Skandapurāṇa Adhyāya 109

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1090010: सनत्कुमार उवाच|
SP1090011: तस्य कालेन महता रमतः शक्तिनन्दन|
SP1090012: भार्यायां चित्रलेखायां वृको नामाभवत्सुतः|| १||
SP1090021: स वृको बलवान्नित्यं विचरन्पृथिवीमिमाम्|
SP1090022: नर्दमानो ऽवधील्लोके भूतानि शतशो महान्|| २||
SP1090031: अथाससाद शैलेन्द्रं हिमवन्तं महागिरिम्|
SP1090032: गौरीकूटसमीपे च कार्त्तिकेयालयं शुभम्|| ३||
SP1090041: तमजानंस्तदाभ्येत्य बलेनाविनयेन च|
SP1090042: नादयानो द्रुमाञ्छुभ्रान्रत्नहेमविभूषितान्|
SP1090043: सर्वर्तुपुष्पफलदान्सर्वकामप्रदानपि|| ४||
SP1090051: शिलामणिमयाञ्छुभ्राञ्छातकुम्भमयाञ्छुभान्|
SP1090052: हरितालमयांश्चान्यांस्तथा मानःशिलाचलान्|
SP1090053: उत्पाट्योत्पाट्य वेगेन बभञ्ज रुषितो यथा|| ५||
SP1090061: स गर्जमानः सततं गजो मत्त इवापरः|
SP1090062: बभञ्ज तद्वनं शुभ्रं कार्त्तिकेयस्य धीमतः|| ६||
SP1090071: तस्य गर्जितशब्देन वनभङ्गस्वनेन च|
SP1090072: स्कन्दस्य गणपः शूरो निर्जगाम निशामयन्|| ७||
SP1090081: कोकवक्त्र इति ख्यातो दृढं स्कन्दस्य वल्लभः|
SP1090082: महात्मा बलसंपन्नो गत्वा वृकमवैक्षत|| ८||
SP1090091: स तं दृष्ट्वा महाकायं तरुणं प्रियदर्शनम्|
SP1090092: जीमूतमिव नर्दन्तं किंचित्प्रकुपिताननम्|
SP1090093: उवाच वचनं हृष्टः कोकवक्त्रो हसन्निव|| ९||
SP1090101: कस्य त्वमिह संप्राप्तो बालो देवगृहं शुभम्|
SP1090102: न जानीषे किमेतच्च स्कन्दस्य सुमहात्मनः|| १०||
SP1090111: वेश्म देवैः सगन्धर्वैः सयक्षोरगपन्नगैः|
SP1090112: कृतं दयितमत्यर्थं गणेशैश्चापि पूजितम्|| ११||
SP1090121: कुमारो मन्दरं यातः सर्वैः सह गणेश्वरैः|
SP1090122: रक्षार्थं मामिह स्थाप्य वारयामि ततो हि ते|| १२||
SP1090131: तुष्टो ऽस्मि तव रूपेण बलेन वपुषा तथा|
SP1090132: उपारमस्व तेन त्वां ब्रवीमि सुमहाबल|
SP1090133: अहं करिष्ये यद्भग्नं तथैव पुनरेव हि|| १३||
SP1090141: वक्ष्ये देवं च तं सम्यक्त्वदर्थं सूकरेश्वर|
SP1090142: यथा न कुप्यते तुभ्यं प्रवरं त्वां करोति च|| १४||
SP1090150: सनत्कुमार उवाच|
SP1090151: तस्य तद्वचनं श्रुत्वा वृकः संरक्तलोचनः|
SP1090152: उवाच कोकवदनमिदं मृगपतिस्तदा|| १५||
SP1090161: न बिभेमि कुमारस्य तव वा पापचेतसः|
SP1090162: बले मम कुमारो ऽसौ न तुल्यः सगणेश्वरः|| १६||
SP1090171: यद्वो बलं च दर्पं च तत्कुरुध्वमशङ्किताः|
SP1090172: नामावशेषमेतद्वः कर्ताहं वनमन्तशः|| १७||
SP1090180: सनत्कुमार उवाच|
SP1090181: ततः स वृक्षमुत्पाट्य हैमं वैडूर्यपल्लवम्|
SP1090182: कोकवक्त्राय चिक्षेप ननाद च यथा वृषः|| १८||
SP1090191: ततः प्रहस्य कोकास्यस्तमेवोद्गृह्य पादपम्|
SP1090192: वृकं तं तेन संक्रुद्धः शिरस्यभिजघान ह|| १९||
SP1090201: स तेन सुप्रहारेण भ्रमित्वा मण्डलं वृकः|
SP1090202: पपात भूमौ निःसंज्ञो यथा शक्रध्वजो महान्|| २०||
SP1090211: ततस्तं पतितं दृष्ट्वा कोकास्यः प्रहसंस्तदा|
SP1090212: बबन्ध पाशैर्बहुभिर्वेश्म चैव प्रवेशयत्|| २१||
SP1090221: तं बद्धं पतितं दृष्ट्वा सहायास्तस्य ते मृगाः|
SP1090222: प्रद्रुताः सहसा सर्वे भयार्ता जीवितैषिणः|| २२||
SP1090231: अथागात्तेन कालेन गणपैर्बहुभिर्वृतः|
SP1090232: कार्त्तिकेयो मयूरेण कूजमानेन सानुगः|| २३||
SP1090241: तस्य तत्कथयामास कोकवक्त्रो गणेश्वरः|
SP1090242: वृकं च दर्शयामास पाशैर्बद्धं महाबलम्|| २४||
SP1090250: कोकवक्त्र उवाच|
SP1090251: भगवन्वराहरूपस्य सुतः श्रीमान्वृकः किल|
SP1090252: हिरण्याक्षो हतो येन दानवो देवकण्टकः|| २५||
SP1090261: बभञ्जायं सुदुष्टात्मा सहितो ऽन्यैर्वनं तव|
SP1090262: ततः पाशैर्मया बद्धः क्रियतामस्य यत्परम्|| २६||
SP1090270: स्कन्द उवाच|
SP1090271: नायं शक्यो मयाद्येह मोक्तुं मृगकुलाधमः|
SP1090272: मुक्ते वक्तव्यता लोके भविष्यति न संशयः|| २७||
SP1090281: देवो मां वक्ष्यते व्यक्तं स्कन्दो भीतो न संशयः|
SP1090282: यो मुमोच सुतं तस्य वराहस्य कृतागसम्|| २८||
SP1090291: उक्तो गतश्चाहमद्य स्थाणुना परमात्मना|
SP1090292: मा क्षमेथा वराहस्य तनुं त्वां सो ऽह्वयेद्युधि|| २९||
SP1090301: इयं च मम तेनाद्य शक्तिर्दत्तातिभास्वरा|
SP1090302: संवर्तिकेति विख्याता सर्वास्त्रबलनाशनी|| ३०||
SP1090311: सो ऽयं दुरात्मा दुर्वृत्तः सर्वलोकप्रबाधकः|
SP1090312: गृह्यतां बध्यतां चैव क्षिप्रमाविष्कृतं बलात्|| ३१||
SP1090320: सनत्कुमार उवाच|
SP1090321: तत एनं बहिः सर्वे स्कन्दस्य गणनायकाः|
SP1090322: बद्ध्वा बहुविधैः पाशैर्यातयन्त सहस्रशः|| ३२||
SP1090331: स यात्यमानो दुःखार्तो विललाप यथा नरः|
SP1090332: निरयस्थो दुराचारः कर्मभिः स्वैः सुपाशितः|| ३३||
SP1090341: तं यात्यमानं संदृश्य नारदः सुमहातपाः|
SP1090342: गत्वा न्यवेदयत्तस्य वराहस्यामितात्मनः|| ३४||
SP1090351: एष पुत्रो वृकस्तुभ्यं बद्धः पाशैरनेकशः|
SP1090352: यात्यते कार्त्तिकेयस्य किंकरैर्दुष्कृती यथा|| ३५||
SP1090361: न नाम तव देवस्य लोकार्थायोद्यतस्य च|
SP1090362: करोति संनतिं स्कन्दो बालभावान्निरानमः|| ३६||
SP1090371: अथवा स्वबलं स्कन्दो मन्यते बलवत्तरम्|
SP1090372: त्वत्तो ऽत्मनस्ततः पुत्रं तव पाशैर्बबन्ध ह|| ३७||
SP1090381: तद्यावदेव तं नासौ प्रमापयति देवप|
SP1090382: तावदेव भवान्गत्वा विमोचयतु माचिरम्|| ३८||
SP1090390: सनत्कुमार उवाच|
SP1090391: नारदस्य वचः श्रुत्वा वराहो नन्दिवर्धनः|
SP1090392: जीमूत इव कालान्ते ननाद रुषिताननः|| ३९||
SP1090401: तस्य क्रोधात्तदा वह्निर्नेत्राभ्यामतिदीप्तिमान्|
SP1090402: निश्चक्राम जगत्सर्वं संहरन्निव तेजसा|| ४०||
SP1090411: उत्थाय चासनाद्देवः सहसैवानिरीक्षणः|
SP1090412: प्रतस्थे शिखरं दिव्यं गौर्या मृगपतिः स्वयम्|| ४१||
SP1090421: स कम्पयन्महीं सर्वां स्तूयमानो महात्मभिः|
SP1090422: उत्पातान्भयदान्पश्यञ्जगामाविनिवारितः|| ४२||
SP1090431: गच्छतस्तस्य देवस्य पन्थानं भुजगो ऽच्छिनत्|
SP1090432: दंष्ट्रा च वृक्षमापात्य पपात धरणीतले|| ४३||
SP1090441: रुधिरं चास्रवद्वक्त्राद्धृदयं च प्रवेपत|
SP1090442: भयं चास्याभवत्तत्र वेगो येनाभिहन्यते|| ४४||
SP1090451: वायवः प्रतिलोमाश्च उरसा चापतद्भुवि|
SP1090452: स्वेदश्चास्य प्रियं स्मृत्वा तदात्यर्थमजायत|| ४५||
SP1090461: एतांश्चान्यांश्च बहुश उत्पातान्भयसूचकान्|
SP1090462: अनादृत्य मृगेन्द्रो ऽसौ जगामैव महाबलः|| ४६||
SP1090471: तं प्रस्थितमभिप्रेक्ष्य निमित्तानि च सुव्रत|
SP1090472: पूजां सज्जामकुर्वन्त देवलोके दिवौकसः|| ४७||
SP1090481: स सिद्धसंघैरनुगम्यमानो यक्षैश्च गन्धर्वमहोरगैश्च|
SP1090482: रक्षोगणैश्चारणकिंनरैश्च जगाम गौरीशिखरं महात्मा|| ४८||
SP1099999: इति स्कन्दपुराणे नवोत्तरशतो ऽध्यायः||