Skandapurāṇa Adhyāya 36

E-text generated on February 22, 2017 from the original TeX files of: Bakker, Hans T., Peter C. Bisschop and Yuko Yokochi, eds. The Skandapurāṇa. Vol. IIB. Adhyāyas 31-52. The Vāhana and Naraka Cycles. Critical Edition with an Introduction & Annotated English Synopsis, in cooperation with Nina Mirnig and Judit Törzsök. Leiden/Boston: Brill, 2014.

SP0360010: sanatkumāra uvāca|
SP0360011: trikūṭaśikhare tasminnagare devanirmite|
SP0360012: āsīnaḥ kāñcane divye vimāne strījanākule|| 1||
SP0360021: pitṝnsarvānsamāhūya saṃpūjya vidhivattadā|
SP0360022: sukhopaviṣṭāṃstāndṛṣṭvā idaṃ vacanamabravīt|| 2||
SP0360031: yuṣmākaṃ tejasā sarvamidamaiśvaryamīdṛśam|
SP0360032: bhavadbhistatkṛtaṃ devā yenāsmi sukhabhākkṛtaḥ|| 3||
SP0360040: pitara ūcuḥ|
SP0360041: maivaṃ vadānṛtaṃ putra mādharmaste bhavediha|
SP0360042: nāsmatprasādādaiśvaryaṃ tava putra kadācana|| 4||
SP0360051: vayaṃ tu niraye ghore yātyamānāḥ sudāruṇe|
SP0360052: tava devasya vīryeṇa sukhamāpuḥ sudurlabham|| 5||
SP0360061: tvayā vayaṃ suputreṇa tāritā nirayādyathā|
SP0360062: tathā nānyaṃ prapaśyāma dhanyānāṃ tvaṃ suto hi naḥ|| 6||
SP0360071: adya varṣasahasrāṇi bahūni niraye vayam|
SP0360072: pacyema ghore durvṛttā bandhuḥ syāttvaṃ na no yadi|| 7||
SP0360081: bahavaḥ prāṇinaḥ putra yātyante tatra saṃyatāḥ|
SP0360082: atighore sudurvṛttāstapasteṣāṃ na vidyate|| 8||
SP0360090: sukeśa uvāca|
SP0360091: pitaro noktapūrvaṃ me mṛṣā na ca vadāmi vai|
SP0360092: yathā prabhāvādyuṣmākamaiśvaryaṃ mama tattadā|| 9||
SP0360101: śṛṇudhvaṃ vadataḥ samyaṅmāvamaṃsthā vaco mama|
SP0360102: na cāvamanye pitaro devatānko 'vamanyate|| 10||
SP0360111: pitaraḥ karma kurvanti satāṃ yatsaṃmataṃ bhuvi|
SP0360112: nityaṃ cāśāsate tena prajā naḥ santu puṣkalāḥ|| 11||
SP0360121: dhārmikāśca kṛtajñāśca satkarmaratayastathā|
SP0360122: ye no narakagartasthāṃstārayiṣyanti nityaśaḥ|| 12||
SP0360131: teṣāṃ tatkāryakaraṇātsvadharmācyavanena ca|
SP0360132: sa dharmo 'nuṣṭhitaḥ samyakprajā janayate śubhāḥ|| 13||
SP0360141: dhārmikāśca vadanyāśca kṛtajñāḥ satpathi sthitāḥ|
SP0360142: pitṛbhaktāśca sarvatra pitṝṇāṃ tāraṇe ratāḥ|| 14||
SP0360151: so 'haṃ bhavadbhirdharmeṇa pareṇa ca samādhinā|
SP0360152: janitastapasā yukto bhavatāmeva sarvaśaḥ|
SP0360153: devamārādhya narakātpitṝṃstāritavānpunaḥ|| 15||
SP0360161: eṣa prabhāvo yuṣmākaṃ tapaḥ sucaritaṃ ca ha|
SP0360162: mamātra kiṃ mahāprajñā anṛtaṃ vātra kiṃ vacaḥ|| 16||
SP0360171: iyaṃ ca vaidikī śubhrā śrutirvedavidāṃ varāḥ|
SP0360172: pramāṇaṃ yadi manyadhvamātmanā kṛtamityuta|| 17||
SP0360181: aṅgādaṅgātsaṃbhavasi hṛdayādadhijāyase|
SP0360182: ātmā vai putranāmāsi sa jīva śaradaḥ śatam|| 18||
SP0360191: aṅgebhyo 'haṃ samutpanno yuṣmākaṃ hṛdayācca ha|
SP0360192: ātmanāhaṃ tathātmānaṃ yuṣmāṃstāritavāṃstathā|| 19||
SP0360201: tasmādbhavanto manyantu sarva eva samādhinā|
SP0360202: tasmāddhi ghoranarakāttāritāḥ svena karmaṇā|| 20||
SP0360211: na cānyakarmaṇā kaścidanyastarati durgatim|
SP0360212: svakarmaṇā hi jantūnāṃ phalapāko vidhīyate|| 21||
SP0360220: sanatkumāra uvāca|
SP0360221: tatasta evaṃ pitarastena proktā mahātmanā|
SP0360222: harṣeṇa sāsrunayanā idamūcustadā vacaḥ|| 22||
SP0360230: pitara ūcuḥ|
SP0360231: tvadanyaḥ ko vadedevaṃ yo na syādīśasaṃmataḥ|
SP0360232: yuktametattava vaco dhārmikasya mahātmanaḥ|| 23||
SP0360241: yo na syādīdṛśaḥ putra kathaṃ taṃ sarvadevapaḥ|
SP0360242: iṣṭaistu yojayetsamyagyathā tvāṃ govṛṣadhvajaḥ|| 24||
SP0360251: tvaṃ dhātā tvaṃ hi no bandhustvaṃ janetā mahāmate|
SP0360252: pitā tvameva putrā hi vayaṃ tava na saṃśayaḥ|| 25||
SP0360261: atra te vartayiṣyāmaḥ purāvṛttaṃ mahāmate|
SP0360262: śrutau smṛtau ca yadgītaṃ tannaḥ saṃsmartumarhasi|| 26||
SP0360270: pitara ūcuḥ|
SP0360271: putrā hi brahmaṇā sṛṣṭā devā yajata māmiti|
SP0360272: te 'yajanta tadātmānaṃ teṣāṃ brahmā cukopa ha|
SP0360273: uvāca cainānsaṃrabdho naṣṭasaṃjñā bhaviṣyatha|| 27||
SP0360281: te śaptāstaṃ tadā devaṃ sarva eva divaukasaḥ|
SP0360282: duḥkhaśokasamāyuktā brahmāṇaṃ tuṣṭuvustadā|| 28||
SP0360291: prasannaṃ taṃ samālakṣya ta ūcuḥ śirasā natāḥ|
SP0360292: naṣṭasaṃjñā vayaṃ deva tanno yaccha punaḥ prabho|
SP0360293: tatkṣamasva ca deveśa ajñānādyatkṛtaṃ hi naḥ|| 29||
SP0360301: athaivamukto devaistairbrahmā lokapitāmahaḥ|
SP0360302: uvāca praṇatāndevānsānukrośamidaṃ vacaḥ|| 30||
SP0360311: prāyaścittaṃ mahāsattvāścaradhvaṃ niyamena ha|
SP0360312: vyabhicārakṛtaṃ sarvaṃ tataḥ pāpaṃ prahāsyatha|| 31||
SP0360320: devā ūcuḥ|
SP0360321: saiva saṃjñā na no deva vidyate sarvasṛkprabho|
SP0360322: yayā jñāsyāmahe tāni prāyaścittāni lokapa|| 32||
SP0360330: brahmovāca|
SP0360331: svānputrānparipṛcchadhvaṃ tataḥ śreya avāpsyatha|
SP0360332: punaḥ saṃjñāṃ ca dharmajñā mā kurudhvamato 'nyathā|| 33||
SP0360340: pitara ūcuḥ|
SP0360341: tataste suraśārdūlāḥ papracchuḥ svānsutāṃstadā|
SP0360342: prāyaścittāni dharmāṃśca vedānsāṅgānsuvistarān|| 34||
SP0360351: te ca tebhyastadā putrā ācakhyuḥ prayatāḥ śubhāḥ|
SP0360352: yāthātathyena tatsarvaṃ parameṇa samādhinā|| 35||
SP0360361: atha te labdhasaṃjñāśca labdhakāmāstathaiva ca|
SP0360362: svānputrānabhyabhāṣanta prīyamānā mudā yutāḥ|| 36||
SP0360370: devā ūcuḥ|
SP0360371: putrā na yūyamasmākaṃ vayaṃ putrā hi vaḥ sutāḥ|
SP0360372: yairjñānaṃ naṣṭasaṃjñānāṃ kṛtamasmākamavyayam|| 37||
SP0360381: tairevamukte tatrāgādbrahmā lokapitāmahaḥ|
SP0360382: uvāca cedaṃ tāndevānsarvāneva mahāyaśāḥ|| 38||
SP0360390: brahmovāca|
SP0360391: vadanti nānṛtaṃ devāḥ satyaṃ deveṣu vartate|
SP0360392: sutāścoktā hi vaḥ sarve pitaro nānṛtaṃ hi tat|| 39||
SP0360401: tasmātpitṛtvaṃ yuṣmākaṃ putrāṇāṃ nityamavyayam|
SP0360402: bhaviṣyati na saṃdeho yūyaṃ putrāśca sarvaśaḥ|| 40||
SP0360411: na hyaśiṣyāya kathyante rahasyāni kathaṃcana|
SP0360412: ekārthau putraśiṣyau ca tasmātputrāḥ stha sarvaśaḥ|| 41||
SP0360421: taranti putraiḥ pitaraḥ putrāṃstāṃstārayanti ca|
SP0360422: tārayitvā pitṛtvaṃ ca karmaṇā tena yānti te|| 42||
SP0360431: yūyaṃ ca tāritāḥ putrairajñānānnarakāttathā|
SP0360432: tasmādime hi pitaro yūyaṃ putrāśca sarvaśaḥ|| 43||
SP0360441: pāti yasmātpitā tasmājjanayatyapi vā pitā|
SP0360442: putreṣu caitadubhayaṃ pitarastena vo matāḥ|| 44||
SP0360451: tataste brahmaṇaḥ śrutvā yāthātathyena tadvacaḥ|
SP0360452: pitṝṃstu tānsutānmatvā putratvamupapedire|| 45||
SP0360461: te putrabhāvamāsādya prītātmāno mahābalāḥ|
SP0360462: pitarastānvarairiṣṭaiśchandayāmāsuravyathāḥ|| 46||
SP0360471: pitaraśca tato vavruragre yajanamātmanaḥ|
SP0360472: yo no 'niṣṭvā yajeddevānna tatphalamavāpnuyāt|| 47||
SP0360481: enasā cābhisaṃyukto mahānirayabhāgbhavet|
SP0360482: †abuddhvā† tena devāśca taṃ hanyuḥ pāpacetasam|| 48||
SP0360491: evamastviti tānuktvā devāste 'tiguṇoditāḥ|
SP0360492: yathāgataṃ tato jagmurbrahmaṇā saha sarvaśaḥ|| 49||
SP0360500: pitara ūcuḥ|
SP0360501: tathā vayaṃ tvayā putra narakānnaṣṭacetasaḥ|
SP0360502: tāritāścetanāvantaḥ punaśca pravarīkṛtāḥ|| 50||
SP0360511: pitā tato bhavānpūjyo yo nu pāsi mahābhayāt|
SP0360512: putrā vayaṃ taveśāna brūhi kiṃ karavāma te|| 51||
SP0360520: sanatkumāra uvāca|
SP0360521: sa evamuktastejasvī sukeśo gaṇasattamaḥ|
SP0360522: praṇataḥ prāñjalirbhūtvā pitṝnvacanamabravīt|| 52||
SP0360531: evametadyathoktaṃ vo nānṛtaṃ vo vacaḥ śubham|
SP0360532: parasparapitṛtvaṃ hi sarveṣāṃ samudāhṛtam|| 53||
SP0360541: varaṃ bhūya imaṃ mahyaṃ prayacchata gaṇeśvarāḥ|
SP0360542: etena praśnamicchāmi kathitaṃ dvijasattamāḥ|| 54||
SP0360550: pitara ūcuḥ|
SP0360551: nāsti kiṃcidaviditaṃ bhavataḥ pravareśvara|
SP0360552: bhavānasmatpramāṇārthaṃ vyākhyātatvamihecchasi|| 55||
SP0360561: brūhi yadviditaṃ no 'sti kathayiṣyāma taddhi te|
SP0360562: śrutaṃ yadanubhūtaṃ vā yathāśakti yathābalam|| 56||
SP0360570: sukeśa uvāca|
SP0360571: bhavanto narake ghore parikliṣṭāḥ sudāruṇe|
SP0360572: ato gatijñāḥ sarveṣāṃ narakānāṃ na saṃśayaḥ|| 57||
SP0360581: teṣāṃ satattvaṃ yogaṃ ca kālabhedaṃ tathā kramam|
SP0360582: tatsarvaṃ śrotumicchāmi paraṃ kautūhalaṃ hi me|| 58||
SP0360591: kiyanto narakāste ca kimpramāṇāḥ kimāśrayāḥ|
SP0360592: kiṃrūpāḥ ke ca yātyante kathaṃ caiva suduḥkhitāḥ|| 59||
SP0360601: kathaṃ ca patate janturyātyate ca kathaṃ tathā|
SP0360602: kiyatā caiva kālena narakātsa vimucyate|
SP0360603: muktaścottiṣṭhate kena kathaṃ saṃtarate punaḥ|| 60||
SP0360611: etatsarvamaśeṣeṇa vistareṇa yathātatham|
SP0360612: kathayadhvaṃ mahāprajñāḥ paraṃ kautūhalaṃ hi me|| 61||
SP0360621: tamupendrapitāmaheśvareśapravareśaṃ viditārthatattvakośam|
SP0360622: duritāṅkitapāpayuktayogaṃ pratiyogaṃ tvidamāhuragrayogam|| 62||
SP0369999: skandapurāṇe ṣaṭtriṃśattamo 'dhyāyaḥ||