Skandapurāṇa Adhyāya 105

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1050010: सनत्कुमार उवाच|
SP1050011: स धन्वी कवची भूत्वा बद्धगोधाङ्गुलित्रवान्|
SP1050012: बद्धपृष्ठेषुधी चैव शरी खड्गी महाबलः|| १||
SP1050021: हरिश्मश्रुश्चतुर्दंष्ट्रः शङ्कुकर्णो महाहनुः|
SP1050022: आजानुबाहुर्दीर्घाक्षो न्यग्रोधपरिमण्डलः|| २||
SP1050031: हस्तयोः पद्मशंखौ च चक्रमत्स्यौ च पादयोः|
SP1050032: दधानो जालहस्तश्च जालपादो ऽश्वमेहनः|| ३||
SP1050041: बालादित्यनिभाक्षश्च अञ्जनाचलसंनिभः|
SP1050042: स निर्ययौ तदा व्यास भृकुटीभूषिताननः|| ४||
SP1050051: द्वार्यपश्यच्च सूतेन रथं समुपकल्पितम्|
SP1050052: सहस्रनल्वमात्रं च हयैर्दिव्यैः समन्वितम्|| ५||
SP1050061: सहस्रैर्दशभिर्व्यास सर्वोपकरणान्वितम्|
SP1050062: खट्वाङ्गेन च संयुक्तं ध्वजेनादित्यवर्चसा|| ६||
SP1050071: आरुरोह जयेत्युक्तो दानवैर्बहुभिस्तदा|
SP1050072: दिवाकरो रथं यद्वद्भगवांस्तेजसां पतिः|| ७||
SP1050081: विबभौ स तदारूढो रथस्थो दितिनन्दनः|
SP1050082: सौवर्णे भाजने यद्वदिन्द्रनीलं समर्पितम्|| ८||
SP1050091: किरीटं त्वाबभौ तस्य शिरःस्थं सुमहाद्युति|
SP1050092: यथाञ्जनगिरेः शृङ्गे दावाग्निः समवस्थितः|| ९||
SP1050101: संचोदयच्च यन्तारं स दैत्यो गमनं प्रति|
SP1050102: यथातुरतरं व्यास व्याधिर्वै मरणं प्रति|| १०||
SP1050111: यन्ता प्रचोदितस्तेन तस्याश्वान्संप्रचोदयत्|
SP1050112: धात्रा प्रचोदितो यद्वज्जीवितानि नृणां यमः|| ११||
SP1050121: जवनास्ते तदा जैत्रमूहुस्तं स्यन्दनं हयाः|
SP1050122: धर्माधर्मौ नरं यद्वन्मृतं संयमनं प्रति|| १२||
SP1050131: तस्य पार्श्वे ऽभवद्व्यास विप्रचित्तिरवस्थितः|
SP1050132: केतोरिव यथा व्योम्नि प्रतिकेतुरवस्थितः|| १३||
SP1050141: शङ्खभेरीमृदङ्गैश्च मुरजैर्वेणुभिस्तथा|
SP1050142: वाद्यमानैर्ययौ राजा हिरण्याक्षो ऽश्मकात्पुरात्|| १४||
SP1050151: अग्रतः पृष्ठतश्चैव पार्श्वयोरुभयोरपि|
SP1050152: जग्मुः सर्वे ऽसुरा व्यास भास्करस्य यथा ग्रहाः|| १५||
SP1050161: निर्गच्छमानः स्वपुराच्छकुन्तान्भयशंसिनः|
SP1050162: अपश्यद्व्यास दैत्येन्द्रो न च तानकरोद्धृदि|| १६||
SP1050171: अच्छिनत्तस्य पन्थानं भुजंगः कृष्णदेहवान्|
SP1050172: गृध्रश्च रक्तवक्त्रो ऽस्य निलिल्ये ध्वजमूर्धनि|| १७||
SP1050181: गृध्रश्चक्रायते चास्य रथोपरि च गच्छतः|
SP1050182: ध्वजश्चाभज्यत महान्रथस्य सुमहाप्रभः|| १८||
SP1050191: वामं चाङ्गं स्फुरत्यस्य शरीरस्य मुहुर्मुहुः|
SP1050192: हेषन्ते न हया दीना हस्तिनो विमदाभवन्|| १९||
SP1050201: एतांश्चान्यांश्च सुबहून्स दैत्यो मुनिसत्तम|
SP1050202: अवेक्षत निमित्तानि भयदान्यात्मनो ऽसकृत्|| २०||
SP1050211: नातिदूरे स निर्गम्य नगरस्य मृगेश्वरम्|
SP1050212: अपश्यद्दानवः संख्ये युध्यमानमभीतवत्|| २१||
SP1050221: सो ऽपि दैत्यवरः श्रीमान्क्रोधात्संरक्तलोचनः|
SP1050222: विस्फारयन्महाचापं रथेनाभ्यपतद्बली|| २२||
SP1050231: वराहो ऽपि महाबाहुर्विद्राव्य दितिनन्दनान्|
SP1050232: सुवर्णाक्षं प्रति रुषा वेगेनैवाभ्यधावत|| २३||
SP1050241: तस्यापतत एवाशु दानवः सुमहाबलः|
SP1050242: सर्वसंधिषु तीक्ष्णाग्रांश्चखान सुबहूञ्छरान्|| २४||
SP1050251: सायकैस्तैर्विनिर्भिन्नः सर्वसंधिषु सुव्रत|
SP1050252: न चचाल मृगेन्द्रो ऽसौ विष्टब्धः समतिष्ठत|| २५||
SP1050261: तं स्तम्भितं तदा व्यास दृष्ट्वा देवा महाबलम्|
SP1050262: विशल्यकरणैर्मन्त्रैर्विशल्यमभिचक्रिरे|| २६||
SP1050271: स विशल्यस्तदा देवैः कृतो मृगपतिर्महान्|
SP1050272: पुनर्वेगं महत्कृत्वा जगाम दितिजं प्रति|| २७||
SP1050281: स वध्यमानो बहुभिः शरैर्मृगपतिर्महान्|
SP1050282: दैत्येन्द्ररथमासाद्य इयेष रथमव्ययः|| २८||
SP1050291: ग्रहीतुं नादयन्व्यास बहुधा विश्वरूपधृक्|
SP1050292: यन्ता च मण्डलं कृत्वा भ्रामयामास तं रथम्|| २९||
SP1050301: प्रसारितकरं दैत्यो मृगं तं सुमहाबलम्|
SP1050302: बबन्धास्त्रेण नागानां स बद्धो न्यपतद्भुवि|| ३०||
SP1050311: पतितं तं च दैत्येन्द्रा विविधायुधपाणयः|
SP1050312: विजघ्नुर्भृशमायस्ता बहुधा क्रोधमूर्छिताः|| ३१||
SP1050321: तं बद्धं वध्यमानं च पतितं नन्दिवर्धनम्|
SP1050322: गरुत्मान्भुजगेन्द्रेभ्यः क्षिप्रमेव व्यमोचयत्|| ३२||
SP1050331: मुक्तश्च स तदोत्पत्य द्रावयाणो दितेः सुतान्|
SP1050332: हिरण्याक्षरथं तूर्णमभ्यधावन्महायशाः|| ३३||
SP1050341: तं धावन्तं पुनर्दैत्यः शरेणानतपर्वणा|
SP1050342: विव्याध हृदये व्यास नर्दमानो यथाम्बुदः|| ३४||
SP1050351: मृगेश्वरश्च भिन्नो ऽसौ हृदये मोहमास्थितः|
SP1050352: पपात भूमौ निर्वृत्ते शक्रध्वज इवोत्सवे|| ३५||
SP1050361: ततो हाहाकृतं सर्वैः समूढैर्देवपुंगवैः|
SP1050362: ऋषयस्तुष्टुवुश्चैनं भास्करश्चाप्रभो ऽभवत्|| ३६||
SP1050371: अथ सो ऽप्यायितस्तत्र ऋषिभिर्ब्रह्मवित्तमैः|
SP1050372: प्रतिलभ्य तदा संज्ञामिदं वचनमब्रवीत्|| ३७||
SP1050381: आप्याययध्वं मां क्षिप्रं मूढो ऽहं सर्वशः सुराः|
SP1050382: नाल्पवीर्येण शक्यो ऽयं दैत्यो योधयितुं रणे|| ३८||
SP1050391: ततस्ते देवताः सर्वे ऋषयश्च तपोधनाः|
SP1050392: तपसा स्वेन तं देवं सर्व एवाभ्यपूरयन्|| ३९||
SP1050401: तस्य त्वाप्याय्यमानस्य ऋषिभिर्देवतैश्च ह|
SP1050402: बभौ रूपं युगान्ताग्निकालमृत्युसमप्रभम्|| ४०||
SP1050411: स दीप्यमानो विबभौ महात्मा देवैश्च सर्वै ऋषिभिः स्तुतश्च|
SP1050412: दीप्तस्तदा भास्करसप्तकल्पो लोकान्दहिष्यन्निव देवदेवः|| ४१||
SP1059999: इति स्कन्दपुराणे पञ्चोत्तरशतो ऽध्यायः||