Skandapurāṇa Adhyāya 107

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1070010: सनत्कुमार उवाच|
SP1070011: तमापतन्तं वेगेन न शूलं दृष्टवान्मृगः|
SP1070012: दैत्यैः सर्वैः समासक्तः सर्वप्राणिभयंकरम्|| १||
SP1070021: अलक्षितेन तेनासौ शूलेनादितिनन्दनः|
SP1070022: विभिन्नो हृदये व्यास मृतकल्पः पपात च|| २||
SP1070031: ततो हाहाकृतं भूतैरदृश्यैर्मुनिसत्तम|
SP1070032: उद्वेलाः सागराश्चासन्भास्करश्चाप्रभो ऽभवत्|| ३||
SP1070041: उल्काः पेतुश्च सर्वत्र म्लानमाल्याः सुराभवन्|
SP1070042: ग्रहाणामभवद्युद्धं विमानानि च पेतिरे|| ४||
SP1070051: जजपुर्मुनयः सर्वे वराहे पतिते तदा|
SP1070052: महादेवं नमस्कृत्य ब्रह्मा सस्मार तं तदा|| ५||
SP1070061: ततो वितिमिरं सर्वमभवत्पूर्ववच्छुभम्|
SP1070062: प्रकृतिस्थं जगच्चाभूद्वराहश्चोदतिष्ठत|
SP1070063: तेजो माहेश्वरं दिव्यं विवेश मधुसूदनम्|| ६||
SP1070071: सो ऽप्यायिततनुस्तेन शूलं निष्कृष्य माधवः|
SP1070072: सहस्रानलसंकाशो बभूव स महाबलः|| ७||
SP1070081: ततस्तेनैव शूलेन तं दैत्यं देवनन्दनः|
SP1070082: जघान हृदये क्रुद्धः क्रौञ्चं शक्त्या यथा गुहः|| ८||
SP1070091: स भिन्नहृदयस्तेन वराहेण महासुरः|
SP1070092: नार्तिमानभवद्व्यास कृच्छ्रे विद्वानिव स्थितः|| ९||
SP1070101: मध्येभिन्नः स तं शूलं निष्कृष्य च विसृज्य च|
SP1070102: खड्गं निष्कृष्य वेगेन वराहं मूर्ध्न्यताडयत्|| १०||
SP1070111: स तेन सुप्रहारेण वराहो नन्दिवर्धनः|
SP1070112: नार्तिमानभवद्व्यास बभूव रुधिरप्लुतः|| ११||
SP1070121: नानाधातुविचित्रो ऽसौ हिमवानिव पर्वतः|
SP1070122: बभौ वराहो देवात्मा सर्वासुरविमर्दनः|| १२||
SP1070131: पुनराहन्तुकामस्य तस्य दैत्यस्य सुव्रत|
SP1070132: अपाहस्तप्रहारेण खड्गं हस्तादपातयत्|| १३||
SP1070141: अकुर्वतां ततो युद्धं नियुद्धकुशलावुभौ|
SP1070142: तौ गजाविव संक्रुद्धौ महिषाविव दर्पितौ|| १४||
SP1070151: सिंहाविव च नर्दन्तौ संक्रुद्धौ वृषभाविव|
SP1070152: शरभाविव चायस्तौ शार्दूलाविव निर्घृणौ|| १५||
SP1070161: परस्परमयुध्येतां परस्परजयैषिणौ|
SP1070162: अङ्कुशैर्हस्तयोक्त्रैश्च क्षेपणैरपसर्पणैः|
SP1070163: मण्डलैश्च पुनश्चित्रैः कर्षणैरपकर्षणैः|| १६||
SP1070171: तलैश्च मुष्टिभिश्चैव भुजैः सचरणैरपि|
SP1070172: नखैश्च दशनैश्चैव तथान्यैश्च महाबलौ|| १७||
SP1070181: तयोरेवमभूद्युद्धमुभयोर्देवदैत्ययोः|
SP1070182: अहानि दश चाष्टौ च तथान्यानि चतुर्दश|| १८||
SP1070191: अन्यत्सहस्रमेवासीद्वर्षाणां तच्च मानुषम्|
SP1070192: एष कालो भवेत्तत्र ततो दैत्यो ऽबलो ऽभवत्|| १९||
SP1070201: तं हीयमानमालक्ष्य दैत्याधिपतिमूर्जितम्|
SP1070202: आकाशे वागुवाचेदमशरीरातिसुस्वरा|| २०||
SP1070211: शृणु देव वराहेदं श्रुत्वा चैव समाचर|
SP1070212: अशक्यो ऽयं त्वया ह्येवं हन्तुं दैत्यो महाबलः|| २१||
SP1070221: अबलो ऽयं कृतः क्रूरो ध्रुवं माहेश्वरेण हि|
SP1070222: तेजसा पश्य चैवैनमेष कालो ऽस्य वर्तते|| २२||
SP1070231: मुक्त्वैनं दैत्यराजानं चक्रेण विनिसूदय|
SP1070232: माहेश्वरेण वैकुण्ठ ततो मृत्युमवाप्स्यति|| २३||
SP1070240: सनत्कुमार उवाच|
SP1070241: ततस्तमभिसंश्रुत्य भगवान्नन्दिवर्धनः|
SP1070242: मुमोच दैत्यराजानं पादेनाहत्य वक्षसि|| २४||
SP1070251: स मुक्तस्तेन देवेन विबभौ दैत्यपुंगवः|
SP1070252: भुक्तमुक्तो यथा सूर्यः सैंहिकेयेन राहुणा|| २५||
SP1070261: भगवानपि दीप्यन्तं श्रिया दैत्यं समीक्ष्य तम्|
SP1070262: सस्मार तत्तदा चक्रं नमस्कृत्वा पिनाकिने|| २६||
SP1070271: ततः सर्वा दिशो व्यास वह्निकुण्डनिभा बभुः|
SP1070272: शब्दश्च सुमहानासीद्युगान्ताम्बुदसंनिभः|| २७||
SP1070281: सिद्धाः पेतुश्च मेदिन्यां देवांश्च भयमाविशत्|
SP1070282: स्वस्त्यस्तु सर्वभूतानामित्यूचुर्मुनयस्तदा|| २८||
SP1070291: सागराश्चावशुष्यन्ति विनेशुर्नागपक्षिणः|
SP1070292: दैत्याश्च दानवाश्चैव सर्वे ते विविशुः पुरम्|| २९||
SP1070301: भयत्रस्तानि भूतानि उल्काः पेतुर्नभस्तलात्|
SP1070302: आगच्छति युगान्ताग्निकालचक्रे सुभास्वरे|| ३०||
SP1070311: क्षुरान्तं तन्महाचक्रमब्जं जलचरान्तकम्|
SP1070312: दुर्निरीक्ष्यं सर्वघाति अभेद्यमविघाति च|| ३१||
SP1070321: तथाप्रतिहतं दिव्यं मोहनं सर्वदेहिनाम्|
SP1070322: करमागाद्वराहस्य शताशनिसमस्वनम्|| ३२||
SP1070331: तमापतन्तं संवीक्ष्य सर्वभूतानि सर्वतः|
SP1070332: पेतुर्भूमौ महाघोरमपश्यन्न च किंचन|| ३३||
SP1070341: सो ऽपि देवस्तदा कृत्वा रूपं सुमहदव्ययम्|
SP1070342: त्रैलोक्यव्यापि चिक्षेप दानवं प्रति नादयन्|| ३४||
SP1070351: तद्युगान्तानलप्रख्यं क्षुरान्तं स्फोटयन्नभः|
SP1070352: जगाम दानवं क्षिप्रं दिशः सर्वा दहन्निव|| ३५||
SP1070361: तं स दानवशार्दूल उपयान्तं महारवम्|
SP1070362: जघानास्त्रैर्बहुविधैरव्यथः शक्तिनन्दन|| ३६||
SP1070371: तच्च तानि महाचक्रमस्त्राण्यनलसंनिभम्|
SP1070372: चकार भस्मसाद्व्यास जगाम च विनादयत्|| ३७||
SP1070381: अथ मायां समासर्जत्तेजसीं पार्थिवामपि|
SP1070382: वायव्यां वारुणीं चैव तामसीमिन्द्रियात्मिकाम्|| ३८||
SP1070391: तथैवोत्पातिकीं मायां मोहनीं स्तम्भनीमपि|
SP1070392: निवर्तनीं जम्भनीं च चकारान्याश्च संयुगे|| ३९||
SP1070401: ताः सर्वास्तत्तदा चक्रं महद्भीममनाशयत्|
SP1070402: गत्वा तस्य शिरः कायादुन्ममाथ यथाचलम्|| ४०||
SP1070411: तत्तेन कृत्तं सुमहच्छिरो ऽग्र्यं व्यात्ताननाग्निप्रतिमोग्रनेत्रम्|
SP1070412: दंष्ट्रालमत्यद्भुतभीमनादं पपात मेरोरिव शृङ्गमुच्चम्|| ४१||
SP1070421: रथाङ्गनिष्पीतवपुर्विरागं न भाति तद्वक्त्रमतीव दीनम्|
SP1070422: निशाप्रहाणौ विनिवृत्तरश्मि बिम्बं यथा चन्द्रमसो विशोभम्|| ४२||
SP1070431: तद्दन्तपङ्क्तिच्छदमादशानं मुहुश्च दन्तान्यपि संदशानम्|
SP1070432: पपात दैत्यस्य शिरो निकृत्तं यथा गिरेः शृङ्गमतिप्रवृद्धम्|| ४३||
SP1079999: इति स्कन्दपुराणे सप्तोत्तरशतो ऽध्यायः||