Skandapurāṇa Adhyāya 16

E-text generated on February 22, 2017 from the original TeX files of: Adriaensen, R., H.T. Bakker and H. Isaacson, eds. The Skandapurāṇa. Vol. I. Adhyāyas 1-25. Critically Edited with Prolegomena and English Synopsis. Groningen: Egbert Forsten, 1998.

SP0160010: vyāsa uvāca|
SP0160011: varānsa labdhvā bhagavānvasiṣṭho 'smatpitāmahaḥ|
SP0160012: kaṃ putraṃ janayāmāsa ātmanaḥ sadṛśadyutim|| 1||
SP0160020: sanatkumāra uvāca|
SP0160021: tenāsau varadānena devadevasya śūlinaḥ|
SP0160022: arundhatyāmajanayattapoyogabalānvitam|
SP0160023: brahmiṣṭhaṃ śaktināmānaṃ putraṃ putraśatāgrajam|| 2||
SP0160031: tasya bālyātprabhṛtyeva vāsiṣṭhasya mahātmanaḥ|
SP0160032: pareṇa cetasā bhaktirabhavadgovṛṣadhvaje|| 3||
SP0160041: sa kadācidapatyārthamārādhayadumāpatim|
SP0160042: tasya tuṣṭo mahādevo varado 'smītyabhāṣata|| 4||
SP0160051: atha dṛṣṭvā tamīśānamidamāhānatānanaḥ|
SP0160052: kena stoṣyāmi te deva yastvaṃ sarvajagatpatiḥ|
SP0160053: sarvāndhārayase lokānātmanā samayādvibho|| 5||
SP0160061: tvameva bhoktā bhojyaṃ ca kartā kāryaṃ tathā kriyā|
SP0160062: utpādakastathotpādya utpattiścaiva sarvaśaḥ|| 6||
SP0160071: ātmānaṃ putranāmānaṃ mama tulyaṃ guṇairvibho|
SP0160072: icchāmi dattaṃ deveśa eṣa me dīyatāṃ varaḥ|| 7||
SP0160080: sanatkumāra uvāca|
SP0160081: tamevaṃvādinaṃ devaḥ prahasya vadatāṃ varaḥ|
SP0160082: uvāca vacasā vyāsa diśaḥ sarvā vinādayan|| 8||
SP0160091: tvayāhaṃ yācitaḥ śakte sa ca te saṃbhaviṣyati|
SP0160092: tvatsamaḥ sarvavedajñastvadīyo munipuṃgava|| 9||
SP0160101: bījātmā ca tathodbhūtaḥ svayamevāṅkurātmanā|
SP0160102: bījātmanā na bhavati pariṇāmāntaraṃ gataḥ|| 10||
SP0160111: evaṃ sa ātmanātmā vaḥ saṃbhūto 'patyasaṃjñitaḥ|
SP0160112: svenātmanā na bhavitā pariṇāmāntaraṃ gataḥ|| 11||
SP0160120: sanatkumāra uvāca|
SP0160121: evamuktvā tu taṃ devaḥ prahasya ca nirīkṣya ca|
SP0160122: jagāma sahasā yogī adṛśyatvamatidyutiḥ|| 12||
SP0160131: tasmingate mahādeve śaktistava pitāmahaḥ|
SP0160132: vacastatpariniścintya evamevetyamanyata|| 13||
SP0160141: atha kāle 'timahati samatīte śubhavrate|
SP0160142: tapasā bhāvitaścāpi mahatāgnisamaprabhaḥ|
SP0160143: adṛśyantyāṃ mahāprajña ādadhe garbhamuttamam|| 14||
SP0160151: tasyāmāpannasattvāyāṃ rājā kalmāṣapādṛṣim|
SP0160152: bhakṣayāmāsa saṃrabdho rakṣasā hṛtacetanaḥ|| 15||
SP0169999: iti skandapurāṇe ṣoḍaśo 'dhyāyaḥ||