Skandapurāṇa Adhyāya 54

E-text generated on February 22, 2017 from the original TeX files of: Yokochi, Yuko, ed. The Skandapurāṇa. Vol.III. Adhyāyas 34.1-61, 53-69. The Vindhyavāsinī Cycle. Critical Edition with an Introduction & Annotated English Synopsis. Leiden/Groningen: Brill & Egbert Forsten, 2013.

SP0540010: sanatkumāra uvāca|
SP0540011: tatastena vimānena sarvasṛksa caturmukhaḥ|
SP0540012: jagāma mandaraṃ dhīmānvicitropalakandaram|| 1||
SP0540021: sa tamāsādya vistīrṇamanaupamyamatiprabham|
SP0540022: dūrāddṛṣṭisukhaṃ dṛṣṭvā sabhāsthānidamabravīt|| 2||
SP0540031: idaṃ rudragṛhaṃ śubhramadṛśyaṃ sukṛtāmapi|
SP0540032: devānāmapi paśyadhvaṃ bhāskarākāravarcasam|| 3||
SP0540041: idaṃ praviśya devānāṃ yajñaśrīrnāpasarpati|
SP0540042: jayaśca nityaṃ yuddheṣu dharmaśca sumahānapi|| 4||
SP0540051: etatsṛṣṭaṃ svayaṃ tena manasānupamadyuti|
SP0540052: na hyasya sadṛśaṃ kiṃcidaṇḍe 'sminvidyate gṛham|| 5||
SP0540061: idaṃ praviśya dharmātmā duḥkhaṃ bhūyo na vindate|
SP0540062: na cāpi janma prāpnoti nityamaiśvaryago hi saḥ|| 6||
SP0540071: anirdeśyamidaṃ yogādyogināmapi nityaśaḥ|
SP0540072: anyastu kuta evedaṃ varṇayīta mahānapi|| 7||
SP0540081: etadasmadvimānasya vāyunābhyāhataṃ ruṣā|
SP0540082: vardhate giriṇā sārdhaṃ vindhyasya śikharaṃ yathā|| 8||
SP0540091: etadasmadvimānasya mārgamāvṛtya viṣṭhitam|
SP0540092: ūrdhvaṃ tiryagadhastācca devadevasya tejasā|| 9||
SP0540101: etadandhaṃ tamaḥ kṛtvā megho 'sau jīvanaḥ svayam|
SP0540102: vajrodyatakaraḥ sragmī pratyudyātyabhinādayan|| 10||
SP0540110: sanatkumāra uvāca|
SP0540111: tataḥ sa bhagavāndevo brahmā lokapitāmahaḥ|
SP0540112: viṣṭabhya taṃ vimānāgryamavatasthe kṛtāñjaliḥ|| 11||
SP0540121: tuṣṭāva ca tadā devaṃ śarvamugraṃ kapardinam|
SP0540122: te caiva ṛṣayaḥ sarve vimānasthāḥ susaṃyatāḥ|| 12||
SP0540131: tataḥ sa meghaḥ svaṃ sthānamagamadvṛṣṭisarjanaḥ|
SP0540132: diśaśca vimalāḥ sarvāḥ prakāśaścābhavadbhṛśam|| 13||
SP0540141: taṃ japantaṃ viditvā ca bhagavāngovṛṣadhvajaḥ|
SP0540142: nandinaṃ dvāradeśasthamidamāha sureśvaraḥ|| 14||
SP0540151: eṣa brahmā vimānena māmiha draṣṭumāgataḥ|
SP0540152: brūhi yenāgato 'sīha kāryeṇa vidito 'si me|
SP0540153: kuru tadgaccha śīghraṃ tvaṃ kālastasyāyamāgataḥ|| 15||
SP0540160: sanatkumāra uvāca|
SP0540161: sa evamukto rudreṇa nandī pramathanāyakaḥ|
SP0540162: dvāḥstha-m-eva vimānasthaṃ brahmāṇamidamabravīt|| 16||
SP0540170: nandyuvāca|
SP0540171: yūyaṃ jñātā bhagavatā yena kāryeṇa cāgatāḥ|
SP0540172: kurudhvaṃ kila tacchīghraṃ kālo 'yaṃ tasya vartate|| 17||
SP0540181: tataḥ sa kṛtvā manasā namaskāraṃ hi śambhave|
SP0540182: pradakṣiṇamupāvṛtya mandaraṃ prajagāma ha|| 18||
SP0540191: sa mandaragiriṃ sarvaṃ parihṛtya mahāmanāḥ|
SP0540192: śākadvīpasya madhyena jambūdvīpamathāgamat|| 19||
SP0540201: sa dṛśyamāno devaiśca munibhiśca yatavrataiḥ|
SP0540202: himavantaṃ giriśreṣṭhamupāgamyedamabravīt|| 20||
SP0540211: etaddhimavataḥ śṛṅgamucchritaṃ kāntimatsthitam|
SP0540212: yugāntādityasaṃkāśaṃ dūrātsamabhilakṣyate|| 21||
SP0540221: atra sā jagato dhātrī dhātrī putramivaurasam|
SP0540222: pālayantī jagatsarvaṃ tapastapyati śailajā|| 22||
SP0540231: aho nu śikharaṃ puṇyaṃ bhāgyavaccāpi sarvathā|
SP0540232: yadenaṃ giriputryarthe varairyokṣyati kāmahā|| 23||
SP0540241: paśyadhvaṃ tapaso vīryaṃ devyāḥ sucaritasya vai|
SP0540242: yadetacchikharaṃ dṛṣṭvā na paśyāma punaryamam|| 24||
SP0540251: sa evaṃ kathayanneva vimānena caturmukhaḥ|
SP0540252: ṛṣibhiḥ sahitaḥ sarvaiḥ śikharadvāramāgataḥ|| 25||
SP0540261: tatrainaṃ rudrasacivā āyudhodyatapāṇayaḥ|
SP0540262: bhartsayanto 'bhyavartanta tiṣṭha tiṣṭhetivādinaḥ|| 26||
SP0540271: tānbrahmā ślakṣṇayā vācā sāntvapūrvamuvāca ha|
SP0540272: praśaṃsamānastānsarvānprāñjaliryuktamānasaḥ|| 27||
SP0540280: brahmovāca|
SP0540281: yūyaṃ sarve mahātmāna aiśvaryeṇa samanvitāḥ|
SP0540282: akṣayā hyamarāścaiva tathāpratihatāśca ha|| 28||
SP0540291: mahāyogabalopetā ajayyā yudhi kenacit|
SP0540292: ko yuṣmānabhivarteta śakro 'pi pravareśvarāḥ|| 29||
SP0540301: devadevājñayā so 'hamāyāto mandarādiha|
SP0540302: devyā varapradānārthamanujñā kriyatāṃ mama|| 30||
SP0540310: gaṇeśvarā ūcuḥ|
SP0540311: devyā dātā svayaṃ devo varāniṣṭānmahāmanāḥ|
SP0540312: tāneva devī tvanyasmānmanasāpi na cintayet|| 31||
SP0540321: śakto devo 'nugrahītuṃ jagatsarvaṃ maheśvaraḥ|
SP0540322: tvāmapyasau 'nugṛhṇāti kimu devīṃ jagatpatiḥ|| 32||
SP0540330: brahmovāca|
SP0540331: aśakto na mahādevo varaṃ dātuṃ mahāmanāḥ|
SP0540332: ya evaṃ cintayeddevaṃ na bhavetsa kathaṃcana|| 33||
SP0540341: na devī bhagavatpārśvādicchate kila pārvatī|
SP0540342: varāniṣṭāṃstato devo māmiha preṣayacchivaḥ|| 34||
SP0540351: atha taṃ yuktamanaso yuktaṃ pratyakṣamīśvarāḥ|
SP0540352: maheśvaramapaśyanta kṛtānujñaṃ ca lokapam|| 35||
SP0540361: niyuktāśca punaḥ sarve brahmāṇaṃ lokakāraṇam|
SP0540362: ūcurgaṇeśvarāḥ sarve viditārthā mahāmune|| 36||
SP0540371: preṣito devadevena jñāto 'smābhiḥ pitāmaha|
SP0540372: tvaṃ viśasvādhunā deva pārvatyā varaditsayā|| 37||
SP0540381: avatīrya vimānāttu tataḥ śīghraṃ pitāmahaḥ|
SP0540382: nililye śikhare tasminnānādhātuvicitrite|| 38||
SP0540391: atha sopaladhātunirjharo girirājo 'timahāśiloccayaḥ|
SP0540392: vinisṛṣṭadivākarāmalaḥ sa girirdivya ivodayācalaḥ|| 39||
SP0549999: iti skandapurāṇe catuṣpañcāśo 'dhyāyaḥ||