Skandapurāṇa Adhyāya 11

E-text generated on February 22, 2017 from the original TeX files of: Adriaensen, R., H.T. Bakker and H. Isaacson, eds. The Skandapurāṇa. Vol. I. Adhyāyas 1-25. Critically Edited with Prolegomena and English Synopsis. Groningen: Egbert Forsten, 1998.

SP0110010: sanatkumāra uvāca|
SP0110011: kadācitsvagṛhaṃ prāptaṃ kaśyapaṃ dvipadāṃ varam|
SP0110012: apṛcchaddhimavānpraśnaṃ loke khyātikaraṃ nu kim|| 1||
SP0110021: kenākṣayāśca lokāḥ syuḥ khyātiśca paramā mune|
SP0110022: tathaiva cārcanīyatvaṃ satsu taṃ kathayasva me|| 2||
SP0110030: kaśyapa uvāca|
SP0110031: apatyena mahābāho sarvametadavāpyate|
SP0110032: mama khyātirapatyena brahmaṇo ṛṣibhiśca ha|| 3||
SP0110041: kiṃ na paśyasi śailendra yato māṃ paripṛcchasi|
SP0110042: vartayiṣyāmi taccāpi yanme dṛṣṭaṃ purācala|| 4||
SP0110051: vārāṇasīmahaṃ gacchannapaśyaṃ saṃsthitaṃ divi|
SP0110052: vimānaṃ svanavaddivyamanaupamyamaninditam|| 5||
SP0110061: tasyādhastādārtanādaṃ gartāsthāne śṛṇomyaham|
SP0110062: tānahaṃ tapasā jñātvā tatraivāntarhitaḥ sthitaḥ|| 6||
SP0110071: athāgāttatra śailendra vipro niyamavāñchuciḥ|
SP0110072: tīrthābhiṣekapūtātmā pare tapasi saṃsthitaḥ|| 7||
SP0110081: atha sa vrajamānastu vyāghreṇābhīṣito dvijaḥ|
SP0110082: viveśa taṃ tadā deśaṃ sā gartā yatra bhūdhara|| 8||
SP0110091: gartāyāṃ vīraṇastambe lambamānāṃstadā munīn|
SP0110092: apaśyadārto duḥkhārtānapṛcchattāṃśca sa dvijaḥ|| 9||
SP0110101: ke yūyaṃ vīraṇastambe lambamānā hyadhomukhāḥ|
SP0110102: duḥkhitāḥ kena mokṣaśca yuṣmākaṃ bhavitānaghāḥ|| 10||
SP0110110: pitara ūcuḥ|
SP0110111: vayaṃ te 'kṛtapuṇyasya pitaraḥ sapitāmahāḥ|
SP0110112: prapitāmahāśca kliśyāmastava duṣṭena karmaṇā|| 11||
SP0110121: narako 'yaṃ mahābhāga gartārūpaṃ samāsthitaḥ|
SP0110122: tvaṃ cāpi vīraṇastambastvayi lambāmahe vayam|| 12||
SP0110131: yāvattvaṃ jīvase vipra tāvadeva vayaṃ sthitāḥ|
SP0110132: mṛte tvayi gamiṣyāmo narakaṃ pāpacetasaḥ|| 13||
SP0110141: yadi tvaṃ dārasaṃyogaṃ kṛtvāpatyaṃ guṇottaram|
SP0110142: utpādayasi tenāsmānmucyema vayamekaśaḥ|| 14||
SP0110151: nānyena tapasā putra na tīrthānāṃ phalena ca|
SP0110152: tatkuruṣva mahābuddhe tārayasva pitṝnbhayāt|| 15||
SP0110161: sa tatheti pratijñāya ārādhya ca vṛṣadhvajam|
SP0110162: pitṝngartātsamuddhṛtya gaṇapānpracakāra ha|| 16||
SP0110171: svayaṃ ca rudradayitaḥ sukeśo nāma nāmataḥ|
SP0110172: saṃmato balavāṃścaiva rudrasya gaṇapo 'bhavat|| 17||
SP0110181: tasmātkṛtvā tapo ghoramapatyaṃ guṇavattaram|
SP0110182: utpādayasva śailendra tataḥ kīrtimavāpsyasi|| 18||
SP0110190: sanatkumāra uvāca|
SP0110191: sa evamukto ṛṣiṇā śailendro niyame sthitaḥ|
SP0110192: tapaścakāra vipulaṃ yena brahmā tutoṣa ha|| 19||
SP0110201: tamāgatya tadā brahmā varado 'smītyabhāṣata|
SP0110202: brūhi tuṣṭo 'smi te śaila tapasānena suvrata|| 20||
SP0110210: himavānuvāca|
SP0110211: bhagavanputramicchāmi guṇaiḥ sarvairalaṃkṛtam|
SP0110212: etadvaraṃ prayacchasva yadi tuṣṭo 'si naḥ prabho|| 21||
SP0110220: brahmovāca|
SP0110221: kanyā bhavitrī śailendra sutā te varavarṇinī|
SP0110222: yasyāḥ prabhāvātsarvatra kīrtimāpsyasi puṣkalām|| 22||
SP0110231: arcitaḥ sarvadevānāṃ tīrthakoṭīsamāvṛtaḥ|
SP0110232: pāvanaścaiva puṇyaśca devānāmapi sarvataḥ|
SP0110233: jyeṣṭhā ca sā bhavitrī te anye cānu tataḥ śubhe|| 23||
SP0110240: sanatkumāra uvāca|
SP0110241: evamuktvā tato brahmā tatraivāntaradhīyata|
SP0110242: so 'pi kālena śailendro menāyāmupapādayat|
SP0110243: aparṇāmekaparṇāṃ ca tathā cāpyekapāṭalām|| 24||
SP0110251: nyagrodhamekaparṇā tu pāṭalaṃ caikapāṭalā|
SP0110252: āśrite dve aparṇā tu aniketā tapo 'carat|
SP0110253: śataṃ varṣasahasrāṇāṃ duścaraṃ devadānavaiḥ|| 25||
SP0110261: āhāramekaparṇena saikaparṇā samācarat|
SP0110262: pāṭalena tathaikena vidadhātyekapāṭalā|| 26||
SP0110271: pūrṇe pūrṇe sahasre tu āhāraṃ tena cakratuḥ|
SP0110272: aparṇā tu nirāhārā tāṃ mātā pratyabhāṣata|
SP0110273: niṣedhayantī hyu meti mātṛsnehena duḥkhitā|| 27||
SP0110281: sā tathoktā tadā mātrā devī duścaracāriṇī|
SP0110282: tenaiva nāmnā lokeṣu vikhyātā surapūjitā|| 28||
SP0110291: etattattrikumārīṇāṃ jagatsthāvarajaṅgamam|
SP0110292: etāsāṃ tapasā labdhaṃ yāvadbhūmirdhariṣyati|| 29||
SP0110301: tapaḥśarīrāstāḥ sarvāstisro yogabalānvitāḥ|
SP0110302: sarvāścaiva mahābhāgāḥ sarvāśca sthirayauvanāḥ|| 30||
SP0110311: tā lokamātaraścaiva brahmacāriṇya eva ca|
SP0110312: anugṛhṇanti lokāṃśca tapasā svena sarvadā|| 31||
SP0110321: umā tāsāṃ variṣṭhā ca śreṣṭhā ca varavarṇinī|
SP0110322: mahāyogabalopetā mahādevamupasthitā|| 32||
SP0110331: dattakaścośanā tasyāḥ putraḥ sa bhṛgunandanaḥ|
SP0110332: asitasyaikaparṇā tu devalaṃ suṣuve sutam|| 33||
SP0110341: yā tu tāsāṃ kumārīṇāṃ tṛtīyā hyekapāṭalā|
SP0110342: putraṃ śataśalākasya jaigīṣavyamupasthitā|
SP0110343: tasyāpi śaṅkhalikhitau smṛtau putrāvayonijau|| 34||
SP0110351: umā tu yā mayā tubhyaṃ kīrtitā varavarṇinī|
SP0110352: atha tasyāstapoyogāttrailokyamakhilaṃ tadā|
SP0110353: pradhūpitaṃ samālakṣya brahmā vacanamabravīt|| 35||
SP0110360: brahmovāca|
SP0110361: devi kiṃ tapasā lokāṃstāpayasyatiśobhane|
SP0110362: tvayā sṛṣṭamidaṃ viśvaṃ mā kṛtvā tadvināśaya|| 36||
SP0110371: tvaṃ hi dhārayase lokānimānsarvānsvatejasā|
SP0110372: brūhi kiṃ te jaganmātaḥ prārthitaṃ samprasīda naḥ|| 37||
SP0110380: devyuvāca|
SP0110381: yadarthaṃ tapaso hyasya caraṇaṃ me pitāmaha|
SP0110382: jānīṣe tattvametanme tataḥ pṛcchasi kiṃ punaḥ|| 38||
SP0110390: brahmovāca|
SP0110391: yadarthaṃ devi tapasā śrāmyase lokabhāvani|
SP0110392: sa tvāṃ svayaṃ samāgamya ihaiva varayiṣyati|| 39||
SP0110401: sarvadevapatiḥ śreṣṭhaḥ sarvalokeśvareśvaraḥ|
SP0110402: vayaṃ sadevā yasyeśe vaśyāḥ kiṃkaravādinaḥ|| 40||
SP0110411: sa devadevaḥ parameśvareśvaraḥ svayaṃ tavāyāsyati lokapo 'ntikam|
SP0110412: udārarūpo vikṛtābhirūpavānsamānarūpo na hi yasya kasyacit|| 41||
SP0110421: maheśvaraḥ parvatalokavāsī carācareśaḥ prathamo 'prameyaḥ|
SP0110422: vinendunā indusamānavaktro vibhīṣaṇaṃ rūpamihāsthito 'gram|| 42||
SP0119999: iti skandapurāṇe ekādaśo 'dhyāyaḥ||