Skandapurāṇa Adhyāya 110

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1100010: सनत्कुमार उवाच|
SP1100011: विनिर्गम्य कुमारो ऽपि रम्यात्स्वभवनात्तदा|
SP1100012: रराम गणपैः सार्धं क्रीडनैर्बहुभिः शुभैः|| १||
SP1100021: आनयामास तं चापि वराहस्य सुतं प्रभुः|
SP1100022: वृकं विमुच्य पाशैश्च उत्ससर्ज हसन्विभुः|| २||
SP1100031: उत्सृष्टं धावमानं च पुनर्जग्राह वेगितम्|
SP1100032: पुनरेवोत्सृजच्चैनं जग्राह च पुनः पुनः|
SP1100033: एवं रराम तेनासौ वराहो ऽभ्यागमच्च तम्|| ३||
SP1100041: शिलां गृहीत्वा महतीं संक्रुद्धो ऽन्तकसंनिभः|
SP1100042: चिक्षेप कार्त्तिकेयाय नादयञ्जलदो यथा|| ४||
SP1100051: तामापतन्तीं बहुधा नदन्तीं विहायसा मृत्युसमानरूपाम्|
SP1100052: जग्राह वेगेन महातिवेगां कोकामुखः प्रज्वलितामिवोल्काम्|| ५||
SP1100061: ततश्चक्रं सहस्रारं युगान्ताग्निसमप्रभम्|
SP1100062: शिलाग्रहणव्यग्राय गणाय व्यसृजत्प्रभुः|| ६||
SP1100071: तदन्तकप्रतीकाशं चक्रं सर्वसुरारिहम्|
SP1100072: विवेश न गणं तूर्णं ततस्तद्व्यनिवर्तत|| ७||
SP1100081: तन्निवृत्तं पुनश्चक्रमकृत्वा कार्यमुज्ज्वलम्|
SP1100082: न जग्राह तदा विष्णुरवमेने च तत्तदा|| ८||
SP1100091: तत्तदानर्चितं तेन चक्रं दानवघातिना|
SP1100092: विष्णुना प्रययौ क्षिप्रं स्वमेव भवनं प्रति|| ९||
SP1100101: तस्मिंश्चक्रे तदा याते भगवान्नन्दिवर्धनः|
SP1100102: वृक्षमुत्पाट्य वेगेन कुमारमभिजघ्निवान्|| १०||
SP1100111: अगण्य तं प्रहारं तु भगवाननलात्मजः|
SP1100112: शक्तिं संवर्तिकां क्रोधाच्चिक्षेप च ननाद च|| ११||
SP1100121: सा दहन्तीव तेजांसि नदन्ती बहुधा तदा|
SP1100122: हन्तुं वराहं प्रययौ शक्तिर्विद्युदिवाशुगा|| १२||
SP1100131: तामापतन्तीं वेगेन भगवान्नन्दिवर्धनः|
SP1100132: जघानास्त्रैर्बहुविधैर्नादयन्सिंहराडिव|| १३||
SP1100141: तानि सा भस्मसात्कृत्वा शक्तिः संवर्तिका शुभा|
SP1100142: विवेश हृदयं तस्य कामिनीव दृढं प्रिया|| १४||
SP1100151: स तया भिन्नहृदयो योगेन परमेण ह|
SP1100152: योगीव देहं संत्यज्य देहेनान्येन तस्थिवान्|| १५||
SP1100161: सो ऽन्यद्देहं समास्थाय पौराणं सुरसत्तमः|
SP1100162: देवैः सर्वैः परिवृतो जगाम भवमन्दिरम्|| १६||
SP1100171: तत्रापश्यन्महादेवं जटामुकुटधारिणम्|
SP1100172: चन्द्रलेखांशुजालौघनिरस्ततिमिरोत्करम्|| १७||
SP1100181: भद्रपीठे समासीनं काञ्चने मणिभूषणे|
SP1100182: भ्राजमानं श्रियात्यर्थं पार्वत्या पार्श्वसंस्थया|| १८||
SP1100191: गणैश्च विविधाकारैर्बहुभिः कामरूपिभिः|
SP1100192: नृत्तगीतप्रियैर्नित्यं समन्तात्परिवारितम्|| १९||
SP1100201: तं दृष्ट्वा शंकरं विष्णुः प्रसन्नेनान्तरात्मना|
SP1100202: तुष्टाव विविधैः स्तोत्रैरिदं चोवाच सुस्वरम्|| २०||
SP1100211: वाराहं रूपमास्थाय त्वत्तेजोबृंहितेन मे|
SP1100212: रणे विक्रम्य भगवन्हिरण्याक्षो निषूदितः|| २१||
SP1100221: त्वं देव कारणं नित्यं संभूतेः प्रलयस्य च|
SP1100222: त्वया सर्वमिदं व्याप्तं जगदव्यक्तमूर्तिना|| २२||
SP1100231: त्वत्प्रसादेन देवेश ब्रह्माहं शक्र एव च|
SP1100232: पूज्याः स्म लोके सततं तथैवान्ये दिवौकसः|| २३||
SP1100241: त्वयि प्रीते महादेव सर्वे प्रीता वयं प्रभो|
SP1100242: त्वयि क्रुद्धे च नाशो नो भविता नात्र संशयः|| २४||
SP1100251: स्तुवन्तमेवं भगवान्विष्णुं चन्द्रार्धशेखरः|
SP1100252: सहस्रसूर्यतेजस्कः प्रीतः प्रोवाच शंकरः|| २५||
SP1100261: भक्त्या तुष्टो ऽस्मि ते विष्णो देवकार्योद्यमेन च|
SP1100262: वरं वरय भद्रं ते यस्ते मनसि वर्तते|| २६||
SP1100270: विष्णुरुवाच|
SP1100271: यदि तुष्टो ऽसि नो देव यदि देयो वरश्च नः|
SP1100272: ततः पाशुपतं दिव्यं व्रतमादेष्टुमर्हसि|| २७||
SP1100281: यदाश्रित्य वयं सर्वे सशक्राः सर्वकामिकम्|
SP1100282: युद्धे जेष्याम दैतेयान्दुःखशोकविवर्जिताः|| २८||
SP1100290: देव उवाच|
SP1100291: अहं वः कथयिष्यामि गुह्यमेतत्सनातनम्|
SP1100292: व्रतं पाशुपतं दिव्यं येन कामानवाप्स्यथ|| २९||
SP1100301: इत्युक्त्वा देवदेवेशो देवानां हितकाम्यया|
SP1100302: ययौ दिवमथामन्त्र्य देवीं गिरिवरात्मजाम्|| ३०||
SP1100311: अथ हिमगिरितुल्यचारुमूर्तिं वृषभवरं भगवांस्तदाभिरूढः|
SP1100312: सुरगणसहितः प्रभुः सुमेरुं व्रतमुपदेष्टुमना जगाम शर्वः|| ३१||
SP1109999: इति स्कन्दपुराणे दशोत्तरशतो ऽध्यायः||