: taṃ hatvāpi sa daityendraṃ viṣṇuḥ parabalārdanaḥ|
SP0700122: tadrūpaṃ naiva saṃtyajya svaṃ veṣamakarodvibho|| 12||
SP0700131: tena rūpeṇa deveśa krūreṇa piśitepsunā|
SP0700132: na vayaṃ nirvṛtā bhūtvā trāsāttiṣṭhāma śaṃkara|| 13||
SP0700141: sa yathā siṃharūpaṃ taṃ parityajati mādhavaḥ|
SP0700142: prasādaṃ nastathā kartumarhasi tvaṃ surottama|| 14||
SP0700151: atha provāca taṃ śakraṃ devadevaḥ pinākadhṛk|
SP0700152: siṃharūpaṃ yathā śakra viṣṇustyakṣyati bhīṣaṇam|
SP0700153: kariṣyāmi tathā śakra vyetu te mānaso jvaraḥ|| 15||
SP0700161: atha vāyustadā devaṃ vyajñāpayata śaṃkaram|
SP0700162: aśarīro yathā na syāṃ tathā me kartumarhasi|| 16||
SP0700171: śrutvā pavanavijñaptiṃ devastasmai trilocanaḥ|
SP0700172: śarīraṃ sumahatprādādyenāsau mūrtimānabhūt|| 17||
SP0700181: vijñāpitaṃ śaśāṅkena tato vyāsa mahātmanā|
SP0700182: dakṣeṇāhaṃ purā śapto yakṣmadeho bhaviṣyasi|
SP0700183: sa yathā yakṣmahīnaḥ syāṃ prasādaṃ me tathā kuru|| 18||
SP0700191: vijñāptaṃ śaśinaḥ śrutvā devastasmai varaṃ prabhuḥ|
SP0700192: imaṃ prāha mahātejāḥ śaśine praṇatāya tu|
SP0700193: tapaḥ kṛtvā prabhāse tvaṃ yakṣmahīno bhaviṣyasi|| 19||
SP0700201: iti labdhvā varaṃ sarve trayo 'pi surasattamāḥ|
SP0700202: vāyuḥ somaḥ sahasrākṣaḥ svāni veśmāni bhejire|| 20||
SP0700210: vyāsa uvāca|
SP0700211: bhagavansa kathaṃ tena narasiṃhena sūditaḥ|
SP0700212: hiraṇyakaśipurdaityaḥ kiṃprabhāvaśca so 'bhavat|
SP0700213: kiṃvayāḥ kiṃ tapaścāsya śaṃsaitatpṛcchato mama|| 21||
SP0700220: sanatkumāra uvāca|
SP0700221: ditirnāmābhavatpatnī kaśyapasya prajāpateḥ|
SP0700222: dakṣasya duhitā vyāsa sā jajñe tanayadvayam|
SP0700223: hiraṇyakaśipuṃ jyeṣṭhaṃ hiraṇyākṣaṃ kanīyasam|| 22||
SP0700231: abhiṣiktaḥ sa daityānāṃ rājābhūdbrahmaṇā purā|
SP0700232: dānavānāmathendratve vipracittirmahābalaḥ|
SP0700233: sahasrākṣaśca devānāmetadindratrayaṃ babhau|| 23||
SP0700241: atha teṣāṃ tadā vyāsa trailokyaṃ saṃpraśāsatām|
SP0700242: hiraṇyakaśipurdaityaḥ śakrarājyajihīrṣayā|
SP0700243: trailokyamātmasātkartuṃ matiṃ tapasi saṃdadhe|| 24||
SP0700251: sa gatvā dakṣiṇāmāśāṃ śrīparvatasamāsthitaḥ|
SP0700252: tapastīvraṃ mahattepe daityarājo mahābalaḥ|| 25||
SP0700261: svaraktena juhāvāgnau saṃmiśrāḥ samidhaścaran|
SP0700262: ūrdhvabāhurnirālambo divā sūryārpitekṣaṇaḥ|
SP0700263: ekapādo 'nimeṣaśca so 'tiṣṭhatkṛtaniścayaḥ|| 26||
SP0700271: dve sahasre tadābdānāṃ divyānāṃ sthitavānbalī|
SP0700272: mahatā tapasā tasya trailokyaṃ saṃpracukṣubhe|| 27||
SP0700281: athābhyetya suraśreṣṭho brahmā kamalavāhanaḥ|
SP0700282: iṣṭaṃ vṛṇu varaṃ rājanniti provāca sādaram|| 28||
SP0700291: taṃ dṛṣṭvā daityarājastu brahmāṇaṃ varadaṃ prabhum|
SP0700292: varaṃ prārthitavānvyāsa śṛṇu yādṛśamīpsitam|| 29||
SP0700301: bhagavanyadi tuṣṭo 'si vara eṣo 'stu me vibho|
SP0700302: amaraḥ syāmavadhyaśca jarāhīno mahābalaḥ|| 30||
SP0700311: na śastreṇa na mantreṇa na rātrau na divā tathā|
SP0700312: naivārdreṇa na śuṣkeṇa na puṃsā na ca yoṣitā|| 31||
SP0700321: abravītsāntaraṃ brahmā sa cainaṃ samabhāṣata|
SP0700322: ataśca yo 'nyathā mṛtyurbhaviṣyati sa me prabho|| 32||
SP0700331: evamastviti taṃ procya brahmā suravarottamaḥ|
SP0700332: jagāmātmapuraṃ kṣipraṃ śāntaḥ prītaḥ pitāmahaḥ|| 33||
SP0700341: so 'pi sarvāsuraśreṣṭho hiraṇyakaśipustadā|
SP0700342: jitvā śakraṃ svayaṃ rājyaṃ cakāra ditinandanaḥ|| 34||
SP0700351: trailokyamātmasātkṛtvā jitvā sarvāndivaukasaḥ|
SP0700352: ātmanaivābhavacchakraḥ svayaṃ vāyuḥ svayaṃ yamaḥ|
SP0700353: dhaneśo varuṇo vahniḥ sarva evābhavatsvayam|| 35||
SP0700361: praṇamadhvaṃ yajadhvaṃ māṃ brahmāhaṃ sapurandaraḥ|
SP0700362: iti prāha ṛṣīnsarvānsiddhānviprāṃśca so 'suraḥ|| 36||
SP0700370: vyāsa uvāca|
SP0700371: śrīparvata iti prokto yastvayā munisattama|
SP0700372: kathaṃ śrīparvataḥ so vai kiṃ puṇyaṃ tatra kiṃ phalam|| 37||
SP0700380: sanatkumāra uvāca|
SP0700381: ahaṃ te kathayiṣyāmi yanmāṃ pṛcchasi suvrata|
SP0700382: hiraṇyakaśipurdaityo yatra tepe mahattapaḥ|| 38||
SP0700391: girau tasminmahāpuṇye devadevo vṛṣadhvajaḥ|
SP0700392: umayā sahito devyā reme nityaṃ mahādyutiḥ|| 39||
SP0700401: tiṣṭhatastatra devasya devī girivarātmajā|
SP0700402: tapaḥsiddhānmahāyogāñjvalanādityavarcasaḥ|| 40||
SP0700411: kṛtvā pradakṣiṇaṃ śambhoḥ sapraṇāmaṃ mahāmune|
SP0700412: gacchatastānmuhurdṛṣṭvā papraccha bhuvaneśvaram|| 41||
SP0700421: ka ete deva saṃsiddhā yogīśāstvāṃ praṇemire|
SP0700422: tato devaḥ prahasyaināmuvāca parameśvaraḥ|| 42||
SP0700431: yogasiddhā mahātmāno yoge pāśupate sthitāḥ|
SP0700432: ya ihārādhya māṃ devi jahuḥ prāṇānnarottamāḥ|| 43||
SP0700441: ta ete siddhadehārthāḥ svacchandagaticāriṇaḥ|
SP0700442: mokṣasiddhiṃ parāṃ niṣṭhāṃ gantāraḥ paramaṃ padam|| 44||
SP0700451: atha saṃcintya suciraṃ vismayāyatalocanā|
SP0700452: devaṃ provāca śarvāṇī vacaḥ paramapūjitam|| 45||
SP0700461: yathāhamapi deveśa prāpnuyāṃ siddhimīdṛśīm|
SP0700462: kariṣyāmi tathā yatnameṣā cāsmi gatā vibho|| 46||
SP0700471: tataḥ kṛtvā śriyo rūpaṃ devī paramaśobhanam|
SP0700472: mahattatra tapastepe sahasraṃ parivatsarān|| 47||
SP0700481: devaścāsyā varaṃ prādāttaiḥ samānaṃ mahādyutiḥ|
SP0700482: kṛtsnasyādhyātmatantrasya mayā proktasya bhāmini|
SP0700483: mahāyogeśvarī siddhā parārthajñā bhaviṣyasi|| 48||
SP0700491: ayaṃ ca parvataḥ śrīmānnāmnā tava bhaviṣyati|
SP0700492: śrīparvata iti khyātaścitradrumavibhūṣitaḥ|
SP0700493: samantādyojanaśataṃ mahāpuṇyo bhaviṣyati|| 49||
SP0700501: ihāgamya ca yo devi tvāṃ māṃ ca girinandane|
SP0700502: śuciḥ snātvārcayenmartyaḥ sa lokaṃ mama yāsyati|| 50||
SP0700511: yaśceha tyakṣyate prāṇāñchrīgirāvacalottame|
SP0700512: trinetraḥ kāmago bhūtvā gāṇāpatyamavāpnuyāt|| 51||
SP0700521: ihāgatya ca ye śailaṃ kariṣyanti pradakṣiṇam|
SP0700522: śarvāyatanasaṃyuktaṃ bhaviṣyanti hi te gaṇāḥ|| 52||
SP0700531: atiśayaramaṇīye siddhasaṃghairupete
SP0700532: surabhikusumacitre śrīgirau ye pumāṃsaḥ|
SP0700533: vyapagatamaladoṣā māṃ prapaśyanti śuddhā
SP0700534: viyati vihagayuktaiste vimānaiḥ prayānti|| 53||
SP0709999: iti skandapurāṇe saptatitamo 'dhyāyaḥ||