Skandapurāṇa Adhyāya 51

E-text generated on February 22, 2017 from the original TeX files of: Bakker, Hans T., Peter C. Bisschop and Yuko Yokochi, eds. The Skandapurāṇa. Vol. IIB. Adhyāyas 31-52. The Vāhana and Naraka Cycles. Critical Edition with an Introduction & Annotated English Synopsis, in cooperation with Nina Mirnig and Judit Törzsök. Leiden/Boston: Brill, 2014.

SP0510010: sanatkumāra uvāca|
SP0510011: sukeśastu tato vyāsa pituḥ śrutvā sudīnavān|
SP0510012: dīnavaccintayāmāsa jantūnāṃ tāṃ gatiṃ tadā|| 1||
SP0510021: cintayābhiparītātmā duḥkhena ca samāhataḥ|
SP0510022: jantūnāṃ mokṣaṇopāyaṃ mūḍhacetā na jajñivān|| 2||
SP0510031: cintāpannaḥ sa tu yadā pitṝṃstānnābhyabhāṣata|
SP0510032: tadā te pitaraḥ sarve sukeśamidamūcire|| 3||
SP0510040: pitara ūcuḥ|
SP0510041: atīva kiṃ cintayasi kutaścintā tavānagha|
SP0510042: īśvarasya sataḥ putra nedaṃ tava vidhīyate|| 4||
SP0510050: sukeśa uvāca|
SP0510051: jantūnāṃ karmajaṃ kleśaṃ śrutvā yuṣmābhirīritam|
SP0510052: cintayāmi kathaṃ teṣāṃ mokṣopāyo bhavediti|| 5||
SP0510060: pitara ūcuḥ|
SP0510061: anādṛtya kṣayaṃ putra mokṣasteṣāṃ na vidyate|
SP0510062: karmaṇaḥ svakṛtasyeha sa ca bhogātkṣayo mataḥ|| 6||
SP0510071: bhogaśca narake 'vaśyaṃ jantūnāṃ sa vidhīyate|
SP0510072: na ca te narakāḥ śakyā hartuṃ karmakṣayaṃ vinā|| 7||
SP0510081: aśakyāḥ khalu ye hyarthā na tānprājñaḥ samārabhet|
SP0510082: arṇavasya prataraṇaṃ yathā tanmṛtyumarchati|| 8||
SP0510090: sanatkumāra uvāca|
SP0510091: evamuktaḥ sa tejasvī pitṝṃstānhṛcchayāvṛtaḥ|
SP0510092: uvāca praṇato bhūtvā māvamaṃsthāḥ sutaṃ hi mām|| 9||
SP0510101: kā śaktirmama tāñjantūnbalāttārayituṃ sutāḥ|
SP0510102: mahādevaprasādāttāṃstārayiṣyāmi durgatim|| 10||
SP0510111: yūyaṃ yathaiva tīrṇāḥ stha narakasthā vicetasaḥ|
SP0510112: tathā te jantavaḥ sarve tariṣyanti na saṃśayaḥ|| 11||
SP0510120: sanatkumāra uvāca|
SP0510121: tatastānsa tadāmantrya mahātmā gaṇanāyakaḥ|
SP0510122: saṃpraviśya samudrāmbho antarjalagatastadā|
SP0510123: jajāpa rudrāñchuddhātmā niścalaḥ susamāhitaḥ|| 12||
SP0510131: japatastasya yogena yuktasya ca mahātmanaḥ|
SP0510132: trailokyamakhilaṃ sarvaṃ tapasābhūtpratāpitam|| 13||
SP0510141: tato devāstadā sarve pitāmahamathābruvan|
SP0510142: kimidaṃ bhagavansarve tapyāma vivaśā vayam|| 14||
SP0510151: kasyedaṃ tapaso vīryaṃ kasya yogo 'yamīdṛśaḥ|
SP0510152: ka eṣa suraśārdūla tapastapyati dāruṇam|| 15||
SP0510161: yāvadevaṃ na dahati yāvaccaiva na kupyate|
SP0510162: tāvatsarvānabhiprāyāṃstasya saṃpādaya prabho|| 16||
SP0510171: sa evamukto devaistairbhagavāndevasattamaḥ|
SP0510172: uvāca mā bhayaṃ vo 'stu nāyaṃ kaścidasaṃmataḥ|| 17||
SP0510181: eṣa rudrasya devasya mahātmā gaṇanāyakaḥ|
SP0510182: samudrāntarjalāsīno rudrāñjapati yogavān|| 18||
SP0510191: na cāsya duṣṭābhiprāyo lokānprati mahābalāḥ|
SP0510192: nārakāneṣa narakāduddhartumabhimanyate|| 19||
SP0510201: te yūyaṃ yadi manyadhvaṃ gatvā rudraṃ praṇamya ca|
SP0510202: arthayāmo 'sya devasya kriyatāmīpsito varaḥ|| 20||
SP0510211: evamastviti te sarve brahmaṇā saha saṃgatāḥ|
SP0510212: gatā mandaramavyagrā nandinā saṃpraveśitāḥ|
SP0510213: te dṛṣṭvā devamīśānaṃ stutvedamabruvanvibhum|| 21||
SP0510221: sukeśo bhagavaṃstubhyaṃ vallabho gaṇanāyakaḥ|
SP0510222: kāruṇyaṃ prāṇināṃ kṛtvā tapastapyati duścaram|
SP0510223: tasya kāmaṃ sakāmaṃ tvaṃ kuruṣva bhuvaneśvara|| 22||
SP0510231: teṣāṃ vijñaptimākarṇya devadevastadā bhavaḥ|
SP0510232: brahmādyaiḥ sahito 'bhyāgātsukeśasya tadāntikam|| 23||
SP0510241: samudrastatra ye cānye munayaḥ saṃśitavratāḥ|
SP0510242: arghyamādāya śataśo nemuḥ śaṃkaramāgatam|| 24||
SP0510251: tamasau gaṇapaśreṣṭhaṃ devadeva idaṃ vacaḥ|
SP0510252: provāca madhuraṃ vyāsa manaḥśrotrasukhāvaham|| 25||
SP0510261: vatsottiṣṭha sukeśa tvaṃ prārthayasva yathepsitam|
SP0510262: sarvaṃ tatsaṃpradāsyāmi tvaṃ hi nandisamo mama|| 26||
SP0510271: tataḥ sukeśa utthāya stutvā taṃ vṛṣabhadhvajam|
SP0510272: praṇipatya punarvavre kāmaṃ pūrvasamīhitam|| 27||
SP0510281: narakeṣu narā deva yātyante pāpakarmiṇaḥ|
SP0510282: teṣāmupari ceto me duḥkhenārditamīśvara|| 28||
SP0510291: te yathā pratimucyante sarva eva jagatpate|
SP0510292: tathā kuru mamādyaiva vara eṣo mayārthitaḥ|| 29||
SP0510301: ye cādhunā narā deva yātyante narakeṣu vai|
SP0510302: teṣāṃ tu pratimokṣārthaṃ yācayeyaṃ sureśvara|| 30||
SP0510311: tatastadarthitaṃ devaḥ prayacchannidamabravīt|
SP0510312: evaṃ bhavatu te vatsa muktā nārakiṇo narāḥ|| 31||
SP0510321: anayāpi ca bhaktyā tvaṃ kāruṇyena ca vallabhaḥ|
SP0510322: sutarāṃ bhava nirvyagraḥ paramaiśvaryasaṃyutaḥ|| 32||
SP0510331: tataste nārakāḥ sarve vimānāni samāśritāḥ|
SP0510332: devadevaṃ tato 'bhyetya sukeśaṃ ca praṇemire|| 33||
SP0510341: tamuvāca punardevaḥ sukeśaṃ gaṇanāyakam|
SP0510342: yo hi tārayate jantūnāpadaṃ kiṃcideva hi|
SP0510343: tasya dharmo 'mito bhūtvā saṃsāraṃ na prayacchati|| 34||
SP0510351: manasāpi hi yaḥ prāṇī kleśājjantūnsadecchati|
SP0510352: vimoktuṃ so 'pi dharmātmā sarvaduḥkhaiḥ pramucyate|| 35||
SP0510361: yaścopārjya svayaṃ dharmaṃ jantubhyaḥ saṃprayacchati|
SP0510362: sukhārthaṃ so 'pi sarvebhyo duḥkhebhyaḥ saṃpramucyate|| 36||
SP0510371: sa tvaṃ pareṇa yogena aiśvaryeṇa ca saṃyutaḥ|
SP0510372: jantūnāṃ tāraṇe yuktastvayānyaḥ kaḥ samo bhuvi|| 37||
SP0510380: sukeśa uvāca|
SP0510381: bhagavaṃstvatprasādānme sarvametadbhaviṣyati|
SP0510382: śaktirmama kuto deva tvayaivaitatkṛtaṃ vibho|| 38||
SP0510391: na cānyadasti kartavyaṃ kṛtyaṃ yanme manogatam|
SP0510392: tavāsmi kiṃkaro dāso nāścaryaṃ yanmamedṛśam|| 39||
SP0510400: sanatkumāra uvāca|
SP0510401: tataḥ sa bhagavāndevo visṛjya gaṇanāyakam|
SP0510402: abhyagānmandaraṃ vyāsa vṛtaḥ sarvāmaraistadā|| 40||
SP0510411: devā api vimānasthānnārakānvīkṣya sarvaśaḥ|
SP0510412: śāntaṃ ca jagato duḥkhaṃ dṛṣṭvā jagmuryathāgatam|| 41||
SP0510421: ya imaṃ nārakottāraṃ śṛṇuyādvā paṭheta vā|
SP0510422: sa duḥkhaṃ samanuprāpya nāvasīdati karhicit|| 42||
SP0510431: etadyogavidhānasarvasamayaṃ śrutvā naro nityaśaḥ 
SP0510432: pāpātmāpi sunirghṛṇaṃ pratibhayaṃ nābhyeti pāpāśrayam|
SP0510433: kiṃ nvetaṃ ya ihābhyupetya satataṃ śaucānvitaḥ śrāvayed
SP0510434: devabrāhmaṇavaidyasaṃsadi dṛḍhaṃ bhaktaḥ sadā śaṃkaram|| 43||
SP0519999: skandapurāṇa ekapañcāśo 'dhyāyaḥ||