Skandapurāṇa Adhyāya 63

E-text generated on February 22, 2017 from the original TeX files of: Yokochi, Yuko, ed. The Skandapurāṇa. Vol.III. Adhyāyas 34.1-61, 53-69. The Vindhyavāsinī Cycle. Critical Edition with an Introduction & Annotated English Synopsis. Leiden/Groningen: Brill & Egbert Forsten, 2013.

SP0630010: sanatkumāra uvāca|
SP0630011: atha nirjitya samare devāndevadviṣastadā|
SP0630012: ājagmuḥ sahitā vindhyaṃ śikharālīnatoyadam|| 1||
SP0630021: prasthāpya vidhivatsarvāṃstau tadā daityadānavān|
SP0630022: remāte sahitau vindhye kiṃnarodgītakandare|| 2||
SP0630031: ārakṣikastayostatra mūko nāma mahāsuraḥ|
SP0630032: apaśyacchikhare devīṃ jvalantīmiva tejasā|| 3||
SP0630041: puṇyalakṣaṇasaṃpūrṇāṃ divyābharaṇabhūṣitām|
SP0630042: āgatāṃ tatra tāṃ siddhiṃ puṇyānāṃ karmaṇāmiva|| 4||
SP0630051: atha mūkastadā devīṃ vismayotphullalocanaḥ|
SP0630052: dṛṣṭvā jagāma manasā sumbhaṃ dānavasattamam|| 5||
SP0630061: yatheyaṃ cārusarvāṅgī pradhānā sarvayoṣitām|
SP0630062: tathā puṃsāṃ pradhāno 'sau sumbho daityendracandramāḥ|| 6||
SP0630071: vistīrṇavakṣasastasya viśālajaghanasthalā|
SP0630072: anurūpā bhavetpatnī dīrghākṣasyāsitekṣaṇā|| 7||
SP0630081: iti saṃcintya manasā tāmuvāca sumadhyamām|
SP0630082: kā tvaṃ trastasamudbhrāntamṛgaśāvavilocane|| 8||
SP0630091: kaḥ pitā te 'navadyāṅgi kā vā mātā tavānaghe|
SP0630092: kimarthaṃ vā vasasyatra girau dānavasevite|| 9||
SP0630101: evamuktātha mūkena mahāyogā sureśvarī|
SP0630102: vijñāya manasā kālaṃ prāptaṃ sumbhanisumbhayoḥ|| 10||
SP0630111: smitapūrvamidaṃ prāha vākyaṃ vākyaviśāradā|
SP0630112: mānuṣīṃ māṃ vijānīhi girāvasminkṛtālayām|| 11||
SP0630121: ātreyaḥ svargato vidvānpitā cakracaro mama|
SP0630122: vihāya māṃ purā bālāṃ mātāpyanugatā patim|| 12||
SP0630131: ājñāptāsmi tadā mātrā pradāyāstrāṇi dānava|
SP0630132: vasa vindhye girau ramye yogyāṃ ca kuru sarvadā|| 13||
SP0630141: sāhaṃ vacanamāryāyāḥ pālayantī nagottame|
SP0630142: vasāmi siṃhaśārdūlamātaṅgamṛgasevite|| 14||
SP0630151: iti devyā vacaḥ śrutvā mūkaḥ saṃhṛṣṭamānasaḥ|
SP0630152: jagāma dānavaśreṣṭhaṃ sumbhaṃ draṣṭuṃ kṛtatvaraḥ|| 15||
SP0630161: atha sumbhaṃ samāsādya harṣeṇotphullalocanaḥ|
SP0630162: ācacakṣa ivākārairapūrvaṃ ratnadarśanam|| 16||
SP0630171: taṃ dṛṣṭvā vismayotphullaraktāyatavilocanam|
SP0630172: mūkamāha tadā sumbhaḥ kasmāttuṣṭo 'si dānava|| 17||
SP0630181: evamuktaḥ sa sumbhena mūko vacanamabravīt|
SP0630182: apūrvamadya dṛṣṭaṃ me strīratnaṃ śikhare gireḥ|| 18||
SP0630191: na tādṛśā manuṣyeṣu na deveṣvasti sundarī|
SP0630192: na rakṣaḥsu na yakṣeṣu na gandharvapureṣu vā|| 19||
SP0630201: na nāgeṣu na siddheṣu na daityapativeśmasu|
SP0630202: dṛṣṭapūrvā mayā rājanyādṛśā sā varāṅganā|| 20||
SP0630211: kā tvaṃ kasya kimarthaṃ vā vasasīha girāviti|
SP0630212: pṛṣṭābravīnmayā vākyamātreyaduhitā hyaham|| 21||
SP0630221: vasāmi cātra vindhyasya śikhare māturājñayā|
SP0630222: iti bhartuḥ samākhyāya vireme mūkadānavaḥ|| 22||
SP0630231: atha sumbhasya hṛdaye mūkasya vacasā saha|
SP0630232: kāmo 'vakāśamakarodvināśāya suradviṣām|| 23||
SP0630241: tataḥ provāca daityendraḥ kāmākulitamānasaḥ|
SP0630242: gaccha mūka madarthe tāṃ pralobhaya sumadhyamām|| 24||
SP0630251: evamuktaḥ sa sumbhena drutamutthāya dānavaḥ|
SP0630252: prayayau yatra sā devī prāganenābhilakṣitā|| 25||
SP0630261: taṃ dṛṣṭvā dānavaṃ devī kṛtāñjalimupasthitam|
SP0630262: kimarthamāgato 'sīti mūkaṃ pṛṣṭavatī tadā|| 26||
SP0630271: evaṃ pṛṣṭo 'tha kauśikyā prāhetthaṃ mūkadānavaḥ|
SP0630272: ārye dūto 'smi sumbhasya tvatsamīpamupāgataḥ|| 27||
SP0630281: atha devī smitaṃ kṛtvā prasannamabhivīkṣya tam|
SP0630282: itthamāhāgataṃ dūtaṃ kimāhāsau 'sureśvaraḥ|| 28||
SP0630291: iti pṛṣṭastadā devyā prāha mūkaḥ kṛtāñjaliḥ|
SP0630292: ārye daityeśvaraḥ sumbhaḥ patnītvena vṛṇoti te|| 29||
SP0630301: tasya dānavasiṃhasya jetuḥ śakrasya saṃyuge|
SP0630302: bhavāgryā sarvapatnīnāṃ patnī mṛgavilocane|| 30||
SP0630311: evamuktā tadā tena vihasyāhāmareśvarī|
SP0630312: svabāhūnavalokyetthaṃ yuddhaśulkāmavaihi mām|| 31||
SP0630321: māṃ vinirjitya daityo 'sau patnīṃ vai kartumarhati|
SP0630322: mayā vā nihato yātu kākagomāyubhojyatām|| 32||
SP0630331: evamuktavatīṃ devīmāha mūko hasanniva|
SP0630332: patyā dānavadaityānāṃ kiṃ te yuddhena bhāmini|| 33||
SP0630341: kruddhasya tasya samare na śaśāka nirīkṣitum|
SP0630342: mukhamairāvataskandhagato 'pi valavṛtrahā|| 34||
SP0630351: śrutvā tadvacanaṃ tasya prāha devī smayanniva|
SP0630352: tṛṇāni mama daityendrāḥ sarve 'pi raṇamūrdhani|| 35||
SP0630361: nivedayasva sumbhasya gaccha tvaṃ dānavādhama|
SP0630362: dautyenāsi yataḥ prāpto mayāto na vihanyase|| 36||
SP0630371: atha praṇamya tāṃ mūko yayau pārśvaṃ suradviṣaḥ|
SP0630372: anujñātaśca tenāsāvākhyātumupacakrame|| 37||
SP0630381: sā mayā prārthitā kanyā tvadarthe dānavottama|
SP0630382: uvāca yuddhaśulkāsmi jitvā māṃ netumarhati|| 38||
SP0630391: bhūyaścoktavatī rājangarvamālambya sāṅganā|
SP0630392: tṛṇāni mama saṃgrāme daityā iti savismayā|| 39||
SP0630401: tattadā vacanaṃ tasyā mūkenoktaṃ niśāmya saḥ|
SP0630402: krodhāddarpācca kāmācca mamṛṣe nāsurottamaḥ|| 40||
SP0630411: athotthāya sabhāṃ ramyāmagacchaddānavādhipaḥ|
SP0630412: sphāṭikastambhaniryūhāṃ vicitramaṇitoraṇām|| 41||
SP0630421: tasyāṃ siṃhāsane haime svāstīrṇe mahati sthire|
SP0630422: niṣasāda mahābāhuḥ sukhāyāṃ varuṇo yathā|| 42||
SP0630431: anu tasya nisumbho 'pi niṣasāda varāsane|
SP0630432: ratnāṅgadāṃśunivahacchuritoraḥsthalastadā|| 43||
SP0630441: tayoranu mahāsattvā viviśurdaityadānavāḥ|
SP0630442: darīṃ himavato ramyāṃ kariśyāmā ivāmbudāḥ|| 44||
SP0630451: atha teṣūpaviṣṭeṣu daityadānavarājasu|
SP0630452: provāca vacanaṃ sumbho ghanastanitanisvanaḥ|| 45||
SP0630461: ārakṣiko girau vindhye madīyo mūkadānavaḥ|
SP0630462: vindhyasya śikhare kanyāṃ dṛṣṭavāṃścārurūpiṇīm|| 46||
SP0630471: yuddhaśulkāhamityāha madarthe 'nena sā vṛtā|
SP0630472: tṛṇāni mama daityendrā bhūyaścoktavatī kila|| 47||
SP0630481: jitvā tāṃ prasabhaṃ kanyāṃ samare garvaśālinīm|
SP0630482: viceṣṭamānāmavaśāmadyaivānetumutsahe|| 48||
SP0630491: atha tasya vacaḥ śrutvā śambhurnāma mahāsuraḥ|
SP0630492: prahasyoccairmahābāhuritthamāhāsureśvaram|| 49||
SP0630501: vāmaprakṛtayaḥ sarvāḥ svabhāvena varāṅganāḥ|
SP0630502: parisāntvyāsakṛdrājaṃstvaṃ tāmādātumarhasi|| 50||
SP0630511: śrutvātha vacanaṃ śambhormayo dānavasattamaḥ|
SP0630512: provācābhinavotphullanīlanīrajalocanaḥ|| 51||
SP0630521: ākāraḥ kaḥ punastasyāḥ kā vā ceṣṭāsurādhipa|
SP0630522: pārśvasthāni ca kānyasyāḥ sadopakaraṇāni vā|| 52||
SP0630531: ityuktavati daityendre maye mattebhavikrame|
SP0630532: atha daityapatirmūkaṃ pārśvasthaṃ samacodayat|| 53||
SP0630541: yaṃ praśnaṃ pṛṣṭavāṃstatra mayo matimatāṃ varaḥ|
SP0630542: mūkastu taṃ tadā sarvamākhyātumupacakrame|| 54||
SP0630551: asau susaṃsthitā tryakṣā karāladaśanānanā|
SP0630552: aṣṭabāhurghanaśyāmā sunasā valgunisvanā|| 55||
SP0630561: pārśvasthāni sadā tasyāḥ sarvapraharaṇāni ca|
SP0630562: tanutrāṇi ca mukhyāni citrāṇyābharaṇāni ca|| 56||
SP0630571: atyādityaṃ vapustasyāḥ kāntiścātiniśākarā|
SP0630572: ityākhyāya tadā mūko vireme daityasaṃsadi|| 57||
SP0630581: atha dīrghaṃ viniḥśvasya tadā mayamahāsuraḥ|
SP0630582: provāca sadasi svantaṃ vaco vacanakovidaḥ|| 58||
SP0630591: nūnamutpāditā devaiḥ kṛtyā yudhi parājitaiḥ|
SP0630592: vindhyaṃ mahīdhramāyātā vināśāya suradviṣām|| 59||
SP0630601: tadalaṃ te tayā rājansanti kanyāḥ sumadhyamāḥ|
SP0630602: dīrghākṣyaścārusarvāṅgyo daityadānavaveśmasu|| 60||
SP0630611: samyagāhṛtya tā rājannanurūpāḥ kalasvanāḥ|
SP0630612: yatheṣṭaṃ krīḍa satataṃ prāsādodarasaṃsthitaḥ|| 61||
SP0630621: evamukte tadā vākye mayenāsurasaṃsadi|
SP0630622: prāha vākyaṃ tadā sumbho vihasyetthaṃ mahāsuraḥ|| 62||
SP0630631: yadi sā devataiḥ sṛṣṭā kṛtyā dānavaśāsane|
SP0630632: ahatvā dānavānāśu tadā sā na viraṃsyate|| 63||
SP0630641: yāvadeva na kṛtyāsmānabhiyuṅkte kṛtodyamā|
SP0630642: tāvadeva prasahyāśu tāṃ vaśe kartumarhatha|| 64||
SP0630651: tato 'numenire sarve daityadānavasattamāḥ|
SP0630652: vacanaṃ daityarājasya kālenābhipracoditāḥ|| 65||
SP0630661: atha sadasi samastāndaityasiṃhāṃstadānīṃ 
SP0630662: tridaśapativijetā vākyametadvivṛtya|
SP0630663: udapatadavalambasvacchaśubhroruhāro
SP0630664: navajalabharanamraḥ prāvṛṣīvāmbuvāhaḥ|| 66||
SP0639999: iti skandapurāṇe triṣaṣṭo 'dhyāyaḥ||