Skandapurāṇa Adhyāya 15

E-text generated on February 22, 2017 from the original TeX files of: Adriaensen, R., H.T. Bakker and H. Isaacson, eds. The Skandapurāṇa. Vol. I. Adhyāyas 1-25. Critically Edited with Prolegomena and English Synopsis. Groningen: Egbert Forsten, 1998.

SP0150010: sanatkumāra uvāca|
SP0150011: praviṣṭe bhavanaṃ deve sūpaviṣṭe varāsane|
SP0150012: sa bahirmanmathaḥ krūro devaṃ veddhumanābhavat|| 1||
SP0150021: tamanācārasaṃyuktaṃ durātmānaṃ kulādhamam|
SP0150022: lokānsarvāṃstāpayānaṃ sarveṣvakaruṇātmakam|| 2||
SP0150031: ṛṣīṇāṃ vighnakartāraṃ niyamānāṃ vrataiḥ saha|
SP0150032: cakrāhvayasya rūpeṇa ratyā saha tamāgatam|| 3||
SP0150041: athātatāyinaṃ vyāsa veddhukāmaṃ sureśvaram|
SP0150042: nayanena tṛtīyena sāvajñaṃ tamavaikṣata|| 4||
SP0150051: tato 'sya netrajo vahnirjvālāmālāsahasravān|
SP0150052: saṃvṛtya ratibhartāramadahatsaparicchadam|| 5||
SP0150061: sa dahyamānaḥ karuṇamārto 'krośata visvaram|
SP0150062: prasādayaṃśca taṃ devaṃ papāta sa mahītale|| 6||
SP0150071: āśu so 'gniparītāṅgo manmatho lokatāpanaḥ|
SP0150072: papāta bhasmasāccaiva kṣaṇena samapadyata|| 7||
SP0150081: patnī tu karuṇaṃ tasya vilalāpa suduḥkhitā|
SP0150082: devaṃ devīṃ ca duḥkhārtā ayācatkaruṇāyatī|| 8||
SP0150091: tasyāśca karuṇāṃ śrutvā devau tau karuṇātmakau|
SP0150092: ūcatustāṃ samālokya samāśvāsya ca duḥkhitām|| 9||
SP0150101: dagdha eṣa dhruvaṃ bhadre nāsyotpattiriheṣyate|
SP0150102: aśarīro 'pi te kāle kāryaṃ sarvaṃ kariṣyati|| 10||
SP0150111: yadā tu viṣṇurbhavitā vasudevasutaḥ śubhe|
SP0150112: tadā tasya suto 'yaṃ syātpatiste sa bhaviṣyati|| 11||
SP0150120: sanatkumāra uvāca|
SP0150121: tataḥ sā taṃ varaṃ labdhvā kāmapatnī śubhānanā|
SP0150122: jagāmeṣṭaṃ tadā deśaṃ prītiyuktā gataklamā|| 12||
SP0150130: sanatkumāra uvāca|
SP0150131: evaṃ dagdhvā sa kāmaṃ tu śaṃkaro mūḍhacetasam|
SP0150132: provāca himavatputrīṃ bhaktyā munivarasya ha|| 13||
SP0150141: vasiṣṭho nāma viprendro māṃ kṛtvā hṛdi tapyate|
SP0150142: tasyāhaṃ varadānāya prayāsyāmi mahāvrate|| 14||
SP0150151: evamuktvā sa devīṃ tu bhaktiprītyā tadā vibhuḥ|
SP0150152: jagāma tapyato 'bhyāśaṃ vasiṣṭhasya munervibhuḥ|| 15||
SP0150161: tato munivaraśreṣṭhaṃ variṣṭhaṃ tapatāṃ varam|
SP0150162: vasiṣṭhamṛṣiśārdūlaṃ tapyamānaṃ paraṃ tapaḥ|| 16||
SP0150171: pūrṇe varṣasahasre tu jvalamānamivānalam|
SP0150172: uvāca bhagavāngatvā brūhi kiṃ te dadāni te|
SP0150173: dadāmi divyaṃ cakṣuste paśya māṃ sagaṇaṃ dvija|| 17||
SP0150181: dṛṣṭvā sa tu tamīśānaṃ praṇamya śirasā prabhum|
SP0150182: śirasyañjalimādhāya tuṣṭāva hṛṣitānanaḥ|| 18||
SP0150190: vasiṣṭha uvāca|
SP0150191: namaḥ kanakaliṅgāya vedaliṅgāya vai namaḥ|
SP0150192: namaḥ sahasraliṅgāya vahniliṅgāya vai namaḥ|| 19||
SP0150201: namaḥ purāṇaliṅgāya śrutiliṅgāya vai namaḥ|
SP0150202: namaḥ pavanaliṅgāya brahmaliṅgāya vai namaḥ|| 20||
SP0150211: namastrailokyaliṅgāya dāhaliṅgāya vai namaḥ|
SP0150212: namaḥ parvataliṅgāya sthitiliṅgāya vai namaḥ|| 21||
SP0150221: namo rahasyaliṅgāya saptadvīpordhvaliṅgine|
SP0150222: namaḥ sarvārthaliṅgāya sarvalokāṅgaliṅgine|| 22||
SP0150231: namo 'stvavyaktaliṅgāya buddhiliṅgāya vai namaḥ|
SP0150232: namo 'haṃkāraliṅgāya bhūtaliṅgāya vai namaḥ|| 23||
SP0150241: nama indriyaliṅgāya namastanmātraliṅgine|
SP0150242: namaḥ puruṣaliṅgāya bhāvaliṅgāya vai namaḥ|| 24||
SP0150251: namaḥ sarvārthaliṅgāya tamoliṅgāya vai namaḥ|
SP0150252: namo rajordhvaliṅgāya sattvaliṅgāya vai namaḥ|| 25||
SP0150261: namo gaganaliṅgāya tejoliṅgāya vai namaḥ|
SP0150262: namo vāyūrdhvaliṅgāya śabdaliṅgāya vai namaḥ|| 26||
SP0150271: namo ṛkstutaliṅgāya yajurliṅgāya vai namaḥ|
SP0150272: namaste 'tharvaliṅgāya sāmaliṅgāya vai namaḥ|| 27||
SP0150281: namo yajñāṅgaliṅgāya yajñaliṅgāya vai namaḥ|
SP0150282: namaste 'nantaliṅgāya devānugataliṅgine|| 28||
SP0150291: diśa naḥ paramaṃ yogamapatyaṃ matsamaṃ tathā|
SP0150292: brahma caivākṣayaṃ deva śamaṃ caiva paraṃ vibho|
SP0150293: akṣayatvaṃ ca vaṃśasya dharme ca matimakṣayām|| 29||
SP0150300: sanatkumāra uvāca|
SP0150301: evaṃ sa bhagavānvyāsa vasiṣṭhenāmitātmanā|
SP0150302: stūyamānastutoṣātha tuṣṭaścedaṃ tamabravīt|| 30||
SP0150310: bhagavānuvāca|
SP0150311: tuṣṭaste 'haṃ dadānyetattava sarvaṃ manogatam|
SP0150312: yogaṃ ca paramaṃ sūkṣmamakṣayaṃ sarvakāmikam|| 31||
SP0150321: pautraṃ ca tvatsamaṃ divyaṃ tapoyogabalānvitam|
SP0150322: dadāni te ṛṣiśreṣṭha pratibhāsyanti caiva te|| 32||
SP0150331: damaḥ śamastathā kīrtistuṣṭirakrodha eva ca|
SP0150332: nityaṃ tava bhaviṣyanti amaratvaṃ ca sarvaśaḥ|| 33||
SP0150341: avadhyatvamasahyatvamakṣayatvaṃ ca sarvadā|
SP0150342: vaṃśasya cākṣatirvipra dharme ca ratiravyayā|
SP0150343: brūhi cānyānapi varāndadāmi ṛṣisattama|| 34||
SP0150350: vasiṣṭha uvāca|
SP0150351: bhagavanviditaṃ sarvaṃ bhaviṣyaṃ devasattama|
SP0150352: na syāddhi tattathā deva yathā vā manyase prabho|| 35||
SP0150360: deva uvāca|
SP0150361: bhaviṣyaṃ nānyathā kuryāditi me niścitā matiḥ|
SP0150362: ahaṃ kartā bhaviṣyasya kathaṃ kuryāttadanyathā|| 36||
SP0150371: tathā tannātra saṃdeho vihitaṃ yadyathā mayā|
SP0150372: tasmātte 'nugrahaṃ kartā bhūyaḥ putrastavāvyayaḥ|| 37||
SP0150380: sanatkumāra uvāca|
SP0150381: evamuktvā tato devaḥ kapardī nīlalohitaḥ|
SP0150382: paśyatastasya viprarṣeḥ kṣaṇādantaradhīyata|| 38||
SP0159999: iti skandapurāṇe pañcadaśamo 'dhyāyaḥ||