Skandapurāṇa Adhyāya 39

E-text generated on February 22, 2017 from the original TeX files of: Bakker, Hans T., Peter C. Bisschop and Yuko Yokochi, eds. The Skandapurāṇa. Vol. IIB. Adhyāyas 31-52. The Vāhana and Naraka Cycles. Critical Edition with an Introduction & Annotated English Synopsis, in cooperation with Nina Mirnig and Judit Törzsök. Leiden/Boston: Brill, 2014.

SP0390010: suśarmovāca|
SP0390011: ataḥ paraṃ tṛtīyastu narakaḥ kālasūtrakaḥ|
SP0390012: samantānmahatoccena prākāreṇa susaṃvṛtaḥ|
SP0390013: lohajālena ca tathā ākāśe 'pyabhisaṃvṛtaḥ|| 1||
SP0390021: yathaikaśca tathā sarve narakā abhisaṃvṛtāḥ|
SP0390022: socchrayāścaiva vijñeyā na vakṣye tadahaṃ punaḥ|| 2||
SP0390031: śokadrohajanāstatra yātyante puruṣādhamāḥ|
SP0390032: ye haranti striyaṃ vājivikretā yastathā gavām|| 3||
SP0390041: dharmasya cātmanaścaiva brāhmaṇānāṃ ca nindakāḥ|
SP0390042: chadmanā yaśca śāstrāṇi gurubhyo 'paharetpunaḥ|| 4||
SP0390051: guruṃ nindati yaścāpi pitaraṃ mātaraṃ tathā|
SP0390052: śvaśuraṃ bhrātaraṃ jyeṣṭhaṃ tathā cānyāngarīyasaḥ|
SP0390053: ākrośate ca yastānvai tathā cāpyavamanyate|| 5||
SP0390061: āśramāṇāṃ tathā bhettā rahasyānāṃ ca sarvaśaḥ|
SP0390062: adattaṃ yaḥ samādadyātsa gaccheddvija tatra vai|| 6||
SP0390071: te tatra patitā ghore narake pāpacetasaḥ|
SP0390072: tisraḥ koṭyastu saṃpūrṇā varṣāṇāṃ tu narādhamāḥ|
SP0390073: yātyante mṛtyuvacanātkrandamānā vicetasaḥ|| 7||
SP0390081: kālasūtreṇa mahatā mitvā mitvā tu duṣkṛtam|
SP0390082: chidyantyaṅgāni jantūnāṃ kuṇṭhāgrairāyudhairbhṛśam|
SP0390083: kiṃkaraistairaviśrāntaṃ divārātrimatandritam|| 8||
SP0390091: pūrṇe kāle tato janturucchrayānpratipadyate|
SP0390092: viśrāmya sa tadā jantuḥ pātyate narake punaḥ|
SP0390093: yāvadasya kṛtaṃ pāpaṃ kṣīṇaṃ sarvamaśeṣataḥ|| 9||
SP0390101: ya imaṃ bahupāpakartṛsūtraṃ śṛṇuyātsuralokakarmasūtram|
SP0390102: na sa yāti tamugraduḥkhasūtraṃ narakaṃ yamalokakālasūtram|| 10||
SP0399999: skandapurāṇa ekonacatvāriṃśattamo 'dhyāyaḥ||