Skandapurāṇa Adhyāya 112: S recension

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1120010: देव्युवाच|
SP1120011: देव्यः शृणुत भूयो ऽपि यथा दानं विना शुभाः|
SP1120012: अयमेवोपवासेन यथा धर्मो ऽपि लभ्यते|| १||
SP1120021: एकभक्तेन यो देव्यो मासं मार्गशिरं क्षपेत्|
SP1120022: स तेन कर्मणा देव्यो गोमान्भवति नित्यशः|| २||
SP1120031: पौषमासेन पुत्रांश्च बहूनाप्नोति धार्मिकान्|
SP1120032: माघमासे च कुर्वाणः स्त्रियः प्राप्नोति वै प्रियाः|| ३||
SP1120041: एकभक्तं तु कुर्वाणः फाल्गुने मासि नित्यशः|
SP1120042: स्त्रीषु सौभाग्यमाप्नोति स्त्रियश्च परमप्रियाः|| ४||
SP1120051: यः क्षपेदेकभक्तेन चैत्रमासं नरोत्तमः|
SP1120052: धनधान्यसमृद्धे स कुले जायेत रूपवान्|| ५||
SP1120061: वैशाखं यः क्षपेन्मासमेकभक्तेन मानवः|
SP1120062: याति स श्रेष्ठतां लोके पूजितो धनवानपि|| ६||
SP1120071: ज्येष्ठमूलं तु यो मासमेकभक्तं समाचरेत्|
SP1120072: भ्रातॄणां भवति ज्येष्ठो भोगं प्राप्नोति पुष्कलम्|| ७||
SP1120081: आषाढं चापि यो मासमेकभक्तं समाचरेत्|
SP1120082: स राज्ञो ऽमात्यतां प्राप्य कामानाप्नोति पुष्कलान्|| ८||
SP1120091: श्रावणे चापि यो मासे तथा चैवाचरेन्नरः|
SP1120092: सेनापत्यं स संप्राप्य बलवानभिजायते|| ९||
SP1120101: यस्तु भाद्रपदे मास-म्-एकभक्तं समाचरेत्|
SP1120102: स तेन कर्मणा देव्यो धनवानभिजायते|| १०||
SP1120111: यो ऽपि चाश्वयुजं मासमेकभक्तेन तिष्ठति|
SP1120112: वाणिज्यं फलते तस्य कृषिः पशुगणास्तथा|| ११||
SP1120121: कार्त्तिकं त्वपि यो मासमेकभक्तेन तिष्ठति|
SP1120122: सो ऽश्वमेधफलं प्राप्य वह्निलोके महीयते|| १२||
SP1120131: यः क्षपेदेकभक्तेन यावज्जीवं नरोत्तमः|
SP1120132: विमानेनार्कवर्णेन  स गच्छेच्छक्रलोकताम्|| १३||
SP1120141: संवत्सरं तु यः पूर्णमेकभक्तेन तिष्ठति|
SP1120142: स पार्थिवसमो भूत्वा महीं पाति महेन्द्रवत्|| १४||
SP1120151: अहोरात्रं तु यो देव्यः कुर्यादेकं नरोत्तमः|
SP1120152: दशानां स सुवर्णानां फलं प्राप्नोति शोभितम्|| १५||
SP1120161: मासे मासे त्वहोरात्रं यः करोति नरोत्तमः|
SP1120162: स तेन कर्मणा शुद्धो विद्वान्भवति धार्मिकः|| १६||
SP1120171: चतुर्दशीमष्टमीं च उभयोः पक्षयोरपि|
SP1120172: अहोरात्रं क्षपेद्यस्तु संवत्सरमशेषतः|| १७||
SP1120181: स तेन कर्मणा युक्तः सर्वपापविवर्जितः|
SP1120182: न याति नरकं देव्यो यमं च न स पश्यति|| १८||
SP1120191: मासे मासे च यः कुर्यात्त्रिरात्रक्षपणं बुधः|
SP1120192: कौबेरं लोकमासाद्य स विन्देत्परमं सुखम्|| १९||
SP1120201: चतुर्थे ऽहनि यो भुङ्क्ते प्रयतात्मा शुचिर्नरः|
SP1120202: गान्धर्वं स पदं प्राप्य मोदते शक्रवद्दिवि|| २०||
SP1120211: पञ्चमे ऽहनि यो भुङ्क्ते प्रतिमासमतन्द्रितः|
SP1120212: वायुलोकं समासाद्य स्वर्गलोकं स गच्छति|| २१||
SP1120221: यो भुङ्क्ते दिवसे षष्ठे नित्यं नियममास्थितः|
SP1120222: वारुणं लोकमासाद्य सो ऽपि विन्देन्महत्पदम्|| २२||
SP1120231: सप्तमे ऽहनि यो भुङ्क्ते जितद्वन्द्वो दृढव्रतः|
SP1120232: आदित्यलोकमासाद्य सो ऽपि विन्देन्महत्पदम्|| २३||
SP1120241: अष्टमे चैव यो भुङ्क्ते दिवसे मानवः शुचिः|
SP1120242: वैष्णवं लोकमासाद्य स भवेत्परमद्युतिः|| २४||
SP1120251: नवमे ऽहनि यो भुङ्क्ते नरो नियममास्थितः|
SP1120252: स वसूनां प्रियो भूत्वा चरते वसुभिः सह|| २५||
SP1120261: दशमे ऽहनि भुक्त्वा तु दशाहस्य फलं लभेत्|
SP1120262: अश्विभ्यां च समो भूत्वा सूर्यवज्ज्वलते सदा|| २६||
SP1120271: मानुष्यं च पुनः प्राप्य दश भार्या लभेत सः|
SP1120272: सुवर्णमक्षयं चैव न चाकाले म्रियेत सः|| २७||
SP1120281: एकादशे तु यो भुङ्क्ते दिवसे मानवः शुचिः|
SP1120282: एकादश्याः फलं प्राप्य स रुद्रगणतां लभेत्|| २८||
SP1120291: स्थित्वा तत्र शतान्यष्टावतिसौख्यसमन्वितः|
SP1120292: ब्राह्मणत्वमनुप्राप्य यज्वा स इह जायते|| २९||
SP1120301: द्वादशे दिवसे यस्तु देव्यो भुङ्क्ते सदा नरः|
SP1120302: द्वादशाहं स संप्राप्य शक्रलोकमवाप्नुयात्|| ३०||
SP1120311: तत्रोष्य स सुखं भूय इह जातो नरोत्तमः|
SP1120312: राजा वा राजमात्रो वा धनी वा सुमहान्भवेत्|| ३१||
SP1120321: त्रयोदशे तु यो नित्यमश्नाति दिवसे नरः|
SP1120322: विशेत्स भार्गवं स्थानं प्राप्य दिव्यसुखान्वितः|| ३२||
SP1120331: अथ चेन्मानुषो भूयः स नरो जायते शुभः|
SP1120332: धनधान्यसमाकीर्णे जायते स कुले शुभः|| ३३||
SP1120341: चतुर्दश तु यो नित्यं दिवसानि क्षपेन्नरः|
SP1120342: तौषितं लोकमासाद्य भवेद्गणपतिर्वरः|| ३४||
SP1120351: अर्धमासं क्षपेद्यस्तु नित्यमेव ह्यतन्द्रितः|
SP1120352: देवराजेन तुल्यो ऽसौ भूत्वा स्वर्गे ऽवतिष्ठति|
SP1120353: इह राजा महान्भूमौ भूय एवाभिजायते|| ३५||
SP1120361: यस्तु मासं क्षपेद्धीरो जितक्रोधो जितेन्द्रियः|
SP1120362: विमानेन स दिव्येन अप्सरोभिः समावृतः|| ३६||
SP1120371: पूज्यमानो यथा देवः स्तूयमानश्च सर्वशः|
SP1120372: ज्वलनादित्यसंकाशो नित्यं सुखमुपाश्नुते|
SP1120373: सर्वलोकेषु वसते बहून्यब्दायुतानि तु|| ३७||
SP1120381: ततो ब्रह्मसदं प्राप्य ब्रह्मणा स सुपूजितः|
SP1120382: ब्रह्मलोके निवसते यथा ब्रह्मा नरोत्तमः|| ३८||
SP1120391: अथ चेत्पुनरायाति ब्राह्मणो भवतीश्वरः|
SP1120392: योगं च तत्र लभते येनैश्वर्यं समश्नुते|
SP1120393: योगीशः स ततो भूत्वा शम्भोर्गणपतिर्भवेत्|| ३९||
SP1120401: सर्वेषां चोपवासानां विधिं परमपुण्यदम्|
SP1120402: देव्यः शृणुध्वं मत्तो ऽन्यं यथावदनुपूर्वशः|| ४०||
SP1120411: स्नातः शुचिरथाचान्तो हुताग्निः सुसमाहितः|
SP1120412: दीक्षयित्वा ततो ऽत्मानमुपवासं चरेद्बुधः|| ४१||
SP1120421: स्नायेत्त्रिषवणं चैव जुहुयादग्निमेव च|
SP1120422: वाग्यतो ऽक्रोधनो दान्तो धार्मिकः सत्यवाग्घृणी|| ४२||
SP1120431: जपन्स चैव गायत्रीं पवित्राणि च नित्यशः|
SP1120432: रुद्रानथ गणान्वापि रात्रौ च स्थण्डिलेशयः|
SP1120433: कुशानास्तीर्य विधिवत्स्त्रीशूद्रैः परिवर्जितः|| ४३||
SP1120441: समश्नीयात्ततो देव्यो वीतशोको विमत्सरः|
SP1120442: यावन्त्यहानि तिष्ठेत तावद्विप्रांस्तु भोजयेत्|| ४४||
SP1120451: ततः पूर्णे तु काले वै ब्राह्मणानां शतं वरम्|
SP1120452: सहस्रमथवा शक्त्या पूजयित्वा तु सर्वशः|| ४५||
SP1120461: हविष्यं भोजनं दत्त्वा गावो वासांसि च क्रमात्|
SP1120462: सुवर्णं तिलपात्रं च एकैकस्य प्रदापयेत्|
SP1120463: ततस्तत्फलमाप्नोति यदन्यैर्दुर्लभं व्रतैः|| ४६||
SP1120471: वृषभं यस्तु नीलाङ्गमुत्सृजेत नरोत्तमः|
SP1120472: अन्यं वापि महाभागाः स पितॄंस्तारयेन्नरः|| ४७||
SP1120481: यावन्ति तस्य रोमाणि वृषभस्य महात्मनः|
SP1120482: तावन्त्येव सहस्राणि वर्षाणां दिवि मोदते|| ४८||
SP1120491: तिलपात्राणि यो दद्याद्विप्रेभ्यः शुद्धमानसः|
SP1120492: अमावास्यां समासाद्य कृष्णानां सुसमाहितः|| ४९||
SP1120501: स पितॄंस्तर्पयित्वा तु अक्षयं नरपुंगवः|
SP1120502: पितृलोकं समाप्नोति चिरं च सुखमश्नुते|| ५०||
SP1120511: उपवासविधिस्त्वेष कथितो मे सुशोभनाः|
SP1120512: चान्द्रायणविधिं भूयः शृणुध्वं सुसमाहिताः|| ५१||
SP1120521: यस्तु चान्द्रायणं कुर्याद्यथोक्तं सुसमाहितः|
SP1120522: स सोमलोकमासाद्य सोमेन समतां व्रजेत्|| ५२||
SP1120531: प्राजापत्यं तु यः कुर्यादेकशो बहुशो ऽपि वा|
SP1120532: प्रजापतिसमो भूत्वा तस्य लोके महीयते|| ५३||
SP1120541: यस्तु सांतपनं कृच्छ्रं करोति नरसत्तमः|
SP1120542: आत्मानमुद्धरेत्कृच्छ्रात्सो ऽग्निलोकं च गच्छति|| ५४||
SP1120551: महासांतपनं यश्च करोति सुमहामनाः|
SP1120552: सर्वज्ञतामवाप्नोति ब्रह्मलोकं च विन्दति|| ५५||
SP1120561: तुलापुरुषकं यश्च कुरुते द्विजसत्तमः|
SP1120562: स मुक्तः सर्वपापैस्तु गच्छेत दिवि-म्-ऊर्जितः|| ५६||
SP1120571: अतिकृच्छ्रेण तु नरः शर्वस्य भवनं व्रजेत्|
SP1120572: कृच्छ्रातिकृच्छ्रेण तथा गाणापत्यमवाप्नुयात्|| ५७||
SP1120581: यस्तु सर्वाणि कृच्छ्राणि कुरुते नरसत्तमः|
SP1120582: स यं प्रार्थयते कामं तमेव समुपाश्नुते|| ५८||
SP1120591: यस्य कस्यचिदेवेह कृच्छ्रस्य सुसमाहितः|
SP1120592: स तेन सिद्धो भवति देवत्वं चापि विन्दति|| ५९||
SP1120601: पयोभक्षस्तु यो नित्यं नरः संवत्सरं वसेत्|
SP1120602: यावकं चोपयुञ्जानो गोमूत्रेणाभिसंस्कृतम्|| ६०||
SP1120611: पिण्याकफलभक्षो वा अक्षारलवणो ऽपि वा|
SP1120612: सो ऽश्वमेधफलं प्राप्य ब्रह्मलोकं समश्नुते|| ६१||
SP1120621: सर्वपापविनिर्मुक्तो विमुक्तः सर्वबन्धनैः|
SP1120622: विमानेनार्कवर्णेन ब्रह्मवच्चरते च सः|| ६२||
SP1120631: यस्त्वेतान्येव सर्वाणि व्यस्तानि नरसत्तमः|
SP1120632: यावदुच्छ्वासमासेवेन्महात्मा नष्टकिल्बिषः|| ६३||
SP1120641: स लोकान्वा महासत्त्वो यथेष्टान्मोक्षमेव वा|
SP1120642: ऐश्वर्यं वा महत्प्राप्य दीप्यमानो ऽवतिष्ठते|| ६४||
SP1120651: एतान्येव च सर्वाणि दानानि च तपांसि च|
SP1120652: विना मन्त्रेण सततं शूद्राणामपि सर्वशः|| ६५||
SP1120661: विधीयन्ते न संदेह एवमाह प्रजापतिः|
SP1120662: अमन्त्रास्ते स्मृताः सर्वे शूद्रा विगतकल्मषाः|| ६६||
SP1120671: स्त्रीणां तु दैवतं भर्ता न ततो ऽन्यद्विधीयते|
SP1120672: स गतिः परमं धाम स धर्मः परमः स्मृतः|| ६७||
SP1120681: तेन या त्वभ्यनुज्ञाता इदं धर्मं समाचरेत्|
SP1120682: सा फलं तस्य धर्मस्य प्राप्नोति सुसमाहिता|| ६८||
SP1120691: या तु तेनाननुज्ञाता धर्मं कुर्याच्छुचिस्मिताः|
SP1120692: न तत्फलं सा लभते लभते चासतीफलम्|| ६९||
SP1120701: या तु भर्त्राभ्यनुज्ञाता कृत्वा धर्मं सुपुष्कलम्|
SP1120702: दद्यात्तु पतये नारी तस्यानन्तं हि तत्फलम्|| ७०||
SP1120711: यच्च प्रार्थयते किंचिदिह लोके परत्र वा|
SP1120712: तत्सर्वं प्राप्नुते देव्यः सुभगा चाभिजायते|| ७१||
SP1120721: वश्यश्चास्या भवेद्भर्ता प्रिया तस्य च सा तदा|
SP1120722: पुत्रप्रजा च भवति न च दुःखं समश्नुते|
SP1120723: एष धर्मो मयाख्यातो युष्माकं लोकमातरः|| ७२||
SP1120730: सनत्कुमार उवाच|
SP1120731: ततस्ताः सहिताः सर्वा देव्यो लोकस्य मातरः|
SP1120732: पूजयित्वा महादेवीमूचुः संहृष्टचेतसः|| ७३||
SP1120741: अहो धर्मस्त्वयाख्यातः सर्वामरनमस्कृते|
SP1120742: यस्य संसेवनात्क्षिप्रं प्राप्यते सुमहत्फलम्|| ७४||
SP1120751: इतो वीक्षामहे देवि गिरेरस्य वनं शुभम्|
SP1120752: पुष्पजातिसमाकीर्णं बहुपक्षिगणावृतम्|| ७५||
SP1120761: तत उत्थाय सा देवी सहिता देवमातृभिः|
SP1120762: मन्दरस्य गिरेर्दिव्यं द्रष्टुं तद्वनमुत्तमम्|
SP1120763: विचचार महायोगा चक्षुर्देहसुखावहम्|| ७६||
SP1120771: मानःशिलानि शृङ्गाणि सौवर्णानि च वीक्षती|
SP1120772: रम्याणि सिततोयानि गिरेः प्रस्रवणानि च|| ७७||
SP1120781: सरांस्युत्पलपूर्णानि वापीश्च सुमनोहराः|
SP1120782: तुतोष गिरिजा दृष्ट्वा पार्श्वसंस्थं च नन्दिनम्|| ७८||
SP1120791: ततः सा देवदेवी तु विचरन्ती महागिरिम्|
SP1120792: अपश्यद्बालसूर्याभं बालाशोकं सुपुष्पितम्|
SP1120793: आताम्रपल्लवशतैः कृत्वाञ्जलिमवस्थितम्|| ७९||
SP1120801: तं दृष्ट्वा गिरिजा देवी परां प्रीतिमगान्मुने|
SP1120802: एष मे तनयः श्लाघ्यो भविता नन्दिवर्धनः|| ८०||
SP1120811: भगवत्यागते ह्येनमनुज्ञाता स्वयम्भुवा|
SP1120812: ग्रहीष्यामि प्रियं पुत्रं बालाशोकं सुपादपम्|| ८१||
SP1120821: अथास्मिन्नन्तरे तत्र उत्पातो ऽतीव भीषणः|
SP1120822: वायुवेगो महानासीद्गिरिवृक्षनिपातनः|| ८२||
SP1120831: अन्धको ऽपि तदा दैत्यः पातालान्मन्दरं ययौ|
SP1120832: प्रह्लादप्रमुखैर्दैत्यैर्दानवैश्च सहस्रशः|
SP1120833: वृतः श्रीमान्महादैत्यः शक्रो देवगणैरिव|| ८३||
SP1120841: सो ऽन्धकः सुमहावीर्यः सखीभिः सहितां तदा|
SP1120842: अपश्यद्देवदेवीं तु वृकः सिंहवधूमिव|| ८४||
SP1120851: दृष्ट्वा भगवतीं देवीं स दैत्यो मूढचेतनः|
SP1120852: प्रणामं नाकरोद्व्यास अन्ववेक्षत केवलम्|| ८५||
SP1120861: तं दृष्ट्वानिमिषं दैत्यं पश्यन्तमचलात्मजाम्|
SP1120862: प्रह्लादस्तु महाबुद्धिरिदमाह वचो ऽर्थवत्|| ८६||
SP1120871: जगतो जननी ह्येषा हिमवद्दुहिताव्यया|
SP1120872: उमेति जगति ख्याता तपोयोगबलान्विता|| ८७||
SP1120881: यस्य पुत्रो ऽभवद्ब्रह्मा सर्वलोकपितामहः|
SP1120882: अस्माकं देवतानां च यो ददाति वराञ्छुभान्|| ८८||
SP1120891: यः स्थितः सर्वमाविश्य भूतग्राममशेषतः|
SP1120892: यस्यात्मना सर्वमिदं धार्यते जगदव्ययम्|| ८९||
SP1120901: पत्नीयं तस्य देवस्य परमेशस्य धीमतः|
SP1120902: शक्ता हीयं जगत्सर्वं क्षणेन दितिजाधिप|| ९०||
SP1120911: दग्धुं वाप्यथवा हर्तुं क्षेप्तुं नरक एव वा|
SP1120912: कथमस्याः प्रणामं त्वं नाकरोर्दैत्य मोहित|| ९१||
SP1120920: सनत्कुमार उवाच|
SP1120921: अथैवं ब्रुवतस्तस्य धर्मयुक्तं सुरद्विषः|
SP1120922: देवीभिः सहिता देवी क्षणेनान्तर्हिता मुने|| ९२||
SP1120931: अथ ते दैत्यपाः सर्वे विचरन्तो महागिरौ|
SP1120932: बहुनिर्झरसंकीर्णे नानापादपसंकुले|| ९३||
SP1120941: तत्र ते विचरन्तस्तु एकस्मिन्निर्झरे स्थितान्|
SP1120942: अपश्यन्सप्तर्षीन्सिद्धान्योगयुक्तान्महामुनीन्|| ९४||
SP1120951: तान्दृष्ट्वा सो ऽन्धको ऽपृच्छत्प्रह्लादमसुरोत्तमम्|
SP1120952: क इमे ऋषयो ह्यत्र किमर्थं चेह संगताः|| ९५||
SP1120960: प्रह्लाद उवाच|
SP1120961: एते ऽन्धक महात्मानो ऋषयः सप्त संगताः|
SP1120962: भृगुरत्रिर्मरीचिश्च विश्वामित्रो ऽङ्गिरास्तथा|| ९६||
SP1120971: भरद्वाजो वसिष्ठश्च योगसिद्धास्तपोधनाः|
SP1120972: नैषां निष्कारणं मन्ये मन्दरागमनं प्रभो|| ९७||
SP1120981: इतो वयमिहैकान्ते स्थित्वा सर्वे ऽसुरेश्वराः|
SP1120982: मतं गृह्णीम सर्वेषां तूष्णीं तिष्ठत दैत्यपाः|| ९८||
SP1120991: ततस्तेषु स्थितेष्वेवमसुरेषु दुरात्मसु|
SP1120992: ऋषयस्ते तपोयुक्ता वाक्यमूचुः परस्परम्|| ९९||
SP1121001: न शुद्धो ऽयं गिरेर्देशो गच्छामो ऽन्यत्र वै द्विजाः|
SP1121002: इहागमो हि दैत्यानां दृश्यते सुदुरात्मनाम्|| १००||
SP1121011: गतास्ते निधनं सर्वे धर्मं ये नाशयन्त्युत|
SP1121012: राज्यार्थं यदि तैः क्रूरैर्न धर्मो नाशितो भवेत्|
SP1121013: नैव ते निधनं सर्वे प्राप्ताः स्युरमरद्विषः|| १०१||
SP1121021: स्वराज्यपरिसंतुष्टा भवेयुर्यदि संस्थिताः|
SP1121022: ते ऽपि सर्वेषु लोकेषु बभुः पूज्याः सुरा इव|| १०२||
SP1121031: असुरान्प्रति सर्वेषामेवं कथयतां तदा|
SP1121032: आगाद्धाता विधाता च कृतान्तश्च महाबलः|| १०३||
SP1121041: तांस्ते संपूज्य विधिवत्परस्परमनुव्रताः|
SP1121042: ऊचुः क्वेदं भवन्तो ऽद्य प्रस्थिता लोकधारिणः|| १०४||
SP1121050: विधातोवाच|
SP1121051: ब्रह्मलोकादुपावृत्ता वयमद्य गता द्विजाः|
SP1121052: ब्रह्मणा स्म समाज्ञाप्ताः कश्यपस्य ततो ऽन्तिकम्|| १०५||
SP1121061: अथाब्रवीन्मुनिं धाता कश्यपं तं प्रजापतिम्|
SP1121062: यत्त्वया ज्ञापितो ब्रह्मन्ब्रह्मा लोकपितामहः|| १०६||
SP1121071: असुरा अपि मे पुत्रा देवाश्चापि प्रियाः प्रभो|
SP1121072: तेषां नैव यथान्योन्यं वैरं स्याल्लोकभावन|
SP1121073: तथा कुरु सुरश्रेष्ठ भवेयं निर्वृतस्ततः|| १०७||
SP1121081: तत्राहं ब्रह्मणाज्ञाप्तो ब्रवीमि त्वां महामुने|
SP1121082: देवासुरं यथावृत्तमन्योन्यं सख्यमेव च|
SP1121083: अमृतोत्पादनं चैव राज्यसंस्थां च कृत्स्नशः|| १०८||
SP1121091: तस्यैवं पृच्छतः सर्वं भविष्यमृषिसत्तमः|
SP1121092: कथयामास भूतार्थं देवासुरविचेष्टितम्|| १०९||
SP1121101: निवेद्य तस्य तत्सर्वं ब्रह्मणा प्रेषिता वयम्|
SP1121102: इहागता भगवतीं द्रष्टुं हिमगिरेः सुताम्|| ११०||
SP1121110: सनत्कुमार उवाच|
SP1121111: तानेवंवादिनो भूयो ऋषयस्ते तपोधनाः|
SP1121112: पप्रच्छुर्नियतात्मानः सर्व एव तदा मुने|| १११||
SP1121121: देवासुराणां यद्वृत्तं भविष्यं कथितं शुभाः|
SP1121122: तद्वयं श्रोतुमिच्छामो यदि वो ऽनुग्रहे मतिः|| ११२||
SP1121131: किं च विज्ञापिता देवी युष्माभिः सुरसत्तमाः|
SP1121132: कथयध्वं च तत्सर्वं यद्यनुग्राह्यता हि नः|| ११३||
SP1121141: तेषां तद्वचनं श्रुत्वा त्रयस्ते देवसत्तमाः|
SP1121142: त्वमाचक्ष्व कृतान्तेति वाक्यमूचुर्महाबलाः|| ११४||
SP1121151: ततः स तेषां बहुचित्रकारणं यथाभविष्यं कथयांचकार|
SP1121152: सुरासुराणां जयतां च कारणं पुरा विधात्रा विहितं यथार्थवत्|| ११५||
SP1129999: इति स्कन्दपुराणे द्वादशोत्तरशतो ऽध्यायः||